Help BMW vs Cerato

[Hany.ElBaathy]

يا شباب أنا محتار جدا جدا أنا عندى 320 bmw موديل 2009 و عجبانى جدا جدا السيراتو كوبيه هل من الجنون تغيير bmw كيا سيراتو كوبيه؟

[Hesham256]

هي دي محتاجة مقارنة أصلا!!!!!! يعني تنزل من ألماني لكوري!!!!!!
باشا حضرتك معاك بي أم مش من المنطق أنك تنزل للكيا!!!!!!!!

[Hany.ElBaathy]

خلاص يا عم هشام خلينا فى bmw و لو انى مش مستمتع بيها خالص فى القاهرة

[speed4speed]

خلاص يا عم هشام خلينا فى bmw و لو انى مش مستمتع بيها خالص فى القاهرة

لو كنت من سكان القاهره اكون مجنون لو جبت عربيه
حجيب حته هوندا cbr1000rr و بدل ما تروح المشوار فى ساعه تختصر الوقت ل 10 دقائق

[yasserelsayad]

انا عندى bmw 320 2009 و عندى سيراتو 2010 بس سيدان
و طبعا فى فرق كبييير اوى لما انزل من الـ bmw و اركب السيراتو
بس مش قصدى ان السيراتو وحشة لكن الـ bmw هى اللى احسن
و على فكرة الفرق هتحس بيه لو ركبت اى عربية من فئة السيراتو زى المازدا 3 مثلا

[Hany.ElBaathy]

انا عندى bmw 320 2009 و عندى سيراتو 2010 بس سيدان
و طبعا فى فرق كبييير اوى لما انزل من الـ bmw و اركب السيراتو
بس مش قصدى ان السيراتو وحشة لكن الـ bmw هى اللى احسن
و على فكرة الفرق هتحس بيه لو ركبت اى عربية من فئة السيراتو زى المازدا 3 مثلا

يعنى هو الفرق جامد جدا؟
و هل هو محسوس فى زحمة القاهرة؟

[yasserelsayad]

لا الفرق مش جامد فى الزحمة بس على الطرق المفتوحة
زى المحور مثلا و الدائرى هتحس بالفرق فى الثبات و عوامل الامان كمان اللى فى العربية اقل كتير اوى
السيراتو مفيهاش غير 2 ايرباج و abs
و فى طرق السفر هتحس ان العربية خفيفة بعد الـ 100
طبعا انا بقول الفروق الاساسية اللى بينها و بين الـ bmw عشان الناس اللى عندها سيراتو متزعلش يعنى .. انا باردوا عندى سيراتو

[mohamed777]

مهما يكون وسط البلد او على الطريق اكيد البى ام كفاية الرفاهية وشكل التبلوةوخامات الصناعه وغيرة وغيرة
بس على فكرة السيراتو بيقولوا عليها ثبتها قريب من البى ام

[yasserelsayad]

لا معلش الثبات مش قريب للبى ام ولا حاجة
لما تركب البى ام و تاخد الصحراوى كله 190 او 200 بملفاتوا و كل عيوبه هتعرف يعنى ايه ثبات عربية بى ام و طبعا لما السيراتو بتجيب الـ 200 اصلا معايا كانت بتموت و كان الثبات يعنى مقبول نوعا ما بس طبعا كانت خفيفة جدا و على فكرة انا معايا الهاى لاين يعنى اللى فيها الجنط الـ17 و كل حاجة.
و موضوع التبلوه و الرفاهية فأكيد هو عارف كدا

[Hany.ElBaathy]

لا معلش الثبات مش قريب للبى ام ولا حاجة
لما تركب البى ام و تاخد الصحراوى كله 190 او 200 بملفاتوا و كل عيوبه هتعرف يعنى ايه ثبات عربية بى ام و طبعا لما السيراتو بتجيب الـ 200 اصلا معايا كانت بتموت و كان الثبات يعنى مقبول نوعا ما بس طبعا كانت خفيفة جدا و على فكرة انا معايا الهاى لاين يعنى اللى فيها الجنط الـ17 و كل حاجة.
و موضوع التبلوه و الرفاهية فأكيد هو عارف كدا

شكرا يا شباب خلاص انا صرفت نظر و هحتفظ بالبى ام

[mantoros]

بصراحة انا مكونتش فاهم انت اصلا بتفكر في ايه يا راجل!!!!!!!!!!!!!
مقارنة لاسعة اوي دي يا باشا :-)

ربنا يكرمك و يباركلك في البي ام
و عقبالنا :-) بس انا اللي بجد هكون في حيرة لان السوبارو wow

[ahmad--ezzat]

جالك قلب تكتب محتار جدا جدا
ياباشا انت عايز تنزل لعربيه 1600 سى سى وانت معاك 320
انت بتهزر صح؟

[yasserelsayad]

تمام كدا يا باشا و ربنا يحفظهالك من العين

[Hany.ElBaathy]

تمام كدا يا باشا و ربنا يحفظهالك من العين

شكرا يا ياسر و بما ان واضح انك خبير عربيات و بالذات bmw و انا رغم انى بسوق من 15 سنة بس حمار عربيات كل حاجة فى التوكيل علشان مش بركب غير زيرو.

طبعا السرعات الى انت بتقول عليها دى لا سوقتها ولا عمرى هسوقها انا يوم ما قطعت الباسات جبت 150 لمدة دقيقة و رجعت فى كلامى

المهم لو ممكن ازعجك و اسالك شوية حاجات اكون شاكر جدا جدا:
- فى حد ابن حلال جرحلى حتت صغيرة فى الاكصدام و منظره مضايقنى جدا لانى بحب العربية تبقى زيرو طول الوقت بالذات ان ما بقالهاش 4 شهور. تنصحنى اعمل ايه؟
- ايه هو السبورت باكدج بتاع ال 320 و لو تعرف بكام؟
- اركب الزينون و ال باركينج سنسورز فى التوكيل و لا عند حد برا و لو عندك اي اقتراح.و هل لو برا هياثر على ضمان العربية.
- هل فيه أي اكسسوارات تنصحنى اجيبها تظبط العربية؟
- انا حطيت نيتروجين فى الكاوتش ايه رايك؟
- عايز اظبط التجريحات الى قلت لك عليها و بعدين اوديها كار كير محترم هل عندك اى اقتراحات؟

اسف على كتر الاسئلة بس كنت محتاج حد فاهم يساعدنى

الف الف شكر.

[yasserelsayad]

انا بردوا لسه جايبها من 4 شهور كدا بس بعيد عنك دخل فيها موتسيكل و هى ركنة فغيرت الباب اللى ورا و الاكصدام
و طبعا انصحك لو فى اى حاجة فى العربية اعملها فى التوكيل احسن
بالنسبة للزينون و الركينج سنسورز لازم يكونوا من بى ام و يركبوا فى التوكيل مش مهم يكونوا من بى ام مصر بس اهم حاجة انك يكون معاك الفتورة بتاعتهم من بى ام لو انت جايبهم من برا عشان لو ركبت برا بيضيع الضمان .. دا طبعا اللى اتقال فى التوكيل لما سألت
النيتروجين تمام بيحافظ عى الكاوتش بس لو انت حاطيت عشان حاسس ان العفشة نشفة فا دا سبب ان الكاوتش اللى راكب اللى هو ران فلات فابيكون الكاوتش ناشف اصلا مش العفشة يعنى الكاوتش مش بياخد و يدى مع الارض زى العاديين بس طبعا الكاوتش دا لى مميزات اكيد طبعا عارفها
بالنسبة للاكسسوارات فا انا رأى ان العربية بسم الله ما شاء الله شكلها تحفة مش محتاج اى زيادات عليه