عايز أشترى سيارة عائلية 7 راكب وبافكر فى 307 sw

[walidsamy71]

أرجوا النصيحة والإفادة

عايز أشترى سيارة عائلية 7 راكب لأنى والحمد لله على رزقه ونعمته عندى أربع بنات ومش نافع معاهم العربية العادية (5 راكب) وبافكر فى كذا عربية مستعملة فى حدود 90- 100 ألف وموتور مايزيدش عن 1600 سى سى ولقيت الخيارات اللى قدامى إما بيجو 307 sw أو تويوتا أفانزا بس شكلها وتقفيلها وكمالياتها مش عاجبنى خالص أو دايهاتسو جراند تيريوس بس اعتقد هتبقى أعلى شوية من الميزانية بتاعتى....
لو حد من حضراتكم عنده اقتراح تانى ابقى شاكر ليه جدا....
وممكن اعرف تقييمكم للبيجو 307 sw من حيث الأداء والأمان والسلامة والصيانة وقطع الغيار وسعر إعادة البيع وأداء العربية عموما والتكييف خصوصا فى الجو شديد الحرارة فى الصيف اللى بقى زى الخليج.....
معلش أعذرونى على أسئلتى الكتير بس أنا محتار وفيه ناس كتير بتخوفنى من البيجو عموما وكلمتهم الدارجة أن البيجو والفرنساوى ملوش حظ فى مصر ....

[power]

بس ال اس دابيليو 7 ولا 5 راكب

[meero_boy2000]

نصيحه لوجه الله ابعد عنها هقولك ليه بن خالتي معاه 307 2008 ستبترونيك خليجي
عربيه محترمه ثبات عالي اوووي سحب ماشاء الله شكل روعه وسع فظيع دي كل امكانيات
مصنعيه نار ميكانيكيه بهايم قطع غيار ووووووولعه توكيل حررررررررررررراميه اعاده بيع في الارض
مع احترامي الشديد للعربيه بس خساره في بلدنا ..... وكلامي لاني عايش مع العربيه دي مع بن خالتي وللعلم خليجي وكل حاجه ولو فسوه بيدفع بالاف والله العظيم يعني كان عايز يظبط حاجه في الكومبيوتر بتاعها والايرباجز مش شغال وفتحه السقف معلقه دفع 4 الاف جنيه في توكيل
خلاصه الكلام لو ظروفك متيسره ماشاء الله وتقدر عليها اتكل علي الله محترمه فعلا ولو مش ناوي تبيع وتغير كل شويه يبقي اتنازل عن كل العيوب دي واشتريها وربنا يباركلك
للعلم بن خالتي شاريها من شهر وعارضها دلوقتي في معرض للبيع من كتر عيوبها هي موديل 2008 وعامله 74000 كيلو
وطمنا عليك وربنا يهديك للاحسن ولاتتسرع وربنا يباركلك

[shifou]

توكل على الله

السلام عليكم ورحمة الله وبركاته،،
شوف يا سيدي، أنا عندي والحمد لله عربية 307sw ستبترونيك خليجي موديل 2007 ليها معايا ثلاث سنين ونص و عامل بيها 95 ألف كم، والحمد لله أعطالها قليلة جداً إن لم تكن معدومة تقريباً، وإليك ملخص لمميزاتها وعيوبها:

المميزات:
1. سيارة ما شاء الله ثابتة ومستقرة جداً على الطريق، حتى على سرعات عالية جداً.
2. تسارع عالي جداً (من أشهر مميزات البيجو على مدار تاريخها حتى من أيام الـ"504" الشهيرة).
3. عربية متقدمة جداً تكنولوجياً (مثال: حساس مساحات المطر الأوتوماتيكية، حساس الإضاءة الأوتوماتيكية عند انخفاض الإضاءة، كمبيوتر الرحلات، حساسات الرجوع إلى الخلف) وعكس المتوقع من سيارة بمثل هذه التكنولوجيا أعطالها قليلة جداً (لم تحدث لي والحمد لله أية أعطال بالأنظمة السابق ذكرها طوال امتلاكي للسيارة).
4. مستوى أمان عالي وأنظمة سلامة متميزة (6 إيـرباجز، ABS، حساسات الرجوع إلى الخلف، cruise control).
5. تكييف فوق الممتاز (صفة مميزة للسيارات الخليجي) مع إمكانية التحكم في جهة السائق والراكب الأمامي بصورة مستقلة.
6. إسنهلاك الوقود ممتاز جداً (متوسط الاستهلاك 8 كم/لتر، 10 كم/لتر في الطرق السريعة ، 6.5 كم/لتر داخل المدينة).
7. خزان وقود الأكبر في فئتها (69 لتر) لظروف عملي أقوم بالسفر من الأسكندرية إلى أسيوط (650 كم) بتفويلة واحدة فقط لخزان الوقود.
8. مساحة ممتازة للركاب الأماميين وركاب الصف الثاني، ومستوى راحة
9. مساحة تخزين خلفية هائلة السعة (بشرط عدم استخدام مقعدي الصف الثالث 6، 7).

العيوب:
1. قطع غيار أصلية فعلاً مرتفعة السعر مقارنة بالسيارات الكورية والصينية الصنع، ولكن هذه الأسعار عادية جداً بالمقارنة بالسيارات الأوروبية واليابانية.
2. رغم التسويق لها بأنها تتسع لسبعة ركاب، إلا أن مقعدي الصف الثالث (6، 7) لا يتسعان لشخصين بالغين، ويمكن فقط إما لأطفال حتى عمر 12-14 عاماً الجلوس براحة معقولة، أو يتم رفع أحد المقعدين واستخدام مقعد واحد فقط لشخص بالغ.
3. عند استخدام مقعدي الصف الثالث (6، 7) فإن مساحة التخزين تختفي تقريباً.
4. لم أقم ببيع سيارتي بعد، ولكن المشهور عن البيجو انخفاض سعر إعادة البيع، ولكن في مثل حالتك عند شراءك سيارة مستعملة فعند بيعك لها (إذا كنت تفكر في ذلك) فلن تخسر كثيراً.


في المجمل أنا مستمتع جداً بهذه السيارة ودائماً أرشحها لأي حد بيدور على حاجة في هذه الفئة، وتكاليف الصيانة ليست مرتفعة بشكل مبالغ فيه (ولكن يبدو من كلام meero_boy2000 أن مركز الصيانة الذي يتعامل معه أسعاره غير طبيعية ولكن مراكز الصيانة متفاوتة جداً في أسعارها، أيضاً الأعطال التي ذكرها في تعليقه مكلفة بطبيعتها).
حاجة أخيرة، أنا أعرف إثنين أصحابي عندهم نفس العربية ولم يشتكوا من أي حاجة، واحد منهم باعها بعد سنتين (كان شاريـها استعمال) لأنه كان محتاج الفلوس وما خسرش فيها غير عشرة آلاف.
أخيراً أرجو إني أكون جاوبت عن كل أسئلتك وفي حالة وجود أية استفسارات أخرى، أنا على أتم استعداد للتوضيح.
شكراً وعذراً للإطالة.

سبحانك اللهم وبحمدك ، أشهد أن لا إله إلا أنت أستغفرك وأتوب إليك.

[meero_boy2000]

تمام الرد الاخير ده الاستاذ shifou وضحلك كل حاجه وهو فعلا زي ماقال مميزاتها بس فعلا عيوبها بتختلف من عربيه لعربيه حسب الاستخدام والتقفيل وحاجات تانيه برضه وبالنسبه لمصاريفها ربنا ميكتبهاش انه يجربها لان في حاجات هو مجربش سعرها بس ربنا يبعده عنها فعلا وممكن انا بالنسبالي حسب امكانياتي تبقي مصاريفها غاليه جداا ووقطع غيارها نااار عليا لكن مثلا حد تاني شايف المصاريف عاديه وقطع الغيار معقوله فده زي ماوضحت لحضرتك في البدايه بيتوقف علي امكانياتك ودخلك انت هل هتقدر او لاء ؟؟؟
نصيحه بسيطه مني ادخل علي جروب البيجو هنا في المنتدي وشوف المشاكل المنتشره ايه وردود افعال الناس ايه عشان تقدر تحكم الامور لان حضرتك هتدفع مبلغ يجيبلك حاجه زيرو برضه مش مبلغ صغير وبرضه مع كل احترامي ليها كعربيه لكن شوف رد فعل الناس في قسم البيجو وربنا يوفقك للاحسن ان شاء الله

[walidsamy71]

متشكر جدا ليكم بس عندى عدة أسئلة

يا جماعة انا متشكر جدا ليكم اهتمامكم وذوقكم ورأيكم المفيد والسديد
أنا بصراحة قلقان من تحذيرات وتخويفات الأخ meero_boy2000 اللى سمعت زيها كتير وطبعا أنا معنديش المقدرة المادية لتحمل تكلفة الصيانة العالية دى فى حالة حظى ماكنش كويس وبدأت العربية تقل أصلها معايا ، وفى نفس الوقت معجب جدا بالمزايا اللى وضحها أخونا shifou فى تحليله الرائع ، خاصة ان أنا مش من النوع اللى بيغير عربيته بسرعة وكدة كدة هى مستعملة فمسألة سعر إعادة البيع مش شاغلنى أوى ، ومن ناحية تانية مش لاقى بدائل كويسة ومقنعة فالتويوتا الأفانزا ما تستهلش يدفع فيها المبلغ ده لأنك تحسها عربية من التمانينات والدايهاتسو الجراند تيريوس أكيد غالية عن ميزانيتى ومش هتكون بنفس الكفاءة والرفاهية والكماليات بتاعة البيجو .

أنا بس عندى كام سؤال للأخ shifou أو لباقى أخوانا المجربين :

1- فى حالة وجود الكراسى 6 و 7 طبعا مفيش مساحة للتخزين على الإطلاق وغالبا ده هيحصل معايا وانا مسافر فهل كل العربيات فيها ال 2 راك اللى على السقف وهل بيركب عليهم شبكة أو حاجة ، أو بمعنى آخر فى حل للموضوع ده وهو هيكون أثناء السفر فقط اللى مش كتير أوى؟؟

2- هل لما آجى أدور على عربية أركز فى كونها وكيل ولا خليجى ولا دى مش نقطة حاكمة ؟؟

3- هل الموديل البانوراما أعلى فئة ده يوجد فيه مشاكل متعلقة بكم الكماليات والتكنولوجيا اللى فيه عن باقى الفئات التانية ولا مش فارقة ؟ يعنى انا مبهور بالبانوراما وكماليتها بس هل مشاكلها أكتر من الفئات الأقل ؟؟

4- أفضل وأرخص مركز خدمة وأكثرهم أمانة فى القاهرة أو الجيزة ؟

6- أنا أتمنى إنى ألاقى العربية دى البانوراما أعلى فئة لون أسود وحالتها ممتازة ويكون صاحبها أمين فن وصفه لحالتها وتاريخها معاه ويكون سعرها فى حدود ميزانيتى 90 ألف ؟ تفتكروا أدور فين ؟؟؟ ولو حد عنده ترشيحات لعربيته أو عربية حد يعرفه يبقى كتر خيره ...

7- فى حالة لقيت طلبى رقم (6) يبقى اختارها ولا اختار الكيا سيراتو 2010 وعاملة 55000 كم ؟؟

فى كل الأحوال جزاكم الله خيرا على نصيحتكم واهتمامكم وانا هاصلى استخارة وأفكر كويس وربنا يجيب الخير إن شاء الله.

[meero_boy2000]

ياباشا لاشكر علي واجب كلنا هنا اخوات وبنحاول نساعد بعض بس اقدر ارد عليك في جزئيه صغيره اوووي وهي انك لو هتفكري فيها خليك في الخليجي لان الوكيل تقفيل مش تمام غير الخليجي ومقرفه شويتين حسب معلوماتي .
انا شوفت كيا 7 راكب في ناس كتير بتشكر فيها بس بصراحه مش عارف اسمها كيا ايه ويقال سعرها معقول اسأل عليها ممكن تكون مناسبه .
وفي الاول والاخر طبعا صلاه الاستخاره هتحدد كل حاجه وربنا يوفقك وطمنا عليك

[mahmoudawad247]

الموضوع صعب فعلاااا

بس لو جينا نحسب الموضوع

الميزانية هى 100 الف ؟؟؟؟

بص هو أقل عربية 7 راكب كويسة هتكون غالية قوى و هيجى على حساب الشنطة الجراند تيروس و دى معدية الميزانية كتير

بص هما لو البنات صغيرين ببقى تقضيها لحد ما تزود شوية المبلغ و تجيب حاجة كبيرة

أما لو البنات كبيرة شوية يبقى انت محتاج عربيتين معقولين وواحدة منهم تكون شنطتها كبيرة شوية علشان تشيل شنط للعيلة كلها

ممكن عربية سبعة راكب جت فى دماغى

سيتروين بيكاسو سبعة راكب بس طبعااا هتكون مستعملة لان الزيرو بيكون غالى قوى و المستعمل فيها بيكون مخسوف بيه الأرض و ما لوش سوق و قطع الغيار برده غالية

برده اللوجان سبعة راكب خيار مطروح بس
307 sw قطع غيارها غالية

مش عارف يا باشا تجيب ايه دى حاجة محيرة فعلااا

انت تجيب عربيتين صغيريين او متوسطين احسن

يعنى قول مثلااا واحدة هوندا سيتى والتانية يارس ،،،، واحدة تيدا و التانية ميجان و مشى امورك

لانك كده كده مضطر ان يكون فى حد تانى يكون متعلم السواقة فى الخروجات الكبيرة

او تجيب عربية سبعة راكب تكون كويسة و فى الحالة دى هتكون غالية


رينا معاك و يعينك

[nouranwar]

انا معلومة ال 7 راكب ديه جديدة عليا جدا انا كنت بحسبها 5 راكب فقط
و بالنسبة لقسم بيجو مش نشيط قوي زي الاقسام الثانية هو و ستروين
و بالتوفيق ان شاء الله

[nouranwar]

هو اقتراح اللوجان ال 7 راكب جميل اذا اعجبته و شكلها بحبه قوي انا مش فاكر اسمها بالضبط بس شكلها بحبه جدا جدا
لكن اقتراح عربيتين في حدود ال 90 الف مش هتبقي الاقتراحات ديه بالضبط لأنها في الحالة ديه هيحتاج عربية الواحدة ب 45 الي 50 الف و المبلغ ده مش هيجيب حاجة عالية قوي ولا رأيك ايه مستر محمود ؟

[shifou]

تمام الرد الاخير ده الاستاذ shifou وضحلك كل حاجه وهو فعلا زي ماقال مميزاتها بس فعلا عيوبها بتختلف من عربيه لعربيه حسب الاستخدام والتقفيل وحاجات تانيه برضه وبالنسبه لمصاريفها ربنا ميكتبهاش انه يجربها لان في حاجات هو مجربش سعرها بس ربنا يبعده عنها فعلا وممكن انا بالنسبالي حسب امكانياتي تبقي مصاريفها غاليه جداا ووقطع غيارها نااار عليا لكن مثلا حد تاني شايف المصاريف عاديه وقطع الغيار معقوله فده زي ماوضحت لحضرتك في البدايه بيتوقف علي امكانياتك ودخلك انت هل هتقدر او لاء ؟؟؟
نصيحه بسيطه مني ادخل علي جروب البيجو هنا في المنتدي وشوف المشاكل المنتشره ايه وردود افعال الناس ايه عشان تقدر تحكم الامور لان حضرتك هتدفع مبلغ يجيبلك حاجه زيرو برضه مش مبلغ صغير وبرضه مع كل احترامي ليها كعربيه لكن شوف رد فعل الناس في قسم البيجو وربنا يوفقك للاحسن ان شاء الله

عداك العيب يا باشا، كلامك مضبوط 100 %، لأنه في اختلافات في كل سيارة، ولو مستعملة حسب المالك السابق واستخدامه ومحافظته على الصيانة الدورية في مواعيدها.. إلخ. وجزاك الله كل خير على الدعاء بالخير اللي إنت دعيتهولي، ونصيحتك المخلصة الخالية من الغرض.

أخيراً نصيحتين إضافيتين للعضو المحترم <walidsamy71>:
أولاً: إعمل قائمة بقطع الغيار التي من المتوقع أن يتم تغييرها في أي سيارة (السيور، الفلاتر، طلمبة المياه، أجزاء العفشة والمساعدين، المرايات، الرفارف و الاكصدامات، الرادياتير والمروحة .. إلخ) واسأل على أسعارها في التوكيل، وبكدة تقدر تقارن أسعارها مع سيارتك الحالية قبل الشراء.

ثانياً: ممكن تحط في اعتبارك السيارة الـ "Kia Carens" لأنها من نفس الفئة، أسعار قطع غيارها معقولة، وتوكيلها سمعته ممتازة.

محمود عبد الشافي
سبحانك اللهم وبحمدك ، أشهد أن لا إله إلا أنت أستغفرك وأتوب إليك

[meero_boy2000]

عداك العيب يا باشا، كلامك مضبوط 100 %، لأنه في اختلافات في كل سيارة، ولو مستعملة حسب المالك السابق واستخدامه ومحافظته على الصيانة الدورية في مواعيدها.. إلخ. وجزاك الله كل خير على الدعاء بالخير اللي إنت دعيتهولي، ونصيحتك المخلصة الخالية من الغرض.

أخيراً نصيحتين إضافيتين للعضو المحترم <walidsamy71>:
أولاً: إعمل قائمة بقطع الغيار التي من المتوقع أن يتم تغييرها في أي سيارة (السيور، الفلاتر، طلمبة المياه، أجزاء العفشة والمساعدين، المرايات، الرفارف و الاكصدامات، الرادياتير والمروحة .. إلخ) واسأل على أسعارها في التوكيل، وبكدة تقدر تقارن أسعارها مع سيارتك الحالية قبل الشراء.

ثانياً: ممكن تحط في اعتبارك السيارة الـ "Kia Carens" لأنها من نفس الفئة، أسعار قطع غيارها معقولة، وتوكيلها سمعته ممتازة.

محمود عبد الشافي
سبحانك اللهم وبحمدك ، أشهد أن لا إله إلا أنت أستغفرك وأتوب إليك

ربنا يكرمك ياباشا ويكرمنا جميعا ويكفيك شرها اااامين
اما بالنسبه للكيا فعلا كان قصدي علي الكارينز ناس كتير بتشكر فيهىا فعلا ممكن تسأل عليها وربنا يديك مافيه الخير
ان شاء الله

[mahmoudawad247]

ازيك يا باشا انت عامل ايه ؟؟؟؟

اخبار 206 cc ايه انا قريت فى اخر مشاركة انك شفتها و كانت ضيقة حبتين من ورا ،،،، ربنا يوفك و تلاقى عربية احلامك ان شاء الله


أنا قصدى انه عنده عربية دلوقتى معاه ،، يجيب معاها عربية زى تيدا او هوندا سيتى و بعد شوية يحدث التانية بنوع زيرو برده فى حدود 100 برده

يعنى فى خلال فترة يكون معاه عربيتين كل واحده 100 و كلهم زيرو

علشان الراجل برده مش حمل مصاريف صيانة ،،، المستعمل كده و لا كده هيصرف شوية

الزيرو هيكون 3 سنين فى الضمان و الصيانة فى الحنين و ربينا يكفيه شر الطريق


و أنا شخصيا بحب يكون فى العيلة الكبيرة أكثر من عربية ،،، علشان بتنفع كتير و بتلم كتييير فى السفر و كلام منده

و برده عربيتين يريحوا بعض شوية


،،،، المهم انت اخبار حوار العربيات بتاعك ايه دلوقتى

[shifou]

أنا بس عندى كام سؤال للأخ shifou أو لباقى أخوانا المجربين :

1- فى حالة وجود الكراسى 6 و 7 طبعا مفيش مساحة للتخزين على الإطلاق وغالبا ده هيحصل معايا وانا مسافر فهل كل العربيات فيها ال 2 راك اللى على السقف وهل بيركب عليهم شبكة أو حاجة ، أو بمعنى آخر فى حل للموضوع ده وهو هيكون أثناء السفر فقط اللى مش كتير أوى؟؟

فعلاً كل العربيات فيها ال 2 راك وبيركب عليهم بارات بالعرض وحمولتها بتكون مش أكتر من 100 كجم.

2- هل لما آجى أدور على عربية أركز فى كونها وكيل ولا خليجى ولا دى مش نقطة حاكمة ؟؟

الخليجي غالباً بتكون مواصفاتها أعلى، وهي اللي هتلاقي فيها كل الكماليات، وطبعاً مش هتفرق في الصيانة لأنها هتكون عدت فترة الضمان.

3- هل الموديل البانوراما أعلى فئة ده يوجد فيه مشاكل متعلقة بكم الكماليات والتكنولوجيا اللى فيه عن باقى الفئات التانية ولا مش فارقة ؟ يعنى انا مبهور بالبانوراما وكماليتها بس هل مشاكلها أكتر من الفئات الأقل ؟؟

سيارتي هي بانوراما مع ملاحظة أن ده مش معناه وجود كل الكماليات فيها وممكن تلاقي موديل بانوراما بدون Cruise Control, Blue Tooth و مشاكلها مش أكتر من الفئات الأقل ولا حاجة، وبصراحة البانوراما وكماليتها تبهر فعلاً.

4- أفضل وأرخص مركز خدمة وأكثرهم أمانة فى القاهرة أو الجيزة ؟

الصيانة الدورية بعملها في مركز صيانة معتمد (ميكانيكا وكهرباء) في ميدان السواح بالقاهرة، أو في مركز صيانة أباظة في رشدي بالأسكندرية، لكن ممكن تبدأ موضوع جديد بالمنتدى لعمل قائمة بالمراكز الجيدة.

هو فين رقم خمسة ؟؟

6- أنا أتمنى إنى ألاقى العربية دى البانوراما أعلى فئة لون أسود وحالتها ممتازة ويكون صاحبها أمين فن وصفه لحالتها وتاريخها معاه ويكون سعرها فى حدود ميزانيتى 90 ألف ؟ تفتكروا أدور فين ؟؟؟ ولو حد عنده ترشيحات لعربيته أو عربية حد يعرفه يبقى كتر خيره ...

عندي إقتراح يفيدك قبل الشراء، مراكز الصيانة بتقدم خدمة كشف إسمها (PDI: Pre Delivery Inspection) ودي الغرض منها فحص السيارة قبل تسليمها للعميل، وسعرها مش غالي (في حدود 200 جنيه) ودي أكيد أحسن من إنك تاخد واحد ميكانيكي معاك، ولكن مش متأكد هل هي للزيرو فقط أم للمستعمل أيضا بس ممكن أسأل وأرد عليك.

7- فى حالة لقيت طلبى رقم (6) يبقى اختارها ولا اختار الكيا سيراتو 2010 وعاملة 55000 كم ؟؟

الكيا سيراتو هايلة جداً وأنا بحبها لكن مش هتحقق طلبك في عدد الركاب، كمان موديل2010 وعاملة 55000 كم (مش كتير شوية؟)

وانا هاصلى استخارة وأفكر كويس وربنا يجيب الخير إن شاء الله

أفضل شيء تعمله وربنا يوفقك للخير إن شاء الله، ولو محتاج أي مساعدة إحنا دايماً تحت أمرك.

محمود عبد الشافي
سبحانك اللهم وبحمدك ، أشهد أن لا إله إلا أنت أستغفرك وأتوب إليك

[walidsamy71]

بارك الله فيكم

ماشاء الله .....

فى الحقيقة لما أضفت الموضوع ده كنت متخيل إن أنا هاطرح فيه تساؤلاتى وحيرتى وفين وفين ... على ما حد يرد عليا ، لكن تعجبت كثيرا من كل هذا الكم من الإهتمام والحرص والتعاون والمساعدة والمبادرة بالنصيحة مع ان كثير من إخوانى الأفاضل اللى ردوا أو بمعنى أصح كلهم ما يعرفونيش ولا أنا اعرفهم لكنهم كلهم اهنموا وردوا وننصحونى بإخلاص ودعولى بالخير ........ هو ده عادى كدة يا جماعة ؟؟ ولا علشان أنا جديد شوية فى موضوع المنتديات ده فلسة مش واخد على كدة ؟؟؟؟
انا تقريبا نسيت موضوع العربية ده !! وكل تركيزى وتفكيرى وخواطرى أثناء قراءة ردود إخوتى الأفاضل هو الإعجاب بالروح الجميلة اللى بتسيطر عليكم ..
وتذكرت حديث الرسول صلى الله عليه وسلم "إن لله عبادا اختصهم بقضاء حوائج الناس ، حببهم فى الخير وحبب الخير إليهم ، أولئك الآمنون من عذاب الله يوم القيامة" جعلنا الله جميعا منهم..

وبارك الله فيكم .....