تيل خلفى للبيجو 305

[hesham_shousha]

لأصحاب ال 305 الأعزاء -
كان فيه مشكله أنه لايوجد تيل خلفى جديد للبيجو ال 305
لكن أحد الميكانيكيه قاللى إن التيل بتاع الشاهين يركب عليها
وفعلا قمت اليوم بتركيبه بنجاح - بعد شراء طنابير خلفى إستيراد غير مخروطه
وطبعا تركيب تيل جديد أحسن بكتير من عمليه حشو التيل القديم

[أحمد علوان]

مبروك يا باشا التركيب
ممكن نعرف الموضوع اتكلف كام كل حاجة بكام لوحدها

[MEDO84EG]

الف مبروك و يا ريت تقولنا بالتفصيل هل في تعديل يتعمل في العربيه علشان يركب او ايه اضراره الجانبيه

[hesham_shousha]

- طقم طنابير إستيراد 200ج
- طقم تيل خلفى شاهين إيطالى 95 ج
- الموضوع لا يحتاج إلى أى تعديلات بالمره

[MEDO84EG]

جزاكم الله خيرا
بس صحيح يا استاذ هشام هيا الساعه بتشتغل ازاي لانها مش شغاله عندي

[hesham_shousha]

راجع التوصيلات الكهربيه

[MEDO84EG]

الف شكر يا استاذ هشام
و لكن بعد اذن حضرتك
هي الطنابير لازم تتغير و لا حضرتك غيرتها عادي يعني؟

[hesham_shousha]

عشان تركب تيل الشاهين لازم الطنابير تكون موش مخروطه - الطنابير اللى عندى كانت مخروطه عشان كده غيرتها

[MEDO84EG]

الف شكر استاذ هشام و بارك الله في حضرتك
بالنسبه للتيل هل في انواع تانيه ممكن تركب غير الشاهين ؟

و كنت عاوز اخد رأي حضرتك في حاجه
ان شاء الله قريب هعمل سمكره و دوكو
و بفكر اروش العربيه حبتين
ايه رأي حضرتك اني اعدل اماكن الفوانيس امامي و خلفي علشان اركب عليها فوانيس 405 امامي و خلفي
انا بحب استشير حضرتك لان حضرتك ما شاء الله بتحب ال 305 بجد و مقتنع بيها و ما شاء الله فاهم
و انا بحب العربيه دي اوي اوي اوي و نفسي استفيد بخبره حضرتك

[hesham_shousha]

بالنسبه للتيل ماعرفشى غير تيل الشاهين
بالنسبه للتعديل : أوعى تعمل الكلام ده لأنه هيبوظ شكل العربيه وموش هتعرف تبيعها فى يوم من الأيام - والفوانيس الأمامى والخلفى الجديده بتاعه ال 305 متوفره فى السوق - يبقى تعمل تعديل ليه ؟؟؟؟؟؟

[MEDO84EG]

بالنسبه للتيل ماعرفشى غير تيل الشاهين
بالنسبه للتعديل : أوعى تعمل الكلام ده لأنه هيبوظ شكل العربيه وموش هتعرف تبيعها فى يوم من الأيام - والفوانيس الأمامى والخلفى الجديده بتاعه ال 305 متوفره فى السوق - يبقى تعمل تعديل ليه ؟؟؟؟؟؟

ربنا يبارك في حضرتك يا استاذ هشام
و الله حضرتك انسان متعاون جدا جدا ما شاء الله
ربنا يبارك في حضرت
طب مفيش اي ترويشات ممكن ادلع العربيه بيها ؟
اصلي جايبها و كان فيها اهمال شنيع
دهان وحش و العفشه مكركبه شويه يعني و الذي منه
بس و الله يا استاذ هشام حضرتك من الناس اللي شجعوني علي شراؤها كان كلام حضرتك في مواضيع كتير
و و الله حضرتك حببتني فيها
و لقيت كلام حضرتك بجد واقع
علي الرغم من ان العربيه البيجو دي موديل 79
لكن و الله العظيم روعه و فعلا احلي من عربيات كتير حديثه
بس طبعان الكلام ده علي 305 اساسها سليم مش ملعوب فيه
انا و الله مش بجامل حضرتك
دنا بجد بدعي لحضرتك و ياما كلمت والدي عن مساعدات حضرتك وربنا يكرم حضرتك يا استاذنا
و يا ريت حضرتك متنسانيش في موضوع الترويش

[hesham_shousha]

الحقيقه ماشفتش حد عامل حركات ترويش لل 305
ال 305 أجمل حاجه ليها تخليها فابريقه

[halme_88]

الف شكر استاذ هشام و بارك الله في حضرتك
وعايذ مساعدتك فى نوع الكوبلن هل اجيب كوبلن استعمال ام صينى ام ماذا

[hesham_shousha]

الحقيقه الكوبلن ده ( بختك يا أبو بخيت )
أنا جربت الإستيراد من واحد أمين - طلع كويس
جربت الفرنساوى الجديد - طلع فرده كويسه وفرده وحشه ( لإنها كانت على بلى )
الصينى ماجربتوش خالص

[MEDO84EG]

طب الكبالن كده ايه الحل فيها