عملت شوية شغل ف العفشة 307

[A.Lotfy]

السلام عليكم ورحمة الله

انا من فترة كده كنت عايز اكشف على العفشة وكنت عملت موضوع لكده

لما رحت مركز الخدمة المعتمد وقولتله بصلي عليها وانا باعمل الصيانة طلع جرب وقالي اعمل حسابك دراعات ميزان ومساعدين وطبعا مبلغ وقدره

نسيت الموضوع فترة وبعدين لما الصوت زاد وخصوصا ان الشارع بتاعي مكسر والصبح مستعجل فبأسمع الحان

رحت مركز في المعادي على صقر قريش الاوتوستراد كده كنت جبت مساحات وكلاكس مرة من عندهم

وقولتله اكشف فقالي قدام حسبت 2000 ولو طلع المساعدين بايظين هيعملو 850 - 900

مشيت اسبوع كده على ما دبرت الكاشات ورحتله تاني ونبدأ الحكاية :)

يوم الخميس الساعة 12 ظهرا بدأ فك العفشة قدام ولقينا ما يلي بالاسعار:
* البطاحتين 500 جنيه
* بيضتين مقص 370 جنيه
* قاعدة موتور سفلية (دي كانت معجونة) 70 جنيه
* طقم تيل أمامي 400 جنيه
* كاوتشتين ميزان 120 جنيه (ودي مكنش هيغيرها بس انا قولتله على صوت تزييق قعد يجرب تحت لغاية ما وصل للصوت وقالي اصل دول ما بيتغيروش انا اول مرة اغيرهم في عربية 307)
* بعت المساعدين بالسوست على ورشة تانية يكشف عليهم علشان معندوش زرجينة وطلعو كويسين
* المصنعية 250 كنت مستكترهم جدا بس مش عارف ليه دفعتهم بلا إرادة كده مش عارف يمكن عشان مبسوط
الكلام ده خلص الساعة 5 تقريبا كنت طالع اجرب

سر انبساطي بقى ان العربية عاملة 141 ألف كيلو ... مفيش حاجة في العفشة اتغيرت غير البطاحات قبل كده اتغيرت مع العلم اني ساكن ف حدائق الاهرام وصباح الهبد والنقر

والتيل كان متغير عند صيانة ال 100 ألف يعني حوالي 40 ألف


وأسعار الحاجة مش غالية مقارنة بالعربيات الياباني


بس ياسيدي .... امبارح برضه رحت نازل على ش دمشق شاري جوز فوانيس شبورة (الواحد ب 85 جنيه صيني) بس ما يفرقش حاجة عن الاصلي بصراحة لان اللي عندي خلاص الرمل أكلهم ومش باشوف بيهم حاجة
وركبتهم واحساس تاني خالص طول ما انا ماشي جوة البلد ماشي بيه


ياالله بقى كفاية كده اروح اشوف شغلي

[ahmedkhairy]

يلا ربنا يباركلك فيها وأحسن حاجة أنك صلحتها

[laxeg]

ربنا يباركلك فيها
ممكن اسم المركز او وصف مكانه لانى عاوز عفشجى كويس

[A.Lotfy]

المكان ف صقر قريش وانت نازل من الدائري في اتجاه المعادي ادخل على الحارة البطيئة هتلاقي يافطة كبيرة مكتوب عليها غريب بيجو وستروين
اسطى محمود

الميزة انه عنده قطع الغيار كلها تقريبا وسعرها انا سألت عليه في شارع دمشق وهيا نفس الاسعار

[laxeg]

شكرا ليك جدا...
انا معايا كيا بس هاجرب وان شاء الله يكون تمام

[Ahmed Amin]

الله ينور يا معلم.
واضح أنو شغل زي الفل.. وإن شاء الله العربية تكون بقت أحسن معاك عشان تستحمل ظروف الشوارع اللي بنمشي فيها..
حاول برضه لو تفضي وتملا الكاوتش نايتروجين. أنا فرق معايا كتير ايام ما كانت العفشة سايبة من المطبات الصفرا اللي مالية الطرق عندنا والكاوتش الناشف
النيتروجين هيساعدك شوية كمان.