عايز اشتري e36 أوتو كاملة فبريكة بالكامل وأية عيوبها !!! يا خبرا ال e36

[mostafa ezz]

سؤال لأهل الخبرا لل e36 سمعت انها معظمها بيبقى نصين طب اعرف حالتها ازاي واركز على أية زي البطحات مثلا وأية أهم حاجة أركز فيها ولو حد عندو عربية عايز بيعها يقولي انا عايز حالة شكرا !! !

[M.Ayman]

ال e36 في منها سيدان و كوبيه و كابورليه و كومباكت ، القلق من موضوع نصين ده بيبقي فعلا جامد لو بتدور علي كابورليه للاسف كتير قوي بقي نصين و السليم بقي قليل ، الكوبيه في منها انصاص كتير برضه بس انك تلاقي كوبيه سليمه اسهل من الكابورليه ، بالنسبه بقي للسيدان و الكومباكت نادرا لما بتبقي نصين ، عموما هقولك علي الخطوات اللي تمشي فيها بالترتيب لما تلاقي دبانه تكشف عليها

اول حاجه
ال vin code و ده بيبقي اخر 7 (ارقام / حروف) من رقم الشاسيه و بالمناسبه مينفعش تجيبه من الرخصه لازم تجيبه من العربيه نفسها هتفتح الكابوت و تبص تحت المساحات بتاعت العربيه هتلاقيه محفور ناحيه اللي بيقعد جمب السواق زي الصوره كده

[aldl]http://i.imgur.com/zBLmje8.jpg[/aldl]

و ممكن تلاقيه كمان علي البطاحات برضه

[aldl]http://i.imgur.com/9QgFcOJ.jpg[/aldl]

، المهم بعد ما تجيبه ادخل علي اي vin decoder -ارشح ليك الموقع ده افضلهم في رأيي -

BMW Model Archive � BMW VIN Decoder � bmwarchive.org

هيطلعلك بيانات العربيه كلها ساعت ما خرجت من المصنع زي بلدها و عدد الابواب و موديلها و موتورها و لونها و الاوبشنز اللي فيها .... الخ

[aldl]https://imagizer.imageshack.us/v2/760x455q90/537/1PdaR3.png[/aldl]

تقارن انت بقي لون العربيه بتاع المصنع بدواخل العربيه اللي بتكشف عليها ، تشوف عدد الابواب و الموديل و الشاسيه و منها تعرف العربيه نصين ولا لأ ، يعني لو انت بتدور علي كابورليه مثلا و دخلت ال vin code بتاعها و طلعلك ان نوعها كومباكت او سيدان تبقي نصين من غير ما تفكر لو لون الدواخل مختلف يبقي فيها حاجه غلط ... الخ

ثاني مرحله
لو العربيه عدت الخطوه دي غالبا هتبقي حاجه مبشره كده ، الخطوه اللي وراها سمكري محترم يكشف عليها بقي علشان تطمن ان مفيهاش رش دواخل مثلا او الشاسيه فيه حاجه مش مظبوطه من حادثه مثلا

اخر خطوه
اخر حاجه خالص بقي تطلع علي المرور اللي تابعه ليه العربيه و تدخل لرئيس وحده المرور او تشوف اي حد يظبطك هناك و تفهمه انك هتشتري العربيه و خايف يكون عليها مشاكل فبيكشفلك عليها و يتأكد ان معليها حاجه امنيه و ممكن كمان تشوف عسكري في الارشيف يتأكدلك من ملفها

كده تبقي عملت كل حاجه تطمنك من ناحيه العربيه و مبروك مقدما ان شاء الله :)

[mostafa ezz]

ألف ألف شكر يا باشا على ال معلومات الجديدة ان شاء اللة عمال بدور على سيدان بس يتارى هتلاقي فبريكا برة وجوة يعني كل ال ف السوق راشة برة ? ?

[M.Ayman]

دبانه فابريكا بره و جوه مش كتيره بس لو صبرت هتلاقي ان شاء الله ، و لو ان رأيي دور علي عربيه نضيفه و خلاص حتي لو رشه بره ، المهم تبقي عربيه حالتها نضيفه و صاحبها صارف عليها بفهم

[mostafa ezz]

فعلا كلامك سليم بس لو لقيت موديل 95 أو 97 صارف عليها يعني اخرها تبقى بكام بكتيرها يعني $$ورشة برة 1600 cc !! ؟؟

[M.Ayman]

من 95 لحد 98 , 4 سلندر ، راشه بره عربيه نضيفه استوك خالص مش متظبط فيها حاجه و مش محتاجه مصاريف تعمل 65 - 70 الف مثلا ، بس كل ما بيتصرف كويس علي العربيه في حاجات زي M3 kit -الاكصدامات و العتب و الباكتات و المرايات - جنوط محترمه original لو فيها موتور 18is مثلا .... الخ المفروض تزود من ثمنها شويه برضه .... فهي عموما تقدير السعر بيعتمد علي العربيه نفسها اولا و اخيرا

[mostafa ezz]

متشكر على الرد السريع وانا كمان في عربية هروح اتفرج عليها موديل 96 ب 75000 وربنا يوفق الجميع

[M.Ayman]

العفو يا باشا ، و ربنا يوفقك و تطلع عربيه كويسه ان شاء الله ، لو العربيه نضيفه قووووي و مفيهاش اي مصاريف محتاجاها حاول تفاصل مع صاحبها شويه بسيطه و اي فرق انت اولي بيه

[mostafa ezz]

طب اية أخبار قطع غيار ومين احسن ناس تفهملها وهل تصليحها غالي صيانيتها برا مثلا! ?

[M.Ayman]

كل الكلام ده متقلقش منه قطع غيار العربيه موجوده و سعرها حلو ، و في صنايعيه فاهمه ليها متقلقش