سؤال في حرارة ال 405

[Omar_H]

السلام عليكم يا رجالة

أنا كنت عايز أعرف هي الحرارة الطبيعية لل 405 ال 1.6 كام ؟؟ مش هي المفروض عند ال 90 كده يعني المؤشر يبقى في النص ؟؟

أصل أنا عندي العربية معظم الوقت متلجة والحرارة 70 أو أقل و بتعلى شوية لو يوم حر قوي مثلا .. و هو مش المفروض إن المراوح تشتغل أما الحرارة تقرب من ال 90 ؟؟ وتفصل لما تنزل عن ال 90 سِنة ؟؟ أنا لاحظت عندي بتفضل شغالة لحد ماتنزل الحرارة لحد 70 تقريبا

فلو كده يبقى إيه السبب ؟؟ مع العلم إني شفت ترموستات الكوعة و راكب وشغال ...

و زي ما أنا قريت هنا في المنتدى إن العربية ليها حرارة المفروض تشتغل عندها مش شطارة إن العربية تبقى متلجة كده و فعلا أنا فاكر زمان أما كانت الحرارة بتبقى عند ال 90 العربية كان سحبها بيبقى أحسن و الموتور صوته انعم و اهتزازه أقل
هو من ساعة ما مرة الحاج راح لواحد بتاع رادياتيرات ينضف الرادياتر والعربية بقت متلجة كده

[karimmagdy50]

على فكرة العربية دى فيها 2 مروحة
واحدة بتشتغل عند 70
التانية بتشتغل عند97
وتفضل شغالة لحد مترجع الحرارة كما كانت الربية
الموضوع ده ممكن يكون الساعة بتاعت الحرارة شغالة على البطى
الكهربائى هو اللى هايعرف الكلام ده وبالتوفيق

[boody504]

علي فكرة المروحتين بيشتغلوا مع بعض وانا كان عندي الموضوع دا في العربية الحرارة بتوصل النص وبعدين المراوح تشتغل بس ساعات كانت بتعدي النص بشوية فانا لقيت الحساس اللي نازل من عند الكربيراتير مفصور فركبتة بس دلوقتي الحرارة مش بتعدي ال70 حتي ووهي العربية مبطلة المروحة بتفضل شغالة لحد ما الحرارة تنزل خالص لو حد يعرف حاجة تانية ياريت يفدنا

[Omar_H]

واضح يا رجالة إنكم عندكم نفس المشكلة .... يا ريت حد يفيدنا ياخوانا في القسم ... هي العربية طبيعي تبقى متلجة كده ؟؟؟

[mohamedadelemam]

السلام عليكم..درجة حرارة التشغيل بعد التجربة للحصول على أحسن أداء وإستهلاك وقود هى عند حوالى 70...ودى والله عن تجربة شيل ورجوع كوعة الترموستات كذا مرة إلا أن إستقريت إنى أشيلها وأخلى الحرارة دايما على 70...

[the-hero]

سواء 70 او 90 فده ممكن يتوقف على نوع كتاوت الباترون اللى بتنظم الموضوع ده وكمان الثيرموستات وكمان نوع الريداتير وكل ده بيختلف باختلاف موديلات واصدارات ال 405 المختلفة
بس تقريبا المهم ان دورة التبريد بتكون بتعمل بكفائة فى صورتها الطبيعية ودة بفحص الريداتير والحساسات وساعة الحرارة وكتاوت الباترون بمعنى
المروحتين بيشتغلوا مع بعض سواء فى السرعة البطيئة او السريعة
شغل السرعة البطيئة دائما مع الفصل والتشغيل الاوتوماتيكي حتى لو العربية مبطلة
السرعة السرية عند ارتفاع درجة الحرارة سواء اضطراري او مع المكييف

[Unendlich]

السلام عليكم..درجة حرارة التشغيل بعد التجربة للحصول على أحسن أداء وإستهلاك وقود هى عند حوالى 70...ودى والله عن تجربة شيل ورجوع كوعة الترموستات كذا مرة إلا أن إستقريت إنى أشيلها وأخلى الحرارة دايما على 70...

يؤسفنى إني اقولك إن ده كلام خاطيء

كل البيجو من أواخر الثمانينيات شغال على درجة حرارة موحدة وهي 88

حركة شيل الثرموستات دي افتكاسة مصري لما الصنايعي ميبقاش لاقي سبب المشكلة , يقولك شيل الثرموستات

اللي صنع العربية مش حمار عشان يحطه, هو حاطه لسبب و هو إنه يحافظ على درجة حرارة ثابتة في مختلف ظروف التشغيل و اللي هي أريّح حرارة للموتور مش تمشي في الزحمة تسخن و تطلع على الطريق السريع تنزل ل70

[mohamedadelemam]

السلام عليكم..حضراتكم موضوع كوعة الترموستات كتر أوى الكلام عليه هنا فى المنتدى..بس أنا مش بجيب كلام ميكانيكية والكلام الفارغ دا..دا كلام صديق مهندس ألمانى...والدليل إن الحرارة عندى ثابتى على 70 فى كل الأحوال..لا زيادة ولا نقص..وبعدين بغض النظر إيه اللى يخلينى أعرض الزيت للسخونية وضياع لزوجته والضغط على وش السلندر بالحرارة العالية ...وهى كدا ماشاء الله كمان أحسن وصوتها أوطى وأنعم ...وبالمناسبة لو حضرتك حابب موضوع ترموستات الكوعة فلازم حضرتك تشترى النحاس مش الألمونيوم اللى غالبا بيتباع هنا لأن الألمونيوم بيفتح عند 92 أما النحاس فدا فعلا بيفتح عند 85 زى ما حضرتك قلت...

[mamado405]

عايذين حد يفيدنا

اتمني لو حد عنده الكتالوج يقول لنا او حد من توكيل بيجو يقول لنا رأي علمي عشان موضوع الحراره دا مهم جدا

[Unendlich]

لأ طالما هو الماني يبقى أكيد بيفهم

بس ياريت المرة الجاية لما تشوفه تسأله ليه جميع شركات السيارات (و من ضمنها الشركات الألمانية ) حاطينه في عربياتهم وكله شغال عند ال90 تقريبا

أكيد كلهم مبيفهموش حاجة

عامة لما الناس بتصدق حكاية الثرموستات دي و يشيلوه بتبقى مصلحة بالنسبة لي, ده أنا جبت 2 استيراد بـ5 جنيه عشان الراجل عارف إن ماحدش بيعوزه وانا فهمته إني هلعب بيه و إني أكيد مش هركبه في العربية زي ما كان الخواجة الجاهل عامل


اللهم بلغت اللهم فاشهد و كل واحد أدرى بـمصلحته

[mohamedadelemam]

السلام عليكم..أولا أعتذر لحضرتك لأنى حسيت إن حضرتك إتضايقت من طريقة كلامى..بجد مش قصدى سامحنى....ثانيا هو حضرتك فهمنى إنه للدول الباردة التى تقل فيها درجة الحرارة عن 15...مع حضرتك إنه ممكن نستخدمه فى الشتاء...بس ليه هى كلها بتبقى 20 يوم ستاء والباقى حر فظيع...مرة تانية بجد أنا أسف لحضرتك ومتزعلش منى

[Unendlich]

السلام عليكم..أولا أعتذر لحضرتك لأنى حسيت إن حضرتك إتضايقت من طريقة كلامى..بجد مش قصدى سامحنى....ثانيا هو حضرتك فهمنى إنه للدول الباردة التى تقل فيها درجة الحرارة عن 15...مع حضرتك إنه ممكن نستخدمه فى الشتاء...بس ليه هى كلها بتبقى 20 يوم ستاء والباقى حر فظيع...مرة تانية بجد أنا أسف لحضرتك ومتزعلش منى

يا أستاذي الفاضل احنا كلنا اخوة و اختلاف الرأي لا يفسد للود قضية
و تفضل بقبول فائق احترامي

[mohamedadelemam]

ميرسى جدا لحضرتك

[mbx4e]

سواء 70 او 90 فده ممكن يتوقف على نوع كتاوت الباترون اللى بتنظم الموضوع ده وكمان الثيرموستات وكمان نوع الريداتير وكل ده بيختلف باختلاف موديلات واصدارات ال 405 المختلفة
بس تقريبا المهم ان دورة التبريد بتكون بتعمل بكفائة فى صورتها الطبيعية ودة بفحص الريداتير والحساسات وساعة الحرارة وكتاوت الباترون بمعنى
المروحتين بيشتغلوا مع بعض سواء فى السرعة البطيئة او السريعة
شغل السرعة البطيئة دائما مع الفصل والتشغيل الاوتوماتيكي حتى لو العربية مبطلة
السرعة السرية عند ارتفاع درجة الحرارة سواء اضطراري او مع المكييف

لأ طالما هو الماني يبقى أكيد بيفهم

بس ياريت المرة الجاية لما تشوفه تسأله ليه جميع شركات السيارات (و من ضمنها الشركات الألمانية ) حاطينه في عربياتهم وكله شغال عند ال90 تقريبا

أكيد كلهم مبيفهموش حاجة

عامة لما الناس بتصدق حكاية الثرموستات دي و يشيلوه بتبقى مصلحة بالنسبة لي, ده أنا جبت 2 استيراد بـ5 جنيه عشان الراجل عارف إن ماحدش بيعوزه وانا فهمته إني هلعب بيه و إني أكيد مش هركبه في العربية زي ما كان الخواجة الجاهل عامل


اللهم بلغت اللهم فاشهد و كل واحد أدرى بـمصلحته

عايزين نشوف ونعرف كتاوت الباترون دا ياهيرو ولو سمحت ممكن اسمه بالانجليزي

[karimmomo911]

انا ليا رأي مغاير شوية.اساسا الدرجة الصح للعربية من 88 لحد 92 وبعد كده المراوح تشتغل وتنزل لحد 85 وتعلي تاني وهكذا وده مكتوب في Hayens service manual for 405 وبعدين العربية لو فضلت علي ال70 هتسخب بنزين اكتر علشان العربية تسخن !!!