ما هو القول الفصل فى بيجو 206

[atamim]

السلام عليكم ورحمه الله و بركاته

بالنسبة للبيجو الحديث تعد ال 206 اول الاشكال الحديثة منه

و كمان هاتشباك و سعرها هو نفس سعر البيجو ال 405 بالرعم ان سعرها الاساسى مفروض كان اعلى من سعر البيجو ال 405 لما كانت زيرو

و انا بحب جدا العربيات الهاتشباك و لما بحثت عن العربيات فى الاعلانات وجدت ان كثيرون يبيعونها لم تصل لل 90 الف كيلو لموديلات ال 2001 و ما يقرب لها

بسعر فى بداية الاربعينات

يا ترى اى الاسباب؟

و هل بها عيوب متكررة و سعر تصليحها غالى؟؟؟؟؟؟؟؟؟
ام هذا ما تعارف علية الناس فى تقييم ثمنها ؟؟؟

[waleedabbas]

من الاخر ال 206 عربية تحفة من احسن العربيات فى فئتها ولا يوجد فيها عيوب تذكر ومن اكتر العربيات فى ماركة بيجو ال مفيهاش عيوب زى ال 405 بالعكس بتتميز عن ال 405 ان الموتور احدث والتسارع بتاعها افضل (سرعة التجميع وليس السرعة القصوى ) واستهلاكها للبنزين ممتاز
اما بالنسبة للسعر ده بيرجع لسببين اولا هى عمرها ما كانت اغلى من ال 405 وهى زيرو وقت ماكانت ال 405 زيرو ب 87 الف كانت ال 206 ب 49 الف ولما ال 405 وصلت 124 الف كانت ال 206 ب 92 الف يبقى طول عمر ال 405 اغلى ولو لقيت 405 مستعملة نفس موديل السنة بتاعة ال 206 هتلاقى برضه ال 405 اغلى
السبب التانى وده طبيعى ان فى المستعمل السيدان بيتفوق على الهاتشباك عشان طبعا اتساع الصالون والشنطة الكبيرة وطبعا فرق الموتور 1600 سى سى

[waleedabbas]

بالنسبة لاسعار قطع الغيار متوفرة جدا ورخيصة تقريبا زى ال 405

[atamim]

طيب بالنسبة للى موجود فى مصر دلوقتى

هل هو فرنساوى بس ولا فية منه تجميع مصرى و ايرانى؟

اقصد اكتر موديلات بداية الالفين و مواتير ال 1200

[se3da]

إلي موجود منها في مصر لحد موديل 2005 فرنساوي بلكامل إلي هي 1200 و-1400

و السيدان إلي موجودة دلوقتي إيراني

[waleedabbas]

كل الهاتشباك ال فى مصر فعلا لغاية 2005 فرنساوى 100% وده من ميزات العربية دى لكن السيدان فعلا هى ال ايرانى

[atamim]

طيب رنج الاسعار كام ؟

و سعر ماتورها استيراد كام لو حبيت اغيرة ؟

[Dr_Smart]

يا ريت يا جماعه معلومات اكتر من البيجو 206 وتقييم مالكيها

وقطع غيارها اصليه ولا تقليد ولا الاتنين موجودين ؟ وصيانتها صعبه ولا اي ميكانيكي شاطر ممكن يتعامل معاها عادي ؟

ورينج اسعارها ايه واسعار قطع غيارها في الرينج المعقول ولا غاليه ؟

معلش هتعبكم معايا

وأستأذن صاحب الموضوع atamim في طرح استفساراتي

[waleedabbas]

رنج الاسعار فى الاربعينات فى موديلات الاوائل 2000 و2001 و2002
سعر الموتور استيراد متوسط 2500
زى معظم العربيات موجود قطع الغيار الاستيراد والجديد اصلى وفى التقليد برضه والاصلى مش غالى
اما بالنسبة للصيانة بلاش اى ميكانيكى هى صيانتها سهلة بس يا ريت واحد متخصص فاهم فى البيجو عشان ميكرهكش فى العربية والصنايعية عندنا ما يتوصوش فى الموضوع ده لكن هى سهلة جدا خليك فى المراكز المعتمدة
بقية الاخوة ان شاء الله يفيدوك بتفاصيل اكتر

[atamim]

يا ريت يا جماعه معلومات اكتر من البيجو 206 وتقييم مالكيها

وقطع غيارها اصليه ولا تقليد ولا الاتنين موجودين ؟ وصيانتها صعبه ولا اي ميكانيكي شاطر ممكن يتعامل معاها عادي ؟

ورينج اسعارها ايه واسعار قطع غيارها في الرينج المعقول ولا غاليه ؟

معلش هتعبكم معايا

وأستأذن صاحب الموضوع atamim في طرح استفساراتي

يا باشا براحتك بيتك و مترحك

المهم كلنا نستفاد و نفيد بعض بكل الاراء و الحلول الممكنه

[atamim]

رنج الاسعار فى الاربعينات فى موديلات الاوائل 2000 و2001 و2002
سعر الموتور استيراد متوسط 2500
زى معظم العربيات موجود قطع الغيار الاستيراد والجديد اصلى وفى التقليد برضه والاصلى مش غالى
اما بالنسبة للصيانة بلاش اى ميكانيكى هى صيانتها سهلة بس يا ريت واحد متخصص فاهم فى البيجو عشان ميكرهكش فى العربية والصنايعية عندنا ما يتوصوش فى الموضوع ده لكن هى سهلة جدا خليك فى المراكز المعتمدة
بقية الاخوة ان شاء الله يفيدوك بتفاصيل اكتر

طيب مش معنى ذكرت فقط رنج من 2000ل 2001
طيب بالنسبة لموديلات من 2002 ل 2005 اى الاسعار؟

كمان اى مشاكلها المعتادة؟ علشان الواحد يتاكد من حالة العربية قبل الشراء؟

و لو عربية موديل 2001 عاملة 91 الف كيلو سعرها يكون كام و حالتها اى بالنسبة للمسافة دى؟
و طقم السرفيس (سيور و فلاتر و خلافة)بيتغير امتى؟

و سير الكاتينه حديد ولا كاوتش؟

[amr mokhtar]

انا كان معايا واحدة موديل 2001 و بعتها عاملة 144 الف كيلو
العربية دى بجد ممتازة بس هى ككل البيجو تحب اللى يحافظ عليها و يعتنى بيها
يعنى لازم قطع الغيار الأصلية و زى ما قال أستاذ وليد يستحسن مركز صيانة محترم

فى فترة إمتلاكنا للعربية من الزيرو محستش إن فيه مشكلة محددة بتكرر كتير
يعنى مع الصيانة الكويسة بإذن الله مفيش مشكلة

بالنسبة لعربية قاطعة 91 الف كيلو فده مش كتير اوى
بس المهم الحالة
إكشف على العربية فى التوكيل لو حالتها كويسة و تحس إنها إستعمال نضيف
يبقى إتكل على الله و خد الخطوة

بس بلاش تاخد واحدة مش كويسة و تقول هشدها على مهلى عشان متكرهش العربية

بالنسبة لطقم السيرفس
هى بتعملها صيانة كل 10 آلاف كيلو بتشمل تغيير الزيت و الفلتر الزيت و البنزين
أما سير التقسيمة فبيتغير على 70 الف كيلو و هو سير جلد

[amr mokhtar]

حاجة كمان نسيت أقولها
المقارنة ما بين 405 و 206 مش هيحسمها غير إحتياجاتك
العربيتين كويسين
بس فيهم واحدة صغيرة و موتورها صغير و تعتبر شبابية
و العربية التانية كبيرة و موتور 1600 بس تعتبر عائلية

فكر فى إحتياجاتك و قرر و ربنا يوفقك

[atamim]

حاجة كمان نسيت أقولها
المقارنة ما بين 405 و 206 مش هيحسمها غير إحتياجاتك
العربيتين كويسين
بس فيهم واحدة صغيرة و موتورها صغير و تعتبر شبابية
و العربية التانية كبيرة و موتور 1600 بس تعتبر عائلية

فكر فى إحتياجاتك و قرر و ربنا يوفقك

شكرا يا استاذ عمرو على المشاركة
بس متهيئلى من نحية عائلة ولا شبابية الفرق بس فى شنطة العربية ولا انا غلطان

ولا قصدك الكنبة الى ورا فى ال 206 متاخدش غير اتين و التالت حيطون مزنوق ؟

[amr mokhtar]

ولا قصدك الكنبة الى ورا فى ال 206 متاخدش غير اتين و التالت حيطون مزنوق ؟

بالظبط كده