حد يعرف حاجة عن 405 رؤا

[eng / AhmeD]

يا جماعة في عربية اسمها بيجو 405 رؤا 1600سي سي بـ75000 حد يعرف عنها حاجة

[mohamed10]

وهذا تقييم بيجو روا من الأستاذ وليد عباس :( منقول من كونتكت كار)

بسم الله ارحمن الرحيم

تقييمى بالنسبة للبيجو الروا بعد 5000 كم
قبل اى حاجة ده مش تقييم خبير او فنى يعنى على قد ما عرفت من تعاملى مع العربية ولو انى بحب دايما لما اهرف حاجة عن عربية احب اسمعها من مالكها مش من ميكانيكى او تاجر او واحد سمع عنها لكن ماعلينا هحاول اقول بحياد وبدون تحيز
هقول الملاحظات على العربية الاول وهى:
- صوت الموتور عالى شوية بسيطة لكن مش مزعج ولا مسبب مشكلة بالعكس فى عربيات كتير اعلى منه وفى عربيات صوتها انعم لكن مع الكبس والشد بيقى صوته عالى لكن ظريف لدرجة ان اكتر من واحد كان فاكرنى مركب فلتر او ديفل.
- العفشة من ورا ناشفة شوية (عن البيجو ال 405 العادية لكن حلوة بالنسبة لعربات كتير) وده بسبب السوست الليف او الورقية لكن ليها مميزات تانية انها بتتحمل الاوزان والحمولات العالية وكمان انا طحنتها فى مشاوير كتير فى مناطق مينفعش اى عربية تدخلها صحراوية وشبه جبلية والحمد لله ميخبتش ظنى زى طبع البيجو عموما.
- الفتيس تقيل شوية مقارنة ببعض العربيات لكنه عادى مش متعب ولما سالت فى التوكيل قالولى عشان العربية دى مفيهاش اتياش منك للفتيس على طول .
دى الملاحظات ال طلعت بيها بعد استخدام اكتر من 5000 كيلو لكن الحمد لله العربية ماشية زى الفل وماشتكش من اى حاجة ولا عملت معايا اى حركة
بالنسبة لميزاتها
الكماليات بالظبط هى نفسها ال 405 العادية نفس الباور ونفس التكييف ( ان لم يكن احسن او جايز عشان لسه زيرو) الزجاج والسنتر من جوه العربية ماتحسش بفرق بينها وبين اى 405
( ملحوظة: انا معايا العربيتين)
اتزان العربية بسم الله ماشاء الله محترم جدا ولو انى لسه ماشى بالجنوط ال 13 والكاوتش الرفيع لكن كل ال عرفتهم غيروا جنوط للعربية دى قالولى بقا اتزلنها ممتاز واحسن
موتور العربية بصراحة ماشاء الله ده احسن حاجة فى العربية اداءه محترم جدا ومتميز مقارنة بعربيات كتير فى نفس الفئة بالرغم ان ده مش متوقع منها خصوصا انها دفع خلفى ونظام الجر قديم شوية لكن الموتور محترم وجربت اشد بيها مع عربيات فى نفس الفئة الحمد لله مكسفتنيش سرعة تجميعه جميلة وتحس بالقوة وانت بتشد (على فكرة دى تقريبا راى كل ال معاهم العربية)
الغيار روحه قصيرة شوية عن ال 405 القديمة يعنى التانية بزود فى الغيار عن دى وده بسبب انها انجكشن والعادية كربراتير ( مش بتفصل يعنى) لكن الروا تجميعها اسرع من العادية
دى محاولة لتققيم العربية وان كنت مش مجمع كل حاجة فى دماغى دلوقتى لكن ممكن لو حضرتك او اى حد سالنى عن حاجة ان شاء الله اجاوب
وبالنسبة لقطع الغيار الحمد لله لسه مغيرتش حاجة فيها تقريبا غير فلتر الزيت
لكن انا سامع ان قطع غيارها ارخص من ال 405 العادية بالرغم من ان التانية مش غالية ده بالنسبة للعفشة والموتور اعتقد غالبا كل حاجة مختلفة لكن الاكسسوارات واحدة فى الاتنين لكن برضه فى قطع
ايرنى موجودة ارخص من الفرنساوى (فى الاكسسوار) المراية اليمين اتخبطت والقزارة بتاعتها وقعت بس بالرغم من ان الخبطة كانت قوية وكنت فاكر انى هغير المراية والمراية الفرنساوة تقريبا ب 140 ده على ما اتذكر اخر مرة جبتها
لكن اكتشفت ان القزازة اتخلعت وبتركب تانى بكلبسات يعنى ماتكسرتش وده معناه ان القزازة دى بتتباع لوحدها من غير المراية ودى ميزة مش موجودة فى المراية الفرنساوى لما بتتكسر بتغير المراية كلها
اتمنى انى ماكونش طولت
والراى يرجع لحضرتك واستخير ربنا واسال تانى برضه ولو هتغير حضرتك من الشاهين طبعا الشاهين عربية محترمة واثبتت وجودها مقدرش اقول غير كده لكن كل ال موحود فى الشاهين من مميزات وزيادة عليه حاجات تانية كتير هتلاقيه فى العربية دى والراى لحضرتك فى الاخر وسيبك من اى كلام تسمعه عن العربية من اى حد محربهاش وبيقول كلام وخلاص
والا ماكانش الحجز على العربية يبقا خلصان لغاية شهر 7 2008

[eng / AhmeD]

و الله عربية كويسة بالنسبة لسعرها و بيجو كمان...........
ألف شكر يا محمد بيه علي مجهودك

[Xpert]

ممكن اعرف بفي الات الجر متاخده منين ؟ الموتور و الفتيس و الدفرنسيل ؟
و شكراً

[sab3aawy]

ممكن اعرف بفي الات الجر متاخده منين ؟ الموتور و الفتيس و الدفرنسيل ؟
و شكراً

الشاسية وآلات الجر هو شاسية وآلات جر سيارة ايرانية اخرى اسمها بيكان ، كانت ايران تصنعها منذ الستينات وحتى التسعينات مطابقة تماما للسيارة هيلمان هنتر بتصريح من شركة هليمان التى كانت جزء من كرايسلار اوروبا ، وفى عام 1978 قامت بيجو بشراء اصول هيلمان بعد انهيارها وبعد فترة اوقفت انتاج السيارة هيلمان هنتر ونقل تصنيع محركاتها الى ايران، واصبحت بيكان حزء من مجموعة أيران خودرو شريك بيجو الإيرانى

تم ايقاف انتاج البيكان سنة 2005 وانتاج السمند بدلا منها، ومع ذلك فقد تم الإستعانة بالشاسيه والآات الجر الخاصة بها مع تصميم خارجى مطابق للبيجو 405 لإنتاج السيارة بيجو RD التى تباع فى مصر باسم ROI

مصادر

http://en.wikipedia.org/wiki/Iran_Khodro

http://en.wikipedia.org/wiki/Paykan

http://www.ikco.com/products/rd.aspx

http://www.rootes-chrysler.co.uk/paykan.html

[hamedo0]

شكرا يا بشمهندس سبعاوى انا كان نفسي اعرف موتور العربيه دى ايه هل بيجو ولا ايراني برده

[eng / AhmeD]

أكيد الموتور بيجو يا جماعة

[Xpert]

هاها .. انت عارف اللي بتقوله ده معنا ايه يا عم سبعاوي ؟ :D
معناه .. notably the substitution of the original 1725 cc Rootes engine with a Peugeot 504-derived unit.
يعني الموتور بتاع 504 برضه !
ممكن بقي صور للموتور و العربيه من تحت ؟ شكراً

[mohamed10]

زيارة لشركة ماسا

ياجماعة انا النهاردة كنت معدى على شركة ماسا فقلت ادخل اشوف العربية روا 405 واجيب عنها بيانات وكانت بياناتها هى :
- السيارة ايرانية الصنع وبسعر 75200 الف جنيه
- جميع مكوناتها ايرانية من حيث الشاسيه والالات الجر والصاج الخارجى
- الموتور انجليزى الصنع وتم تجمعيه فى ايران
هذه هى كل امعلومات عن روا 405
وقد شاهدت ايضا السيارة سمند وهى الميزة فيها انها شاسيه 405 الفرنسى وماتور 307 الفرنسى والباقى ايرانى بسعر 87 الف جنيه

[eng / AhmeD]

ألف شكر يا محمد
يعني الموتور شبه مجهول ولا ايه؟

[Xpert]

عايزين صور لالات الجر يا رداله ... اتعملوا كده و اقفشولنا 405 رؤا و سمند و صوروهم .. عشان نعرف تحت الكابوت عامل ازاي ;)

[adel_edrees]

ممكن أعرف قطع الغيار بتتباع فين و العربية دى لو ليها مانيوال بالأنجليزى أو بالعربى ياريت تدلنى عليه

[amr mokhtar]

ياجماعة انا النهاردة كنت معدى على شركة ماسا فقلت ادخل اشوف العربية روا 405 واجيب عنها بيانات وكانت بياناتها هى :
- السيارة ايرانية الصنع وبسعر 75200 الف جنيه
- جميع مكوناتها ايرانية من حيث الشاسيه والالات الجر والصاج الخارجى
- الموتور انجليزى الصنع وتم تجمعيه فى ايران
هذه هى كل امعلومات عن روا 405
وقد شاهدت ايضا السيارة سمند وهى الميزة فيها انها شاسيه 405 الفرنسى وماتور 307 الفرنسى والباقى ايرانى بسعر 87 الف جنيه

على كده بقى العربية دى ملهاش علاقة ببيجو خالص
طيب ليه بتتباع تحت اسم بيجو و و كيل بيجو؟
و بعدين انا سألت فى توكيل بيجو عن العربية دى من فترة و قالوللى انها فعلآ مافيهاش حاجة بيجو

بس انا برضه مازلت مش قادر أقتنع ان السمند فيها موتور 307 الحالى ...

[waleedabbas]

السلام عليكم ورحمة الله وبركاته
وحشنى المكان هنا بقالى كتير مش بدخل ولو انى كنت بتابع ساعات بدخل اشوف اخر الاخبار واخرج على طول
بس غريبة كان فى ناس كتير هنا معاها الروا مفيش حد عارف حاجة عنها
عموما ان شاء الله اوعدكم هعمل تقييم عنها بعد فترة اختبار سنة وبيتهيالى ان الجو هدى شوية ومبقتش بسمع حد بيذم فى العربية كتير زى الاول الناس كانت بتشتم فيها من غير ماتشوفها ده من قبل ماتنزل مصر اساسا
لكن بعد ما الناس جربت العربية وعرفتها الصورة بقت اوضح سواء بقى العربية بيجو او مالهاش علاقة ببيجو
بس ال هقوله دلوقتى بالمختصر المفيد عن تجربتى انا وناس كتير من ال معاهم العربية بجد الحمد لله العربية محترمة وتستاهل وبدات الاشاعات ال كانت طالعة عليها تتلاشى والعربية بدات تظبط نفسها فى السوق وتثبت جدراة
وان شاء الله هجيب صور للموتور والعربية واحكيلكم التفاصيل بس معلش سامحونى ظروف شغلى مبقتش اقدر ادخل كتير