معايا 200 ألف عايز أركب بي ام .. أرجو النصيحة من خبراء الـ بي ام

[Dr.AmrElshreef]

لأول مرة هاركب بي ام ..
بصراحة المنتدى هنا خلاني أعشق ال بي ام جدا ..
فكرت أجيب جيب شيروكي 2007-2009 .. بس استهلاك البنزين بتاعها خلاني أنساها من حساباتي ..
فكرت أجيب كورولا زيرو .. أو لانسر أو أوكتافيا أو سبورتاج ..
بس بصراحة الـ بي إم عالم تااااني ..
دورت على دوبيزل لقيت حاجات كتير واعذروني انا معنديش خبرة خااالص في الالماني ..
لقيت فئة خامسة زي 525 موديل 2004-2006 في حدود 200 ..
ولقيت فئة تالتة 320 2006-2007 ..
بس الحقيقة نفسي في الشكل الجديد FaceLift ..
قراءتي هنا خوفتني شوية من 316-318 لأن تسارعهم مش عالي ..
أقل حاجه ممكن 320 أو 330 .. والـ FaceLift بيبدأ من 2008 تقريبا ..
وكده صعب الاقي حاجه في حدود الـ 200 ألف بتوعي ..

كده أنا قولتلكو أنا عايز ايه و معايا كام ومستني ردود خبراء الـ بي إم في أجمل منتدى ..
سألت و لقيت ناس كتير محتاجه نفس المواصفات .. فـ ياريت نعمل هنا ملف كامل عن الرانج دا من الأسعار ..
شكرا و عذرا للإطالة ..

[م أحمد]

بص يا دكتور بما انك فكرت فى البنزين فكر برضه فى الضريبة

السيارات لغاية 2030 سى سى بتبقى ضريبتها حوالى 850 جنيه فى السنة و على حسب سنة الصنعة كل ما تطلع سنة تزيد خمسين جنيه

السيارات أعلى من 2030 سى سى ضريبتها (( 2 % )) من ثمن السيارة سنويا

لو مشاويرك داخل المدينة ، العربيات صاحبة ال سى سى العالى هتبقى غير اقتصادية فى زحمة القاهرة
لو طوالى الفرق مش كتير

[kokowasfy]

الفئة الخامسة زي 525 موديل 2006 عالم تانى غير اى بى ام وحش تسارع وثبات و حاجة تانية خالص و الى بيركب بى ام ميبصش على المصاريف و الميزانية البى ام ركوبة لو هتتحمل ضريبتها و بنزينا و صينتها شلها لكن لو غير كد فكر فى الكورلا مثلا عربية محترمة و موفرة بس لا تقارن بى البى ام مع احترامى ليها طبعا

[Dr.AmrElshreef]

https://egypt.dubizzle.com/ar/cars/bmw/listing/7-listings-dfc14ac445e75990a06cc31afdcc6522/show/?back=L2FyL2NhcnMvYm13L3NlYXJjaC8_aXNfc2VhcmNoPUZhbHNlJnBhZ2U9Mg==

أرجو التقييم .. والمفاضلة بينها وبين دي ..

https://egypt.dubizzle.com/ar/cars/bmw/listing/7-listings-dfc14ac445e75990a06cc31afdcc6522/show/?back=L2FyL2NhcnMvYm13L3NlYXJjaC8_aXNfc2VhcmNoPUZhbHNlJnBhZ2U9Mg==

[Dr.AmrElshreef]

اللينك بتاع العربية التانية مش راضي يتنسخ هنا مش عارف ليه ،،
العربية 525 i 2006 فتحة سقف رشة جانبين فقط عفشة جديدة 150 الف كم ..
تمنها 215 الف ..

انصحوني بالله عليكم ..

[blazer]

ال 320 طبعا افضل لانها كيلو متر اقل بكتير و موديل اعلى وشكل حديث وكمان مصاريف صيانتها اقل من الفئه الخامسه و بتمسك سعر شويه فى اعاده البيع

[maskeen]

نصيحه بلاش تدخل عالم البى ام على الفئه الخامسه مره واحده

هاتكلك 320 مو 2010 ولا 2009 ماشيه 60-70 الف وعيش بيها 3-4 سنين تفهم دواخل البى ام وتتأقلم على مصاريفه
ولما هاتبيع هاتخسر 10-15 الف ف السنه ...انما الخامسه مصاريف تقيله وضريبه وخساره كبيره..يعنى عاوزه واحده مستغنى شويه

[Dr.AmrElshreef]

شكرا لنصايحكم الغالية يا جماعة ..
هادور على حاجه زي دي ان شاء الله ...

[FrozenFire]

في رأيي المتواضع عشان أنا برضه دخت الدوخة دي ووصلت لخلاصة

وبما إننا دكاترة زي بعض فأعتقد إن التفكير متقارب. أولا بما إننا بنفكر في ألماني يبقى نتجاهل تماما حكاية مصاريف التشغيل والصيانة والضرائب في مقابل إننا نركب عربيات بجد.

أولا خلي بالك من المستعمل عشان ماعندناش وقت نقعد نلف على مراكز الصيانة والتوكيل عشان أي مشكلة تبان بعد ما نشتري العربية. ولكن لو ظهر قدام حضرتك حتة مش ماشية كتير وكل صيانتها في التوكيل يبقى إتكل على الله.

ثانيا ال 316 فقيرة جدا وتعتبر هي بداية الدخول لعالم البي إم. فيبقى إحنا بنتكلم في 318 أو 320

ولكن من واقع بحثي على مدار 3 شهور في كل حتة لقيت إن عشان نلاقي حاجة مستعملة نضيف ومش عاملة كيلوا مترات كتيرة يبقى إحنا بنتكلم في 250 ألف مش 200 ألف

فكده قدام حضرتك إختيارين (طبعا ده رأيي بعد بحث طويل) يا إما نبدأ بال 316 يا إما ننسى الألماني دلوقتي لحد ما نقدر نزود المبلغ شوية

أنا عن نفسي وبصراحة شديدة شيلت الألماني من حساباتي لأني معايا هوندا وبصراحة عربية فوق الممتازة ولكن المشكلة في المطبات اللي متواجدة أكتر من العربيات نفسها. فقررت إني لو حنقل حنقل على فئة مختلفة تماما وهي فئة الكروس أوفر عشان أريح دماغي من المطبات تماما.

دي خلاصة تفكيري الفترة الماضية

والسلام ختام

[Dr.AmrElshreef]

أنا بصراحة كنت بفكر في الجيب عشان شوارعنا الحرير ..
لكن عشان البنزين صرفت نظر عنها خاالص ..
حكاية المستعمل دي فعلا متفق معاك فيها جدا ..
الالماني دخل دماغي بصراحة .. ومش عايز اركب اقل من 320 ..
اللينك اللي حطيته هنا فيه عربية عاملة 40 الف كياو .. وفي واحده عاملة 34 الف و ب 235 الف ..
هادور على حاجة زي كده واكشف عليها ف التوكيل .. واريح دماغي .. لحد ما ربنا يفتحها علينا ونجيب الفئة الخامسة زيرو
ان شاء الله بعد ما اعدي سن الخمسين وعليك بخير طول ماحنا ف مصر ..

شكرا لاهتمامك ومرورك الجميل

[eng.m7md.ali]

مفكرتش في ال 118 ؟؟

اعتقد هتلاقي في رينج السعر ده حاجات كسر زيرو او حالة محترمة .. وبردو معاك عربية بتجري

[atef_5005]

أنا بصراحة كنت بفكر في الجيب عشان شوارعنا الحرير ..
لكن عشان البنزين صرفت نظر عنها خاالص ..
حكاية المستعمل دي فعلا متفق معاك فيها جدا ..
الالماني دخل دماغي بصراحة .. ومش عايز اركب اقل من 320 ..
اللينك اللي حطيته هنا فيه عربية عاملة 40 الف كياو .. وفي واحده عاملة 34 الف و ب 235 الف ..
هادور على حاجة زي كده واكشف عليها ف التوكيل .. واريح دماغي .. لحد ما ربنا يفتحها علينا ونجيب الفئة الخامسة زيرو
ان شاء الله بعد ما اعدي سن الخمسين وعليك بخير طول ماحنا ف مصر ..

شكرا لاهتمامك ومرورك الجميل

انا برضو في نفس الحيره
بس الفكره ان دعم البنزين هيتلغي علي اكتر من 1600 سي سي و هما بدأو بالكروت و بعد كده الدعم
يعني كلها سنتين بالكتير و الدعم يتشال و العربيه تخسر جامد اوي

[FrozenFire]

أنا بصراحة كنت بفكر في الجيب عشان شوارعنا الحرير ..
لكن عشان البنزين صرفت نظر عنها خاالص ..
حكاية المستعمل دي فعلا متفق معاك فيها جدا ..
الالماني دخل دماغي بصراحة .. ومش عايز اركب اقل من 320 ..
اللينك اللي حطيته هنا فيه عربية عاملة 40 الف كياو .. وفي واحده عاملة 34 الف و ب 235 الف ..
هادور على حاجة زي كده واكشف عليها ف التوكيل .. واريح دماغي .. لحد ما ربنا يفتحها علينا ونجيب الفئة الخامسة زيرو
ان شاء الله بعد ما اعدي سن الخمسين وعليك بخير طول ماحنا ف مصر ..

شكرا لاهتمامك ومرورك الجميل

سن الخميسن؟؟؟؟؟؟ يعجبني روح التفاؤل دي

هاهاهاهاهاهاهاهاها

لا تحسبن المجد تمرا أنت آكله، لن تبلغ التمر حتى تلعق الصخر

والسلام ختام