iBMW 523

[deblabolbol80]

السلام عليكم و رحمة الله و بركاته
الحمد لله أنا مبسوط أني لقيت المنتدي ده يا جماعة ماشاء الله عليكم
حقولكم علي ملخص تجربتي مع الالماني و محتاج نصيحتكم ضروري
أنا كان معايا مرسيدس c180 كومبريسور 2006 و عشان ظروف الشغل اضطريت أني ابيعها غصب عني و دورت كتير علي حاجه تخليني قرب القوة و الرفاهية فلقيت ال بي ام دبليو بس ال 523i Model 1998 بسعر مغري 95000 بس أنا لسه معرفش إيه نظامها في قطع الغيار و الصيانه و الاستهلاك
الرجاء يا شباب المساعدة بنصيحة او معلومات تفيدني عشان أنا عايز اخلص في العربية
علي فكرة أنا جربتها ماشاء الله
معلش طولت عليكم

[party_0000]

بالتوفيق وان شاء الله الاعضاء اللي معاهم العربيه يفيدوك

[inspiron]

خليني أوضح لحضرتك حاجة الأول..هعلق علي جملة دورت علي مقاربة للـ c180 عشان القوة والرفاهية.

الـ e39 لا تقارن بالـ c180 . لأن الـ e39 أحسن طبعا
موتور 2500 سي سي 6 سلندر 172 حصان
لا يقارن بموتور 1800 سي سي 156 حصان

ورفاهية الـ e39 تتفوق علي c180 لأنها أعلي في الـ options منها
الراحة في الـ e39 تتفوق علي c180 لأنها قاعدة العجلات فيها أكبر وصالون أكبر وأفخم طبعا.وعفشة أحسن

الشكل الخارجي أذواق...ولكن وقف العربيتين جنب بعض وقارن بينهم كده وقولي رأيك من حيث الشكل والحجم.

ليه بقي أنا بقول لحضرتك الكلام ده...عشان متحسسش نفسك بالندم إنك نزلت من c180 لـ e39
لأنك يا عزيزي بإقتنائك إن شاء الله ليها هتلاقي نفسك عليت مش نزلت بصرف النظر عن السعر.لأن البي إم سعرها أقل بسبب ثقافة الشعب ليس إلا.تقبل مروري وراجع مواضيعي عن العربية دي

أنا عربيتي بالمناسبة 523i e39 2001

[party_0000]

عاش يابي اماويه عاش

[deblabolbol80]

باشا اشكرك علي ردك بالسرعة دي
انا ماقصدش اني نزلت بالمستوي و لكن نزلت بالموديل
انا فاهم يعني ايه الماني و مش اي الماني بس خليني اكون صادق معاك انا طول عمري مركز مع المرسيدس و عايز اقولك اني لما جربت البي ام كانت اول مرة اسوق فيها بي ام اصلا بس الصراحة حسيت برفاهية غير عادية اكتر من ال c180 بس انا خايف من النمر بتاعة قطع الغيار و الحساسات و كده يعني
ارجوك فيدني بما انك معاك واحدة
وشكرا

[inspiron]

باشا اشكرك علي ردك بالسرعة دي
انا ماقصدش اني نزلت بالمستوي و لكن نزلت بالموديل
انا فاهم يعني ايه الماني و مش اي الماني بس خليني اكون صادق معاك انا طول عمري مركز مع المرسيدس و عايز اقولك اني لما جربت البي ام كانت اول مرة اسوق فيها بي ام اصلا بس الصراحة حسيت برفاهية غير عادية اكتر من ال c180 بس انا خايف من النمر بتاعة قطع الغيار و الحساسات و كده يعني
ارجوك فيدني بما انك معاك واحدة
وشكرا

يا سيدي الفاضل متخافش من حاجة..والله العربية دي سمعة قطع الغيار فيها مظلومة جدا لأن بيتحكم عليها كده سماعي ومن ناس مركبتش أصلا بي إم قبل كده..قطع الغيار في الحرفيين منتشرة جدا وبأسعار في متناول اليد إلي حد ما..علي سبيل المثال.العفشة كاملة ورا من غير المساعدين بـ 1700 جنيه ( مقصين بالجلب وسوست وبيض مقصات وإكسين ) ده مثال بسيط.
الحساسات والكلام ده مش زي ما حضرتك متخيل.ولكن....أهم شئ وإنت بتدور علي العربية دي لما تلاقي واحدة تعجبك تدور الموتور وتبص علي لوحة العدادات كلها.لو لقيت أي لمبة منورة ومطفتش يبقي حاجة من الإتنين.يا تصرف نظر عنها يا تاخدها التوكيل تكشف عليها ويعملولك تقرير عنها.عشان لو لقيت حاجة مثلا زي ( لمبة الإيرباج - لمبة الabs - لمبة الشيك إنجين - لمبة traction control - لمبة الفتيس ) دي كلها حاجات تقلق.وحتي لو لقيت الدنيا زي الفل ومفيش لمبة منورة ثابته بردو تتأكد بإنك تستعمل الفحص الذاتي بتاع العربية وده بيتم عن طريق إنك تدوس علي زرار في العدادات ويكتبلك علي الشاشة check control ok لو دي ظهرت يبقي كده تمام.لو ظهرلك بقي check أي حاجة يبقي تكشف عليها علي طول.

[amr3elrouby]

الملكة e39 هى من اسباب ارتفاع سمعة البى ام فلو العربيه سليمه اعتمد وتوكل وصدقنى مش هتركب غير البى ام بعد كده

[deblabolbol80]

ربنا يسهل يا شباب
انشاء الله أنا اديت للراجل ميعاد علي بعد بكره انشاءالله بس خليكوا معايا في الاستفسارات عشان و الله اعلم لما جربتها كان في تتين لمبة منورة في التابلوة بتاع العدادات بس عشان أنا مش ركيب بي ام مفسرتش غير يمكن الairbag علي العموم حديكوا تقرير مفصل بس أبقوا أفيدوني
و شكرًا

[maskeen]

لازم لازم تاخدها لميكانيكا متخصص يفحص الاساسيات:
-كبس الموتور وهل اتعمله اى عمرات ام لا
-الفتيس وهل اتلعب فيه او فيه اى تفويتات ام لا
-العفشه حالتها ايه ؟ (مقصات ومساعدين وكل الكلام ده) ..هل فيهم حاجه محتاجه تتغير قريب

وطبعا لازم سمكرى متخصص يقولك الشاسيه سليم ولا لآ

وبعد كل ده صللى استخاره واذا لقيت نفسك بعدها مش مرتاح يبقى انسى حتى لو نفسك هاتطلع عليها

[BMW5260]

ليه مالكين الموديل ده مابيعملوش موضوع عن أسعار قطع الغيار لأني كنت عايز أجيب e36 و عرفت إنها ضيقة نسبياً ومش عائلية قوي وبعدين أنا مش لاقي حالة شاذة ،،،،، بس أنا حابب آخد فكرة جايز أتشجع وأحول على e39

[TOOLA]

متابع و فى انتظار النتائج (بالتوفيق ان شاء الله), و صحيح اخبارك ايه يا inspiron, ان شاء الله يكون كله خير.

[inspiron]

متابع و فى انتظار النتائج (بالتوفيق ان شاء الله), و صحيح اخبارك ايه يا inspiron, ان شاء الله يكون كله خير.

الحمد لله يا باشا إنت أخبارك إيه

[pepsi007]

توكل علي الله و متقلقش و اهلا بيك في نادي البيمرز

[TOOLA]

الحمد لله يا باشا إنت أخبارك إيه

تمام الحمد لله و كلو ماشى, بفكر اغير بس مكسل و مش عارف ارسا على موديل بعينه, ربنا يسهل, عموما احتمال ابعتلك على الخاص قريب لزوم شوية استشارات :), و ربنا يكرم

[E30power]

لو حالة نضيفة ومتبعينلها صيانتها ...توكل على الله وعمرك ما هتندم ..

الفرق الى ممكن يحسسك بالفرق استهلاك البنزين وليس اكتر ولا اقل