الديسك ؤقفش في الاسطوانه ومش عايز يسيبها

[nour2007]

النهارده وانا راجع من القاهره حسيت بتقل في فتيس العربيه وعلي ما وصلت البيت وصلت لمرحلة ان مفيش غيارات قادر اخدها اتصلت بالميكانيكي وجالي الحمد لله كنت وصلت بلبيس وقاللي ان الديسك قافش وهيحتاج يتحل واحتمال كبير يتغير
العربيه بايته عنده وهيبتدي شغل من الصبح
الدلوقتي الحاله ان العربيه ما بتقبلشي غيارات لازم ابطل العربيه واديها اول او تاني واطلع علي طول وعلشان اوقف العربيه لازم ابطل الموتور
يعني مفيش فصل حركه نهائي وير الدبرياج سليم وشغال
لما اخلص شغل انا والميكانيكي هبقي احكيلكم علي اللي حصل معايا
ادعولي ربنا يجيب العواقب سليمه يارب

[atamim]

باذن الله العواقب سليمة

[AymanPt]

انا حصل لي نفس الموقف ده بالضبط من كام يوم في البيجو الـ 205

بس دواسة الدبرياج كانت وطيت أوي ,, و العربية مش عايزة تنقل ,, لآزم أبطل و أنقل و بعد كده أدور و أمشي

عليت دواسة الدبرياج بأيدي و العملية أتحلت الحمدلله

إن شاء الله تتطلع العملية بسيطة ولا تحتاج أنك تغير طقم الدبرياج .

[nour2007]

تم حل الاسطوانه والديسك ولقيت السوست متكسره بتاعة الاسطوانه
وتم التغيير بجديد auto motor France
وسعره 425 جنيه والحمد لله الوضع اختلف كتير بالنسبه للسحب

[د.محمود صلاح]

الحمد لله جت سليمة والتكلفة معقولة

[Nour_Peugeot]

طيب الحمد لله انها جت علي اد كده بسيطه

[nour2007]

شكرا علي ردود كل الاخوه الزملاء
بس المشكله ان الواحد ماكانشي عامل حسابه في المبلغ ده اتعورت فيه جامد دا انا لسه مغير كبالن الشهر ده
تعاطفك لوحده مش كفايه اتبرع ولو بجنيه

[the-hero]

بس طلعت اصية ووصلتك ازاى لحد البيت وكويس انها جت فى الدبرياج لأنك كدا كدا كنت هتغيره
وانا من مكانى هذا بناشد الأعضاء للتبرع ومن قدم شئ بيداه التقاه وهنيالك يافاعل امممممممممممم خير حا ضر حاضر من عنيا
يا حضرة الظابط خد الناس ديه من هنا انا هتبرعلك بريال ياعم يلا مش جنية عشان تغنى وتقول معايا ريال معايا ريال ده مبلغ عال مهوش بطال ترم لم لمم لم لم لم
ههههههههههههههههههههههههههههههههههههه

[nour2007]

بس طلعت اصية ووصلتك ازاى لحد البيت وكويس انها جت فى الدبرياج لأنك كدا كدا كنت هتغيره
وانا من مكانى هذا بناشد الأعضاء للتبرع ومن قدم شئ بيداه التقاه وهنيالك يافاعل امممممممممممم خير حا ضر حاضر من عنيا
يا حضرة الظابط خد الناس ديه من هنا انا هتبرعلك بريال ياعم يلا مش جنية عشان تغنى وتقول معايا ريال معايا ريال ده مبلغ عال مهوش بطال ترم لم لمم لم لم لم
ههههههههههههههههههههههههههههههههههههه

من ناحية اصيله فهي فعلا اصيله مقدرشي انكر وانا من شهر ونص بس مليت الاسطوانه تيل ومن ساعتها وانا بسمع تكتكه من المكنه ولما ادوس دبرياج كانت التكتكه بتروح لذلك انا كنت شاكك في موضوع ملي الاسطوانه والعك بتاع الميكانيكي وروحتله قبل الموضوع ده بيومين وقلتله حل الاسطوانه والديسك انا قلقان منهم صحيح سحب العربيه كان كويس بس التكتكه دي ماكانتشي مريحاني وكنت قلقان علي المكنه و المهم الميكانيكي قاللي الدنيا زي الفل ورده شمعه منوره وحل التكتكه ده اننا نغير زيت الفتيس بزيت تقيل وفعلا راح جاب زيت انا اول ما شفته افتكرته شحم وحطه يادوبك يوم والتاني والتكتكه راحت والديسك راح والاسطوانه راحت والبوتجاز راح .......
عموما الحمد لله انا مابحبش التلصيم في التصليح وانا كمهندس دايما في شغلي بدقق في الموضوع ده وصعب اوي ان عطل اصلحه ويبوظ تاني لأن شغلي فل الفل بس الظروف الماديه هي اللي ساعات بتخليني اتصرف والصم
المهم فيه ميزه جديده الدلوقتي في البيجو انه مهما الصنايعيه يعكوا العربيه ماشيه رغم انف الكارهين

وبعدين ايه الحكايه مش شايفين تبرعات يعني

[Nour_Peugeot]

من القاهره بتبرع ب 5 جنيه

بس انا العيز تبرع 10 الف جنيه عشان اكمل المشروع بتاع العربيه ده ههههههههههههههه

[the-hero]

وانا كمان سعدونى اجيب 406 ديه رخيصة هنا اوى هههههههههههههههههههه
ونقلب اسم المنتدى يبقى منتدى متسولين بيجو
ونبعت لبيجو فرنسا يشوفلهم حل فالعربيات بتاعتهم اللى جننتنا وفلستنا دنا فى مصر كنت بحرم نفسي من العشا عشان تشتعشي

[nour2007]

رقم الحساب 000000000
وده لكل مساكين و محتاجين بيجو

[nour2007]

وانا كمان سعدونى اجيب 406 ديه رخيصة هنا اوى هههههههههههههههههههه
ونقلب اسم المنتدى يبقى منتدى متسولين بيجو
ونبعت لبيجو فرنسا يشوفلهم حل فالعربيات بتاعتهم اللى جننتنا وفلستنا دنا فى مصر كنت بحرم نفسي من العشا عشان تشتعشي

بتعمل كم عندك ال 406 ؟؟

[kisho55555]

هى ال 406 لسه بتنزل يا هيرو ولا ال 407 هى البديلة ليها ...؟؟؟

الحمد لله ان تصليحات الاسطوانه ب 400 جنيه .. انا غيرتها فى ال 504 والمجموعه كانت 630 جنيه والحمد لله السحب جميل جدا والنقل سهل وكل حاجة تمام ...

ايه يا هيرو ..... لو انت نزلت باقل من 607 مش هندخلك مصر وانت حر بقى ...

[the-hero]

مشفتش هنا 407 نهائيا
ال 406 هنا بتتباع مستعملة بس حالات بقي مقولكش واكترها ال 6 سلندر ال 3000 سي سي بتعمل فى حدود من 15 الى 18 الف