مشكلة في موتور الe36

[m.elQabbaney]

السلام عليكم ورحمة الله وبركاته
الإخوة أعضاء نايل موتور المحترمين بعد التحية
دي يا جماعة أول مشاركة ليا في المنتدى

الموضوع إن إشتريت e36 318is كوبيه موتور b42b18
كنت بسمع صوت طقطقه خفيف أول مشغّل العربية . غيّرت الزيت لموبيل وحاليا الصوت زاد في كل مرة تشغيل بعد ركنة
أنا الّي أعرفه إن الصوت ده ناتج عن التكيهات . أعمل ايه أغيّر الزيت بحاجه أتقل من موبيل ؟ تنصحوني بايه ؟
أروح للمdكانيكي يضبطهوملي ؟ أعمل سيرفس كامل ؟ هيتكلّف كام ؟
عندي كمان ميّة الراديتير بتقل كل فترة ؟ ده طبيعي ؟ يعني في الصيف كل إسبوع بزوّد مية خضرا !
علماً إن الموتور ستوك ومتلعبش فيه
شكراً

[Ahmed Amin]

وعليكم السلام ورحمة الله وبركاته, وأهلا بيك في المنتدي,,

الطقطقة مع الدوران ممكن تكون قواعد الموتور, ومش دايماً بتكون تاكيهات..

وموضوع إن المية بتقل دا ممكن تكشف غطاء الراديتاير والقربة,, أنا مش عارف ال e36 ليها غطاء رادياتير ولا غطاء قربة فقط,, بس الغطاء لو مش حاكم الضغط المية هتقل,
أو ممكن يكون عندك تسريب ولازم تراجع علي وتكشف علي وصلات الخراطيم وتشوف التسريب بيحصل منين,

بالنسبة للزيت عندك زيت وولف كويس وزيت شيل برضه كويس, وفعلاً زيت موبيل سئ جداً وحاول تغيرة في أقرب وقت.

[m.elQabbaney]

شكراً على سرعة الإستجابة والرد
حضرتك الصوت مش رجّه في الموتور . ده صوت تكتكه (تك تك تك إلخ) ولغاية مالموتور يسخن تختفي
أنا عندي خبرة قليله في المواتير بس متاكد إن الصوت جاي من الصبابات أو التكيهات . الصوت فوق في الموتور مش تحت
يعني على حسب خبرتي لإن العربية وهي مركونة الزيت الخفيف بينزل تحت . آجي اشغّل الموتور بيدور والزيت كذلك بعدها بشوية الصوت يختفي (بعد التسخين)
الّي قارفني إني بعد مغيرت للزيت ده صوت الموتور بقى ملحوظ مع إني كنت بسمع قبل التغيير صوت شكمان عالهادي (ستوك)
وحاسس إني بزُق العربيه مش زاي الاول بتجري لوحدها
الرديتير بدون غطا لكن فيه مخرج للضّغط وسليم ومبسرّبش . الغطا في القربة ونقص الميّة من القربة . مفيش تسريب لكن فيه تبخير . يعني مفيش نقط ميّة بتنزل من الراديتير أو الغطا (ايه ده أنا جاوبت على السّؤال : تبخير)
ايه سبب التبخير . الموتور بيسخن جامد

أعمل ايه . أحط زيت تقيل زاي الاول وكبّر دماغي ولا اشتغل في العربية ؟
وهل أي ميكانيكي مواتير بيظبط التكيهات ولا لازم متخصّص m . وهيتكلّف كام تقريبا ؟
مع الشكر

[Ahmed Amin]

السبب الرئيسي لتبخير مياة التبريد هوا غطاء القربة,, بأفتراض إن الدورة سليمة ومفهاش أي تسريب للمياة,
لأنه مش بيقدر يحكم الضغط لما الموتور والمية بتسخن,, فبتبدأ المية تتبخر لأن الكاوتش اللي فيه بيكون أتاكل,

فأكشف علي غطاء القربة الأول وغيره لو كان متهالك والكاوتشة اللي فيه متأكلة,,

بالنسبة لموضوع التكتكة, فأنا مش هقدر أفيدك فيه أووي,,
بس أنت كدا وضحك مشكلتك بالظبط, وإن شاء الله أي حد من اللي معاه دبانة بكرة يفيدك أكتر مني,

بس عموماً لو هتروح لميكانيكي يفضل يكون بتاع BMW عشان ميعكلكش في العربية,
وبالنسبة للزيت هيا مش بأنك تحط لها زيت تقيل ولا خفيف,,
الزيت بيتحط علي حسب عمر وكبس موتورك وعلي حسب الكيلومتر اللي هوا عاملة,,
بتشوف ساعتها هوا يناسبة زيت أيه ساعتها نص تخليقي ولا معدني,,

وممكن تبقي تكتب بيانات موتورك من موديل السنة بتاعت العربية وعدد الكيلوات اللي مشيتها ونوع الزيت اللي أنت حاطه حالياً وحالة كبس موتور عربيتك لو تعرفه, وأن شاء الله هيرد عليك حد من شركة ولف أو أستاذ كريم بالزيت المناسب لعربيتك.

http://www.nilemotors.net/Nile/375062-a.html

[m.elQabbaney]

تسلم إيدك والف شكر يا فندم . تعبتك معايا
بإذن الله هغيّر غطا القربة في أقرب فرصة (طبعاً بعد التدقيق والكشف على دورة الميّه كلّها)
منتظر أهل الخبرة في الرد على حكاية التكتكه
مع الشكر

[AlGazar2]

زى ما قالك العضو الفاضل بالظبط

و نصيحة غير زيت موبيل بشل او زيت معبأ فى الخارج و اسمع فرق الصوت بنفسك

زيوت موبيل سيئه للغاية

[Thebutcherr]

صوت التكتكة هو صوت البلوف اللي في التاكيهات بتكون تاكلت مع الزمن و لو اتغيرت هتحل المشكلة بس هتبقي غاليه , الحل متحطش زيت تقيل لانه هيبقى جهد اكبر علي البلوف و يمكن ده حصل بعد موبيل, الموضوع مش مقلق و لا معضلة و سيب العربية دقيقتين تسخن
موضوع المياه ببساطة محتاج تروح لحد يكبسلك دورة المياه و يشوف فيها تسريب من كوعة و لا ريدياتير و لا اي حاجة و ممكن تكون بسيطة ,كوليه عاوز يطربط , غطاء قربة كدة يعني

[m.elQabbaney]

شكراً يا رجّالة . بارك الله فيكم . بس موضوع الصوت بصراحة مدايقني وبيكسفني في كل مرّة بشغّل فيها العربية
مش مرتاح وعايز اعمله . هو نظام تربيط تاكيهات ولا فيه قطعه هتتغيّر ؟
طيب لو هروح للميكانيكي العربية هتكون سخنت والصوت هيختفي . المكانيكي ساعتها هيعرف العيب إزّاي ويعرف أنهي تاكي ؟ وهيقدّر شغله بكذا ولا هيقول نحل الاول ونشوف والموضوع هيفتح ؟
الّي اعرفه في الامريكاني تربيط وجوان ودمتم !

[Thebutcherr]

اقرا تعليقي

[m.elQabbaney]

تسلم إيدك يا سعادة الباشا . شكراً على التعليق . أفهم من كلامك إنو مش معضلة ! يعني ملاقيش يوم صباب ناططلي من التبلوه ومدّيني بالقلم وراجع تاني :)
قصدي الموضوع مش مقلق . أغيّر زيت مناسب بس (ومثال اتصل بشركة وولف) وهما الّي يحدّدو نوعية الزيت ؟
عندك فكرة لو هيتصيّن هيتكلّف كام تقريبا ؟
أنا ليا واحد صاحبي (براّ البلد) كان معاه كوفيت وكان عنده الصوت ده وكبّر دماغه وكان قارص عالدائري (280) . البستم خرج من كرتيرة الزيت . وده كان موتور شفرليه ls3

[max_ziro]

تسلم إيدك يا سعادة الباشا . شكراً على التعليق . أفهم من كلامك إنو مش معضلة ! يعني ملاقيش يوم صباب ناططلي من التبلوه ومدّيني بالقلم وراجع تاني :)
قصدي الموضوع مش مقلق . أغيّر زيت مناسب بس (ومثال اتصل بشركة وولف) وهما الّي يحدّدو نوعية الزيت ؟
عندك فكرة لو هيتصيّن هيتكلّف كام تقريبا ؟
أنا ليا واحد صاحبي (براّ البلد) كان معاه كوفيت وكان عنده الصوت ده وكبّر دماغه وكان قارص عالدائري (280) . البستم خرج من كرتيرة الزيت . وده كان موتور شفرليه ls3

مش للدرجة دى ياباشا هو بس الزيت وحش غيرة و حتى لو لقيت الصوت بعد التغيير كبر دماغك لحد ما الزيت يطلع راس المتور و بعد كدة اتحرك

[m.elQabbaney]

أنا زوّدت نص لتر على ال5 لتر الّي كانو في العربية . الصوت إختفى صبح وليل وأي وقت
سألت الميكانيكي قالي دي (معليش يا جماعة مش فاكر الإسم ايه بالظبط) الكستبانات . عربيتك مفيهاش تكيهات
لو عايز تعملها هتاخذ مني شغل 3 ساعات . مقالّيش هتتكلّف كام بس شكلها حل بيت الكامة وإحتمال تغيير شواكيش
واحد صحبي قالي كبّر دماغك وهات زيت تنظيف الموتور الّي بيشيل الوساخه وحط زيت نظيف وغيّر الفلتر وعالبركة
دلوقتي في مشكلة ظهرتلي وهي السبب في الّي حصل . عندي كرتيرة الزيت من ناحية الضبّه فيها شرخ وبترشح زيت
كنت بلاقي بقعة صغيّرة تحت العربية
تقريبا إتحكّت في مطب فتشرخت . الميكانيكي عملها مؤقّتاً بمعجون لحام معدن . بس تقريباً لازم أغيّر الكرتيرة

[tarbook]

بص يا سيدى لما تفك غطائ التاكيهات هتلاقى ماسورة نحاس رفيعة دى اغسلها بالبنزين اغسلها كويس اوى وسلك الفتحات الموجودة فيها علشان هى دى الى بتخلى الزيت ينزل على الشواكيش والبلوف والكوستبنات وممكن الحوار يتحل معاك وربنا كريم