بي إم e30 موديل 90 و للا هوندا سيفيك 92 ؟

[tsaid]

السلام عليكم يا رجالة
أخيرا و بعد أكتر من 6 شهور علي سرقة عربيتي (سيفيك 90 ex) عملت جمعية و هقبضها خلال أيام إن شاء الله
هيبقي معايا في حدود 45000 جنيه إن شاء الله و محتار اجيب سيفيك 92 ex أوتوماتيك (أنا مش عارف المبلغ ده ممكن يجيب si و للا لأ) وللا أجيب بي إم 316 موديل 90 أوتوماتيك
الإثنين سواء سيفيك 92 ex أو si و البي إم e30 فيهم كل الأوبشنز من زجاج كهرباء و باور و أوتوماتيك و فتحة سقف و stability رهيب و سرعة و إعتمادية و نعومة
أنا أكتر حاجة تهمني في العربية الثبات و قلة الأعطال
و فيه ميزة نسبية للهوندا إني عارف الميكانيكية بتوعها و عارف بتوع قطع الغيار إنما بالنسبة للبي إم فطبعا معرفش عنها حاجة
و طبعا عايز أعرف رأيكوا بكل حيادية و ياريت اللي يقول راي يقول الأسباب كمان يعني يقول ليه هوندا أو ليه البي إم
و جزاكم الله خيرا

[M.Ayman]

كنت هقولك بما انك عملت الموضوع ده فى قسم البى ام دبليوم فدى اشاره الى انك ميال ليها اكتر ,,, بس بما انك عامل الموضوع نفسه فى كلا القسمين فانت فعلا عايز الحياديه و بتدور على الافضل
_________________________

طيب اولا العربيتين ماشاء الله من افضل العربيات الشبابيه فى مصر من حيث كل شيء ,,,, بس انت اللى فى ايدك تقرر تختار بين الجر الامامى و الخلفى و كله له مميزاته و عيوبه

يعنى مثلا الثبات فى الخلفى اعلى و لو لا قدر الله حصل اى حاجه مفاجئه لمها فى الخلفى ممكن اما فى الامامى بيبقى صعب فيعنى الثبات فى صف البى ام + انها من اول موديلاتها مقسمه الوزن بنسبة 50% الى 50 % واللى حتى مرسيدس معرفتش توصلها لحد اخر موديلاتها فده بيديها ثبات اضافى فى المنحنيان و الغرز و كده

التسارع طبعا بيمتاز بيه الجر الامامى عن الخلفى و برضه التوفير فى البنزين الجر الامامى يكسب

لو على التعامل بقى و قطع الغيار البى توافرها و اسعارها يفيدك اكتر ملاك ال e30

كشياكه فهى اذواق مع انى بصراحه لو شفت قدامى عربيتين متظبطين واحده 30 و التانيه سيفيك اكيد ال 30 هتشدنى اكتر

كقلة اعطال كل القديم عايز صيانه دوريه و موتور نضيف يعنى لو اشتريت عربيه موتورها كويس و واظبط على السرفيس بتاعه اكيد مش هتقرفك الا فى اوقات نادره ان شاء الله -و برضه ممكن ملاك العربيه يأكدوا كلامى او ينفوه -

لو دريفتات طبعا مش محتاج اقولك البى ام يعنى ولو انى مظنش انك دماغك فى الموضوع ده بدليل انك عايز ترتاح و تجيب اوتوماتيك

انا مش فاكر ايه تانى اوجه مقارنه بين العربيتين و ان شاء الله ربنا يوفقك للاختيار الافضل

[fahd_628]

قلة اعطال + نعومة = هوندا !!!!

بس الصراحة كعربية تسوقها !!! ال e30 جميلة بس اهم حاجة تكون 6 سلندر علشان تستمتع بيها

و بالنسبة للنعومة فى الحالة دية فا ال e30 بال 6 سلندر انعم و اقوى

مفيش كلام

[Eng_Mostafa_89]

التسارع طبعا بيمتاز بيه الجر الامامى عن الخلفى و برضه التوفير فى البنزين الجر الامامى يكسب

بعد اذن صاحب الموضوع اوضح بس النقطة دى
التسارع بالنسبة للجر الامامى افضل واسرع فى بداية الطلعة وعلى السرعات القليلة ودة علشان قلة الاجزاء والوصلات الميكانيكة فطبعا كفائة النقل بتكون اعلى من الجر الخلفى
انما فى حالة الدفع الخلفى الاجزاء والوصلات الميكانيكية اكتر فالكفائة اقل وبالتالى التسارع اقل فى الطلعة وعلى السرعات المنخفضة انما على السرعات العالية التسارع افضل بكتير جدا من الجر الامامى ودة علشان وزن العربية بيترحل الى الخلف فيضغط على المحور الخلفى وبيحسن تلامس الاطارات على الارض فبتكون جوة الجر كبيرة للعربية انما فى حالة السرعات العالية للجر الامامى الوزن على المحور الامامى بيقل فبيكون تلامس الاطارات مع الارض مش كبير فبيكون التسارع قليل
اتمنى انى اكون قدرت اوضح وافدتكم

[M.Ayman]

قلة اعطال + نعومة = هوندا !!!!

بس الصراحة كعربية تسوقها !!! ال e30 جميلة بس اهم حاجة تكون 6 سلندر علشان تستمتع بيها

و بالنسبة للنعومة فى الحالة دية فا ال e30 بال 6 سلندر انعم و اقوى

مفيش كلام

+1111111111 فعلا ال 6 سلندر فى البى ام حاجه تانيه بتستمتع بالثبات و الاداء حاجه ماشاء الله

[M.Ayman]

بعد اذن صاحب الموضوع اوضح بس النقطة دى
التسارع بالنسبة للجر الامامى افضل واسرع فى بداية الطلعة وعلى السرعات القليلة ودة علشان قلة الاجزاء والوصلات الميكانيكة فطبعا كفائة النقل بتكون اعلى من الجر الخلفى
انما فى حالة الدفع الخلفى الاجزاء والوصلات الميكانيكية اكتر فالكفائة اقل وبالتالى التسارع اقل فى الطلعة وعلى السرعات المنخفضة انما على السرعات العالية التسارع افضل بكتير جدا من الجر الامامى ودة علشان وزن العربية بيترحل الى الخلف فيضغط على المحور الخلفى وبيحسن تلامس الاطارات على الارض فبتكون جوة الجر كبيرة للعربية انما فى حالة السرعات العالية للجر الامامى الوزن على المحور الامامى بيقل فبيكون تلامس الاطارات مع الارض مش كبير فبيكون التسارع قليل
اتمنى انى اكون قدرت اوضح وافدتكم

فعلا ده قصدى بس عموما الناس بتهتم بالطلعه لحد بدايات السرعه العاليه علشان غالبا هى دى استخدامه لو بيمشى فى البلد طبعا بيبان جمال الخلفى على الدائرى مثلا او طرق السفر المفتوحه

[mada_diab]

1600 يبقي هوندا غير كده فى اى حاجة تانية ال 30 تكسب ماعدا الصالون ضيق شوية