Tweet
وأخيرا عملت عمرة للوحش البيجو 305 فيلم وخلص على خير الحمد لله
السلام عليكم ورحمة الله
أخواني في منتدانا الجميل وحشتوني بقالي كتييييييييير مبخشش على المنتدى لكن ان شاء الله في الفترة اللي جاية دي ان شاء الله هاظهر كتييير.باركولي يا جدعان الحمد لله عملت عمرة للعربية الجبارة بيجو 305
وطبعا كان حتة فيلم يا جدعان ميحصلش ولا حتى في تايوان
كانت مدة الفيلم سوري قصدي العمرة 14 يوم عند الميكانيكي وطبعا الصراحة عدوا هوا بس هوا بطييييييئ
اكيد مكنتش مستاهلة الأيام دي كلها لكن اييييية دنيا
انا الأول اتفقت مع الأخ المحترم جدا أبو عمر اني هاروح أعمر عند الميكانيكي اللي عمرله العربية بتاعتة لكن حدثت سخرية القدر والموتور قفش (ظهري قفش يا حورية
) وانا على الدائري قدام مرسيدس عند المعادي كدة فقلت طيب أخش توكيل مرسديس اشوف حد يشوفلي العربية قلت بلاش يتنكوا بقا ويقولي ملناش في الفرنساوي ولا حاجة قلت مش طالبة المهم مطولش عليكم قولوا طول قطرت العربية وجري على الميكانيكي بتاعي قلت يشوف فية اية قالي الموتور قفش وهنا كانت الصدمة لقيت نفسي خلاص لبست عندة المهم فك الموتور طلع في بييل اتكسر جوة.وجبت الحاجة وعمل العمرة واستلمت العربية بعد 14 يوم أيوة أخي القارئ الكريم 14 يوم يعني ما يناهز (حلوة يناهز دي
) اسبوعين مقفولين او مفتوحين وعلى فكرة 14 يوم عمل لا يتضمنوا يوم الأحد اللي هو الأجازة المقدسة للأخوة الميكانيكية. والحمد لله مصدفش اي أيام أعياد في هذه الفترة.المهم بعت الحاجة للخراط وداره العجلة وبدأت أصرف وأجيب ولفيت على الحاجة الفرنساوي نمرة واحد والحمد لله جبت الحاجة والجدول التالي يوضح الأسعار أعزائي متصفحي الموضوع:
البند مع التوضيح ان وجد والسعر بالجنية المصري إعلاءا لسمعته عزيز زائر الموضوع وسعيا لرفع قيمتة قال يعني العمرة كانت لهدف وطني
بلية دبرياج العربية كانت عايزاها من الأول 50
طقم جوان فرنساوي نمرة واحد 195
شنبر برازيلي من ملك الشنابر وعرفت انه كويس جدا واحسن من الفرنساوي 100
سيليكون رمادي لزوم النفخ قصدي التقفيل 15
فلتر زيت من النوع المصري الأصيل 10
بييل بدل اللي انكسر 50
اويلسيل صباب فرنساوي أصلي وبعد اما جبتة طلع فيه مع طقم الجوان 20
سبيكة 140
هلالات 45
شبكة أمامية لزوم الألاجة بعد العمرة وأهي اتكسرت الحمد لله ويا ريتني جبت من الرخيصة العادية ومجبتش من الشيك الغالية 50
زيت تعاون 1000 كيلو بتاع عربيات مش قلية 55
فتيس كامل ولية قصة هاحكيهالكم بعد الجدول وقصة مهمة ومؤثرة كمان 200
مسمار بيل بدل اللي اتكسر 30
سكس بلف 40
جوان وش السلندر من المفتخر 20
لحام شكمان اصل الماسورة اتكسرت وهم بيفكوا الموتور 15
نثريات اللي افتكرتة 50
خراط (يتضمن شمايز) 520
ميكانيكي600مع ان كنا متفقين على 500
المجموع مبلغ وقدرة 2205 فقط لا غير
انا لفيت كتير عشان اجيب الحاجات دي بالاسعار دي وبالجودة المطلوبة ولو حد عايز حاجة يقولي وان شاء الله أقولة يجيبها منين وان شاء الله أعرف اساعده زي ما الناس هنا بتساعدني كتير.
المهم الراجل اشتغل وقفل العربية والعربية اتلينت أو اتنيلت وهي واقفة وبعد كدة طلعة من العباسية على بدر وطريق السويس حبيبي ولين يا برنس والحمد لله الدنيا مشيت ورجت ظبط حاجات غاية اما كل حاجة اتظبطط الحمد لله.
هاقولكم على لقطات من اللي حصل ساعة العمرة أو بعدها.
قصة الفتيس:
قصة الفتيس يا حضرات دي عبرة لأي قارئ بيسعى لتعمير دماغة قصدي عربيتة والقصة تبدأ لما أشتريت العربية وبالمناسبة عن طريق المنتدى واللي أخدت منه العربية قالي عداد السرعة شغال بس سلك السرعة واقع ممكن تزقة بس وهو هايشتغل طبعا طلع العيب مش سلك السرعة لأني عملت سلك جديد وجبت كام بيبة سرعة وجربتها وكما اية جبت كذا عداد سرعة وركبتة فضا بقا انتم عارفين المهم طلع العيب في ترس اسمة ترس الحلزونة (بيفكرني بالحلزونة ياما الحلزونة
) ودر ترس موجود في الفتيس اللي بينقل الحركة لبيبة السرعة اللي بتنقل الحركة لعداد السرعة عشان يديك القراية اللي عرفتة عنها انها ترس معدن وعرفت وده معرفش صح ولا لأ ان الناس اللب معاها 504 بيبدلوا ترس الحلزونة اللي عندهم ببتاع 305 عشان معدن ومبيبظش بس في حالتي ده كان استثناء وصدف المهم رحت اجيب الترس ده لقيت الوكالة بتقفل وكل اما اقول لحد يقولي لأ مينفعش ابيعة عشان كدة هاوقف فتيس كامل المهم عشان الحاج كامل ميزعلش جبت الفتيس كامل وريحت نفسي.مشكلة طمبورة الكرنك:
بعد العمرة واثناء فترة التليين كان صوت الموتور أعلى بشوية من صوت موتور العربية الربع نقل الشيفرولية المهم أروح للميكانيكي يقولي ده الشكمان أروح لبتاع الشكمانات يحط جوان وأرجع المهم الدنيا فضلت رايح جاي كتير لغاية ميعاد تغيير الزيت لقيت فضلة خيركم كدة حتة من مسمار بيل نزلة هاهاهاهاها والله مش بهزر طلع انهم وهم بيركبوا الفتيس كان فية مسمار بيل مكسور وواقع في الفتيس طلع انهم مشلهوش كلة والميكانيكي قالي ان مع غيار الزيت اللي جاي الصوت هايروح المهم عدا غيار الزيت اللي بعده وملقتش حاجة نزلت في الزيت والدنيا حلاوة والصوت نقاوة وانا في البقلاوة من هنا لهنا الميكانيكي قالي دي طنبورة الكرنك ولازم تبيت العربية عندي وانتم عارفين احنا معندناش عربيات تبات برة انتم عارفني حمش وفي الشدة شديد وفي القوة قوي قوي قوي المهم فين وفين قالي العيب في طنبروة الكرنك اللي بتنقل الحركة لطلمبة المياة والدينامو أعزائي المتابعين قلت شكلة مخبيلي خازوق من عينة ما خفي كان اعظم وهو كل ده اساسا باروحلة الاقية زحمة جدااااااااا فيخلي اي صبي يشتغل في العربية المهم المرة ده هو اللي اشتغل في العربية فك المسمار اللي ماسك الطنبروة وبص عليها وقالي ياحمد هاتلي ورد نحطها على المسمار وفعلا جبت عدد 6 ورد وحطهم الدورت طلع صوت الموتور جامد جدي والدنيا فل بجد وأخيرا حسيت اني عملت عمرة للعربية والصوت الازعاج ده كله ان الطنبورة بتتهز والعربية الحمد لله مبقاش ليها صوت تقريبا وصون العادم وهو طالع من الشكمان اعلى من صوت الموتور لدرجة اني اوقات بافتكر العربية مطفية فاقوم مدور لغاية اما شكلي هاحرق المارش هاهاهاهاهاه
والحمد للع العربية بتجري جري جامد على طريق السويس 140 عادي جداااا وعربية الحمد لله ما شاء الله فعلا تحفة والحمد لله على كدة ومعلش طولت عليكم ولما هافتكر اي من القطات الجامدة اللي حصلة هاكتبهالكم
وانا دلوقتي عرفت واحد جاري في مدينة بدر راجل كبير يعني خمسينات كدة والله حاجة ربنا يديلة طولة العمر شغال طول عمرة ميكانيكي في الهيئة العربية للتصنيع وعندهم اسطول بيجو 305 والراجل حافظ العربية بشكل غريب ربنا يديلة الصحة وايدة تتلف في حرير بس مش فاتح ورشة باكلمة لو في حاجة يظبطهالي في العربية الراجل الصراحة مجرم 305 ولو حد عايز يرحله ممكن نظبط معاه يعمله اي حاجة في العربية وهو حنين في الفلوس بس يكون فاضي
وادعولي بقا ربنا يباركلي في العربية ويكفيني شرها ويرزقني خيرها ويكفيني ويكفيكم شر الطريق
وكل سنة وانتم طيبين بمناسبة رمضان
Comment