سعر رن فلات و بطاريات لل e90

[svneleven]

مساء الفل يا رجالة.
من كام يوم كده طالع الدائري و لسه بقول يا هادي لقيت رسالة Tyre pressure loss.
نزلت شوفت الكاوتش لقيته زي الفل قولت يبقي تهييس. من الكمبيوتر.
مشيت 200 متر كده لقيت C180 اللي بعتبرها عدوي اللدود (معايا 320 2011 علي فكرة) المهم شدينا و لعبنا شوية و كله تمام قولت أركن أبص علي الكاوتش لقيت العجلة اللي ورا يمين نايمة شوية قولت يبقي الكمبيوتر كان عنده حق. طب طلع مقاس الكاوتش و قيس يا معلم. كام؟ زيرو. كام؟ زيرو و الله لكن العجلة شكلها نايم بس عشان رن فلات طبعا و الجميل أني ما كنتش حاسس بأي حاجة و أنا بشد مع ال C180.
المهم روحت ل بتاع كاوتش لقيت مسمارين لوز اللوز. الحم يا عم ببص علي الكاوتش من جوه لقيت شرخين الواحد حوالي 20 سم. مش عارف بقي ايه السبب عشان الشدة اللي مع ال مرسيدس و الا عشان الواد بتاع الكاوتش حط الشفة يتاعة ماكينة الفك في جنب الكاوتش عشان يعرف يفك. المهم كده كده الكاوتش انتاج 2010 و ماشي 40000 كم بالتمام و الكمال و مع العربية من الزيرو فالصراحة طلبت تغيير طقم جديد.
هغير و اعمل موضوع جديد أحكيلكو فيه بالتفصيل ان شاء الله.

[Karim_Monir]

الشرخ نتيجة الجري والعجلة نايمة خلي الجنط يقطع البروفايل
19187
رقم بريدجستون
كلمهم وفي خصم 7 % لاخر ابريل لحاملي ستيكر نايل موتورز في كل فروع فيت اند فيكس

[svneleven]

سألت فعلا في فيت ان فيكس قالي علي خصم المنتدي لكن انا مش معايا الاستيكر و أنا عارف ان فيه خصم 10% لحاملي بطاقات البنك الاهلي. العجلة ب 920 و بعد الخصم تعمل 829 لكن قالي لازم تدفع بالبطاقة بتاعة البنك الاهلي روحت اعمل ايداع في البنك الاهلي لأن حسابي فاضي عشان مش بستعمله لقيت قدامي 70 واحد طبعا مشيت روحت فرع تاني لقيته فاضي و مجرد 5 دقايق ندهو عليه لكن علي الشباك قالتلي الحساب موقوف عشان ما اتعاملتش عليه بقالك سنتين طب ايه الحل يا اما أروح الفرع بتاعي يا اما يبعتو طلب للفرع بتاعي و ياخد يوم يومين و بعد كده أجي أعمل ايداع. المهم عملت الطلب من الفرع اللي انا فيه و الصراحة مش طالبه مرمطه.
روحت علي ممدوح مبروك قالي 890 قولتله فيت اند فيكس عارض عليه 830 ايه النظام؟ قالي خلاص مشيها 840 وافقت و خلصت طبعا تركيب و ترصيص و نيتروجين و تغيير البلوف كلها و ظبط الضغط ورا 36 و قدام 30 زي ما الكتاب يقول.
و أنا هناك سألت علي أسعار البطاريات و كانت كالاتي:
فارتا سيلفر 100 أمبير و 830 cca ب 1060 جنيه.
فارتا سيلفر 90 أمبير و 720 cca ب 830 جنيه.
فارتا سيلفر 88 أمبير و 740 cca ب 820 جنيه.
و هياخد القديمة ب 60 جنيه.
اللي في العربية 90 أمبير و 750 cca.