بيجو 405

[م.احمد زكريا]

أنا ناوي إنشاء الله اجيب البيجو 405 ده لأني بحب البيجو ومفيش معايا إمكانيات للـ 307 حاليا

وطبعا الايراني غير مطمئنة

انا كنت عايز اعرف مميزاتها وعيوبها ولما اشتريها اخلي بالي من ايه فيها

ويا ترى الفرنساوي 1989 - 1994
ولا المصري أحسن

أفيدوني أفادكم الله

[Mahmoud_405]

السلام عليكم
اولا يا م احمد البيجو 405 جميلا جدا جدا ... عربية محترمة واسعة وانا كنت كتبت تقييم للعربية ال 405 برستيج ممكن تقراه وتقريبا الاتنين واحد بس فرق اوبشنز والفتيس الاتوماتك والموتور ال 2000 سي سي... بس ال 405 العادية احسن في تكلفة الصيانة الاقل ونفس الوسع وعزمها حلو جدا علي الموتور ال 1600...

اما بالنسبة للفرنساوي او المصري .......اكيد الفرنساوي احسن في التقفيل وانا عندي اقتناع تام بعد ماركبت علربيات كتير كانت مصري ونفسها بس خليجي ... ان التقفيل المصري زبالة (ده عمتا) بس تقفيل البيجو مش وحش.......لكن مشكلة الفرنساوي انها قديمة وحتبقي متهلكة ( لو لقيت واحده حالتها حلوه يبقي تتوكل علي اللة)... وطبعا لو مصري موديل 98 او 99 وحالة نضيفة بردوا اتوكل علي اللة ( اللي عايز اقولوا اعمل موازنة بين الفرنساوي والمصري علي اساس الحالة)..

المهم قوي لازم تروح تكشف عليها في التوكيل علشان يطلعلك العيوب اللي مش باينة ( كشف عام ب 165 جنية) وتقاو عايز اعمل كبس موتور.....

وربنا يوفقك وانا تحت امرك في اي حاجة

[م.احمد زكريا]

انا متشكر جدا ليك ولإهتمامك
وربنا يسهل وألاقي حاجة حالتها حلوة

الف شكر ليك يا باشا

[Mostafa]

بص يا باشا
يوم ما تقرر انك تشترى 405 انا هعتبرك انك اخدت واحد من اكتر القرارات اللى ان شاء الله مش هتندم عليها ابدا فى حياتك
ردا على سؤالك فى الاول اعتقد ان المصرى احسن لانك الفرنساوى كده قديم قوى ومعظمه حالته دلوقتى مش ولا بد . حاول تشترى ما بين موديل 99 لحد 2004
اولا فى كل المديلات دى لا شئ تغير كلهم حاجه واحده بالظبط مفيش غير سنه الصنع بس انما مفيش مسمار اتغير فى العربيه.
انا كان معايا 405 موديل 2003 ودلوقتى مع والدى 405 موديل 99 (انا اللى اشتريتها بس عجبته فأخدها)
المميزات :
واسعه جدا جدا . مريحه جدا جدا . موزونه على الطريق . قطع غيار متوفره فى كل وقت وفى كل مكان (لو عايز للعربيه ابره هتلاقيها) . قطع الغيار معمره فعلا يعنى ركبها وانساها وده عن تجربه . الموتور معمر وقوى (اعرف واحد معاه 405 عامله 380 ألف ولسه الموتور زى الفل) .
العيوب:
الموتور كاربراتير . سحب العربيه على السرعات العاليه مش قد كده . هوه كويس وبتجيب سرعات زى ما انت عايز بس السحب بطئ شويه . صوت الموتور بتاعها مش حلو بحس ان فيه كركره كتير. بس فيه 405 برستسج ودى موتورها 2000 سى سى حقن الكترونى والموتور ده اكتر من رائع وتفادى كل مشاكل الموتور العادى ال 1600 عيبه بس ان قطع غياره اغلى شويه ومش متوفره زى ال 405 العاديه
---
وانت بتشترى خد بالك قوى قوى من ان العربيه تكون فابريقه دواخل . ال 405 العفشه الاماميه بتاعتها كلها متحمله على القنطره الاماميه . فلو العربيه عامله حادث امامى جامد هتكون فى منتهى القرف انك تظبط العفشه بتاعتها . لو هتشترى 405 عاديه خد بالك قوى من الكربراتير لانه هوا روح العربيه وسعره غالى قوى بالنسبه لاسعار قطع الغيار فلازم ميكونش فيه مشاكل . وخد بالك كمان من التابلوه الامامى تكون حاله الجلد كويسه عشان الجلد لما بيقلب ملوش اى حل غير انك تستحملها كده.
وانا تحت امرك وممكن لو حبيت اجى اتفرج معاك على اى عربيه 405 عاوز تشتريها وان شاء الله افيدك لانى بحب العربيه دى جدا ومتعمق شويه فى تفاصيلها

[م.احمد زكريا]

انا متشكر جدا ليك يا مصطفى

ريحت قلبي وطمنتي وربنا يسهل وأجيب حاجة سليمة

[Mahmoud_405]

تقيم ممتاز يامصطفي..بس انا كنت عايز اعرف ياعني اية جلد الطبلوه يقلب؟؟؟ وهل ملمعات الطابلوه غلط؟؟؟ وازاي احافظ عليه؟

[Mostafa]

هقولك يا محمود باشا . التابلوه بتاع ال405 لما بيتهرى من الشمس بيبدأ تلاحظ شويه حاجات كده زى :
1- عند فتحات التكييف ممكن تلاحظ ان الجلد بتاع التابلوه بدأ يبعد عن الاطار البلاستيك بتاع الفتحات .
الكونسول اللى فى الوسط اللى فيه تحكم التكييف والساعه الديجيتال. ممكن تلاقى الجلد بتاع التابلوه بدأ يبعد عن مكانه وبيبقى شكله وحش قوى . انا عندى حته كده فى العربيه مدايقانى جدا .
بالنسبه بقى لموضوع ملمعات التابلوه . انا فى العربيه ال405 القديمه كانت جديده وكنت بستخدم معاها ملمعات التابلوه على طول وكان زى الفل وكويس جدا اولا لان التابلوه على طول بيلمع وثانيا لانه بيخلى الجلد طرى مش بينشف .
لما جبت ال405 التانيه كان الجلد بتاع التابلوه ناشف قوى (اكتر مشكله فى العربيه دى ان الشمس كانت هارياها . انا رشتها كلها من غير سمكره خالص لان الدهان كان محروق تماما) المهم بعد ما حطيت عليه ملمع التابلوه فوجئت بعد كام يوم ان فيه حته طقت فى الجلد . عملت زى ما تكون اتقطعت بموس وعملت الشكل ده + ادام الراكب الامامى . اعتقد ده لانه كان ناشف جدا وملمع التابلوه بدا يخيه يطرى قام طاقق لوحده

[Mostafa]

هقولك يا محمود باشا . التابلوه بتاع ال405 لما بيتهرى من الشمس بيبدأ تلاحظ شويه حاجات كده زى :
1- عند فتحات التكييف ممكن تلاحظ ان الجلد بتاع التابلوه بدأ يبعد عن الاطار البلاستيك بتاع الفتحات .
الكونسول اللى فى الوسط اللى فيه تحكم التكييف والساعه الديجيتال. ممكن تلاقى الجلد بتاع التابلوه بدأ يبعد عن مكانه وبيبقى شكله وحش قوى . انا عندى حته كده فى العربيه مدايقانى جدا .
بالنسبه بقى لموضوع ملمعات التابلوه . انا فى العربيه ال405 القديمه كانت جديده وكنت بستخدم معاها ملمعات التابلوه على طول وكان زى الفل وكويس جدا اولا لان التابلوه على طول بيلمع وثانيا لانه بيخلى الجلد طرى مش بينشف .
لما جبت ال405 التانيه كان الجلد بتاع التابلوه ناشف قوى (اكتر مشكله فى العربيه دى ان الشمس كانت هارياها . انا رشتها كلها من غير سمكره خالص لان الدهان كان محروق تماما) المهم بعد ما حطيت عليه ملمع التابلوه فوجئت بعد كام يوم ان فيه حته طقت فى الجلد . عملت زى ما تكون اتقطعت بموس وعملت الشكل ده + ادام الراكب الامامى . اعتقد ده لانه كان ناشف جدا وملمع التابلوه بدا يخيه يطرى قام طاقق لوحده

[م.احمد زكريا]

على فكرة في القت الحالي انا معايا 305 فيها نفس المشكلة في التابلوه
بس بدأ التشقق على شكل خطوط على حرف العدادات

في ناس قالولي أسية بس أنا مش مقتنع

بالمناسبه....... ليه مافكرتش تغير التابلوه حتى ولو إستيراد هل برضه سعرة عالي

مثلا بتاع ال 305 ب 1000 و بتاع 504 وصل 1500 جنيه

[Mostafa]

1- اسف ان ردى اتكرر وارجو من الاداره حذف التكرار
2- الفكره انك لو غيرت التابلوه صعب اوى انك تركب الجديد زى ما الاصلى كان راكب . عمره ما هيبقى زيه . هتبدأ بقى تسمع صفاره من هنا وشخلله من هناك وهيبقى صلحنا من اليمين وبوظنا من الشمال.
المشكله ان انا حاولت افك الكونسول اللى فى الوسط اللى فيه تحكم التكييف واحاول الزق الحته اللى قلبت دى لقيت اصلا وراها خامه كده شبه الاسفنج وتقريبا صعب جدا جدا انها تتلزق

[Mahmoud_405]

الف شكر يا مصطفي علي الرد