بخصوص الحراره فى 504

[darsh_darsh]

انا الحراره عندى بتعلى جامد فى الزحمه وبتوصل الى اخر الاسود
وفى ناس منقسمه الى راين
راى بيقول ان السبب من الطبه الموجوده خلف طرمبه المياه فى ناس بتقول الصح تتشال وناسس تقول الصح تركب وانا فعلا فكيت الطرمبه ولاقيت الطبه متشاله ممكن تكون اتشاله اثناء العمره وشغل الخراطه او هى متشاله اساسا والطرمبه سليمه وزى الفل
ملحوظه تانيه كنت جاى من مشوار والعربيه كانت سخنه جدا وكان المؤشر اخر الاسود وفى واحد شافها وجس الريداتير بايده لاقاه سخن مولع من فوق لكن بارد جدا من الشبكه فقالى ان الريداتير ممكن يكون فيه مشكله علما انى فكيته لما فكيت الطرمبه وغيرت المروحه واخدته عند بتاع الريداتيرات نضفه وغسله
فمش عارف هل كده طبيعى انه سخن من فوق وبارد من الشبكه ولا هو كده مسدود
منتظر ارائكم علما انى غيرت زيت وطقم كهرباء كامل وظبت تاكيهات اكتر من مره وبرضه لسه بتسخن

[Unendlich]

الطبة, ال welsh plug لااااااازم تبقى موجودة و راكبة كويس, لو سابت بتدمر طرمبة المية
بالنسبة لفرق الحرارة في الرادياتير, فلازم يكون في فرق بس مش للدرجة اللي بتوصفها
و ممكن تراجع المشاركة دي و إن شاء الله تفيدك

أستاذ أبو حسني
بعد اذنك أنا هعلق بس على كام نقطة كده.
أولا بالنسبة للتبريد, فجايز الحل بتاع حضرتك فيه فكرة, انما لو ال cooling system بتاعك سليم يبقى مش هتحتاج الكلام ده. مشكلة ال 504 رغم جبروتها هو فتي الصنايعية فيها و التعديل عليها زي الثرموستات اللي بيشيلوه و المروحة اللي شغالة على طول ... كوارث
آدي أهو صفحة من الكتالوج مكتوب فيها إن لما المروحة تعطل, مش عارف 3 مسامير إيه بيتربطوا عشان تشتغل على طول لغاية ما تتصلح, يعني الناس بتعتبر ده عطل مش ميزة. زائد انه كمان شيء ضد ال common sense, بمعني إنك واقف في الزحمة و محتاج التبريد بشدة, تلاقي المروحة بتتمختر على السلانسيه, اجري بقى و خلي هوا ربنا يدخل و خلاص تبقى مش محتاج المروحة, تلاقيها بتجعر.


لو عايز تعمل تعديلات مجدية على نظام التبريد فـ الخطوات كالتالي:
ترمي الرادياتير بتاعها في الزبالة و تشتري واحد cross flow, اللي المية بتمشي فيه بالعرض مش زي ده من فوق لتحت (التاني هتبقى العلب بتاعته في الجنب)



و ترمي دي كمان في الزبالة



بعد كده تركب مروحة محترمة تغطي أكبر مساحة ممكنة من الرادياتير, المروحة اللي في الصور من الرينو توينجو ماركتها Behr (الماني) و فيها سرعتين





و هيبقى ال clearance عامل كده


و ساعتها بقى عايز تفتري في التكييف, تركب سربنتينة عريضة توصل للفتحة التانية اللي في الصاج و تفضل على ال setup الفبريكة اللي هو مروحة التكييف قدام. خد بالك إن مروحة التكيف معمولة مش بس عشان تخلي الهوا يعدي جامد من سربنتينة التكيف انما ليها دور تاني مهم و هو مساعدة المروحة الأساسية في التبريد نظرا لزيادة الحمل على الموتور, و أنت كده لغيت الجزئية الثانية.
الصورة دي هتفهمك اللي أنا عايز أقوله



كده أنت هيكون عندك حاجتين بيحكمولك حرارة العربية, الباشا ده


ده بيفضل قافل دورة المية لحد ما توصل ل 75 درجة (82 في الموديلات من أول 1980) و بعد كده يبدأ يفتح. و هيبقى عندك الثرموستات الكهربا و ده هيبقى متوصل بالمروحة و ده بيبقى 82-68 و 88-79 للموديلات من بعد 1980 و 92-87-88-83 للموديلات اللي فيها مروحة التكيف الأمامية سرعتين

http://88.191.108.165/images/JPG021/819770.JPG

مروحة التكيف الأمامية ليها موديلين واحد منهم مشترك مع المرسيدس التمساحة, اللي هي دي

http://88.191.108.165/images/JPG999/0506.4413.JPG

و طبعا أي مروحة كهربا لازم يكون ليها كتاوت و فيوز


حاجة اخيرة كمان, الموتور لما بيطلع بره, سربنتينة التكيف مش بتتلمس, بتفضل مكانها. الرادياتير هو اللي بيطلع و طبعا الكباس بيطلع عشان بيكون راكب على كارتيرة الزيت.

[darsh_darsh]

مشاركه مفيده لكن الطبه ديه مش موجوده عندى اركبها يعنى ديه هتخلى العربيه متسخنش ولا ايه وكمان ديه لاقيتها عند بتاع قطع غيار قالى الطبه ب5 جنيه فهل هى دى فعلا ولا التانيه نوع مختلف وكمان كده ممكن يكون الريداتير فيه مشكله مثلا انه فوق سخن جداااااااااااااااا ومن الجزء الشبكه بارد والطبيعى لامبير الحراره انه يكون فين فى الحر عشان ابقى عارف وكمان مينفعش اركب امبير خارجى يشتغل مع القديم زياده حرص انى اعرف الدرجه كام بالظبط فى امبيرات بتبقى بالدرجات الاقى حاجه زى كده وهل تركيبها هو السلكه اللى بتركب فى صباع الحراره بس ولا اسلاك تانيه منتظر افادتك باى معلومات تعرفها عن دوره التبريد وتقولى اختبر ازاى الطرمبه بنفسى زياده تاكيد

[Unendlich]

بصراحة أنا أول مرة في حياتي أسمع عن option إن الطبة دي تتشال أو تفضل. افتكاسات مصري ... أم الأجنبي. حسبي الله و نعم الوكيل في صنف الميكانيكية الفتاييين دول.
عامة هي بتفصل بين المية الساقعة و السخنة في وش السلندر و عدم وجودها بالتأكيد هيلخبط الدنيا و مفيش حاجة اسمها ميكانيكي يقولك لما تشيلها التبريد هيتحسن (نفس فتية شيل الثرموستات).
بالنسبة لسعرها فالله أعلم بس احنا بنتكلم على نفس الطبة ألا و هي المدورة اللي في ضهر طرمبة المية و دي مش بتشوفها و تتأكد من حالتها أو وجودها من أصله غير لما تفك الطرمبة.
بالنسبة لمكان الامبير فالكتالوج كاتب إن ال operating range بتاعه في المنطقة السودة كلها. لو ثرموستات الطرمبة/الكوعة راكب و دورة التبريد مظبوطة بيبقى قبل النص بـسيكة و السيكة دي بتعتمد على درجة حرارة فتح الثرموستات 75 أو 82 و طبعا الحرارة بتعلي سنة في الزحمة عشان احنا في مصر بدل أما المروحة تبقى electromagnetic احنا مخلينها تشتغل على طول و في الزحمة بتبقى شغالة بسرعة السلانسيه.
بالنسبة لتركيب امبير زيادة هو ممكن طبعا بس مقدرش افيدك في التوصيلات الصراحة لأني مش من هواة الكهربا.

مشاركه مفيده لكن الطبه ديه مش موجوده عندى اركبها يعنى ديه هتخلى العربيه متسخنش ولا ايه وكمان ديه لاقيتها عند بتاع قطع غيار قالى الطبه ب5 جنيه فهل هى دى فعلا ولا التانيه نوع مختلف وكمان كده ممكن يكون الريداتير فيه مشكله مثلا انه فوق سخن جداااااااااااااااا ومن الجزء الشبكه بارد والطبيعى لامبير الحراره انه يكون فين فى الحر عشان ابقى عارف وكمان مينفعش اركب امبير خارجى يشتغل مع القديم زياده حرص انى اعرف الدرجه كام بالظبط فى امبيرات بتبقى بالدرجات الاقى حاجه زى كده وهل تركيبها هو السلكه اللى بتركب فى صباع الحراره بس ولا اسلاك تانيه منتظر افادتك باى معلومات تعرفها عن دوره التبريد وتقولى اختبر ازاى الطرمبه بنفسى زياده تاكيد

[darsh_darsh]

انا فعلا معرفتش ان الطبه مش موجوده غير لما فكيت الطرمبه وبتاع قطع غيار بيقولى عنده ب5 او 10 جنيه وفى ناس بتقولى بتجيبها من عند الخراط احسن فانت رايك ايه ومتعرفش الامبير الزياده اللى بيكون مرقم ب 60 و70 و80 وهكذا الاقيه فين وبالنسبه لعندى المروحه شغاله على طول ومفيش ترموستات فالمفروض تبقى فين فى ناس قالتلى فى نص الاسود ونص الاسود ده لو امبير مرقم تكون كام معلش تعبتك معايا فى الاسئله
واستفسار تانى معلش انا الباور تقل عندى متعرفش السبب يكون ايه انا مره تقل منى شبه كده غيرت الزيت ونضفت البلف بتاع مكنه الباور والمشكله اتحلت بس بعد فتره رجع يتقل تانى فممكن يكون عيب زيت ولا عيب البلف وايه احسن زيت باور وهو المفروض يتغير مع كل تغيره زيت موتور ولا بيقعد اكتر وكمان عطاء الريداتير بيبقى ليه رقم معين مكتوب عليه الصح كام وكمان حكايه ان الريداتير سخن جدا من فوق وبارد من الشبكه ده عيب فى الريداتير ممكن يكون مسدود صح والريداتير عندى 3 ماسوره فهل ده كويس ولا فى نوع احسن

[Unendlich]

انا فعلا معرفتش ان الطبه مش موجوده غير لما فكيت الطرمبه وبتاع قطع غيار بيقولى عنده ب5 او 10 جنيه وفى ناس بتقولى بتجيبها من عند الخراط احسن فانت رايك ايه
لأ مفتيش الصراحة

ومتعرفش الامبير الزياده اللى بيكون مرقم ب 60 و70 و80 وهكذا الاقيه فين
ده ملوش علاقة بالبيجو

وبالنسبه لعندى المروحه شغاله على طول ومفيش ترموستات فالمفروض تبقى فين فى ناس قالتلى فى نص الاسود ونص الاسود ده لو امبير مرقم تكون كام معلش تعبتك معايا فى الاسئله
ما هو طول ما مفيش ثرموستات عمر ما الحرارة هتثبت, يعني في الزحمة هتلاقيها بتعدي النص عشان سرعة المروحة بطيئة بزيادة و على الطرق السريعة هتلاقيها بتنزل جااامد (يا دوب فوق الأزرق) نظرا لقوة الهوا اللي داخل و مفيش حاجة تخلي الموتور يحتفظ بحرارته

واستفسار تانى معلش انا الباور تقل عندى متعرفش السبب يكون ايه انا مره تقل منى شبه كده غيرت الزيت ونضفت البلف بتاع مكنه الباور والمشكله اتحلت بس بعد فتره رجع يتقل تانى فممكن يكون عيب زيت ولا عيب البلف وايه احسن زيت باور وهو المفروض يتغير مع كل تغيره زيت موتور ولا بيقعد اكتر
برده مفتيش

وكمان عطاء الريداتير بيبقى ليه رقم معين مكتوب عليه الصح كام
280

وكمان حكايه ان الريداتير سخن جدا من فوق وبارد من الشبكه ده عيب فى الريداتير ممكن يكون مسدود صح والريداتير عندى 3 ماسوره فهل ده كويس ولا فى نوع احسن

هو أفضل رادياتير على الإطلاق هو ال cross flow زي ماشرحت قبل كده
جرت العادة دي بلدنا إن ال 3 ماسورة بيبقى للي من غير تكيف و ال 4 بيبقى للمكيفة
بس موضوع السخونية عندك لو الرادياتير متسلك قريب زي ما بتقول هيبقى مش حله إنك تجيب اكبر و خلاص, هيبقى حل هيقعد معاك فترة (قد تمتد لكذا سنة نظرا لأصالة العربية) انما هيبقى still في مشكلة أنت محلتهاش.

[darsh_darsh]

انا الغطاء عندى كنت جايبه استيراد وانا بجيب شويه حاجات لااقيته وخدته من الراجل هو مكتوب عليه من فوق 0.7m
فده كويس ولا ايه وكمانالحراره حتى لو ماشى على السريع مش بتنزل عن نص الاسود غير بسنه بسيطه قوى فده سببه ايه وكمان هل اسلك الريداتير تانى يمكن السخونه اللى من فوق والشبكه البارده ده ان فى مواسير من الريداتير مسدوده وكمان هل دوره المياه بتاخد هواء ولا لا وكمان سؤال تانى انا الدينامو عندى تعبان ومحتاج يتغير ايه احسن دينامو بحيث لو ركبت تكيف محدكش انى اغيره تانى اجيبه كام امبير وبتاع بيجو ولا عربيه نوع تانى واستيراد ولا جديد ياريت شرح تفصيلى وكمان انا اقصد بالامبير الزياده انى اتاكد ان الامبير الاصلى مش بيخرف شويه مثلا

[darsh_darsh]

اضافه تانيه انا اثناء العمره الاسبراتير كان مبوش وعملتله جلبه ودلوقتى بوش سنه بسيطه فهل لى دخل فى موضوع الحراره وكمان التاكيهات المفروض تتظبط على كام بالظبط

[darsh_darsh]

انا الدينامو بتاعى باظ وشحنه ضعف جامد ومحتاج يتغير ضرورى وانا عايز اجيب دينامو بس عايزه امبيره يستحمل تركيب تكيف على العربيه فهل اجيب دينامو بيجو عادى ولا مش هيستحمل واجيب نوع تانى وهيكون كام امبير وسعره تقريبا كام والاصلى بتاع البيجو كام امبير

[samer504]

يا جماعه انا بردو عندى مشكله جامده مع الحراره و عاوز اعرف سعر ال ٤ ماسوره ده كام

[samer504]

للعلم انا عندى تكيف و كارتيه الومنيوم و رادياتير ٣ ماسوره

[samer504]

انا عندى كارتيره زيت صاج حاله ممتزه و وقاعده فلتر زيت بيجو ٥٠٤ للبيع ٠١٠٠٨٠٠٦٩١٠

[Unendlich]

يا جماعه انا بردو عندى مشكله جامده مع الحراره و عاوز اعرف سعر ال ٤ ماسوره ده كام

بـتسخن مع التكيف ولا من غيره ؟؟
و بعدين ده لسة الجو مشدش حيله عشان نتكلم في سخونية
أنت كده احتمال يكون عندك مشكلة مستخبية و كده كل اللي هتعمله إنك هتديها مسكن بالرادياتير الأكبر

[darsh_darsh]

انا عملت كل حاجه مش ناقص غير انى اركب الطبه اللى ورا الطرمبه واجرب بس خايف تسخن اكتر
وكمان هل غطاء الريداتير يسخن العربيه اصل لما بفتح الغطاء وهى سخنه الاقيه اكن حاجه مكتومه كده وينفس هواء

[khaled_sabry]

انا عملت كل حاجه مش ناقص غير انى اركب الطبه اللى ورا الطرمبه واجرب بس خايف تسخن اكتر
وكمان هل غطاء الريداتير يسخن العربيه اصل لما بفتح الغطاء وهى سخنه الاقيه اكن حاجه مكتومه كده وينفس هواء

مدام فيه هواء بيطلع يبقى جوان وش السلندر يامعلم
حتى لو كانت بتنقص ميه بمعدل بسيط
لأن معنى الهواء اللى بيطلع ده ان الكبس اللى فى السلندرات دخل على مية الريداتير
نا كان عندى الحكايه دى و ماكنتش واخد بالى منها رغم انى عملت اختبار الجوان ده (تفتح الرادياتر الصبح و العربيه بارده و تدور و تشوف لو فيه فقاقيع ميه بتزيد مع زياده البنزين)
لكن لما روحت للميكانيكي (محمد ندا) عملى االاختبار ده و اكتشفت ان الفقاقيع مش بتظهر غير لما ازود بنزين اوى

غير الجوان احسن و يفضل تغيره عن واحد بتاع بيجو و خلى بالك الجوان لو اتركب بالمقلوب حيسدلك مجارى الميه و عدلته من قلبته مش ملحوظه اوى