مساعده في شراء اي 30

[the_wheel_man]

السلام عليكم
هذه اول مشاركه في المنتدي منذ سنين فأتمني انك تفدوني
المهم في عربيه بي ام e30 كانت معروضه علي النت كوبيه 2500
و صاحبها معدلها علي شكل العربيه البي ام بتاعت need for speed most wanted
و هي عربيه مشهوره شويه و صاحبها قايل انها 200 حصان و عفشه رياضيه و جنوط 17 يباني
و ممكن يكون حد من حضراتكم شافها
المهم انه عارضها علي 50 الف و مش راضي ينزل حاجه خالص
السؤال هنا هل السياره تستحق فعلا هذا الثمن ؟
و حاجه اخري انا شفت فيديو ليها و هيا بتخمس donuts و بيتعمل بيها burn outs
فهل الاتنين دول بيأسروا علي الموتور و حاله العربيه و لا لا و مش مشكله الكوتش
و جزاكم الله خيرا

[A7medHeaders]

طبعا إوعا تشتريها .. أولا العربيات الكوبيه 90% منها بتبقي نصين (أقصد الـ بي إم ) .. وموضوع التخميس ده أساسا يخليك تصرف نظرك عنها لأن المحرك هيبقي هلكان ده غير المصايب اللي ممكن تكون حصلت للشاسيه نتيجة اللي بيعمله .. شوف واحدة غيرها وممكن تعدلها زي التانية لو عاجباك .. وربنا يوفقك

[mik_e30]

لو الي تقصدها لونها ازرق في فضي وفيها جنوط وسبولير خلفي
العربية دي تحفة بجد واعرف صاحبها
بجد مفيهاش غلطة لو هي الي بقولك عليها

[sheko_2000eg]

السلام عليكم
هذه اول مشاركه في المنتدي منذ سنين فأتمني انك تفدوني
المهم في عربيه بي ام e30 كانت معروضه علي النت كوبيه 2500
و صاحبها معدلها علي شكل العربيه البي ام بتاعت need for speed most wanted
و هي عربيه مشهوره شويه و صاحبها قايل انها 200 حصان و عفشه رياضيه و جنوط 17 يباني
و ممكن يكون حد من حضراتكم شافها
المهم انه عارضها علي 50 الف و مش راضي ينزل حاجه خالص
السؤال هنا هل السياره تستحق فعلا هذا الثمن ؟
و حاجه اخري انا شفت فيديو ليها و هيا بتخمس donuts و بيتعمل بيها burn outs
فهل الاتنين دول بيأسروا علي الموتور و حاله العربيه و لا لا و مش مشكله الكوتش
و جزاكم الله خيرا

بص يا باشا
العربية دي بتاعت حسن جاكسون
العربية فيها كمية تعديلات لا حصر لها
العربية متعدلة GTR و المكنة 2500 سي سي
العربية فابريكة جوة و فتيس رياضي كامل
انا مش هبيعهلك لكن انا اعرف كويس العربية ديه
و العربية مش نصين و لا حاجة زي ما الناس بتقول -- لانها ببساطة لو نصين مكنيتش استحملت تخميسة واحدة و كان زمنها فتحت من بعضها

صالونها ممتاز جدا -- و من الاخر كده العربية دي اللي هياخدها مش هيعدل اي حاجة
لكن لو انت عايز عربية عشان تمشي بيها و خلاص يباه متجبش العربية ديه لان العربية متدعلة تعديل ممتاز جدا فانت مش هتقدر عليها لانها من البي امات اللي بتحب الجري و الفرك لانها متعدلة لكده ----
اخيرا لازم تباه عارف ان البي امات اصلاً مصممة لانها تستحمل الدريفتات و الخمسات -
تصميمها بانها تكون جر خلفي هو سبب عدم اصابة اي جزء بالشلل في المجهود بتاع الدريفت او التخميس - لانها بالبلدي كده مفيهاش كبالين امامية ممكن تفك او تتكسر ---
اخر حاجة انا مليش مصلحة في الموضوع ده لكن انا شايف العربية سعرها كويس بالنسبة للشغل اللي فيها .
و لو عايز تتواصل مع صاحب العربية و معانا كا بيميرز ايجيبت تعالي علي الجروب بتعنا
تنورنا و هتلاقي اكتر من عربية معروضة للبيع

Welcome to Facebook - Log In, Sign Up or Learn More

[mik_e30]

ياسلاااااااااااااااااااااااااااااااااااام معلم من يومك ياحضرت المنسق المحترم شيكو :)
اللة ينور

[the_wheel_man]

جزاكم الله خيرا علي الردود
و هيا فعلا العربيه بتاعت حسن جاكسون المتعدله جي تي ار
و سامحوني انا مليش في البي ام اوي بس بحبها و الي الشكل القديم ده بتمني اجيبه من زمان
و انا تواصلت مع صاحبها
بس سؤالي ال 50 الف تستاهلها العربيه دي ولا لا
و ان شاء الله لو قدر و رحت شفتها ياريت لو حد يعرف مركز صيانه يعني يكشفلي علي اداء الموتور و الحاجات الي فيها
لاني اخر عربيه اشترتها 131 العربيه من بره بسم الله ماشاء الله و بعد مارحت اغير السيور فتحت بطنها جامد
و رحت اظبط العفشه غيرت مقصين و علبه دركسيون و عايزه 4 سوست
فا انا متعقد شويه
فا انا الي عايز اشوفه هو مدي اداء الاجهزه الي في العربيه يعني موتور و عفشه و الحاجات عشان لو في حاجه تبقا في الحسبان
فا ياريت لو حد من حضراتكم يعرف مركز يفحص الحجات دي يبقا جزاه الله خيرا

[mik_e30]

بس العربية عالي معمول فيها سعرها جميل اوي لان في ناس بتطلب علي عربيات مش متعدلة اسعار قريبة اوي بس للامانة هقولك حاجة
العربية موتورها كبير اوي اوي
يعني ضريبة 1500 في السنة وبنزينك بقي هتعيش فية براحتك بس في المقابل هتلاقي نفسك راكب طيارة مش عربية
وبالنسبة لل31 ياريت تكلمني عالخاص لاني عندي استفسارات بما انك دخلت في حوار تصليحها وكدا

[the_wheel_man]

هو صاحبها قايل انها مثبوته ع الرخصه 2000 و الموتور بتاعها في حاجه مش فاكرها بيستهلك في 200 ك صفيحه
بس سؤال برضه محيريني
مدام العربيه جامده كده و سعرها معقول ليه متباعتش لحد دلوقتي دي معروضه من السنه الي فاتت؟
و انا تحت امر حضرتك في موضوع 131
حضرتك اسأل الي عاوز تعرفه و لو عارف هساعدك بأذن الله لو مش عارف !!!!

[mik_e30]

لا ياعم انا اعرفة شخصيا انا كنت معاة في الجروب
دا لسة كان بيسالنا من يومين ابيعها ولا لا
الاعلان القديم دا كان عارضة زمان ونفض لفكرة البيع ودلوقت رجعلها تاني وبيدور علي واحدة بردو e30 وهيشدها من اول وجديد تاني
وهكلمك عاخاص بخصوص ال 31

[the_wheel_man]

نرجو من حضراتكم القول النهائي في سياره جاكسون
اكلمه ولا بلاش
كلمه واحدة

[sheko_2000eg]

اشتريها واتكل علي الله
و اي بنزينة هتقيسلك كبس الماتور
بالنسبة للعفشة اي عفشجي هيقولك اولها و اخرها
ربنا يوفقك

[hanyhosney]

طبعا زي ما كل الزملاء قالوالعربيه بتاعت جاكسون وهو عامل جروب علي الفيس جاكسون جي تي ار
انا ممكن اجاوبك ليه ما تبعتش
عشان هو صارف كتير اوي
والسعر ال حاطه بالعافيه مايخسروش
اكتر من ال خسره
وهودهاسمه بيع غناوي يعني جابت كده بايع مجبتش اهي موجوده
المشكله في نقطتين
اولا هو رخصها علي انها 2000
انت هتعرف تعمل كده ولا لا وايه رد فعلهم فيالمرور لما يعرفو الحوار ده لو اكتشفوه؟
ثانيا هي مترخصه انهيلون ولا ده استيكر؟
علي فكره انا فكرت فيها ونا بدور
وزي ما قالك شيكو التخميس والكلام ده مش مهللك
علي فكره صاحب العربيه مهندس ميكانيكا طيارات
وفاهم بيعمل ايه
لو اشتريتها انا لي لفه وش

[the_wheel_man]

جزاكم الله خيرا علي ردودكم المفيده جدا
و بالنسبه لموضوع اللون هو كان كاتب في الاعلان انها مترخصه لونين
و غير كده لو قدر الله و شفتها ابقا اعمل كشف علي موتور و عفشه ولو حلوه علي بركه الله
بس الي انا ملاحظه لو العربيه موتورها و عفشتها حالتهم كويسه هيبقا سعرها الحالي كويس مش غاليه
و مش رخصيه لدرجه الخساره
سعرها معقول
و الله الموفق

[waleed_sat]

باشا ..... فى مثل بيقول

الغاوى ينقط بطقيته

بمعنى .... لو إشتريتها لازم تضع فى الإعتبار إنك متفكرش تبعها ... خاصة

إنها 2 باب موديل 84 ومهما كان صاحبها معدل فيها حتى لو بتقول بابا وماما لها سعر

معين لا تتعداه . وبعيد قوى عن السعر المعروض

أنا لو منك أدور على عربية ستوك أساسيات سليمة 4 باب وأنت براحتك ربيها على

إيدك .... تغير مكنة ... كورونا لوك .... عفشة رياضية .... إلخ

هذا رأيي بمنتهى الأمانه مع تقديرى لجميع آراء الإخوة الأحباب