مؤشر حرارة بيجو305 عند الشارطه الثالثه

[abobelal]

السلام عليكم ورحمة الله وبركاته
فى مواضيع عن سخونة ال305 وانه اصحاب الموضوع بيقولو انهم عملو محاولات لتركيب
مروحه كهربائيه وسوئالى هو هل ال305 بتسخن
فى مصر وهل هو ده عيبها انا مش عارف لانى لسه شاريها والمؤشر بيجى معايا عند الشارطه الثالثه هل هذا بالنسبة لها كثير ولا لأ ياريت أصحاب السياره القدام يجاوبونى لان انا من ساعة ماقرأت مواضيع الاخوه فى ذلك الشأن وانا قلقان
ابو بلال

[hesham_shousha]

معايا العربيه بتسخن وبيوصل المؤشر لأقصى درجه
وعالجت الموضوع ده بتركيب مروحه كهرباء بتنزل المؤشر شويه

[abobelal]

شكرا على ردك أخى وحبيبى
وعلى العموم انا لسه شاريها من ثلاث اسابيع وبحاول اتصاحب عليها ومشكلة التبريد دى مش هاسيبها إلا لما الاقى ليها حل غير مروحه كهربا لانى صعبان عليا أغير فى حالة الفابريكه بتاعتها ولو لقيت حل عن طريق الاخوه فى المنتدى او عن طريق التفكير العميق سوف أعلنه فى المنتدى إن شاء الله
ابو بلال

[aboomar22]

طيب حضرتك متاكد ان الريداتير بتاعها كويس وان التاكيهات مضبوطة ومش مقفولة وكمان الكهرباء مظبوطة وهى بتسخن مع حضرتك فى الزحمة ولا فى السريع لو العربية تمام فى كل الاحوال وبتسخن فى الزحمة والاشارات ركب مروحة كهربة بمفتاح داخلى اتكلفت معايا 150 جنية كله بس هتشتغل مع العادية طبعا علشان طلمبة المية مع المروحة العادية

[amrfox2002eg]

طيب حضرتك متاكد ان الريداتير بتاعها كويس وان التاكيهات مضبوطة ومش مقفولة وكمان الكهرباء مظبوطة وهى بتسخن مع حضرتك فى الزحمة ولا فى السريع لو العربية تمام فى كل الاحوال وبتسخن فى الزحمة والاشارات ركب مروحة كهربة بمفتاح داخلى اتكلفت معايا 150 جنية كله بس هتشتغل مع العادية طبعا علشان طلمبة المية مع المروحة العادية

معلش ياباشا عايز تفاصيل عن الراجل ده علشان ناوى اعملها ياعنى مكانه خد اد ايه وقت وفلوس

[abobelal]

يا جماعه انا لسه مشترى العربيه وكان العيب اللى فيها فى التكيهات بتطلع صوت تكتكه عالى وبيعلى مع التزويد وجبت ليهاوش سيليندر استعمال عشان انا محبيتش اوضب القديم لانى استحرمت عربيه زى دى تتوضب لانها بنت ناس وعشان اريح دماغى وانا واقف فى تركيب وش السيليندر لاقيت الميكانيكى بيحط اتنين جوان لوش السيليندر برغم ان لما فكينا القديم كان جوان واحد وسالته انت بتحط اتنين ليه قالى اصل البساتم عاليه وممكن تكون مضايقه الوش وفكرة الاتنين جوان انا عارفها بس دى بتتحط لما بتكون انت ماسح الوش اكثر من مره المهم عشان ماطولش عليكو انا كبرت دماغى وقلت يحط اتنين ولا واحد مش فارقه بس بينى وبينكو انا لما قعدت مع نفسى لقيت نفسى مش مستريح للموضوع ده وحاسس ان السخونه اللى فى العربيه ممكن تكون بسبب كده بس مش متاكد لسه بس لو اتاكدت هاقولقو على طول عشان تبقو عارفين
ابو بلال

[aboomar22]

معلش ياباشا عايز تفاصيل عن الراجل ده علشان ناوى اعملها ياعنى مكانه خد اد ايه وقت وفلوس

بص المروحة موجودة عند بتوع الاستراد وبصراحة انا اشتريتهامن بتاع ريداتير فى فيصل اسمه رامى ريشة شارع المساكن من شارع فيصل التربية الرياضية وكان تمنها بالتركيب 150 جنيه وخدت وقت ساعة مثلا ولو انت ساكن ممكن اجى معاك اى وقت رقمى على الخاص

[hanyrefaat79]

هو المروحة مش بتشتغل مع الماتور انا معايا العربية بقالها 4 سنين عمرها ماسخنت حتى فى ايام الحر الصعبة ديه انا _ انا بس اللى بموت من الحر علشان مفيهاش تكييف _ يمكن مابتسخانش علشان انا عندى مروحة بتشتغل بسير مع الماتور وانا مشتريها كدة وماعرفش هى نازلة كدة من الشركة ولا صاحبها اللى قبلى هو المركب المروحة كدة

[aboomar22]

ايوة المروحة بتشتغل مع الموتور وكمان السير بيشغل طلمبة المياه دى مروحة اضافية احنا بنركبها علشان الصيف

[Doush_csf]

هي العربيات دي كلها كانت نازلة بـمراوح بتشتغل بـكلاتش (دبرياج يعني) بحيث لما العربية تسخن تلف بـسرعة الموتور و غير كده (و العربية باردة يعني ) بتلف على سرعة خفيفة (اكنها على السالانسيه) بس نظرا للفهلوة اللامتناهية بتاعت الصنايعية و ثقافتهم الواسعة لغوها و خلوها شغالة بـسرعة الموتور و ده طبعا بيخلي صوت العربية عالي بدون لزوم واللي يفكر شوية هيلاقيها فكرة غبية عشان بتبقى المروحة بتتمختر في الإشارات (يعني أكتر وقت محتاجها فيه ) وبتجعر عالسرعات (في حين إن الهوا الطبيعي أكتر من كافي لتبريد العربية )
حاجة تانية برده الصنايعية بيحبوا يعملوها هي الغاء ثرموستات الحرارة اللي جوه الطرمبة بـحجة إنه بيسخن العربية و لما كنت بدور عليه كانوا يردوا يقولولي يا باشا غلط و هيسخن العربية و شوية هوهوه ملهاش أي أساس علمي و فضلت لغاية ماجبتو جديد و مش قادر اقولكوا اد إيه جميل , ده أنا رحت تاني يوم خدت الراجل بالحضن

بالنسبة لصاحب الموضوع فـلو العربية مظبوطة (من ناحية التكيهات والذي منه ) و بتسخن فده ممكن ( أحد الأسباب يعني ) يبقى فيها ثرموستات بس بايظ ( أنا الحقيقة ماليش أي تجربة مع ال 305 بس ده حصل في 504 و 505 )
و كان الحل إننا جبنا جديد زي ماقلت و المشكلة اختفت تماما

[hassanali]

جبت مروحه تمبرا من مجلس الامه 80 جنيه و الكهربائ 30 جنيه 25 سلك وكتاوت و مفتاح كله 135 3/7/2010

[memoo305]

فعلاً ال 305 بتسخن في الحر ووقفة المرور والمؤ شر بيوصل لأحمر إنما على الطريق درجة الحرارة بتنخفض . ولعلاج الموضوع:
1- تغيير الريدتاير الأصلي بواحد 2 ماسورة (تقريبا بيبقى حجمة زي بتاع ال505)
2- تركيب قميص بين المروحة والريداتير ده بيعملة السمكري وبيساعد على رفع كفأة التبريد
3- تركيب مروحة كهرباء يتاعة فيات سواء دايرة اتوماتيك أومانيوال هيساعد بشكل كبير جداً في حل مشكلة إرتفاع الحرارة مع زحمة المرور.