أعمل ايه مع الأسد العجوز ؟

[hossam_elwani]

اولا بيع واخلص التوضيب بلاعة فلوس ومش حتخلص ومش حتتعمل زى ما انت عايز اسمع كلامى انا مجرب مش بيقولو اسأل مجرب ولا تسأل طبيب انا كان عندى 504 صالون وفكتها بالحته وعملتها عند احسن صنايعية الناس بتشهد لهم وجبت ليها احسن قطع غيار فى السوق وفى الاغلب فرنساوى ومع ذلك النتيجة مخيبة للامال ومبالغ رهيبه وصلت لـ 12000 جنيه فى 1998 يعنى 30000 النهارده

ثانيا مين اكد معلومة ان 504 حتتصنع تانى من جديد كله اقتراحات غير مؤكده على حد علمى..... الى عنده كلام مؤكده بخصوص الموضوع ده يرد

[MaZaGAngeE]

ممكن بعض التفاصيل أكثرعن حالة العربية
حجم السمكرة
قليل ... مفيش خبطات و لا حاجة يمكن شوية ظبط صغيرين
أنا عملت عمرة ليها من 8 سنين و جبت طقم قشرة صاج للأبواب و جبت باب شنطة و شنب و مراية .
لو فيه بارومة هل منتشرة فى السيارة كلها ولا فى اجزاء معينة
هنحتاج نغير العتب و فيه شوية بارومة في الأرضية و في الداير بتاع العجلتين اللي قدام
حالة الدهان مقبوله ... عادية موش وحشة قوى .... جيدة
الدهان عادي
حالة العفشة هل تحتاج الى تغيير شامل او اصلاح اجزاء معينة
العفشة محتاجة ظبط بس غالبا
حالة الفاونيس والاشارات والعدادات والاكصدامات وشغل الكهرباء فيها
الفوانيس كلها كويسة و شغالة و الاشارات شغالة الاكصدامات كويسة جدا بس العدادات مش شغالة و الكهربا محتاجة شوية ظبط
حالة الفرش من الداخل والتابلوه ... مقبوله .. متوسط ... جيد
الفرش حالته كويسة و التابلوه جيد و سليم مش مقطع و لا مكسر منه حاجة
حالة الحوض والشنطة والقوئم هل تعرضت لحادث لا قدر الله ام فابريكة
الحوض مرشوش نظافة ( عدم خبرة مني و عدم ضمير من الصنايعي ) الشنطة كويسة بس محتاجة قفل جديد عشان الموجود بيعلق القوايم كويسة و لو قصدك حوادث كبيرة محصلش حوادث ليها قبل كده ( أنا أول مالك ليها )
واخيرة حالة الموتور تساوى كام فى المايه % يعنى ما هى المدة التى تتوقع ان يستمر فيها الموتور للعمل بكفاءة صيانته هل يحتاج طقم شنبر فقط ام عمرة كاملة
الموتور أظن 75% بس محتاج شوية رفايع حواليه زي طقم اصلاح للكربيراتير و لماستر الفرامل يعني ترويق بس
وطبعا لو قدرت تكتب تكاليف كل موضوع
أنا مش عارف الكلام ده هيصرف قد ايه بس العمرة اللي فاتت صرفت 7000 جنيه عشان كده أنا مقدرها ب 15000 دلوقتي

[MaZaGAngeE]

انا عرضتها في المنيا على 30000 و فيه ناس جايالي بكرة عشان تشوفها و تقدرها

[husseinoo]

اشكر حضرتك على سعة صدرك
وانك اجبت بشكل وافى على اسئلتى الكتيرة

واهم حاجة استفدت منها
هى ماذا تتوقع هاتصرف على ايه ؟
لو اشتريت سيارة مستعملة من خلال سعرها هاتعرف الحالة بتاعتها تقريبا

لكن الغريب انك كنت طالب 22000

واليوم طالب 30000

مع أن المفروض ان موضوع رش الحوض ده "يؤثر جامد فى سعر العربية"

ممكن اعرف ايه المقصود "بالداير بتاع العجلة" - "طقم قشرة صاج للأبواب - شنب "

النسبة لضبط العفشة "تقصد تحتاج الى تغيير مساعدين وييات"
ام ملىء المساعدين فقط لا غير

مع اطيب التمنيات
اخوكم حسين غزالة

[MaZaGAngeE]

اشكر حضرتك على سعة صدرك
وانك اجبت بشكل وافى على اسئلتى الكتيرة

واهم حاجة استفدت منها
هى ماذا تتوقع هاتصرف على ايه ؟
لو اشتريت سيارة مستعملة من خلال سعرها هاتعرف الحالة بتاعتها تقريبا

لكن الغريب انك كنت طالب 22000

واليوم طالب 30000

مع أن المفروض ان موضوع رش الحوض ده "يؤثر جامد فى سعر العربية"

ممكن اعرف ايه المقصود "بالداير بتاع العجلة" - "طقم قشرة صاج للأبواب - شنب "

النسبة لضبط العفشة "تقصد تحتاج الى تغيير مساعدين وييات"
ام ملىء المساعدين فقط لا غير

مع اطيب التمنيات
اخوكم حسين غزالة

يا حسين بيه أنا ماقلتش إني هبيع على 22000 ده كان كلام واحد تمنها و ما عجبنيش بس كان سبب إني أعرف هيه تساوي ولا لأ .
لما عرضتها على كذا واحد للبيع ( من باب معرفة السعر السوقي ليها ) سألوني عايز كام قلتلهم 30000 و أنا عارف إنه رقم كبير عليها بس إنت عارف الناس السماسرة لم قلت 20000 هيقول كتير جدا و ممكن ياخد العربية و فوقيها فلوس و كمان يمشي زعلان عشان ماخدش سمسرة كويسة .

النهاردة كان عندي بعد الصلاة واحد سمسار من أسيوط هيشتريها و يوضبها و يبيعها ( أكل عيش يعني ) و طبعا طلع العربية زي ماتكون كاروو و في الآخر تمنها ب 20000 . أنا قلت له سيبني أشور و أرد عليك و مان ناقشتش السعر معاه خالص عشان حور عليا زيادة قوي .
تعليق السمسار على العربية :

1- تغيير عتب
2- بارومة في أرضية العربية
3- محتاجة قشرة للصاج
4- الموتور محتاج جوان بتاع الكبس ( مش فاهم ده ايه بالظبط بس ما سألتوش ) بيقول فيه بخرة خفيفة طالعة من بيت الزيت ( و لا عارف ده ايه برضه ) .

بس الراجل هياخد العربية عشان ست بيت.............

طبعا الراجل ده بيشتغلني بس ممكن يكون كلامه صح هشوف ميكانيكي نضيف و أسأله .


ضبط العفشة يعني تربيط المساعدين و اليايات و لو محتاجة ملء ...... يعني كده مش تغيير مساعدين .

الداير بتاع العجلة يعني بطن الرفرف تقريبا .. لو بصيت كده على العجلة من جوة

طقم القشرة الصاج ده عبارة عن صاج للباب بيتركب عليه تفك القديم و تركب الجديد بدل ما تشتري باب جديد و ده بيتعمل لو الباب كويس و مش محتاج يتغير ....

[nabaster]

هرد عليك يا مزجانجي رد علي السريع بس ده بسبب اني مشوفتش العربيه ومقدرش احط سعر ليها

بس عموما اسمع مني

دلوقت لو عربيه حالتها 90% اساس وعفشه وميكانيكا وصالون لو حبيت تخليها 95% مش هتصرف اقل من 6 تلاف جنيه دي حاجه

وانسي انك تخلي بيجو 504 بذات ميه في الميه وبحالة المصنع لانها هتوصل معاك لمبلغ خيالي ممكن يعندي الـ 25 الف توضيب بس

واقصد بحالة المصنع انك تجيبلها المسمار بتاع بلادها

بالنسبه لسعر العربيه علي وضعها الي بتقولي عليه

السمسار بتاع اسيوط قالك محتاجه جوان وفيها بخر خفيف يبقي فكك منه والمكنه زي الفل

بس يمكن محتاججه تتظبط بس وده يدخل قول في 500 جنيه

قول شغل عفشه كامل

طقم جلد كامل ورا وقدام يعمله 250 - 300 جنيه

طقم مساعدين خلفي 250

طقم سوست 120 جنيه

مساعدين امامي مش عارف اصراحه وصلو كام بس دول غاليين اوي اوي وصل الواحد 1200

بس دول بيتفكو وبيتملو مش بيتغيرو الا لو مكسوريين ويصرفو 250 جنيه

مجموع شغل العفشه قول 1000 جنيه

عندك بقي جسم العربيه في حاجه انا مقتنع بيها ان طالما الباب اتغيرت الطبله بتاعته مره يبقي خلاص متتغيرش تاني لان شكل العربيه بيبقي مش مظبوط في الاخر مهما عملت

فلو محتاجه شغل سمكره بسيط كان بها لو بايظيين خالص هاتلك طقم باب بس الطقم عندك هيدخل في 4000 - 5000 جنيه

قول مش هتغير وهتسمكر بس وعندك مرمات في الدواسه وهتغير عتب ومرمات في داير العجل يبقي كده قول 1000 جنيه سمكره ومرمات بالعتب

ادخل بقي علي الدوكو العربيه بحالها ده خصوصا ان عندك مرمات في الدواسات يبقي كده هتدخل معاك في 1500 خامات بمصنعيه

انتا عندك مرمات في الدواسات يبقي كده هتفك الصالون وبالمره اكيد هتوضبه كسوه بقي ونضافه وبتاع قول ادي 1000 جنيه بالمصنعيه بالتركيب بكله

كده العربيه هتدلع من معاك عروسه ان شاء الله بس اعمل حسابك الموضوع ده تقريبي يذيد 1000 يقل 1000 ده بقي علي حسب الصنايعيه وعلي حسب حلة العربيه الي انا مشوفتهاش

الي حتي ولو شوفتها مقدرش احدد سعر بظبط برضه لان العربيه لما بتتحل متنكرش انها بتفتح شويه عن الي حاطه في دماغك

كده المجموع تقريبا 5000 تلاف 6000 تلاف جنيه وده بدون ما تغير طقم باب ولا تجيب اي حاجه غير طقم العتب بس يعني بدون شنب ولا مرايات صاج (ورا الاكصدام) ولا اكصدمات ولا فوانيس ولا طقم جريد

يعني دول مبدايا

يعني اصراحه لو عرفت توصل العربيه لـ 23 للراجل بتاع اسيوط بييييييييع وانتا مطمن انك متظلمتش

لو ليك اي استفسار مستنيه

A.Yakout

[husseinoo]

ا
اللهم صل على محمد وعلى آله وصحبه أجمعين
كل عام وحضراتكم بخير

الله يكرمك يا رب على المعلومات الجميلة قوى
خصوصا تحذيرك من نصب "السماسرة" طبعا موش كلهم نصابين ... لكن اغلبهم يحبوا "يخسفوا للناس أشيائهم" ويطلعوا القطط الفاطسة فى الحاجة ويكرهوه فيها

لكن الغريب فى الحوار ده أن حضرتك قلت ان حالة الموتور حوالى 75% ودى موش قليلة ... ده معناه ان الموتور جيد وممكن يشتغل مع واحد بيطحن مشى موش اقل من 3 سنوات

ازاى السمسار ده يقول ان الموتور محتاج "جوان كبس"
طبعا انا موش فاهم قصده إيه بجوان الكبس
ممكن هيرو او اسلام او اى حد يفهمنا

واذا كان كلام السمسار ده سليم "وأنا اشك فى كده" ... لأن صاحب السيارة اكيد ادرى بحالتها

يعنى عشان سيارة محتاجة شوية سمكرة فى الصاج "تتباع بـ 20000" الف جنيه

اعتقد ان السبب الرئيسى هو "موضوع رش السيارة من الداخل" فقط لا غير

لان فيه سيارة كانت رشة من الداخل أمامى فى السوق وكان ممكن يوصل ثمنها الى 20000 او 19000
لكن اعتقد ان السيارة "موش رشة من الداخل نظافة" ...لأ دى عاملة حادثة وكان واضح ان فيه لحام فى الحوض ... ودى قصة ثانية

النهارده وانا نازل اشترى ملابس للاطفال الصغيرة "بمناسبة العيد" ... كل سنة وانتم طيبين جميعا ...
المدام ببتفرج على الملابس ... وانا بتفرج على السيارات اللى ماشية
اقسم بالله العظيم ... أن مافيش سيارة عليها القيمة إلا البيجو 504 ... والسيارات الحديثة العائلية الكبيرة وطبعا غالية

لكن للأسف ان الجميع يحاول ان يشترى الجديد ... لمجرد انه جديد ... وللشكل الحلو

حتى فى البيت عندى موش مقتنعين بأن البيجو 504 لا يعلى عليها ... وعايزين سيارة شكلها جديد مثل "الاسكودا فلاشيا" او السوزوكى سويف ... على سبيل المثال

اخيرا وانا مروح
واحد راكب سيارة كبيرة وبيحاول يخرجها من بين عربيتين
ههههههههههههههههه
وانا بتفرج هاشوف هايعمل ايه فى الزنقة دى
الراجل مجرد ما ريح ثانية واحدة على عربية حديثة تقدر تقول عليها "توت فروت"
ريح عليها فقط
كان هايكسر الفانوسين والشبكة

قلت له يعنى لو راكن وراك بعربية بيجو 504
موش كان الاكصدام بتاع البيجو كان هيبقى فى مستوى اكصدام سيارتك وعمرك ما كنت هاتخبط الفاونيس والشبكة بالطريقة دى

عربيات جديدة معمول عشان تتكهن موش عشان تريح ... إلا إذا كانت زيرو
او ماشية فى شوارع سليمة مثل اوروبا موش شوارع زى شوارعنا

حتى اعز اصدقائى النهارده كان راكب "لادا" ... بعد كده دلوقتى راكب "لانوس"
الراجل من نفسه بيقول المشكلة لما يركب معايا حد "ورا"
وفى بعض المطبات لازم العربية تحك من تحت

لكن هو بيقول موش مشكلة ما هو انا موش طول الوقت بركب ناس معايا ... لكن السيارة حلوة
طيب معقولة الكلام ده
ايه رأيكم فيه

شاكر لحضرتك معلوماتك القيمة
مع اطيب التمنيات
اخوكم حسين غزالة

[nabaster]

اخيرا وانا مروح
واحد راكب سيارة كبيرة وبيحاول يخرجها من بين عربيتين
ههههههههههههههههه
وانا بتفرج هاشوف هايعمل ايه فى الزنقة دى
الراجل مجرد ما ريح ثانية واحدة على عربية حديثة تقدر تقول عليها "توت فروت"
ريح عليها فقط
كان هايكسر الفانوسين والشبكة

قلت له يعنى لو راكن وراك بعربية بيجو 504
موش كان الاكصدام بتاع البيجو كان هيبقى فى مستوى اكصدام سيارتك وعمرك ما كنت هاتخبط الفاونيس والشبكة بالطريقة دى

هعلق علي النقطه دي بس يا حسين بيه

انتا لو راكن ورا لادت مثلا بعربيه بيجو ورجع عليك لازم لازم هيحمل علي الشبكه و الفوانيس لان اكصدام البيجو واطي من قدام علي عكس الي ورا الي لو في ميكروباص دخل فيك من ورا هيتكسر وش الميكروباص كله بسبب اكصدامك العالي

بالنسبه بقي لموضوع صاحبك الي معاه الادا

طبعا فرق السما والارص بين الادا وبين الانوس

الانوس اثبتت كافأتها في عربيه يتعمد عليها فعلا وبتاعه (هرك) مش عربيه فافي اوي يعني

بالنسبه ان عربيته بتحك في المطبات وتوطي منه لما يركب حد بسيطه

قاله يركب صدادات للمساعدين الي ورا بحيس العربيه توصل لمستوي معين مش هتنزل عن كده بعد كده مهما حمل

وفي المطبات العاليه مش شرط ياخد المطب بوش العربيه خليه (يعرض) علي المطب او بمعني تاني (يسبع) عليه

وبجد ليك وحشه يا باشمهندس حسين

A.Yakout

[husseinoo]

مساء الفل
والله يا استاذ "ياقوت"
انت معلم قوى

وكلامك ده بيفهمنى حاجات عمرى ما كنت هاعرفها ابدا

كلامك كله بحساب
وعشرة على عشرة

يعنى من الآخر
لو العربية موتورها كويس
واساسيتها كويسة
لكن يوجد بعض البارومة ... ممكن تفتح معى صاحبها فى حوالى 5000 جنيه

ده مجرد "بارومة - سمكرة - فرش - دهان"
يعنى الراجل ما ركبش مسمار ولا قرب فى للماتور

يا خبر ابيض

ايه المقصود
طقم العتب
الشنب و مرايات صاج (ورا الاكصدام)
طقم جري

ده موضوع الصيانة ده "موال" ... وشراء سيارة ده يعنى لازم يكون معاك "معلم" موش اقل من استاذ ياقوت فى معلوماته

الله يكرمك يا رب
ويسعدك دنيا وآخرة
ويطرح البركة فى أولادك وفى اسرتك
ويكرمك زى ما انت بتساعد الناس بمعلومات القيمة

كل سنة وحضرتك طيب

اخوك حسين غزالة

[nabaster]

بجد شكرا علي كلامك يا حسين بيه الي بجد مش عارف ارد عليه

ووالله انا مش استاذ للدرجه وبتغلب والله ساعات

فوق كل زي علم عليم

وبعدين انا استفدت من المنتدي ده جدا جدا لازم يعني افيد فيه اخواتي الي استفدت منهم

ولما انك جبت سيرة الاسره متشوفلي عروسه عندك طيب؟؟؟

ههههههههههههههههههههه

اكيد هتتفاجيء من كلامي بس فعلا انا تقريبا 22 سنه يعني اخو حضرتك الصغير وتقريبا تقدر تقول خاطب يعني

حتي اسلام لما قابلني من كام يوم بيقولي يا راجل انا فاكرك اكبر من كده هههههههههههههه

ايه المقصود
طقم العتب
الشنب و مرايات صاج (ورا الاكصدام)
طقم جري

ردي بقي علي سيادتك في الصوره دي



رقم 1 دي العتبه ومع اليمين والشمال يبقي اسمه طقم العتب

رقم 2 دي طقم المرايه بتبقي ورا الاكصدام تحت الشبكه و الفوانيس وبتتلحم في الرفرف من هنا ومن هنا والشنب بيتلحم من فوق بين الرفرفين وينزل الطقم علي بعضيه الرفرفين والشنب والمرايه مع بعض في العربيه حته واحده وده وش العربيه

طقم الجريد الي هوا طفم الجلد علي باب العربيه والرفارف

بالنسبه بقي لموضوع البرومه وتكلفتها فا دي علي حسب البرومه فين ومساحاتها قد ايه ومعاك من 200 جنيه لحد 3000 جنيه علشان تلم البرومه بس بدون اي شيء تاني (دوكو او سروجه او اي شيء تاني)

واي استفسار تاني تحت امرك

A.Yakout

[husseinoo]

اللهم صل على محمد وعلى آله وصحبه أجمعين

الله يكرمك يا ياقوت
يا سيدى انا تحت امرك ... وبالنسبة للعروسة ما عنديش إلا كتكوتة صغيرة قوى "بنتى " ...بس هاتتعبك ولازم تستناها شوية عشان هى اربع سنين بس ههههههههههههه

بس موش هالاقى احسن منك راجل ابن راجل

بالنسبة للسن الصغير
انت صغير السن كبير العقل
انت واسلام وهيرو
شباب زى الفل
شباب عنده العلم والمعرفة والعطاء والحب

وشغف بالعلم والمعرفة
موش شباب هايف

وإن شاء الله ربنا هايكرمك وتفرح بعروستك

بس انت اهم حاجة "تنوى" موش بالكلام ... بالعمل
وإن شاء الله يكون زواج سعيد

انا طبعا فهمت الى حد ما اغلب الكلام اللى حضرتك كتبته

بس لو كانت الصورة كبيرة شوية كانت الإستفادة هاتكون جامدة قوى

على فكرة انت عندك معلومات بالنسبة لى "معلومات رهيبة"
انا اول مرة اعرفها

يا ريت يا ياقوت تعمل مشاركة مستقلة
وتفهمنا موضوع الصيانة
وكل التفاصيل عشان تكون مرجع لكل واحد بيفكر يعمل صيانة لسيارته

منها انه يتعلم قبل ما يعمل حاجة تكلفه وهو موش عارف حجم التكاليف

وكمان عشان لو حد اشترى سيارة مستعملة "لا يندفع وراء حلم اقتناء سيارة بيجو 504 الحلم" ... لازم يحرص كويس
ويتعلم منك
ويفهم منك كل كلمة وكل حرف بتكتبه

خصوصا ان كثير من السيارات التاكسى تم تحويلها ملاكى
ويتم بيعها
ويوجد كثرة منها فى السوق

كيف تحكم على السيارة
كيف تحدد الحد الأدنى من احتياجاتك من اى سيارة مستعملة
كيف تحدد تكاليف الصيانة المتوقعة لو اشتريت السيارة
كيف تحدد المتوقع من هذه السيارة ما هىالمدة التى من الممكن ان تستمر معاك ثم تبدأ فى فتح "بؤها" زى ما بيقولوا
كيف تحترس من التجار ولا تتأثر بمعسول الكلام وتثق فى كلامهم

كل حاجة هاتكتبها لنا يا ياقوت
هاتكون مرجع وتحذير وإفادة
لكل من يملك بيجو 504
لكل من يرغب فى اقتناء بيجو 504 مستعملة ... ممكن يصرف نظر وكده يحافظ على فلوسه ... او يتوكل على الله ويشترى وهو مطمئن
لكل من يرغب فى بيع سيارته "ممكن حساباته" تجعله يحتفظ بالسيارة وده يكون اوفر له

ممكن يكون معانا ميكانيكى وسمكرى ... والأعطال بالنسبة لهم بسيطة لكن بالنسبة للمشترى هاتكلفه جامد زى ما انت وضحت لنا "الله يكرمك"

الله يكرمك يا شيخ
كوباية شاى حلوة
ونظم الموضوع براحة فى دماغك

وبدون استعجال

اشرح لنا كل مشكلة وحلها وتكلفتها
ورأيك الشخصى قبل اى شىء

وافتح باب المشاركات القيمة فى المنتدى

وبعد اذنك ممكن نقترح اسم المشاركة
"سؤال وجواب بين مبتدأ فى البيجو 504 .. ومحترفين نايل موتورز"

او اكتب اى اسم تحبه للمشاركة

المهم انا منتظر منك ومن هيرو ومن اسلام ومن كل الشباب اللى زى الفل عطاء مستمر
واستفادة جامدة منكم
فى الميكانيكا
فى العفشة
فى الكهرباء
فى الدهانات
فى التعديلات
فى كل حاجة لها علاقة بالأسد الفرنساوى

الله الموفق
وربنا يسعدك دنيا وآخرة

مع اطيب التمنيات
اخوكم حسين غزالة

[MaZaGAngeE]

يا حسين بيه أنا معاك في رأيك ده و كلامك على راسي
أنا مش هاين عليا بيعها خالص

أ. ياقوت العربية موجودة و أنا مستعد و جاهز و موافق إنك تاخدها تعمل عليها الموضوع بتاعك ده بالتفصيل الممل و زي ما تاخد وقت مش مشكلة.
على فكرة أنا بنزل مصر كتير و ساكن في مدينة نصر و كل شهر عندي أسبوع أجازة مستعد أقضيه معاك لو مش هتزهق مني . بس أخوك أبيض في السمكرة و الميكانيكا و الكهربا و خلافه .

أنا بحب العربية دي جدا و صعبان عليا إني أبيعها قوي

[husseinoo]

يا استاذ دى عربيتك وانت فهمتها كويس
ومتعود عليها
شوية سمكرة وتلم المسائل
وتشترى عربية بـ 3000 او حتى 5000 زى ما ياقوت بيقول
وريح دماغك وعربيتك معاك ... والماكينة سليمة مية مية
باقى التفاصيل ممكن حين ميسرة
اهم حاجة تلم البارومة قبل ما تفتح فى السيارة

"وقلم بوية محترم" واتفرج عليها
جالك الزبون اللى على مزاجك ... وليك مزاج تغير وتبيع "براحتك"

ما جاش الزبون اللى على مزاجك
عربيتك تحت رجليك
وشكلها زى الفل
وماكينة زى الفل
محتاج ايه تانى

ربنا يكرمك
وييسرك لك الاحوال

وفى حالة التغيير
يا تجيب اسد مكان اسد
يا بلاااااااااااااااااااااااااش

[nabaster]

أ. ياقوت العربية موجودة و أنا مستعد و جاهز و موافق إنك تاخدها تعمل عليها الموضوع بتاعك ده بالتفصيل الممل و زي ما تاخد وقت مش مشكلة.
على فكرة أنا بنزل مصر كتير و ساكن في مدينة نصر و كل شهر عندي أسبوع أجازة مستعد أقضيه معاك لو مش هتزهق مني . بس أخوك أبيض في السمكرة و الميكانيكا و الكهربا و خلافه .

أنا بحب العربية دي جدا و صعبان عليا إني أبيعها قوي

وعلي ايه القاهره ؟؟؟

انا جمبك يا رايس من اسيوط يعني كلها ساعه ونص وتكون عندي

ان شاء الله الشهر ده يعدي بس علي خير لانه امتحانات :(

ادعولي بقي

وبالنسبه لاستاذ حسين ربنا يسهل افضي بس وعيوني ليكم ان شاء الله واسم الموضوع كويس جدا

وهيبقي ان شاء الله بطريقة سؤال وجواب لاي استفسار عن البيجو عموما او لو حابينه عن الـ 504 خصوصا معنديش مانع

A.Yakout

[MaZaGAngeE]

وعلي ايه القاهره ؟؟؟

انا جمبك يا رايس من اسيوط يعني كلها ساعه ونص وتكون عندي

ان شاء الله الشهر ده يعدي بس علي خير لانه امتحانات :(

ادعولي بقي

وبالنسبه لاستاذ حسين ربنا يسهل افضي بس وعيوني ليكم ان شاء الله واسم الموضوع كويس جدا

وهيبقي ان شاء الله بطريقة سؤال وجواب لاي استفسار عن البيجو عموما او لو حابينه عن الـ 504 خصوصا معنديش مانع

a.yakout

أحمد بيه كويس اننا جيران دي حاجة جميلة , ربنا يوفقك في الامتحانات و ينجحك و لما تخلص نبقى نبدأ شغل في العربية مع بعض و تكون هيه موضوع منتدى بيجو 504 .