بيجو 206 +

[rama2000]

انا حجزت عربيه بيجو 206 + (( 2011))

لو فى اى حد عنده معلومات عنها ياريت يفيدنا

ولكم جزيل الشكر

[rama2000]

يا جماعه محدش رد عليا ليه انا عايزه مسعداتكم

[amr mokhtar]

أولآ الف مبروك مقدمآ و بجد إختيار موفق
انا مالك سابق لبيجو 206 موديل 2001
العربية دى راااائعة بمعنى كلمة من ناحية الثبات و الإعتمادية و الخامات الداخلية

انا شفت 206+ فى المعرض هنا فى الإسكندرية و عجبتنى جدآ

المهم عشان العربية تعيش معاكى كويس
الصيانة فى التوكيل و انا سمعت ان فيه فرع كبير فتح جديد فى أبو رواش

لو فيه حاجة محددة حضرتك عايزة تسألى فيها انا تحت أمرك

[rama2000]

انا متشكره جدا ليك يا استاذ عمرو مختار ربنا يكرمك يارب انا مبسوطه اوى ان فى حد رد عليا
اولا عايزه من حضرتط طلب
تقولى اذاى اشيك على العربيه وانا بستلمها
ثانيا موصفاتها مميزاتها اتلاشى اذاى عيوبها
ثالثا اسعار قطع الغيار
انا عارفه انها غاليه اقوى انا سمعت ان الفنوس االامامى بس ب 800 جنيه
انا متشكره ليك جدا معلش حتعبك معايا

[amr mokhtar]

مفيش تعب و لا حاجة

و حضرتك بتستلمى العربية إتأكدى كويس إن مفيش خدوش على الصاج او حتة فى الصاج شكلها غريب مثلآ

الصالون من جوة يكون سليم و الفرش مفيش فيه قطع او غيره

شوفى الموتور و كل حاجة موجودة فى مكانها
يعنى علبة الفيوزات مقفولة كويس و الوصلات الكهرباء سليمة على سبيل المثال

غير هى العربية بييجى معاها ولاعة السجائر و مش عارف بيبقى معاها عدة و لا لأ!!

العربية دى مميزاتها أكتر من عيوبها
يعنى هى عربية معمرة بإذن الله و بتستحمل السفر .. انا كان معايا 1100 سى سى يعنى موتور أصغر و بالرغم من كده سافرنا بيها كتيييير جدآ و سفريات طويلة
يعنى هقولك عينة من السفريات دى
إسكندرية-السلوم
إسكندرية-دهب و الرجوع تانى يوم
ده غير السفر للمنيا عشان والدى كان بيعمل هناك لفترة

ثباتها رائع فى الملفات و على السرعات العالية

العربية عامة معمرة فى قطع الغيار .. انا غيرت طقم دبرياج على 125 الف كيلو و فيه عربيات كتير بتغيره قبل كده
و كذلك المساعدين غيرتهم على 120 الف كيلو

عيوبها
قد يكون قلة الكماليات يعنى لحد دلوقتى الزجاج الخلفى عادة مش كهرباء
الصالون مش واسع اوى لو حد متعود على عربيات سيدان
الموتور نازل بتكنولوجيا قديمة و عدد الأحصنة قليل نسبيآ (75 حصان)
قطع الغيار مش رخيصة

بالنسبة لأسعار قطع الغيار .. إحنا بعنا العربية من سنة فمعرفش إيه التطور فى الأسعار
بس عامة هى حاجتها بقت متوافرة فى الأسواق فى القاهرة
لكن طبعآ الكشافات الأمامية فى الموديل الحديث بتاعة 308 و دى هتبقى غالية جدآ ..
الكشاف القديم هو اللى كان 800 جنيه إنما الجديد هيبقى بأكتر من كده

[sakrquraish]

هي سعرها كام

[rama2000]

انا موش عارفه اشكرك اذاى يا استاذ amr mokhtar
واللهى انت ساعدنى كتير
جدا انا بس حتعبك معايا ممكن لو انا احتاجت فيها حاجه ابقى اسال حضرتك بعد كده
ومرسى اوى عاى المجهود الرائع الى انت عاملوه ده

[rama2000]

هي سعرها كام

العربيه سعرها 90 الف