تحذير لكل واحد بيحط حاجته في الكونسول

[ahmed.hashem]

يا ريت يا جماعه كل واحد بيحط الموبايل و المحفظه فى الكونسول او الدرج اول ميركب و بيستعمل البلوتوث او الهاند فرى يبطل يعمل كده و يخلى الحاجه في جيبه احسن عشان لو لا قدر الله حد بيثبتك و اخد العربيه تعرف تكلم حد يجيلك او الشرطه.

للاسف واحد من اصدقائى وقفوه امبارح و اخدوا العربيه و طبعا الموبايل و المحفظه كانوا فى الكونسول و فضل واقف على الصحراوي لحد ٦ الصبح لما عربيه الشرطه بتاعه تامين الطريق كانوا معديين و شافوه بس طبعا الحراميه كانوا مشيوا بقالهم اكتر من ساعه فمعرفوش يجيبوهم .

ربنا يستر علينا كلنا خصوصا اللى بيسافروا فى اوقات متاخرة

[al_manara]

جزيت خيرا علي النصيحة
ربنا يستر طريق الجميع

[h.c.ronaldo]

ربنا يااارب يرجعاله يااارب وي شكرا على النصيحه ياباشا

[lanos2004]

السؤال وقفوة ازاى على الصحراوى انا على الصحراوى دايما فى اوقات متاخرة جدا-وفى عز ايام الثورة ولم اجد شىء غريب او مريب

[SYD]

شكرا علي النصيحة

[HOSSAM99]

قدر الله و ما شاء فعل .. و شكرا علي النصيحه
أغرب شئ علي الصحراوي مش التثبيت لأ ... عربيات التأمين اللي بتمشي أول ما الدنيا تليل !!!!

[moh19227]

طبعا كلوا يخلي بالو اليومين دول علشان الداخليه مشغوله اوي في المظاهرات
وربنا يستر

[S O P H O S]

الامن مش مشغول الامن مفقود
مجرد راي ..

[lanos2004]

دايما بحس ان المواضيع دى مش كلها طبعا بعض منها وراها لغز وانها غير طبيعيه
ربنا يستر علينا جميعا ان شاء الله

[M.ADEL KAMEL]

صحراوى ايه بس يا جماعة اللى عليه تأمين .....طيب اناهاحكيلكم على حاجة حصلت قدام عينى .....
من حوالى سنة او اكتر بشهر او اتنين بالتحديد فى الموسم الكروى الفائت و اللى كان فيها كارثة بورسعيد و اللى كنت شاهد عيان عليها ... المهم كنت مسافرالاسكندرية انا و زملائى لتصوير مباراة نادى الاتحاد و الاهلى ....تحركنا من امام التليفزيون حوالى الساعة ١١ صباحا و خدنا طريقنا و عدينا الرست هاوس ووصلنا على مشارف الاسكندرية عن مصنع السكر اللى على الطريق تقريبا الكيلو ٤٥ كانت الساعة ما بين١.٣٠ و ١.٤٠ ظهرا و فجاءة واحد زميلنا بيقولنا "بصوا ياجماعة " كل انظارنا اتجهت ناحية مابيشاور و هو الاتجاه الاخر من الطريق كان فى مطب واقف بعده بعد المطب على شمال الطريق عربية نص نقل ماركة شيفروليه دبابة وواقف جوا الصندوق واحد ماسك بندقية الية موجهة لركاب السيارات اللى واقفة امام المطب و مستنية تعدى و ناس تانية (لم الاحظ شخصيا إذا كان معاهم سلاح او لا) بتاخد متعلقات اصحاب العربيات و ركابها و اكيد (و هذا لم الاحظه ايضا ) كانوا بياخدوا المجوهرات و ما الى اخره من نفائس... المهم كل ده و احنا بنتفرج مذهولين ازاى دا يحصل فى عز الظهر و فى طريق زى ده .... المهم اتخذنا قرار ان احنا مانقفش حتى علشان موازين القوى هاتبقى غير متكافئة و خاصة ان معناش اى نوع من السلاح و قررنا ان احنا ندخل على الكمين اللى بعد البوابات و نبلغ يمكن يلحقوا يعملوا حاجة و السواق زود سرعته علشان نلحق نعمل ده ..دخلنا البوابات و عديناها و دخلنا جوا الكمين قدام باب المبنى بتاع الضباط ( مع العلم الكمين ماكانش فى حد واقف فيه اصلا و عربية شرطه بوكس كان فيها امين شرطة و عساكر كانوا بيهرجوا و اللى عارف كمين مدخل اسكندرية عارف انه علطول شغال و صعب جدا وممكن يعطل الطريق لفترة وقت كبيرة ) و دخلنا على الظباط اللى هناك قابلنا ملازم اول بملابس الشرطة الرسمية و قالنا "خير آمروا " رد كبيرنا " احنا مديرو التصوير بالتليفزيون و كنا فى طريقنا لتصوير مباراة الاتحاد و حصل كذا و كذا و سرد الموقف سريعا " رد الضابط الشاب "طيب مكتب المباحث على اليمين " دخلنا على الضابط الشاب ايضا بملابس مدنية و حكى كبيرنا الموقف تانى فدخل احد الاشخاص فوقف الضابط الشاب و حكاله على اللى قولناه فسألنا فين الكلام ده فرد احدنا عند مصنع السكر فقالنا طيب احنا هانتصرف ...عن نفسى حسيت بخيبة امل كبيرة و استنينا لما الضابط الكبير خرج و سألنا هاتروحولهم قالنا اه و تقريبا اتكلم فى اللاسلكى و خدنا بعضنا و مشينا و ركبنا عربية التليفزيون و اتجهنا للاستاد بخيبة امل و انا متأكد انهم ماعملوش حاجة لأنهم خايفين من الاشتباك المباشر مع المجرمين

[ayman2]

يا نهار أسود أنا كنت فاكر ان الصحراوى أمان وأحسن طريق ممكن تسافر عليه بعد الثوره .... لابد من تطهير الداخليه

[M.ADEL KAMEL]

الامان دى كلمة اتلغت من قاموسى انا على الاقل يا استاذ ايمن و اعتقد من قواميس ناس كتير

[محمدصلاح]

فعلا موضوع يقلق جدا خصوصا ان المجرمين دول بقوا بيتفننوا فى طرق توقيف العربيات على الطريق
بس برضه صاحبك كان ماشي متأخر أوى أوى يعني

أنا دايما لما بأبقى ماشي متأخر كده بأصطاد تريللة محترمة كده يكون سايقها راجل كويس وبأطفيله النور وأمشي وراه .. بتديك أمان شوية

[M.ADEL KAMEL]

المشكلة ان فى مئات الجرائم بنفس الشكل ده و الضحايا مالهمش معين غير ربنا سبحانه و تعالى و هو نعم المعين