مساعدة فى بيجو 205

[MF_813]

بسم الله الرحمن الرحيم
انا عربيتي عملت حادثة من الجانب اليمين عدد 2 باب و السقف من فوق اتعوج خاجة بسيطة بسبب القايم ،، انا كنت عايز اعرف اجيب منين البابين و اسعارهم ايه ، و التابلوه اتكسر خالص و القنسوة اللا هيه قدام عصاية الفتيس مكان الكاسيت ، و الحمد الله على كل شيؤ اه و الكابوت كمان و 2 رفرف
انا طولت و كفاية كده بقى الحمد الله فياريت لو اى حد يقدر يساعدني بالاسعار و الاماكن
و شكرا مقدما ليكم

[hanymi45]

السلام عليكم ورحمة الله وبركاته
ربنا يعوض عليك ان شاء الله والحمد لله ان انت بخير كل شئ يتعوض
عموما مش ح اطول عليك انا معرفش بصراحة الاسعار ايه ولكن فى عندك الوكاله عند حميدو اشهرهم رغم انه فيه اكتر من واحد هناك ولكن فاصل معاه كويس وفى محمد حلاله ده فى مكان اسمه ارض اللواء على الدائرى هو متخصص فى 205 بس مش بيشتغل فى غيرهم ممكن برضه يفيدك وهو ميكانيكى كمان وانا اتعاملت معاه واسعاره دايماً بتكون أرخص من اى حد تانى فى الغالب بالنسبه للوكاله معروفه مكانها طبعاً بالنسبة لمحمد حلاله ليه رقم تليفون يوصف لك المكان بتاعه وتروح له هو عموما لما تبقى جاى من اكتوبر وفيصل على الدائرى ورايح ميدان لبنان متنزلش نزلة ميدان لبنان بعدها فى طلعه تنزل منها يعنى عكس هو المكان ده اسمه ارض اللواء بس من عند الدائرى وتليفونه 0108988995 وفى برضه عماد المصرى فى الدقى هو محترم جدا ومش بيفاصل بصراحه بس الاسعار بتكون ممكن اغلى شويه هو تحت كوبرى الدقى اسال عليه معروف هناك قدام بنزينة التعاون الناحية التانيه
ولكن انا راى ونصيحتى ليك اسأل عند كل واحد وشوف الارخص والافضل لكن بصراحة هما الثلاثه حاجتهم مضمونه
وربنا معاك ويعوضك خير ان شاء الله وانا تحت امرك فى مساعده

[MF_813]

الف شكر يا باشا وشكرا علي مساعدتك