ممكن معلومات عن 318

[MoOoD]

السلام عليكم شباب
بصراحه انا لسه شايف المنتدى من كام يوم كده ورحت مسجل على طول
بخصوص الموضوع انا عندى BMW 318i موديل 2000
عاوز أعرف كل حاجه عنها مثلا :
المنيوال بتعها "دليل الإستخدام"
بشوف فى المنتدى هنا بيسمو العربيه كده E20 هى تبقى ايه :)
الكمليات بتعتها "من حيث الفئات"
سؤال أخير هى فيها AUX In عشان فى واحد قالى انه موجود وملقيتهوش

واتمنى ان تتقبلوا إستفساراتى
ومشكوريين مقدما إخوانى

[Ahmed Selim]

بص يا باشا أنا هرد على قد معلوماتى

العربية دى فى منها موديلين....high line & base Line
ال High بتفرق فى أن الموتور 2000 سى سى وجميع الكماليات تقريباً
ال Base بتبقى 1800 سى سى وناقصة بعض الكماليات بس مش فاكر ايه بالظبط

العربية ال E30 قصدك ؟؟؟
دى الفئة التالتة القديمة...مو من 84 الى 90
اللى أنت بتسأل عليها بيتقال عليها E46 وده بيرمز لموتور العربية

اللى سمعته أن الومديل اللى بتسأل عليه من 99 الى منتصف 2001 كان فيه فتيس ليه بعض المشاكل......وبعد كده عدلوا الفتيس.....
يعنى 2001 فيها فتيس قديم وجديد.......ودى كلمة مشهورة شوية فى الأعلانات....يعنى تلاقيه كاتب مثلاً " مو 2001 الفتيس الجديد "

يبقى كده قبل 2001 فتيس قديم وبعد 2001 فتيس جديد
2001 فيها الأتنين

أستنى برضه حد يكون على علم أكتر منى يصححلى أو يزود المعلومات لو فيه حاجة ناقصة

[MoOoD]

متشكر جدا أخى
ومشكور على سرعه الرد والإهتمام بالرد

[link7200]

الاخ احمد شكرا على المعلومات الى كتبتها (وفرت عليا كتابه كتير)
للاضافه من اخر 98 الى اخر 2001 غير مشكلة الفتيس
العربيه تقفلها مش قد كدا ( دا بالنسبه للتقفيل المصرى ) نازل فيها عيوب زراير كتير يعنى بتعطل و تعلق و شوية كلام فاضى كدا

[Ahmed Selim]

الاخ احمد شكرا على المعلومات الى كتبتها (وفرت عليا كتابه كتير)
للاضافه من اخر 98 الى اخر 2001 غير مشكلة الفتيس
العربيه تقفلها مش قد كدا ( دا بالنسبه للتقفيل المصرى ) نازل فيها عيوب زراير كتير يعنى بتعطل و تعلق و شوية كلام فاضى كدا

أى خدمة يا رجالة....

أنا برضه سمعت الكلام ده من واحد صاحبى بس مسمعتوش من حد تانى....عشان كده مكتبتهوش......وكمان كان بيقولى أنه غير 4 مكن أزاز منهم 3 فى باب واحد ( كانت العربية فى الضمان ساعتها )

[farahat]

العربيات ال-BMW بتتسمى حسب الشكل و الموديل بتاعها ، يعني مثلاً الفئة التالتة موجود منها ٤ أشكال E30 و E36 و E46 و E90 و هو الموجود حالياً و كل شكل عند BMW بيقعد ٧ سنين متوالية و بعد كدة يتغير . يعني ال-E90 نزل في 2005 و هينزل الشكل الجديد بتاع الفئة التالتة في 2012 .
و الشكل إلي قبل كدة إلي هو E46 نزل في اواخر 1998 و قعد لحد 2006 .

أما بالنسبة للمواتير فليحة ترقيم مختلف ، يعني مثلاً الموتور ال-١٦٠٠ إلي نزل في ٢٠٠٧ و لسة موجود لحد دلوقتي إسمه N46 ، و الموتور ال-١٨٠٠ ليه كود تاني و هكذا ، زي مثلاً الموتور ال-M40 و M45 و هكذا ، بس احنا هنا في مصر مش متعودين على تسمية المواتير ، بنعرفه بالشكل

بالنسبة لل-318i ال-E46 دي كل مواتيرها 2000CC ، أما ال-316i E46 دي كل مواتيرها 1800CC ، و بالنسبة للشكل دة نزل في مصر فئتين من الكماليات واحدة اسمها baseline و واحدة highline ، الفرق ما بينهم في الكماليات

بالنسبة لل-AUX أظن ال-highline فيها AUX انما ال-baseline مافيهاش

[salem]

el baseline 2001 318
1800 CC
ma3 akhoya mesh 2000CC
el highline heya ely 2000CC

[dodo_ahm]

السلام عليكم ورحمة الله يا رجالة
خلاص نويت ادوس ان شاء الله في واحدة زي الي بتحكوا عليها
فمن فضلك قلي رنج تمنها كام؟ الاخ مود خلصتها بكام ومنين؟
318 99 2000 او2001 اتمسك الفتيس الجديد؟ ولا ايه؟
ولوعاوزاجيب بسرعة انزل سوق الجمعة؟ ولا منيب بتاع الاهرام ده؟
وهل هتحتاج مني صانة كل يومين؟ وقطع غيار بالغلو الي العالم بتتكلم عليه؟
وايه الفرق بن 318 و 318i?
اهم سؤال ايه ظروووف البنزيييييييين ؟ بتاكل؟ اكتر من العادي بشوية ولاجدا؟
معلش اسئلتي كتيرة
ربنا يجازيكم كل خير
شكرااااااااااااااااااااااااااااا جداااااااااااااااااااااااااا

[Ahmed Selim]

2001 فيها فتيس قديم وجديد
99 و 2000 فيها فتيس قديم بس ولا ينصح بيه........خليك مع الجديد

لا أنصح بسوق الجمعة عموماً.........بس أحياناً بيبقى فيه حاجات كويسة

ال 318 فى منها نوعين......high line ودى 2000 سى سى وهتاكل بنزين عن المواتير ال 1600 طبعاً و فى base line و دى 1800 سى سى وأعتقد أن أستهلاكها مش هيبقى أعلى كتير عن ال 1600

قطع الغيار غالية بس معمرة جداً

[MoOoD]

جزاكم الله خيرا إخوانى على الرد
أخى Link
بس منيين أعرف العربيه دى مصرى ولا حاجه تانيه
----------------------------------------------------
أخى أحمد
هل من الممكن ان يركب الفيتيس الجديد مع مو 2000 ام لا ينفع ....وايه الفرق
مثلا سحب أسرع ولا ايه بالضبط
----------------------------------------------------
أخى فرحات العربيه اللى معايا 1895 CC وهى 318I
----------------------------------------------------
أخى DODO

العربيه معايا من وقت قصير وكانت ب125000 ولا أعلم هل الفتيس القديم ولا الجديد
ولكن تبعا لكلام الأخوه فأعتقد انه القديم

2001 فيها فتيس قديم وجديد
99 و 2000 فيها فتيس قديم بس ولا ينصح بيه........خليك مع الجديد

بالنسبه للبنزين إستهلكها عادى لآنها 1800 سى سى
فعلا فى صوت فى مكنه الإزاز الأيسر "لى مشاكل سابقه مع مكن الزجاج "
بالنسبه للكاتلوج فى حد عنده الكتالوج فى ملف PDF أو ورد
فى مشكله وهى و العربيه على ال D بيكون هناك صوت دوشه و رعشه خفيفه فى السياره
معلش انا متعود على الأوكتافيا ولا أعلم هل هذا طبيعى ولا لأ
ممكن حد يقولى ده طبيعى ولا لأ

بالنسبه لموضوع ال AUX In طلما هوه مش موجود هل لو حطيت الشريط ابو سلك بتاع ال MP3 Player هل ينفع ام انه لن يخرج من الكاسيت مره أخرى :)
معلش بس انا خايف أجرب فإذا كان حد جرب يقول أحسن ما أبوظ الكاسيت


ومشكوريين مره أخرى

[MoOoD]

نسيت أسأل هو الفتيس الجديد بيعمل كام
والتركيب يعمل كام أيضا

سؤال بايخ شويه الكشافات الخلفيه فى منها الجزء بتاع الإشاره لونه أبيض ده بيعمل كام
أعتقد انه خاص بالهاى لاين

[cooleye]

زي مالاعضاء الكرام قالوا ان في منها موديلين
قبل ال2002كله baselineيعني 1895cc
ومفيش فيها لافتحه سقف ولا طاره مالتي فانكشن
لكن موديلات 99وبعض موديلات 2000 ده الفتيس القديم يعني اوتوماتيك بس
موديلات النصف الثاني من 2000وموديلات 2001الفتيس الجديد يعني استبترونيك
بعد ال2002
الشكل فيه اختلاف بسيط من الخارج في الكشافات الاماميه والفوانيس الخلفيه
وفيها highlineوbaseline
والاتنين 2000ccولكن بتفرق في الكماليات زي الفتحه والطاره وكده
العربيه معايا 2001 والحمد لله مفيهاش اي مشاكل نهائي بس بعملها الصيانه كل 10000كم
وبالنسبه للكتالوجات فهي معايا لو اي استفسار انا موجود
بالنسبه للفوانيس الخلفيه الاشاره بيضاء موجوده عندي لو محتاجها

[MoOoD]

أشكرك اخى Cooleye على الرد
ثانيا لو لم أثقل عليك أتمنى ان تقوم برفعهم ...هتخدمنى كتير
أصل انا بحب أقرأ الكتالوجات :)
سؤال انا ظهرت عندى إشاره ترس جواه علامه تعجب بجانب إشاره D فى لوحه العدادات
وبعدين طفت لوحدها
لو تعرف تكلفه السرفيس فى البافريه ممكن تكون فى حدود كام
ولو فى مكان بنفس الجوده فى القاهره ...ياريت تقولى

--------------
---------
---
-
مشكور أخى .وجزاك الله خيرا

[cooleye]

لاشكر ولا حاجه اهم حاجه الافاده
علامه الترس دي يعني في حاجه في الموتور او الفتيس
والاحتمال الارجح كنترول فتيس او اير ماس
في واحد انا بتعامل معاه اسمه منصور في جسر السويس خلف مستشفي القوات المسلحه قبل كوبري التجنيد
بجد راجل محترم جدا وفاهم اوي شغله هو كان مهندس في التوكيل
وماتقلقش بالنسبه للصيانه الاسعار في الرينج المعقول
بس لحد ماتروحله لو العلامه دي نورت تاني اقف علطول وانزل شيل كابل البطاريه ل5 دقائق وركبه تاني علشان غلط انك تمشي واللمبه دي منوره ممكن تضر الكمبيوتر
سؤال اخير هي عربيتك لسه شاريها قريب ؟موديل كام وماشيه اد ايه وجبتها علي كام؟

[salem]

el ters da lono asfar kda?!

law howa da yeb2a da el teeel
ana lsa m3'yro fe bavaria be 500 gnih