320 موديل 2006

[M_Elhendawi]

مساء الفل على احلى منتدى و كل سنة و انتم بكل خير ...
قدامي 320 بدون فتحة سقف او اي درايف موديل 2006
ماشية حوالي 90000 فابريكة برة وجوة
مطلوب فيها 160000

ايه رأيكم حاسس انها تنزل شوية مش كتير ..
و ايه رأيكم في الموديل .. هل فيه مشاكل معروفة
و يا ترى اي رينج اسعار قطع الغيار بتاعتها

و الاهم .. طبعا انا حاكشف عليها كلها .. بس هل في حاجة ضروري ابص عليها بشكل معين؟؟

معلش انا طولت عليكم بس انا اول مرة اتعامل في البي ام دبليو .. و مش عايز رغبتي الشديدة فيها تخليني ماخدش بالي من حاجات مهمة .. خصوصا اني لو ربنا اراد ان شاء الله .. حاشتري بقرض اسدده اقساط للبنك .. بدل ما اشتري حاجة زيرو تكون كوري او ياباني ضعيف قسط برضة ...

و شكرا جزيلا على وقتكم و اهتمامكم

[broadband]

افضل حاجة هى التوكيل علشان يجيبلك تاريخ العربية و هى في اللفة

[eng wael]

رغم ان مشاركتى بعيده عن لب الموضوع بس ابعد عن القرض
وربنا يباركلك فى الشراء

[mi22do]

انا شايف السعر ممكن ينزل 5 الاف كمان .
فيه طريقة سهلة لمعرفة سعر BMW 320 i - جربها كدة و هتلاقي شغاله كويس .
موديل 2006 = 160 الف
موديل 2007 = 170 الف
موديل 2008 = 180 الف
موديل 2009 = 190 الف
موديل 2010 = 200 الف
و طبعا دة للحالة الممتازة و عداد قليل. (+ و - ) 15 الف

[M_Elhendawi]

شكرا جدا يا جماعة على الردود

ان شاء الله اقولكو على التطورات ..
بس في واحد قالي ان في مشكلة في فتيس الموديل ده و مش عارف ده كلام صح ولا فتي المصريين المعتاد .. لو حد عنده معلومة ياريت يشارك بيها .. و شكرا جزيلا يا جماعة ....

[novo]

مساء الفل على احلى منتدى و كل سنة و انتم بكل خير ...
قدامي 320 بدون فتحة سقف او اي درايف موديل 2006
ماشية حوالي 90000 فابريكة برة وجوة
مطلوب فيها 160000

ايه رأيكم حاسس انها تنزل شوية مش كتير ..
و ايه رأيكم في الموديل .. هل فيه مشاكل معروفة
و يا ترى اي رينج اسعار قطع الغيار بتاعتها

و الاهم .. طبعا انا حاكشف عليها كلها .. بس هل في حاجة ضروري ابص عليها بشكل معين؟؟

معلش انا طولت عليكم بس انا اول مرة اتعامل في البي ام دبليو .. و مش عايز رغبتي الشديدة فيها تخليني ماخدش بالي من حاجات مهمة .. خصوصا اني لو ربنا اراد ان شاء الله .. حاشتري بقرض اسدده اقساط للبنك .. بدل ما اشتري حاجة زيرو تكون كوري او ياباني ضعيف قسط برضة ...

و شكرا جزيلا على وقتكم و اهتمامكم

الحاجات اللى بيحصل فيها مشاكل
كمبريسور التكييف
hard shift فى الفتيس و علاجها عن طريق سوفت وير
بص على علبة الدركسيون علشان لو الجلب مهرية ممكن تأثر عليها
العربية واطية فتأكد من أن الشكمان بالكامل سليم

[ahmed_alhadidy]

تبص كويس علي دوره التبريد ( طلمبه الميه والردياتير بالتحديد) تبص علي كومبريسور التكييف لانه بيبوظ بسرعه والسبب مش في الكومبريسور السبب بيكون دايما السربنتينه الداخليه بتتخرم وتبوظ الكومبريسور، بص علي العفشه الاماميه بالكامل جلب وبارات دركسيون ومساعدين وبطاحات، بص علي الموتور وشوف فيه تسريب ولا لا خصوصا من اويل سيلات الحساسات وجوان غطا التاكيهات، متركزش مع الهارد شيفت بتاع الفتيس لانه موجود في معظم ال e90 وحله بسيط، لو لقيت الحاجات دي كلها سليمه خدها بال160 ولو طلب اكتر كمان اديله عشان معظم اللي بيبيع دلوقتي بتبقي المشاكل دي ظهرت عنده فيلبسها للي بعده، هيا مش عيوب تصنيع ولكن كلها حاجات سرفيس بس بتكلف كتير، نصيحتي ليك اكشف كويس وركز مع الحاجات دي وموفق في الشراء ان شاء الله

[M_Elhendawi]

شكرا جزيلا .. بجد مشاركة رائعة