الرن فلات بين الواقع والخيال..........

[ACE]

اتخرم منى مرة واحدة وعملته فى فت اند فكس
ماحاولتش اروح مكان تانى
الحمد لله انى ماحاولتش
بس اخدو منى ٦٠ جنيه فى. خرم واحد
٣٠ جنيه للخابور و٣٠ ترصيص للعجلة
كنت مستكترهم جداااا بصراحة خاصة انى كنت لسه مرصص من اسبوع

[ACE]

مش عارف ايه ده !!!! ايوه احيانا كتير بقلب سبورت لكن برضه الاستهلاك يبقى بعدل شويه :copy of new:

يعنى ايه تقلب سبورت ؟
او ازاى ؟

[FrozenFire]

اتخرم منى مرة واحدة بس
ماحاولتش اروح مكان تانى
الحمد لله انى ماحاولتش
بس اخدو منى ٦٠ جنيه فى. خرم واحد
٣٠ جنيه للخابور و٣٠ ترصيص للعجلة
كنت مستكترهم جداااا بصراحة خاصة انى كنت لسه مرصص من اسبوع

لا لا لا. ماتستكرهومشي خاااااالص. إنت ما شوفتش اللي أنا شوفته.

أحسن ماتروح لناس فتاية يبهدلوالك العجلة زي ماحصل لي. وبعدين الفروض فعلا إنك ترصص العجلة بعد كل مرة تتصلح.
لأن وزن اللحام بيختلف وبيخلي العجلة محتاجة ترصيص تاني. ده ااصح.

والأخ 2code يقصد إنه بيجيب الفتيس على Ds

[EngAhmedSayed]

الحمد لله
على كل شىء
و أهم شىء انى سيادتك افادة الاخرين بتجربتك و ان شاء وربنا يجعله فى ميزان حسناتك

[minicooper20]

كلام مظبوط
بس لى الجنط عندك ١٦ كانت بقت اسهل انا كان جنط عندى ١٦ و كانت ديما بعملو عند بتاع كاوتش عادى بس هو محترف شويه
متجبش فرده الا لما العندك دى تبوظ خالص

[hossam_elwani]

لا لا لا. ماتستكرهومشي خاااااالص. إنت ما شوفتش اللي أنا شوفته.

أحسن ماتروح لناس فتاية يبهدلوالك العجلة زي ماحصل لي. وبعدين الفروض فعلا إنك ترصص العجلة بعد كل مرة تتصلح.
لأن وزن اللحام بيختلف وبيخلي العجلة محتاجة ترصيص تاني. ده ااصح.

والأخ 2code يقصد إنه بيجيب الفتيس على ds

انت الجنط عدك اتضرر من الدق بالاجنه ؟؟

[FrozenFire]

انت الجنط عدك اتضرر من الدق بالاجنه ؟؟

لا الحمد لله الجنط زي الفل. ماحصلوش حاجة.

[speed_magnum]

اتنين فاهمين في شغل الكاوتش في مصر
fit & fix ,,, tire mania

[2CODE]

يعنى ايه تقلب سبورت ؟
او ازاى ؟

وانت جايب الفتيس على D هاته شمالك هتلاقيه DS

وده النظام الرياضي هتلاقي العربية بتنقل على نقلات عالية جداً واستجابه الفرامل جبارة وتحكم العربية فوق الممتاز

جربها لو عندك في الـE90 (تقريباً عندك) بس يكون الشارع فاضي شويه وشوف تسارع العربية شكله ايه

[mooozooo]

طب لو انا مش موجود فى القاهره وعايز اصلح الكاوتش ينفع اعمل خابور عادى ولا لازم لحام مكوه وافك الكاوتش
مهو مش منطقى يعنى انى اسافر القاهره مخصوص عشان اصلح فرده كاوتش

[ACE]

وانت جايب الفتيس على d هاته شمالك هتلاقيه ds

وده النظام الرياضي هتلاقي العربية بتنقل على نقلات عالية جداً واستجابه الفرامل جبارة وتحكم العربية فوق الممتاز

جربها لو عندك في الـe90 (تقريباً عندك) بس يكون الشارع فاضي شويه وشوف تسارع العربية شكله ايه

مش انا كده بكون حولتها مانيوال ؟
ولازم انقل بنفسى ؟

[2CODE]

مش انا كده بكون حولتها مانيوال ؟
ولازم انقل بنفسى ؟

لأ كده يبقى انا عندي فتيس غيرك ده نظام اوتوماتيك برضه مش ستيترونيك بس رياضي

انا عندي لو رفعته لفوق بعد ما اجيبه شمال يبقى كده ستيبترونيك لكن لو مرفعتوش لفوق يبقى ds وينقل اوتوماتيك بعد عدد لفات عالي اوي

[novo]

السلام عليكم جميعا

أنا كنت ناوي إني أحكي القصة اللي حصلت معايا الأول وبعدين أقولكم على الخلاصة. ولكن عشان نكون عمليين شوية فحنقول الخلاصة الأول وبعدين اللي عايز يعرف اللي حصل معايا عشان يتعلم منه ومايحصلوش اللي حصل لي يكمل الموضوع للآخر.

الخلاصة:
• الرن فلات ماهواش موضوع خزعبلي ولا إختراع من كوكب تاني. الرن فلات هو كاوتش تيوبلس عادي جدا ولكن جوانب الكاوتش ناشفة زيادة عشان لما الضغط ينزل من الكاوتش ما يجيش على الأرض وتفضل ماشي بيها فترة. ممكن تمشي بالكاوتش وهو من غير هواء على سرعة أقصاها 80 كيلوا في الساعة لحد أقرب مكان تصليح.

• الرن فلات ليه مكن مخصوص عشان يفكه من على الجنط. المكن العادي ما بيقدرشي يفك الكاوتش صح. ممكن في الجنط ال16 لو حد بتاع كاوتش كويس يقدر يفكه من غير ما يبهدل الكاوتش. لكن لو كان الجنط عندك 18 أو إنك لقيت مكانة الكاوتش العادي ما بتقدرشي تفصل الكاوتش عن الجنط من أول محاولة يبقى إوعى إوعى إوعى تروح لحد بتاع كاوتش عادي.

• المكن العادي حتلاقيه لما ييجي يفصل الكاوتش على الجنط بيفلت ويفعص ويضغط الكاوتش جامد جدا بدل ما يفصله والحركة دي هي اللي بوظت عندي فردة. (لمزيد من التفاصيل تابع القصة).

• المكن المخصوص للرن فلات يشبه لحد كبير المكن بتاع الكاوتش العادي ولكن يختلف عنه تماما في الأداء وعشان كده كتير من الناس بيتهيأ لها إن مكن الرن فلات هو مكن الكاوتش العادي. على فكرة مكن الرن فلات بيفك برضه الكاوتش العادي. مكن الرن فلات يتميز عن المكن العادي إن الشفة اللي بتفصل الكاوتش عن الجنط أعرض وأكبر وكمان إن ضغط الهوا بيبقى أكبر وكمان زاوية دخول الشفة على الكاوتش مختلفة. الحاجات دي بتخلي المكنة تفصل الكاوتش عن الجنط بسهولة تامة. للأسف موبيلي كان فاصل شحن وماعرفتش أصور المكنة.

• الرن فلات ما بيتلحمشي بالمكواة بتاعة الكاوتش العادي. في لحام مخصوص بيشبه الخابور (ولكن مش هو الخابور العادي) من غير مكواة. هو الرن فلات مش حيقول لأ للمكواة وحيلحم بس مش هو ده الصح ولا ده الموصى بيه من بي إم.

• لو ما إتبعتش التعليمات دي وروحت لبتاع كاوتش عادي وعملت لحام عادي اللي حيحصل إن الكاوتش حتيحول بالتدريج من رن فلات لكاوتش تيوبلس عادي جدا وحيفقد مع الوقت ميزته وهي إنك تقدر تمشي عليه وهو فاضي من الهواء.

• المكان الوحيد في مصر اللي عنده مكن الرن فلات (على حد علمي وبعد بحث كتير) هو Fit and Fix وليهم فروع في كل حتة ولكن يفضل إنك تتصل بيهم وتتأكد إن الفرع القريب منك عنده مكن الرن فلات.


نيجي بقى للي حصل ليا. من حوالي شهرين لقيت الآي درايف بيقول إن العجلة اليمين ورا ضغطها نقص. ركنت عند أقرب واحد ولقيت العجلة على 25 فزودتها عادي.

تاني يوم حصل نفس الموضوع. قلت يبقى لازم تتحل العجلة. روحت لمركز عندنا في المنوفية وده يعتبر أحسن واحد عندنا. وهو عرف على طول إن العجلة رن فلات. المهم حط العجلة على الماكينة وبدأ يحاول يفك الكاوتش. اللي كان بيحصل إن الشفة بتاعة الماكينة ماكانتشي بتقدر تفصل الكاوتش عن الجنط. فكان اللي بيحصل إن الشفة بتفلت وتتضغط (تفعص) الكاوتش جامد.
حاول كذا مرة وكان بيستخدم مية بصابون وحديدة مساعدة عشان يقدر يفكها. وبالفعل قدر إنه بعد معاناه مستمرة لمدة ساعة إلا ربع إنه يفصل الكاوتش عن الجنط.

ولقى 3 مسامير في العجلة طلعهم وعادي جدا لحمهم بمكواة اللحام زي أي كاوتش عادي ودفعت 30 جنيه.

لحد هنا قشطة وشغال بس أنا مش مقتنع إن ده الصح وإن المفروض في مكن فك مخصص للرن فلات.

من حوالي 10 أيام الآي درايف قالي إن نفس العجلة ضغطها بينقص. المرة دي بقى كتبت موضوع هنا على أمل إني أعرف حد متخصص في الرن فلات ولقيت إن أغلب الردود بتقول إن الرن فلات عادي جدا بيتفك بأي ماكنية كاوتش وإنه مالوش ماكينة مخصوص وإنه بيتلحم بالمكواة العادية بتاعة الكاوتشات التيوبلس.

فكلمت موظف معرفة من بي إم وقالي على أوتو تاير في سانت فاطيما وقالي إنهم محترفين. روحت تاني يوم كنت في القاهرة وزودت العجلة قبل ما أخرج من عندي عشان ما تفضاش مني عقبال ما أوصل لهم.

رفعوا العربية وحطوا العجلة على الجهاز وتتكرر نفس القصة اللي فاتت إن الشفة بتفلت وتفعص الكاوتش جامد. المهم ماحبتشي أعدل عليهم وقلت دول أكيد ناس فاهمين هما بيعملوا إيه. جالي تليفون مهم جدا من الخارج فخرجت من الورشة بتكلم وبعدين سمعت دق جامد قوي. قلت أكيد ده مش عندي. خلصت المكاملة ورجعت الورشة لقيتهم فعلا حاطين أجنة بين الجنط والكاوتش وعمالين يدقوا عليها جامد بالمطرقة وكان واضح إنهم مش عارفين بعد ساعة كاملة إنهم يفكوها. إتعصبت عليهم وخليتهم يركبوا العجلة في العربية تاني وسيبتهم ومشيت.

روحت لواحد تاني (مش فاكر إسمه للأسف). المهم تتكرر نفس المأساة بنفس المنظر وبنفس الأسلوب. أخدت العجلة من غير ما تتصلح ورجعت البيت تاني ومنظر الكاوتش وهو بيتفعص من الماكنية لا يفارق خيالي. وأنا بقول لنفسي ما هو أكيد في حل وأكيد مش كل الرن فلات بيتهان كده عقبال ما يتفك. أكيد في حاجة مش مفهومة.
وتسمع بقى من أصحاب الورش اللي المفروض إنهم ناس متعلمين خزعبلات وإفتكاسات زي: أصل الرن فلات بيبقى في حديدة على جنب الكاوتش، الرن فلات ما بيتفكش لأنه بيتعمل بخابور بس. وهاتك يا فتي ومافيش حد يقولك أنا معرفشي. يلاقي البي إم داخلة عليه يحسسك إنه أبو العريف وإنه أول مركز متخصص في كاوتشات الرن فلات في مصر والله والله والله سمعتها بنفس الحرف من أوتو تاير ربنا يسامحهم.

على مارجعت بالليل لقيت الأخ الفاضل Novo كاتب إن في مركز إسمه Fit and Fix وإن دول ناس فاهمين شغلهم بس غالين.

كلمتهم وقالوا لي فعلا إن في مكن مخصوص للرن فلات فإخترت فرع أكتوبر لأني كنت رايح أكتوبر تاني يوم وبرضه زودت العجلة قبل ما أخرج من عندي.

وصلت عندهم وبصيت على المكنة اللي بتفك العجل ولقيتها تشبه لحد كبير المكن العادي ولكن في 3 فروق جوهرين.
إن الشفة اللي بتفصل الكاوتش أعرض وأكبر وإن زاوية دخول الشفة على الكاوتش مختلفة وواضح من صوت الماكنة إن قوتها أكبر بكتير من المكن العادي. المهم فكوا العجلة وحطوها على المكنة اللي عندهم وبالظبط في 57 ثانية كانت العجلة مفكوكة عن الجنط.
أنا بقيت مش مصدق عيني وكنت منتظر إن نفس السيناريو يحصل تاني ولكن اللي حصل إن المكنة فكت الكاوتش عادي جدا ولا فلتت ولا فعصته ولا أعصابي تعبت ولا أي حاجة خالص.
لقى فيها مسمارين نضف مكانهم وحط لحام من نوع أول مرة أشوفه من ناحية جوا ولقيت حاجات زي الخابور كده خارجة من الجنط سابهم 5 دقايق من غير مكواة أي حاجة وبعدين قص الزيادات.
كنت عايز أعمل روتيشنRotation للعجل يعني أغير أماكن العجل ولكن قالوا يفضل العجلة دي ما تركبشي قدام. المدير بصراحة كان متعاون جدا ومتفهم وبيشرح لي كل حاجة إسمه مستر مصطفى. وراني ليه الكاوتش ماينفعشي يركب قدام وححاول أبسطها واشرحها عشان برضه للأسف الموبيل كان فصل شحن مني وماعرفتش أصور.
من جوا الكاوتش تحس إن في زي طبقة خفيفة من الكاوتش حنعتبرها مجازا كده زي ورق الحائط مغطية الطبقة الداخلية من الكاوتش بالكامل. الطبقة دي نتيجة المحاولات الكتير الفاشلة والمكن اللي كان بيفعص الكاوتش بدئت تنفصل عن الكاوتش ودخل هوا بينها وبين الكاوتش. تحس المنظر بالظبط زي ورق الحائط لما يكون مش محطوط كويس وعامل زي فقافيع هوا بينه وبين الحيطة. دي كده معناها إن الكاوتش إتبهدل.
طبعا مستر مصطفى قالي كده الصح والأفضل إنك تغير الفردة دي وتجيب فردة جديدة وطبعا طالما حتغير فردة يبقى لازم تغير أختها. قلت له دا أنا يادوب لسه مكمل 10 آلاف كيلوا.
قالي خلاص سيبها عادي ولكن كل 5آلاف كيلوا تيجي أفكها ونبص عليها نطمن. قلت له هل في خطر إنها تنفجر ولا حاجة خصوصا إني بمشي على سرعات عالية جدا. قالي لا إن شاء الله مش حتنفجر ولا حاجة هو بس اللي ممكن يحصل إنها تنام خالص وماينفعشي تتنفخ تاني.
دفعت 60 جنيه ( سعر اللحام الواحد 30 جنيه). واتكلت على الله.

المدة كانت لا تتجاوز ربع ساعة من أول ما رفعوا العربية لحد ما أخدت العربية ومشيت. ناس فعلا فاهمة شغلها وماحدش بيفتي ولا بتسمع خزعبلات ولا إفتكاسات.

طبعا تاني يوم إتصلت ببي إم وسألت على سعر فردة الرن فلات الجنط ال 18 ولقيت إنها ب 2500 ونوعها جوديير ألماني.
فأكيد مش حجيب 2 ب 5آلاف جنيه وأنا لسه يادوب عامل 10000 كيلوا بيهم.

بالنسبة لأداء العجلة بعد التصليح فأنا مش حاسس بأي مشكلة فيها خالص. لا رفة ولازنة وتعمدت أقرص في ملفات وعلى سرعات عالية وبرضه ما حستشي بأي مشكلة فيها الحمد لله فغالبا حسيبها كده وكل 5آلاف حشيك عليها.

دي القصة اللي حصلت معايا وأتمنى إني أكون قدرت أفيدكم بالكلام ده

والسلام ختام

شكرا جد لحضرتك لنقل التجربة
للأسف حصلت معايا قصة برضه ...كنت ماشي على الدائري ووقعت فى حفرة و فقدت ضغط الهواء فى حوالى 10ثوان...ركنت لقيت قطع بطول 4سم فى الفردة و الحمد لله الجنط سليم...مشيت لغاية غطاطي المريوطية فيصل و هو بالمناسبة وكيل بيريللى و هانكوك و عانده مكن رن فلات...اشتريت فردة بيريللى سرعتها Y (أعلى من الفردة الأوريجنال V) ب2000جم و اصريت أركبها عند fit& fix بس للأمانة غطاطي كان عنده مكن رن فلات
على فكرة الفردة اللى راحت كانت عاملة 1600كم فقط لا غير فمضايقش نفسك.

[FrozenFire]

شكرا جد لحضرتك لنقل التجربة
للأسف حصلت معايا قصة برضه ...كنت ماشي على الدائري ووقعت فى حفرة و فقدت ضغط الهواء فى حوالى 10ثوان...ركنت لقيت قطع بطول 4سم فى الفردة و الحمد لله الجنط سليم...مشيت لغاية غطاطي المريوطية فيصل و هو بالمناسبة وكيل بيريللى و هانكوك و عانده مكن رن فلات...اشتريت فردة بيريللى سرعتها y (أعلى من الفردة الأوريجنال v) ب2000جم و اصريت أركبها عند fit& fix بس للأمانة غطاطي كان عنده مكن رن فلات
على فكرة الفردة اللى راحت كانت عاملة 1600كم فقط لا غير فمضايقش نفسك.

حفرة على الدائري؟؟؟؟؟ و1600 كيلوا؟؟؟؟

صحيح... اللي يشوف بلوة غيره...
الحمد لله قدر الله وماشاء فعل. معلشي فداك..
كده يبقى عرفنا إن في حد غير فيت آند فيكس عنده الرن فلات.

[FrozenFire]

طب لو انا مش موجود فى القاهره وعايز اصلح الكاوتش ينفع اعمل خابور عادى ولا لازم لحام مكوه وافك الكاوتش
مهو مش منطقى يعنى انى اسافر القاهره مخصوص عشان اصلح فرده كاوتش

لا طبعا بلاش الخبور ولا اللحام

فيت آند فيكس عندهم فروع في كل حتة. كلمهم على الر قم بتاعهم وإسأل على أقرب فرع ليك. 19187