Battery charge or electrical supply faulty

[MuhamedNabil]

السلام عليكم و رحمة الله

Battery charge or electrical supply faulty

دى رساله بدات تطلع من كام يوم كده و تروح لوحدها بعد كام ثانية

- المهم انى قيست البطارية و زى الفول مع ان التست العليها بيقول انها محتاجة شحن

- قيست شحن الدينامو و العربية باردة مدى 14.50 فولت و لما العربية سخنة بعد مشوار 13.8 فولت

- السير بتاع الدينمور برده كويس البلية خشنة شوية بس انا غيرتها خلاص

لو فى حد هنا حصلوا الموضوع ده ياريت يفيدنى انا شاكك ان يكون فى كابل فى دايرة الشحن سايب او بايظ بس لسة ملقيتش رسمة الدايرة بتاعت العربية

[Ahmed Amin]

أزيك يا بشمهندس محمد.

أنا عملت بحث سريع كدا علي المشكلة دي وجاب لي نتيجة في منتديات بيجو فورمز,
وكان في موضوع لواحد عنده نفس مشكلتك وطلع العيب من :-

1.سلك الدينيمو "اللي هوا تقريبا سير المجموعة عندنا" أأكد عليه تاني أنو مشدود كويس.
2.البلية بتاعت الدينيمو, كويس أنك غيرتها بس أبقي بص عليها تاني وأتاكد أن السير بيلفها معاه كويس ومش بتفوت.

3. أحتمال كبير تكون البطارية مادام بتقول أنها محتاج شحن يإما تبقي خلاص عايزة تتغير, أو حصلها أجهاد من حاجة غلط في الكهرباء, قلة شحن من الدينيمو أو تهرب.
أنا البطارية عندي فصلت من غير مقدمات..
فحاول تشحنها الأول كويس وشوف هتعد قد ايه, مع إن شحن البطاريات الجافة مش بيعمر زي البطارية المية.
*بس يفضل أنك تشحنها الأول عشان لو المشكلة مش منها متبقاش غيرتها بواحدة جديدة علي الفاضي والعيب مش منها والجديدة تُستهلك برضه.

أنا فكرت يكون العيب في الدينيمو أنو يكون بيودع وبيفصل ويشتغل, ولما بيفصل أو بيبطل يدي شحن للبطارية بيزيد الحمل عليها أكتر من المعدل الطبيعي لأنه المفروض يبقي شغال وبيديها طول الوقت فبيطلع لك الرسالة دي ويكون دا اللي خلي البطارية محتاجة شحن دلوقتي..
بس معتقدش أنو ممكن يعمل كدا, وبرضه السير معتقدش أنو ممكن يفوت شوية ويشتغل شوية,

*4* - وأخر حاجة وأتمني تبقي المشكلة علي قد كدا, واحد طلعت له الرسالة دي و غير بطارية ودينيمو وسير وحور عشان يحلها وفي الأخر طلعت سلك الأرضي مش متوصل كويس..!

فعشان كدا بقولك خلي البطارية دلوقتي وأتاكد لو في تهريب من سلك الأرضي,
والموضوع إن شاء الله ميكونش كابل في دايرة الشحن,
فاياريت تعمل أتشيك علي الحاجات دي كويس قبل أي حاجة..

بالتوفيق يارب, وتبقي تطمنا عملت أيه.

[MuhamedNabil]

الف شكر على مجهودك , انهردة و انا رايح الشغل برده طلعت نفس الرسالة نزلت و قيست الشحن فى سعتها لقيت ان الشحن تقريبا متوقف و العربية شغالة على البطارية و المشكل اظاهر انها بتيجى بعد متمشى على rpm عالى فترة و تيجى تهدى جوة البلد تظهر الرسالة
انا شاكك فى السير مثلا يكون بيفوت او الشنابر بتاعت الدينامو برده هحاول اقيس الارضى كده و ابوص على البلية بتاعت الدينامو لان كان في صوت غريب وقتها لحاجة بتلف و فيها خشونة