بيجو 406

[ebn_mesr]

الاخوة الاعزاء
السلام عليكم ورحمة الله وبركاته
انا لسه مشترك فى المنتدى ده اليوم لانى ناوى باذن الله اشترى عربية بيجو 406 موديل 2006 وكنت عايز اعرف بعض المعلومات عنها وعن مراكز الخدمة وقطع الغيار واسعارها و حاجات زى كده بس فوجئت ان مواضيع المنتدى الخاصة بالعربيات البيجو كلها بتواريخ قديمة ومافيش اى مواضيع جديدة هم الناس بطلو يشتروا البيجو ولا ايه ياريت لو حد عنده رد او اى افادة يرد عليا وشكرا جزيلا لكم
اخوكم م.احمد

------------------------------
اللون الاحمر مخصص للمداخلات الاداريه فقط
يرجي مراجعه قوانين المنتدي

2.25ص
14/1/2012

م.ع.12

[benmatar]

السلام عليكم
المشاركة دي كنت شاركت بيها لأحد السادة الأفاضل وأعرضها لحضرتك للإفادة، بالنسبة لبيجو 406 من أفضل ما يتم اقتناؤه من سيارات وده عن تجربة للموديل ده ولماركات وموديلات أخرى، ولكن بشروط معظمها وأهمها يتعلق بحالة السيارة المستعملة التي تشتريها.. يعني تكون استخدام راقي بمعنى الكلمة وأنصح بشراء موديلات 2004، 2005، 2006 أفضلها. وسهل إنك تلاقي من العربية دي فابريقة بالكامل.. بصفة عامة اتزانها عالي جدا وده كلام عن تجربة حتى سرعة 200 بجد والعفشة كويسة بس مش ناعمة نعومة الياباني بس متانة وقوة تفوق الياباني بمراحل وعالية عن الأرض وثابتة في نفس الوقت.. الباور بتاعها ممتاز ومزودة بفرامل مانعة الانغلاق وتعمل بكفاءة جدا وكماليتها رائعة )abs, ebd) .. بصراحة ركبت مع اصدقاء ماركات أخرى أحدث بس آسيوي مشفتش زي 406 في الكفاءة والقوة وبرضه أفضل من موديلات وماركات تانية فرنساوي برضه بفارق ملحوظ.. الفتيس أهم وأخطر شيء وثمنه نص ثمن العربية.. لازم يكون سليم.. وبالنسبة للموتور 2000 سي سي بنزين فاستهلاكه رائع لو استخدامك أغلبه سفر وطرق مفتوحة بس هتكلفك شويتين لو حياتك ومشواريك داخل المدن وسفرك قليل. المجمل عربية رائعة متينة وقوية وشيك وأنا مجرب 3 موديلات منها وشفت بيها مغامرات وقطع غيارها معمرة ومعظمها أصلي.. بس عملية إعادة البيع بطيئة ومش زي الياباني أو الكوري في البيع بس ليها اللي بيفهم فيها ويقدرها لأنها تستحق الاحترام.. ومتقرنهاش بالآسيوي.. ومستواها زي الألماني.. لو بتحب السرعة والسفر الطويل اشتريها ولو بتدور على اقتصاديات التشغيل متجبهاش بصراحة.. أنا بانصحك وتحت أمرك.. وأهم شيء في الفحص يكون التركيز على الفتيس بعد مايكون الشاسيه 100%، وياريت تكون عارف من صاحبها مواعيد تغيير الزيت ده لو كان بيغيره وهي دي مشكلة 406 إننا كشعب مبيهتمش بجداول الصيانة فإن فتيس 406 هو سر نجاحها وفي نفس الوقت سر خوف الناس منها. يعني الزيت المفروض يتغير كل 50 ألف (عادة معظم الأوروبي والألماني) وطبعا محدش كان بيعمل كده وده يؤدي لتغيير البلوف والزيت. الخلاصة إنك طبعا زي أي عربية تكشف على أهم شيء ألا وهو الشاسيه والدواخل وبالأخص النص الأمامي. والمفضل إنها تكون فابريقة بالكامل وده شئ مش صعب الحصول عليه في 406 لإنها عربية فخمة وشيك وكانت غالية لما نزلت زيرو.. يعني المفروض متكونش متهانة.. وأنصحك تشتري 406 أم موتور فضي أو بيسموه الموتور الأبيض وهي دي الموديلات 2006،2005، 2004.. بشكل عام لو جربتها على طريق ومجابتش معاك 200 كيلو/ ساعة بسهولة متبقاش تمام وتراعي إن النقلات ناعمة وسلسة واتزانها عالى والباور ستيرنج ميعملش صوت وانت بتلفه وهي واقفة ودايرة طبعا.. وتراعي الكونترول شغال كويس في كل حاجة زي ضبط مستوى الضوء الأمامي وتوجيه التكييف ديجيتال والاستجابة تمام وكونترول الكاسيت من الدركسيون والانارة الأوتوماتيكية... وربنا يوفقك وسامحني للإطالة

[ebn_mesr]

اشكرك جدا جدا اخى العزيز على اهتمامك وردك على موضوعى بس معلش انا كنت عايز اخد رأيك فى كذا حاجة كده لو مافيهاش غلاسة اصلى دى تعتبر اول عربية خاصة بيا اشتريها وخايف اتصدم فيها (وطبيعة شغلى محتاجة عربية تستحمل السفر فمينفعش انى اجيب حاجة مش قوية زى اللانوس او الفيرنا مثلا) ناس كتير بتخوفنى منها ومن عدم توافر قطع غيارها ومراكز صاينتها لاننى عيش فى البحر الاحمر وعلشان الاقيلها قطع غيار لازم انزل القاهرة مثلا وده مشوار مش سهل طبعا كل شوية وغير كده انا ماليش خبرة كبيرة بالميكانيكا والكشف على العربيات ومش عارف الاقى حد يكشف معايا عليها ويختبرها ويقولى اذا كانت كويسه ولا لاء وبجد خايف اتخم فيها واخيرا واسف جدا للاطالة مش عارف هى العربية لو عاملة لغاية كام كيلو تبقى كويسة؟
ملحوظة هى العربية استعمال بنك وواحد صاحبى بيقولى انها ممتازة جدا وهو كمان هايشترى واحدة

[ebn_mesr]

اشكرك جدا جدا اخى العزيز على اهتمامك وردك على موضوعى بس معلش انا كنت عايز اخد رأيك فى كذا حاجة كده لو مافيهاش غلاسة اصلى دى تعتبر اول عربية خاصة بيا اشتريها وخايف اتصدم فيها (وطبيعة شغلى محتاجة عربية تستحمل السفر فمينفعش انى اجيب حاجة مش قوية زى اللانوس او الفيرنا مثلا) ناس كتير بتخوفنى منها ومن عدم توافر قطع غيارها ومراكز صاينتها لاننى عيش فى البحر الاحمر وعلشان الاقيلها قطع غيار لازم انزل القاهرة مثلا وده مشوار مش سهل طبعا كل شوية وغير كده انا ماليش خبرة كبيرة بالميكانيكا والكشف على العربيات ومش عارف الاقى حد يكشف معايا عليها ويختبرها ويقولى اذا كانت كويسه ولا لاء وبجد خايف اتخم فيها واخيرا واسف جدا للاطالة مش عارف هى العربية لو عاملة لغاية كام كيلو تبقى كويسة؟
ملحوظة هى العربية استعمال بنك وواحد صاحبى بيقولى انها ممتازة جدا وهو كمان هايشترى واحدة

[م.احمد زكريا]

اهلا بيك في منتدى نايل موتورز و ربنا يوفقك وتدخل عرين الاسود

البيجو 406 عربية ممتازة جدا سواء في السفر او داخل المدن وبعدين فيها كل التتمناه من عربية

وسع وفخامة وقوه على الطريق وثبات حتى 200 كم/ساعة

------------------

نيجي لقطع الغيار والصيانة

قطع الغيار متوفرة جدا جديد واستيراد

أما مراكز الصيانة فهي كتير وخصوصا في الحرفيين

المشكلة بالنسبة ليك هي وجودك في البحر الاحمر وانا بصراحة مش عارف هل فيه مراكز لصيانة بيجو ولا لأ

بالنسبة لمواتير بيجو فيسموها موتور المليون كيلو

أهم حاجة تكشف عليها في العربية " الفتيس "

وده بيتقاس بوضع العربية على جهاز كشف الاعطال وبيتم قياس ضغط الزيت لو طلع 2.8 الى 3 فكدة ان شاء الله مافيش مشكلة

طبعاة ده غير الكشف العام على السيارة عند متخصص

الافضل تطلع بالعربية على مركز خدمة بيجو الاقرب ليك ويا ريت يكون غير البيصينوا فيها " وخصوصا انها بتاع بنك " وتعمل كشف كامل ومفصل عن العربية

وربنا يفقك ان شاء الله في حاجة كويسة

وهي على فكرة اختيار رائع

واهلا بيك في بيجو

[Unendlich]

على فكرة في زيت مخصووووووووووووص لفتيس العربية دي مش أي زيت اتوماتيك و خلاص
جركن فضي مكتوب عليه Esso ATF AL4 و عليه علامات بيجو و ستروين

[benmatar]

السلام عليكم
آسف للتأخير في الرد لظروف
زي ما تفضل السادة ووضحوا النقاط الهامة وفعلا هي الفيتيس وحالته مع الفحص العادي لأي عربية بداية من الشاسيه، وبقول لحضرتك أفضل شئ البحث عن الكيلو القليل والفابريقة بالكامل ياحبذا، والأمر ده مش نادر وبالذات في البيجو 406 أو الباسات أو الموديلات الشبيهة.
وتقريبا عشان تجيب حاجة تمام 2004 إلى 2006 ودي أفضل الموديلات هتكون في الثمانينات.
وطبعا مراكز الخدمة المتخصصة في البيجو موجودة وأفضلها بالنسبة لتجاربي هو مركز أحمد عمارة في مصر القديمة

[Rambo10]

ياريت لو حد يفيدنى فى اسعار كبالن 406 مو 2003 اتوماتيك

[medo20000]

الله ينور يارجالة بس ممكن حد يرفع لنا صور لعربيته علشان أنا كمان بقارن بينها وبين ال BMW e36 موديل 1997 ...مع كامل إحترامى لل 406 >>>

[waleedabbas]

ياريت لو حد يفيدنى فى اسعار كبالن 406 مو 2003 اتوماتيك

سالت عليهم غزال ال ف شارع دمشق تمنهم 5000 جنيه لكن استيراد بيعملوا حوالي 1000 جنيه الفردة الصغيرة الشمال ودي ال غالبا بتبوظ بتعمل من 400 ل 500 جنية