عاوز أجيب كاوتش جديد بيجو 307

[sadsa]

السلام عليكم,
انا معايا بيجو 307 هاتش باك عاوز اجيب كاوتش جديد ... تنصحونى بايه و كمان الأسعار
أنا عاوز حاجة يكون أدائها عالى والسعر يكون معقول برضه

[ahmedteam]

بريدجستون من عند fit & fix

[Ahmed Amin]

حاجة أدائها جيد وسعرها معقول هتجيب ال Kumho Ecsta Ku31
الله يمسيه بالخير بشمهندس Muhammednabil كان رشحهولي من حوالي سنتين ونص, ومفيش مشاكل معاه لدلوقتي الحمدلله.
الطقم الأربع كاوتشات كانو في حدود ال 2000 جنيه.

ودا شكل ونقشة الفردة, وطبعا المقاس هيكون 205/55R16






لو عايز حاجة أداء أعلي هتشوف اللي عند بريدجستون والميشلان والكونتينينتال,
بس أنت قلت عايز حاجة سعرها معقول, ودي أسعارهم هتبداً معاك من 3600 للطقم وأنت طالع.

[sadsa]

تسلملى يا باشا,,,,,,
طمنى اخباره ايه في الدبدبة والفرامل؟؟؟؟؟

[Ahmed Amin]

تسلملى يا باشا,,,,,,
طمنى اخباره ايه في الدبدبة والفرامل؟؟؟؟؟

مفهمتش قصدك بالدبدبة بس الكاوتش ناعم, ووحسيت أني راكب عربية جديدة أول ما جبتة,,
لأن الكاوتش اللي عليها كان عدي عليه 3 سنين وكان في أول السنة الرابعة فكان خلاص نشف وكنت بحس بكل زلطة وطوبة ونقرة بعدي من عليها,

فالكاوتش أدائة ممتاز جداً مقارنة بسعرة,,
والفرامل هيا هيا نفس الأداء, متأثرش ولا قلت,
يمكن كانت أحسن أول ما جبته لأن الكاوتش كان لسه طري, وكان أدائها أحسن, لكن دلوقتي عادي الأداء هوا هوا.

ومفرقش كتير عن ال Good Year الأصلي اللي كان نازل معاها.

[sadsa]

والاقيه فين

طيب الاقيه فين؟
خصوصا انى عاوز اجيبه قسط ...اللى قدامى دلوقتى جي تي الفردة ب 600 ايه رايك؟

[Ahmed Amin]

طيب الاقيه فين؟
خصوصا انى عاوز اجيبه قسط ...اللى قدامى دلوقتى جي تي الفردة ب 600 ايه رايك؟

بالنسبة لأماكن الشراء أنا كنت جايبة من أسكندرية من محل كاوتش في سموحة مش فاكر أسمة بالظبط دلوقتي بس هوا قدام بنزينة موبيل وجنبه محل لفلي بتاع مستلزمات الأطفال, ودا محل مشهور في المنطقة.
دي الخريطة لو حبيت تروح له, أو لز نزلت أسكندرية في مرة زي مانا عملت وجبته من عنده,

http://www.yellowpages.com.eg/profile/MTIwMjU3/Lovely.html

وكان فيه موضوع من فترة عن الكاوتش وأماكن توافرة في القاهرة هنا
مكان بيع كومهو اكستا ku 31 - نايل موتورز - NileMotors.net


موضوع القسط دا معرفش أفيدك فيه ومنصحكش بيه,, والأفضل في الحالة دي أنك تجيب جوز كاوتش وتركبهم قدام, بدل ما تجيب أربعة وتقسط.

وتستنضف أحسن كاوتشتين عندك من الخمسة اللي عندك وتركبهم ورا, وتخلي أنضف واحدة من التلاتة اللي هيتبقو أستبن, وتشيل الكاوتش اللي عندك أحتياطي أو بتبيع لبتاع الكاوتش علي حسب حالته وأنت بتغير الكاوتش, أوعي تسيب له الكاوتش كدا علي أساس أنك هترميه,
الفردة بتتباع من 50 ل 80 أو أكتر علي حسب الحالة, اللي عنده ضمير هيعرض عليك تبيعهم, واللي معندوش هيخبيهم من قدام عنيك وهوا بيغير لك بالكاوتش الجديد ويركنهم علي أنه هيرميهم.
أنا عن نفسي طلبت وأخدت كاوتش معايا في الشنطة وأنا ماشي, عشان قلت ممكن ينفعني لو حصل حاجة لفردة الأستين محتاجتش أشتري جديدة وأستعمل واحدة من القدام دوول.

ولحد ما يبقي معاك مبلغ تاني تجيب ساعتها جوز كاوتش نفس النوع ونفس الموديل اللي هيا النقشة يعني وتركبه قدام
وترجع الجداد اللي مشيت عليهم فترة ورا.

وبس كدا عشان تبقي العربية كلها ماشية بنفس النقشة من غير ما يعمل فرق معاك في الثبات ولا صوت علي السرعات.

[hamaka]

حاجة أدائها جيد وسعرها معقول هتجيب ال kumho ecsta ku31
الله يمسيه بالخير بشمهندس muhammednabil كان رشحهولي من حوالي سنتين ونص, ومفيش مشاكل معاه لدلوقتي الحمدلله.
الطقم الأربع كاوتشات كانو في حدود ال 2000 جنيه.

ودا شكل ونقشة الفردة, وطبعا المقاس هيكون 205/55r16






لو عايز حاجة أداء أعلي هتشوف اللي عند بريدجستون والميشلان والكونتينينتال,
بس أنت قلت عايز حاجة سعرها معقول, ودي أسعارهم هتبداً معاك من 3600 للطقم وأنت طالع.

يا باشا بشمهندس محمد نبيل ده مدرسة أصلاً ، ربنا يكرمه بجد....

[Ahmed Amin]

يا باشا بشمهندس محمد نبيل ده مدرسة أصلاً ، ربنا يكرمه بجد....

فعلاً والله, وغير موضوع الكاوتش دا أنا واحد من الناس اللي أستفدت منه كتير وساعدني في حل مشاكل كتير في عربيتي,
وعرفني الصح في حاجات كان ممكن يضحك عليا فيها, أو مكنتش أعرف أحلها من غير مساعدته,
وأنا نفسي لو أرد له جمايلة عليا قريب, ومش عارف أزاي بس مسيري هردهاله. :)

ربنا يكرمه ويبارك فيه, ويوفقه في حياته يارب.

[sadsa]

شكرااا للجميع
انا اشتريت 4 فرد جي تى قسط على 6 شهور
بعد اما دخت على الكومهو لانه كله قالى مبقاش ينزل الكورى وكل اللى موجود فيتنامى ...مع انى مش مصدقهم بس انا خلصت في الكاوتش الجى تى
و هوة كويس جدا ... ممكن يكون ناشف شوية بس مريحنى على الطريق لانى استخدامى للعربية اغلب الاحيان سفر

[Ahmed Amin]

مش مصدقهم ليه.؟ طيب ما اللي انا جايبة فيتنامي, هوا اللي موجود بس تقريباً,
وزي الفل مفهوش أي مشاكل وطري علي النقر والحفر.

كانت عاملة كام الفردة الجي تي, وأيه الموديل بتاعها ؟
وأيه نظام التقسيط دا.؟! وزود السعر عليك قد ايه..