بي ام دبليو 318 موديل 2001 رأيكم فيها

[mah907]

انا معايا عربية كورولا وبعتها وعايز اشتري بي ام 318 موديل 2001 بيز لاين اتوماتيك العربية حالتها كويسة راشة الجانبين فقط نظافة علي اللحم بدون معجون العربية حالتها كويسة لانحتاج مصاريف
ممكن اعرف العربية دي تعمل كام ؟
وياتري مصاريف العربية دي وقطع غيارها ايه ؟
ياليت الإفادة من كل صاحب بي ام

وجزيتم خيرا ...

[Bmw-Lover]

انا معايا عربية كورولا وبعتها وعايز اشتري بي ام 318 موديل 2001 بيز لاين اتوماتيك العربية حالتها كويسة راشة الجانبين فقط نظافة علي اللحم بدون معجون العربية حالتها كويسة لانحتاج مصاريف
ممكن اعرف العربية دي تعمل كام ؟
وياتري مصاريف العربية دي وقطع غيارها ايه ؟
ياليت الإفادة من كل صاحب بي ام

وجزيتم خيرا ...

العربيه دى كويسه لو متراعيه و صاحبها اللى قابلك كان عارف البى ام عيوبها ايه و بيركز فيها، سيبك من راشه جنبين و مش راشه جنبين و الكلام دا .. اى سمكرى هيعرف خلاصة الرش حتى لو سمكرى نص نص ، اللى يهمك دلوقتى الموتور و العفشه بتوع العربيه لانك لو محتاج تغير قطع غيار وانت فى مصر هتتعب اوى عشان تجيب حاجه نضيفه لانك مش هتعرف تجيب الاصلى بتاعها ( الله اعلم الوضع ايه دلوقتى .. انا مش فى مصر وانت ادرى منى دلوقتى بقطع الغيار ) .
المهم.. اعمل التالى طبعا اكشف على الزيت و الريداتير وشوف فى ميه فى الزيت او زيت فى الميه ولا لا ، ثم دور العربيه من البارد .. وشوف دوارتها عامله ازاى ، بشرط ان يكون شحن البطاريه مظبوط .. بعد ما تدورها ركز بالترتيب على :
1- رعشة الموتور
2- الريداتير رطب ولا عليه وساخه كتير ولا متنضف قبل مانت تيجى
3- فى اى ريحة بخار ماء ريداتير فى الكبوت ولا لا ، و شم الغلاف بتاع الكبوت نفسه ، معرف اسمه ايه بس اللى هو الغطى الجلد او القماش اللى مبطن الكبوت نفسه .. شمه كويس اوى عشان لو العربيه دى ضربت ريداتير قبل كدا او اى خرطوم .. دا هيدلك كويس اوى .
4- فى اى ريحة عادم فى الكبوت ولا لا وبالذات ناحية الفرن .
5- روح عند الشكمان بعد ما العربيه تدور بـ 5 دقايق ، شوف الريحه بنزين نى ولا لا ، و طبعا تشوف الاربى ام بتاع الايدل كام.
6- انزل تحت العربيه شوف فى اى تنقيط زيت من عند الموتور من تحت ولا لا .. لو فى زيت عند جوان التكيهات فكك منه مش مشكله ، شوف الزور بتاع مقاس الزيت ، فتحة الزيت ، بطن الموتور نفسها من تحت هتوريك لو فى زيت بيسرب بقاله فتره زمنيه طويله ولا لا .. انت هتعرف من المنظر .
7- بص على ترمبة الميه ، حاول تعرف كدا من منظرها هى جديده ولا قديمه ، وشوف خراطيم الريداتير سواء الرفيعه او الطخينه ... جديده ولا قديمه ... لو معظم الحاجات دى جديد ، اخلع و متشتريش العربيه دى حتى لو قالك انه مغيرهم كصيانه ، دى اشاره 100% على ان العربيه سخنت قبل كدا و انت عمرك ما هتعرف اتمشى بيها وهى سخنه قد ايه ، ولا هتعرف ان كان فى شرخ فى الوش او البلوك ولا لا بدون ما تعمل كشف كبس وقصص انت فى غنى عنها لانها مكلفه .
8- العربيه دى مشهوره بحاجتين .. المساعدين الخلفى و القواعد بتاعتهم اللى فى الشنطه ( تقريباً اسمهم فى مصر بطاحات ) + السوست ، المساعد بقى و بطاحته دى دايماً بيضربو .. تأكد انهم سلام ، تشيل الفرش بتاع الشنطه و تبص على المساعد اليمين و الشمال وانت بتضغط العربيه من فوق لتحت .. لو المساعد طلع عن البطاحه او الكوتش طلع ونزل .. يبقى انت هتلبس بطاحات قريب ، ولو عايز تكشف عالمساعد نفسه هى سهله بس لازم صاحب العربيه يوافق ، ترفع الناحيه اليمين مثلا ًو تأمن العربيه كويس عشان متقعش عليك .. تشيل العجله ، و تفك مسمار المساعد اللى تحت .. و تجرب ترفع جسم المساعد اللى فيه الهيدروليك لفوق ، ضد اتجاه العربيه يعنى .. لو لقيت مقاومه عاليه اوى او متوسطه حتى يبقى المساعد شغال ، لو طلع و منزلش .. يبقى ضايع .
9- ورا المساعد فى سوسته تحت فى بطن العربيه .. من اشهر الحاجات اللى بتتكسر و بالذات مع طرق زى مصر ، اتأكد ان السوسته كامله .. لو مكسوره بنسبه كبيره هتلاقى بقيتها فى القاعده بتاعتها .. ولكن ممكن يكون وقع .
10- نرجع للموتور تانى .. العربيه دى مشهوره ان الكلتش بتاع التكييف بيبوظ بسرعه .. شعل التكيف وبص من قدام وانت وشك للموتور ،بص على شمالك تحت هتلاقى كلتش التكييف ، اتأكد انه بيلف و يفصل ، بشرط يكون شحن التكيف والضغط مظبوط 100%.

اكيد هيكون فى بيض بايظ و كذا حاجه مش سليمه فى العفشه .. انت و تقديرك بقى للى شايف انه مش مكلف بالنسبالك .. الى فوق دا اساسيات اهم حاجه .

بالنسبه للفتيس .. لو مانيوال ، معنديش اى فكره عن فتيس العربيه دى المانيوال .

سامحني على اى تقصير او عدم نظام .. انا نازل الشغل بس رديت عليك بسرعه جداً قبل مانزل عشان عارف الموقف بتاع شرا عربيه دا رزل اوى .. بالتوفيق يا زعيم .

[mah907]

أشكرك جدااا علي ردّك الجميل ده اللي فعلا أفدني بشدة