استفسار عن كنترول وزينون عاليe90 وخاصة ل م. فرحات

[Karim_Monir]

السلام عليكم
عندي استفسار فني وخاصة لمهندس فرحات واللي يعرف يا ريت يجاوب
كنت واقف مع كهربائي بي ام وشكلة فاهم بيقوللي الزينون اللي انت مركبه في العالي ممكن يطير ال lcm
بيقولي ده كنترول
وبيقولي عشان العربية بتنزل مش مجهزة تنزل زينون عالي
بتتزل زينون واطي
بقولة ده الطقم اللي في العالي اوسرام اوريجنال
وبياخد 35 وات بس
قالي كلام نظري الواقع غير كدة
قولتلة بس انا مش بقلب بالزينون خالص بشغل بس
قاللي ده ممكنويطول العمر معاك شوية لكن برضه سهل الكنترول يبوظ
ده كلام صح ولا فتي
هل العربية مش مجهزة لدة
انا مبشوفش في السفر غير بالعالي زينون
بس في نفس الوقت الكنترول مش حاجة سهلة
شكرا لتعاونكم

[AlGazar2]

بص فى البى ام طالما العربية غير مجهزه لحاجة يبقى بلاش لان اى تعويره فيها مش سهله

و اعتقد ان فى العربيات الى الكنترول ليه علاقة بالانوار فيها بيبقى مع الزينون جهاز يمنع التأثير بتاع الزينون و يخلى الكنترول قارى انه لمبه هالوجين عادية و فاصل الاتنين عن بعض

[amz2011]

متابع

[mohamed_hamdi]

هل حضرتك وصلت لرأي في الموضوع ده يابشمهندس كريم و لا لسه؟. هل تركيب زينون للعالي مع وجود زينون اصلا في الواطي يعمل مشكلة للكنترول او لا.
جزيل الشكر

[farahat]

كريم باشا ، هو واضح إنه بيجتهد بس يعني الكلام لا يخلو من بعض "اللمسات الفنية الفهلوية " :)

أولاً الكنترول اللي هو LCM هو فعلاً بتاع تشغيل النور ، بس عربيتك مفيهاش أصلاً LCM ، عشان دة كان في ال-E46 ، في ال-E90 فيه مكانه الجيل الجديد FRM ودة مختلف في الوظايف وأكثر تعقيداً ، دي أول نقطة ،

ثانياً موضوع الزينون .. العربية مش بتنزل بزينون عالي مش توفير مثلاً ولا إن الشركة مش عارفة تعمله ولكن لسببين :

الاول فلسفي ويتعلق بإستخدام النور العالي أصلاً ، في أوروبا والدول المتقدمة النور العالي (High Beam ) بيستخدم لحاجتين ، أولهم إنه يستخدم على الطرق السريعة عشان يديك مدى رؤية بعيد وعلى سرعة عالية إلى حد ما ، والتاني إنه يستخدم كإشارة سواء للقادم في الطريق المقابل أو لأسباب أخرى حسب ظروف القيادة (اللي هو عندنا بنسميه الرعاش )

السبب التاني سبب هندسي وهو إن النور العالي بيرمي الشعاع بتاعه لمدى بعيد ، وعشان يعمل المادة البعيد دة لزم يعلي زاوية النور عشان يجيب range أكبر ، بس رفع الزاوية دة معناه انها هتيجي في مستوى رؤية السائق المقابل لو حد جه في وشك ، وبما إن الزينون أصلاً مبهر وممكن يسبب خلال في الرؤية عند السائق المقابل فمينفعش نستعمله في العالي.

طب الحل إيه .. في العربيات اللي بينزل فيها زينون أصلي في الواطي ذي BMW وخصوصاً لو فيها نظام ال-Bi-Xenoon بيكون الزينون نفسه فيها ليه درجتين درجة مع العالي ودرجة مع الواطي ، يعني في الواطي زينون فقط بينور مساحة كبيرة وضوء جيد بس بزاوية واطية (يعني يفرش الارض كلها نور أدامك بس مايجيش لفوق في عين السواق اللي أدامك )، ولم تجيب النور العالي بينور لمبة هالوجين لمسافة بعيدة ويعلي زاوية الزينون يبقى كدة إدالك نور عالي وزينون عالي .

لكن لو هتستخدمه بس في الترعيش بينور الهالوجين فقط ، عشان الزينون هندسياً مش معمول عشان يتولع ويطفي بسرعة (عشان أسباب كتير أعتقد قتلت بحثاً هنا في المنتدى ).

وعشان كدة الكشاف ال-Bi-Xenon الأصلي غالي عشان بيميز الحالات دي ويظبط نفسه ، ويعتبر كدة 3 كشافات جوة وحدة واحدة ، ودي حاجة ماينفعش تتعمل بمجرد تغيير اللمبة العادية إلى زينون .

نيجي بقى للكنترول ، الكنترول سواء ال-LCM أو ال-FRM معمول عشان يتحقٍ في الوظايف دي بالمنظر دة ، نظرياً مش هيفرق معاه اللمبة نوعها إيه المهم يكون متكود عليه صح نوع اللمبة عشان يعرف يشعل إيه امتى (ذي ما واضح الموضوع معقد مش مجرد on/off ، دة في حالة الزينون )

لكن لو كل القصة تغيير لمبة عادية بلمبة زينون ، مش هيفرق معاه كتير ، أهم حاجة بس سحب التيار بتاع الموديول يكون في نفس حدود اللمبة الهالوجين ، ومش هيفرق معه خالص رعاش ولا غيره ولا عالي ولا واطي طالما التيار هو هو أو قريب منه ، لكن الموديول نفسه ممكن يطير من الترعيش مثلاً والكونترول ولا هيزعل .

اتمنى أكون جاوبت على السؤال، وبدون تعقيد ، لو فيه أي توضيح مطلوب إسألو بس وأنا أجاوب (لو أعرف ) ان شاء الله

[Karim_Monir]

حقيقي باشمهندس فرحات مش عارف اقولك ايه علي الشرح السلس المبسط والوافي جدا ده
بجد تسلم ايدك
طبعا المعلومة وصلت بسلاسة كمان
وده اللي كنت متوقعه لان الموديول بيسحب 35 وات واللمبة بتسحب 55 وات ووظيفة الموديول انه يرفع من ال 35 للجهد المناسب للزينون لكن كلامه شككني فعلا لكنه مجتهد زي ما بتقول والفهلوة واضحة عندة
شكرا مرة تانية عالمعلومة الطيبة