405 1600cc

[amado ibrahim]

السلام عيكم
أخوتى الاعزاء فى هذا المنتدى الراائع أرجو الافادة عن السيارة بيجو 405 1600 موديل 2003 حيث اننى مقدم على شراء هذه السيارة واريد ان اعرف بالتفصيل مميزاتها و عيوبها

[kareem_Ashmawy]

السلام عليكم ...
حضرتك يستحسن تحدد عايز تستفسر عن ايه بالضبط فى العربية
لأنها مشهورة جدا و أكيد حضرتك مدام ( مقدم على شرائها)
يبقى حضرتك سألت الموديل ده
عموما بوجه عام
هى عربية تجمع بين نعومة الجديد و متانة القديم
يعنى لو قلنا بسرعة كده
من اقوى شاسيهات العربيات اللى موجودة ( بص على غربيات الشرطة من 94 لغاية دلوقتى)
برده صاجها جامد جدا...( عربية 125 دخلت فى الرفرف عندى و الحمد لله بلا خساير)
العفشة مريحة جدا جدا
الصالون من جوه شقة واااااااااسع جدا
.الشنطة واسعة جدا جدا
.
قطع الغيار أسعارها معقولة جدا و معمرة جدا
و المستعمل منها موجووووووووووووووود بالهبل و انضف من الجديد
وكل حاجتها موجودة مفيش حاجة متلاقيهاش
التكييف معقول جدا ( بس مش زى اليابانى بصراحة )

استهلاك البنزين بتاعها متوسط حوالى 170 الى 200 كم فى الصفيحة جوه البلد

ثبات بأه ماشاء الله ثابته جدا
أنا عن نفسى باخد بيها غرز قطم على 130 و الحمد لله زى الفل

حاجة بأه اخيرة
العربية دى بتعمل برستيج فى الشارع ملوش حل:)

أى استفسارات أنا تحت امرك
وربنا يوفقك

[the-hero]

العربية دى بتعمل برستيج فى الشارع ملوش حل:)

الراجل جبلك زتونة الموضع الف شكر يا كريم باشا عجبتنى أو دماغك فى الجملة ديه
مكنوش سموها البرستيج كلمة أساسا جامدة موت ومفيش أسم عربية لحد دلوقتى شددنى زى الكلمة ديه
بس ليه تعليق بسيط على كلامك يا نجم الصفيحة بتعمل من 170 الي200 كم بالنسبة للبرستيج ال 2000 سي سي لكن ال 1600 بتعمل من 200 الى 240 كم على حسب مش فى البلد أو السفر
والف شكر ليكوا يا رجالتنا والى الأمام دائما

[amado ibrahim]

شكرا على الرد الوافى يا كريم باشا رد معلم بجد فلقد اوضحت لى مميزات السيارة بكل وضوح فاضل سوال واحد هل لك ملاحظات على هذه السيارة

[kareem_Ashmawy]

الراجل جبلك زتونة الموضع الف شكر يا كريم باشا عجبتنى أو دماغك فى الجملة ديه
مكنوش سموها البرستيج كلمة أساسا جامدة موت ومفيش أسم عربية لحد دلوقتى شددنى زى الكلمة ديه
بس ليه تعليق بسيط على كلامك يا نجم الصفيحة بتعمل من 170 الي200 كم بالنسبة للبرستيج ال 2000 سي سي لكن ال 1600 بتعمل من 200 الى 240 كم على حسب مش فى البلد أو السفر
والف شكر ليكوا يا رجالتنا والى الأمام دائما
__________________

ربنا يخليك ياباشا...هى فعلا برستيج و هى برستيج
وعلى فكرة أنا قصدى الاتنين ال 1600 و ال 2000
و عذرا على موضوع استهلاك البنزين ده
أنا حسبتها على عندى فى ال 2000

شكرا على الرد الوافى يا كريم باشا رد معلم بجد فلقد اوضحت لى مميزات السيارة بكل وضوح فاضل سوال واحد هل لك ملاحظات على هذه السيارة

يافندم الشكر لله أنا معملتش حاجة....
بص هى الملاحظة الوحيدة عليها ان صوت الموتور عالى شوية
يعنى مش زى اليابانى مثلا و عزل الصوت برده مش زى الياباتى
انما صوت الموتور بتعها تحب تسمحه
بيدى احساس بالقوة
كمان فى بعض الناس بيقولوا ان شكلها مش حلو أوى زى الموديلات الجديدة
بس بصراحة انا بحب شكلها جدا
حاجة كمان الباور بتاعها اتقل من عربيات كتير ( على فكرة انا سقت ال 407 نفس تقل الباور)
بس ده عشان ثبات ممتاز على السرعات العالية...وعندك هيرو باشا أهوه مصور عربيته ما شاء الله
على 200كم/س..
دى بعض الحاجات اللى ممكن تبقى عيوب و ربنا يوفقك مرة تانية


هى صحيح معروضة عليك على كام......

[amado ibrahim]

الله يكرمك يا باشا يصراحة حببتنى فى العربية انا كشفت على العربية وكانت حالتها ممتازة وهى معروضة على 64500
يصراحة انا اتشرفت بمعرفتك يا كريم باشا و اتمنى ان تقبلنى كصديق

[kareem_Ashmawy]

يافندم الشرف ليا ..:) و انا اللى تشرفنى صداقتك
هو السعر كده معقول لو كانت عاملة كيلومتر قليل
بس لو معدية ال 100 ألف كيلو يبقى نزلها شوية كتير
وربنا معاك

[amado ibrahim]

شكرا يا باشا على الرد السربع هى عاملة 90 الف كيلو ايه رايك فى السعر

[FLYINGPEUGEOT]

اهلا بيك يااستاذ amado ibrahim


عضو واخ جديد معانا

انا بس كان ليا سؤال بخصوص السعر...ممكن اعرف كماليتها ايه الاول ؟

[kareem_Ashmawy]

اهوه جالك زعيم البيجو أهوه
اسأله عن كل اللى نفسك فيه باه....


تقريبا يا ابو هانى ...هى فيها الكماليات العادية اللى بتنزل مع التقفيل المصرى
باور
اتنين زجاج ك أمامى
سنتر و ريموت
تكييف


صح و لا ايــــــــه؟؟؟

[amado ibrahim]

اسف للتأخير فى الرد كنت بالخارج
أولا أنا سعيد جدا بردك ياابو هانى
فعلا العربية بالمواصفات اللى ذكرها ابو الكرم
و اتمنى ان توضح لى يا ابو هانى ملاحظاتك على هذا الموديل و تعليققك على 405 عامة
بجد يهمنى رأيك يا باشا

[FLYINGPEUGEOT]

اهوه جالك زعيم البيجو أهوه
اسأله عن كل اللى نفسك فيه باه....


تقريبا يا ابو هانى ...هى فيها الكماليات العادية اللى بتنزل مع التقفيل المصرى
باور
اتنين زجاج ك أمامى
سنتر و ريموت
تكييف


صح و لا ايــــــــه؟؟؟

عامل ايه ياكيمو...واحشنى يادوك
بالظبط كده ياكيمو...بس فى شوية كماليات كانت بتبقى اختياريه

1- الجنوط ال 14 175/70 الرياضيه
لان كان فى منها نفس المقاس بس حديد

2- fog light فوانيس الشبوره

3- التكييف

4- الاديشينال ستوب لايت

اسف للتأخير فى الرد كنت بالخارج
أولا أنا سعيد جدا بردك ياابو هانى
فعلا العربية بالمواصفات اللى ذكرها ابو الكرم
و اتمنى ان توضح لى يا ابو هانى ملاحظاتك على هذا الموديل و تعليققك على 405 عامة
بجد يهمنى رأيك يا باشا

العفو ياباشا احنا اخوات...وانا اسعد بمعرفتك :)

بالنسبه ل 405 وجيه اباظه

مفيش اى اختلاف بينها وبين...405 فرنسا او انجلترا

غير حاجات بسيطه اوى

1- (اتعمدوا فتح التاكيهات شويه)...عشان الحراره !!!! مع انها كده كده مبتسخنش !!!
مما ادى الى
1- صوتها عالى شويه بالمقارنه باى 405 1600 تانيه
2-استهلاك البنزين اعلى حاجات بسيطه بردو

بس الميزه الوحيده..405 وجيه اباظه اقوى من الآخرين ؟؟ :)

اوريجينال 405 1600 بتططلع حوالى 92 حصان

405 وجيه اباظه بتتطلع حوالى 97 :)

ودا بسبب فتح التكيهات...وزودوا كمان ضغط طلمبة البنزين
+ ان ال engine internals اخف وزنا....ايوه اخف وزنا ؟؟؟
مع ان الموتور هو هو ..الا ان اجمالى وزن البساتم والشمايز والبى يلات والكرنك
فى 405 وجيه اباظه اخف...من اوريجينال 405 !!!!

ودا ساعد فى زيادة الهورس باور والعزم طبعا...

وعلى فكره فى ناس كتيييييييييييييييييييييييييييييييييييييييييييييييي يييييييييييييييييير انا واثق انها متعرفش الحكايه دى...حتى فى التوكيل نفسه فى ناس ماتعرفش حكاية ال
الانترنالز دى


بس كل دا كان على حساب
ارتفاع صوت الموتور + زيادة استهلاك البنزين لكن بنسبه ضئيله جدا+التكيهات بتحتاج تتظبط باستمرار..ودى احد مشاكلها

ال 405 عامتا ...الباور ستيرينج اتقل من اى باور ستيرينج تانى...لكن بيخف شويه على السرعات

الفرامل....اضعف من فرامل ال اوريجينال 405
بس حاجات بسيطه اوى
ودا بيرجع لسوء المواد المستخدمه فى سيرفو الفرامل

التكييف بيأثر بشكل ملحوظ على الاداء بالذات جوا البلد...بس مش اوى بردو :)

ابعادها هتتعبك شويه فى الاول...بس دا مايمنعش انها كتصميم فوق الرائعه

بردو حنة العزل دى مش اقوى فيها


غير كده العربيه دى محترمه جدا جدا واسعار قطع الغيار متوفره ورخيصه وشغلها كا ميكانيكا وكهربا سهل جدا

العربيه قويه...ثابته ...مريحه


دا كل مايخص 405 وجيه اباظه بكل حياديه وشفافيه

اتكل على الله ياباشا...والف مبروك مقدما

وبالنسبه للسعر...عالى شويه...هى العربيه عامله 90000 حلو اوى
ودا يفرق فى السعر طبعا..بس مش كدا

العربيه تنزل 3-4 الآف جنيه عن كده كمان....بس بينى وبينك لو صاحبها زرجن على السعر دا...بردو اتكل على الله :)

اخوك هانى محمد (الزعيم) :)

[amado ibrahim]

الزعيم زعيم يا رجالة
الله ينور يا باشا
لكن بالنسبة للخدمة الشاقة من سفر فى الطرق اياها والتحميل ايه اخبار العربية

[kareem_Ashmawy]

الزعيم زعيم يا رجالة
الله ينور يا باشا
لكن بالنسبة للخدمة الشاقة من سفر فى الطرق اياها والتحميل ايه اخبار العربية

متقلقش من الحكاية دى خالص...تستحمل سفر زى ما انت عايز
و طرق اياها فعلا ما شاء الله بتستحمل جامد

[waleedabbas]

ايه ده انا كنت فاكر انا بس ال حافظ كل حاجة فى البيجو 405 ده طلع هنا كل الاخوة ماشاء الله فعلا كل الكلام ال قاله استاذ كريم واستاذ هانى وهيرو باشا كلام مظبوط
الخلاصة فعلا هى عربية عملية وقوية وقطع غيار اسعارها مناسبة جدا ومعمرة هى بجد خليفة ال 504 على تطور شوية لكن مش معقدة اوى زى الحديتوعمرى ما شفت حد ركب العربية دى ومش بيمدح فيها