بيجو 305 بـ سعر 6500 للبيع

[ashkef]

السلام عليكم
انا امامي بيجو 305 بسعر 6500 مو 79 ولكن متردد لان الماتور تعبان

هل السعر ده كويس و هتحتاج اصرف عليها كام علشان أخليها عروسة

أرجوا النصيحة فأنا مبتديء

[powerofhelll]

ابعد عنها لو حالتها تعبانه

[MEDO84EG]

خد معاك ميكانيكي و سمكري حوادث
و استخير

[ashkef]

مشكورين يا جماعة
بس انا فى واحد صحبي قالي
أشتري العربية حتى لو المتور تعبان
وغير الماتور بمتور تانى بحوالى 3500 واصرف على العربية بتاع 4000 جنية كمان
سمكرة
دكو
وكهرباء
وتنجيد
وروشنة
هتخليلك العربية ميه ميه
احسن من انك تشتري 128 بـ 14 ألف

هل هذا الرأي صواب

وهل صحيح 305 لو صرفت عليه هتنساها وتستاهل
أنا قرأت معظم المواضيع عن 305 والناس بتشكر فيها وكأنها المرسيدس
وشكراً لكم

[mohamed9999]

6500+3500+4000=14000جنية +1000 تانى زياده فى اى مصاريف للعجز و الزياده =15000جنيه وفى الاخر موديل 79
انا راىء تزود شوية و تجيب 131 احسن بكتييييييييييييييييييييييييييييييييييييييييييييييي ير
مجرد راى عشان العربيه دى قطع غيارها غالية على ما اسمع ومش اى ميكانيكى يعرف يستغل فيها بيقولو كده
برضو مجرد راىء

[ashkef]

مشكور أخي

انا احب اعلق على شيء فى البداية

انا مبسوط والله من التعاون اللى موجود فى المنتدي ما شاء الله بالرغم من أن معظم المواضيع متكرره بس سعة صدور الأخوة واسعة ومحدش بيبخل على حد بحاجه لدرجة اني لقيت بعض الاخوة مستعدين يقبلوا بعض ويساعدوا بعض
هو ده شعب مصر


رأيك حلو
بس أنا اللى معايا دلوقتي 8000 هجيب العربية وأركنها
وأظبطها حاجه حاجه وكل ما تبقى معاي فلوس أعمل حاجه
ولو أستنيت أحوش فلوس تاني ممكن تتصرف فأنا شايفها فرصه
ولا انت رأيك إيه

[Mostafa.Mahran]

مشكورين يا جماعة
بس انا فى واحد صحبي قالي
أشتري العربية حتى لو المتور تعبان
وغير الماتور بمتور تانى بحوالى 3500 واصرف على العربية بتاع 4000 جنية كمان
سمكرة
دكو
وكهرباء
وتنجيد
وروشنة
هتخليلك العربية ميه ميه
احسن من انك تشتري 128 بـ 14 ألف

هل هذا الرأي صواب

وهل صحيح 305 لو صرفت عليه هتنساها وتستاهل
أنا قرأت معظم المواضيع عن 305 والناس بتشكر فيها وكأنها المرسيدس
وشكراً لكم

ووقفتك على ايد الصنيعية و القرف ووجع الدماغ والعطلة كل ده يساوى كام؟

[ahmedelshahawy]

لو كان الموضوع بالسهولة دي كان صاحبها صرف عليها احسنله و اللى يخليه يفرط فى العربية بالسعر ده و السهولة ديه يأكد انه قرفان منها لو صبرت شوية لحد ما تجمع فلوس كمان و اشتريت حتى 127 احسن بكتييييييييييييييييييييييير فى واحد صاحبى باع 127 و اشترى 305 والله ندمان

[ashkef]

ما هو ده اللى مخليني أقلق إن أنا أندم بعد كده
اما بالنسبة لموضوع الوقوف على الصنايعية والدوخة ديه أكيد هيجي وقت لآي عربية وهدوخ فيها نفس الدوخه ديه إلا إذا جبت حاجه زيرو
انا اللى قلقني الندم بعد الشراء وكلامك زود الشك اللى عندي وهيخلني أفكر أكتر
وربنا يقدم اللى فيه الخير

[Mostafa.Mahran]

ما هو ده اللى مخليني أقلق إن أنا أندم بعد كده
اما بالنسبة لموضوع الوقوف على الصنايعية والدوخة ديه أكيد هيجي وقت لآي عربية وهدوخ فيها نفس الدوخه ديه إلا إذا جبت حاجه زيرو
انا اللى قلقني الندم بعد الشراء وكلامك زود الشك اللى عندي وهيخلني أفكر أكتر
وربنا يقدم اللى فيه الخير

انا معاك ان كل عربية هيجى عليها وقت وتقف عليها فى التصليح بس الكلام ده بعد ما تركبها الاول
انما دى انت لسه مركبتهاش فهتقف على تصليحها ليه؟ده صاحبها اشترى دماغه و عاوز يخلص منها

[ahmad--ezzat]

خد معاك ميكانيكي و سمكري حوادث
و استخير

حوادث ايه العربيه عدت المرحله دى....العربيه لاتصلح طبعا وهيتعذب لو اشتراها

[kasten]

إبعد عنها ايكد صاحبها منزل فى سعرها كده لانه عايز يخلص منها
ولو كان فيها خير مكنش رماها الطير

[hesham_shousha]

مانصحكشى تاخد معاك ميكانيكى لإن موضوع الموتور محسوم لإنه مفوت
أنصحك تاخذ سمكرى وهو ده المهم إن العربيه تكون نظيفه من ناحيه الحوادث والخبطات
وأهم حاجه برضه تبص على صالون العربيه من ناحيه نظافته وإنه موش متبهدل
وعشان تحسم الصراع اللى بيدور فى دماغك عند مقارنتها بال 128- هاقولك الفرق حيث إنى ركبت العربيتين
فيه دعاء بدعيه كل ماشوف عربيه 128 تمر من جنبى وهو ( الحمد لله الذى عفانا مما إبتلى به كثير من خلقه )
فلا يوجد مقارنه بين السيارتين
ال 305 قويه وال 128 ضعيفه جدا
ال 305 واسعه وال 128 ضيقه
قطع غيار ال 305 معمره عكس قطع غيار ال 128
ال 305 تستحمل مطبات مصر بكفاءه وال 128 بتتبهدل فيها
لكن لو إخترت ال 305 لازم تعرف إن لها عيوب واللى بتتمثل فى صعوبه صيانتها حيث
قطع غيارها ممكن تدوخ عليها وممكن ماتلاقيش بعضها
موش أى ميكانيكى يفهم فى الموتور - أنا دايما أروح لأحمد عماره فى المشاكل المستعصيه
عايز أقولك إنى بامشى فى اليوم حوالى 70 كم بالعربيه وهى مريحانى وموش بتحتاج صيانه كتير
فيه مقارنه صغيره توضحلك الفرق بين قطع غيار ال 305 وال 128
سلك الدبرياج فى ال 128 كل شويه يتقطع وانت ماشى وتحتاس بالعربيه لان صناعته ضعيفه
سلك الدبرياج بتاع ال 305 قوى جدا وكفايه اقولك انه راكب عندى له 10 سنين بلا مشاكل
الاسطوانه والدسك بتوع ال 128 ما يستحملشى فتره قصيره
انا مغير الاسطوانه والدسك من 100000 كم ولسه ماغيرتش الاسطوانه حتى
يعنى بالمختصر فرق السعر فى قطع الغيار هتكسبه فى الراحه فى الصيانه وموش كل شويه هتروح للميكانيكى
وفى النهايه القرار لك
وأفكرك بضروره تقييم الصالون من ناحيه نظافته من الداخل
وربنا يوفقك

[hesham_shousha]

حاجه تانيه عايز اضيفها
سير الكاتينه فى ال 128 لازم يتغير كل 10 الف
فى ال 305 مايتغيرشى الا كل عمره لانه حديد
الكبالن مابتستحملشى كتير فى ال 128
فى ال 305 تعيش سنين - بس هات الفرنساوى
ونتيجه المقارنه دى هتلاقيها فى كل جزء فى السياره لان مستوى جوده الصناعه قى ال 305 أرقى بكثير من ال 128 وإمسك أى جزء فى السيارتين ( مارش - دينمو وغيرها ) وقارن بينهم بمجرد النظر - وهتحس بالفرق

[ashkef]

والله كلامك ريح قلبي وطمني
لإني ميال للعربيه لانها عائليه وكتير قالوا لي مفيش وجه مقارنه بينها وبين اي عربيات من جيلها فى ماعد المرسيدس
وانا مكنتش مصدق الكلام ده
ولو قطع غياره غاليه بس ثمنها فيها ده هيبقى افضل بالنسبالي بدل ما اغير كل شويه

انا عزمت واستخرت ربنا وان شاء الله تكون من نصيبي

شكراً لك ولكل اراء الاخوة

بس ليه الناس يأما بيحبو العربيه ويمجدو فيها اوي
يأما يكره العربيه ويذمو فيها اوي
مشفتش حد محايد خالص

وإن شاء الله لو حصل نصيب هصورها وارع الصور بتاعتها