مشكلة في زجاج الكهربائي للميجان 2

[mohmdomar]

عندي الازاز بتاع باب السواق والباب اللي وراه بيهيسوا (اللي علي الشمال), لكن البابين التانيين اللي علي الناحية اليمين شغالين تمام

الباب القدماني لازم تدوسه حوالي 5 مرات قبل ما يستجيب ولما يستجيب لازم تفتح الشباك للأخر قبل ما تقدر ترفعه تاني

الباب اللي وراه بيفتح سنة سنة يعني لازم تدوس الزرار كذا مرة لحد ما يفتح للأخر

زائد ان البابين مش بيتقفلوا اوتوماتيك مع باقي العربية لما تدوس مرتين علي زرار القفل في الريموت


هل في بوردة او جزء معين في العربية بيتحكم بالشباكين دول(الناحية الشمال)؟؟

[mohmdomar]

اوف ماختش بالي اني في منتدي البيجو ارجو النقل لمنتدي الرينو

[Ahmed Amin]

ياباش ولا يتنقل ولا حاجة, هنا وهناك واحد,,
بالعكس دانت كمان وصفت مشكلتي بالظبط مع كنصول الأزاز..
ومعظم حاجات الرينو والستريوين مشتركة مع البيجو
وبالمناسبة أنا عندي نفس المشكلة دي بالظبط فهشاركك تجربتي..

لما بفتح شباكي بيفتح عادي, لكن الشباك اللي جنب السواق بيفتح بصعوبة معايا في الأول لما أخرج بالعربية, ولما بيفتح بينزل كله وبيشلني عشان اعرف أطلعة بس بعد كدا بيبقي أسهل في الطلوع شوية.

الازاز اللي ورا في الجانبين بينزل تكة تكة فقط ومش بيطلع من الزرار تاني, لازم أمد أيدي ورا عشان أقفلهم.

حاولت أصلحها في مركز خدمة لبيجو مرتين,
وفتح ونضف البوردة اللي عليها الزراير كلها بكل الطرق ومتصلحتش, لسه نفس المشكلة
واللي فهمته إن سبب المشكلة ان كان في عصير وقع مكان زراير الازاز ناحية السواق وعلي حسب مافهمت من الفني أن في أي سي أتحرق,

سألت علي سعرها جديد كان حوالي 850 او 900 جنيه وبصراحة سعر مبالغ فيه لحتت بلاسكته صغير وبوردة مش غالية.
والاستيراد بتاعها لاقيته ب 400 ل 500 جنيه بس منصحكش بيه لأنه اللي لاقيته منه طالع من عربيات وبيبقي طالع عينه.. وفي الغالب ممكن يعمل معاك نفس المشكلة بعد شهر او اتنين ويبقي راح عليك نص تمن الأصلية.

أنا في الأول مكنتش بعرف أقفل أزاز السواق خالص, وكنت بضطر عشان أقفلة أني أركن وأبطل العربية وأقفل بالسنتر عشان وحدات الرفع ترفع الأزاز للأخر, لكن بعد ما كنت نضفت البوردة في مركز الخدمة كان نضفها ب wd-40 تقريباً
بقيت أعرف أقفل وأفتح أزاز السواق عادي ودا أهم حاجة بالنسبة لي, باقي الازاز بمد أيدي وأقفلهم.

دي تجربتي مع المشكلة كنصولة الأزاز دي ولو كان حظك أحسن مني وعرفت تصلحها ياريت تبقي تعرفني..
ومبدئياً ممكن تفتح وتنضفها بهوا وبأسبراي جافwd-40
وإن شاء الله تتحسن معاك عن دلوقتي..