سوال لاهل الخبرة بي ام 520 موديل 74

[ياسر علم]

فيه عربية بتاع واحد جارنا بي ام موديل 74 عمال يلعب فى دماغي اشتريها منه
هو راجل كبير فى السن وبيقولى العربية دى عشرة عمر وخصارة وخدها بالسعر الى انته عايزه
سالت ميكانيكى قالى ابعد عن البى ام وخصوصا موديل السبعينات مالوش قطع غيار
وان لقيت بتكون غالية نار
العربية مكتوب عليها 520 وهيا m10 وقالى كمان انها تعديل 84
وانا ماعرفش يعنى ايه تعديل 84
ياريت حد ينصحنى
اشترها ولا لا
بصراحة انا معجب بيها لانى من عشاق الالمانى
وان اشتريتها سعرها يعمل كام
وقطع غيارها ايه نظامه لانى مش حمل مصاريف زيادة
كفاية عليا مصاريف البيت والدروس
ومعلش لو كنت طولت عليكم

[ياسر علم]

انا اسف ده مودليها E12 520 Diagram Selection 1970

[hugan]

بعيد عن موضوعك
ارجو تعديل الصفه في البروفايل الخاص بك

[zezmograby]

عدادها كام ؟ واية نظام الخبطات والسعر ؟

[saddam]

صديقي المواطن
طبعا العربية دي أجدد وحده في الجمهورية ثمنها هو 22 ألف جنيه وطبعا هي عربية جميلة بس يعني تقدر تقول وقتها البي إم لسه مثبتش رجليه وإختار طريقه في السوق وعامة قطع غيار قليلة جدا بس حنوفق ليها متقلقش وموجود كمان في بورسعيد شوية حاجات ليها ولو إدهالك بحدود 13 ألف خدها غير كده سيبهاله وكمان عربية زي دي تتشد ويتحطلها جنوط وتحطلها لون حديث 2013'يفضل زيتوني ومينفعش تكون عربيتك الوحيدة لازم تكون معاك عربية سنيدة عشان متبهدلهاش دي مش لانوس وقطع غيارها مرطرطة
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[ياسر علم]

اولا انا متشكر جدا على الرد والسعر فى الحدود دى بس فهمنى
يعنى ايه يكون معايا عربية تانية
هى دي متتحملش سفر داخل مصر ولا ضعيفة
ولا علشان مصاريف قطع الغيار

[ياسر علم]

العداد قارى 190000

[fosta123]

http://en.wikipedia.org/wiki/BMW_5_Series_(E12)

[saddam]

اولا انا متشكر جدا على الرد والسعر فى الحدود دى بس فهمنى
يعنى ايه يكون معايا عربية تانية
هى دي متتحملش سفر داخل مصر ولا ضعيفة
ولا علشان مصاريف قطع الغيار

صديقي المواطن
مش مش تستحمل بالعكس هي أم اﻹحتمال ولكن لما تركب فانوس خلفي مستعمل ب 250 جنيه مثلا وتتعب عشان تلاقيه مش زي بتاع لانوس ب 10 جنيه وأي كفتجي يبيعهولك فإنت بتوضب وبتاخد وقت كتير في شد عربية للمزاج مش تقعد تهين بيها في الشارع ببساطة حتمل ومش حتلاحق عليها أنا عندي أنتيكات من أول موديل 58 وصدقني أحيانا بسافر ألف كيلو عشان أجيب مثلا أكرة باب ب 150 جنيه فمينفعش أروح بالعربية مشاوير تافهة زي العتبة والقصص دي لازم تكون هروجات مزاج وتفاخر وبرستيج ودلوأتي معروض كام عربية عليا عشان أنزل بالمستوى العمري لمجموعة عربياتي ومعروض عليا النهارده عربية 50 وعربية 60 وعربية 48 وعربية 36 وبحاول أجمع نفسي وأقنع أصحابها أشيل اﻷربعة بالقسط وأقنعنا واحد وفاضل 3 ونسأل الله الثبات دعواتك بالمناسبة فيه وحده بيضة أخت عربيتك راكنة في شارع عمومي في إسكندرية بين محطة الرمل ومحكمة إلمنشية

وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[ياسر علم]

بالتوفيق انشاء الله وعموما انا هتوكل على الله وان احتجت قطع غيار هكلمك