مشكلة في بيجو 406 (العربية مابتدورش من اول مرة)

[capoofever]

عندي مشكلة وياريت لو تقدروا تفيدوني فيها:

العربية 406 مانيوال موديل 1999 كل ماجي أدورها مابتدورش ولازم اقعد ادور وابطل الكونتاكت حوالي 4 او 5 مرات عشان تقوم والموضوع ده كان على فترات متباعدة (يعني كل اسبوع مرة ولا حاجه وممكن تقعد شهر ماشية كويس) لكن دلوقتي بقت كل يوم تقريباً
على فكرة انا كشفت عليها في مركز معتمد والجهاز ماطلعش اي حاجة !! وسمعت كلام كتير منه ان ده
الكنترول يونت ولازم يتغير......الخ

فيا ترى ده من ايه وهل حد قابل الموضوع ده قبل كدة!

[mego_100]

دة المارش , كان عندى نفس العيب بالضبط زى مبتقول فى السيارة الالفاروميو , عايز يتنضف او يتغير

[mbx4e]

بصراحة القسم عندنا نايم خالص انا شفت موضوعك من فترة وللاسف ماقدرتش اجوابك غير بعد فترة بصراحة خفت اقولك على حاجة تطلع غلط عشان انا ماليش خبرة لا في الانجشن او ال 406 قلت خلي الناس اللي ليهم خبرة وليهم في الانجشكن وال 406 يجاوبوك الاول وكلنا نستفيد بس للاسف قسم البيجو شكله عجز ولا الناس مشغوله مافيش اي نشاط على المنتدي في قسم البيجو خالص مش عارف ليه ؟؟؟؟؟
المهم بص ياسيدي انا هاقولك على خطوط عريضه وشويه افكار واحتمالات تحطهم وتمشي عليهم وانشاء يكون فيهم فايده والشفاء
بالمناسبة حضرتك مش موضح اي حاجة للاسف وصف العرض عندك ممكن يكون سببه عندك حاجات كتيره على ما اظن انت الموتور عندك انجكشن والاشعال كمان الكتروني .... صحيح كلامي ؟
بص ياباشا انت ممكن يكون عندك كذا حاجه وانا هاديك كذا احتمال اكشف عليهم واحد واحد بالترتيب هانبدا بالاسهل ثم السهل ثم الصعب (طبعا انا بتكلم لو عندك انجكشن واشعال الكتروني)
الاسهل : اولا بتشوف الصيانه العادية :
نبدا بنظام الكهربا للدواره :
1: نكشف على الفيوزات واي كتوات نتاكد انها سليمه ومتركبه في مكانها الصح وبشكل سليم .
2:حالة البطارية والقواطيش بتعتها والاسلاك الموصلة للمارش و الدينمو وكتاوت الدينمو هل في حاجة فيهم لاتعمل بصوره مش مزبوطه نعملها صيانه ونشيك عليها حاجه حاجه ونتاكد من التوصيلات متركبة كويس وسليمه .
3: لو في اي حساست في السكه عندك في الدوارة تكشف عليها سواء الكتروني او كهربا بصراحه انامقدرش اقولك لاني مش عارف موتورك ايه نظامه زي ماقلتلك كل دي احتمالات
الاسهل : ثانيا نظام كهربا الاشعال :
نبدا بالصيانه الاول بردك : 1 : نتاكد من البوجيهات وممكن يكون العيب منها يا بايظه او متركبة غلط او متوصله غلط او الاسلاك بتاعتها مش متوصله صح او فيها خلل او متركبه مقاس غلط اتاكد من مقاس السبارك جاب انه مزبوط طبعا مش قصدي 1 شمعة او 2 شمعة انا اقصد مقاس البوجيه.
2 : مش هاوصيك لو في حساسات للنظام دا تكشف عليه طبعا ياما يتغير او يتركب صح .
3 : نتاكد من الاسبراتير الاكتروني و الكونترول يونت ecu و الموبينة اللي اكيد عندك هتلاقيها الكتروني بغض النظر عن المسميات اللي بيسموها الصنايعه عشان محدش يقول اني بفتي بس انا بحاول اساعدك ممكن اكون مسمياتي خطا بس قصدي صح باذن الله ولو اخطات فدا من نفسي والشيطان والصواب من عند الله.
الصعب : ثالثا : دورة الهواء والوقود والحساست الموجوده في الموتور
نبدا باسهل حاجة فيها صيانه وتنظيف فلتر الهواء وفلتر البنزين او تغيرهم وكذلك البخاخات او الرشاشات يتغيروا او يتنظفوا بالالترا ساوند او الاشعة الصوتيه او سبراي مخصوص للتنظيف وتنظيف وصيانة بوابات الهواء والوقود هتلاقي مواضيع في قسم الاوبل والهوندا تساعدك في المواضيع ( عندك الاستاذ طناني وفادي في الاوبل مواضعهم حلوه والاخوة في الهوندا كلهم متعاونين ماشاء الله عليهم ) دي بالنسبه للتنظيف والصيانه لشغل الانجشكن وحساسات الماف او الماب بتاع الهوا والايدل والحراره والشغل دا مش سهل بس نفس الوقت مش صعب ولذيذ محتاج دماغ فاهمة ورايقه عشان تقدر تفهم العيب عندك لو ناتج عن الشغل دا .
اسف للاطالة وارجو اني اكون افدتك .

[mbx4e]

دة المارش , كان عندى نفس العيب بالضبط زى مبتقول فى السيارة الالفاروميو , عايز يتنضف او يتغير

المارش يتنظف ويتغير له فرشات كربونيه او الفحمات
او الاتوماتك starter motor بتاع المارش لو فيه مشكلة يتغير او يتعمله شاربون والافضل يتغير لو الاتوماتك بتاعه بايظ دا لو كان مابيلقطش
لكن لو كان بيلقط بس بيعتل يعني في صوت خشونه في الدواره يبقى دا عيب في ترس المارش مش متركب مزبوط او مش متنظف او مبوش مشروخ او بايظ
دا بالنسبه للمارش

[rompo10]

المارش او البطاريه

[sarhan22]

اكشف على الموبينا