فتيس بيجو 307 والنظام الرياضي

[lalalala]

لو سمحتوا انا لسه جايب بيجو 307 موديل 2006 بس كنت عاوز اعرف حرف الs اللي موجود في الفتيس ده ايه فايدته انا قريت الكتالوج بس مفهمتش حاجة كاتبين نظام السواقه الرياضي ..يعني ايه بقي بيعمل ايه يعني

ولو فيها رخامه يعني كنت عاوز اعرف مكان فلتر التكييف

[Ahmed Amin]

حاااااااضر بس صغر الخط شوية,,

ال S لما بتضغط عليه بيخلي العربية في وضع السواقة الرياضي, وهتلاقي مكتوب قدامك علي الشاشة Ds
بدل ال D العادية

بيسمح لك أنك تحرق علي النقلات ومش بينقل بدري زي ال D العادي وطبعا أستهلاك البنزين بيعلي
لأن وضع الD العداي مفروض أنو ينقل بدري وفي الوقت المناسب عشان يحقق أحسن معدل لأستهلاك البنزين

[Ahmed Amin]

ومكان فلتر التكيف ورا الموتور ناحية قربة المياة,

دي صورة لمكان الفتر,


ودا فيديو لطريقة التغيير,
How to replace the air cabin filter dust pollen filter on a Peugeot 307 - YouTube

[lalalala]

تسلم يا باشا واسف لو كان الخط كبير وشكرااا جدا علي اهتمامك وردك

[Ahmed Amin]

الشكر لله يا معلم,
ومفيش أسف ولا حاجة أنا كنت بهزر معاك,

[eleanor]

فعلا حرف ال s بيخلى العربيه تحرق على الغيارات علشان تبقى السواقه رياضيه
زى الاستاذ LeitoSR ماقال بالظبط وفلتر التكيف هو شرحو لحضرتك بالتفصيل

[Haitham G]

بس انا شايف ان موضوع s مش بيفرق كتير لأن لو انت بتدوس البنزين للاخر فمش حتحس بفرق تقريبا

[Ahmed Amin]

مانت لو هتفضل دايس بنزين للأخر تبقي مش هتبقي بتتكلم علي وضع رياضي,,
وبتتكلم عن جري في خط أو طريق مفتوح.

ال S بيفرق طبعاً لو أنت ماشي في زحمة وبتجري وعايز أداء رياضي والفتيس يكون نشط معاك,
لو بتدوس وبتشيل رجلك كل شوية في الوضع العادي D الفتيس هينقل علي طول للغيار الأعلي عشان يحقق أحسن أستهلاك وتوفير للبنزين,,

أما في وضع ال S مش هيخلي الفتيس ينقل للغيار الأعلي, وهيفضل مثبت العربية علي نفس الغيار لحد ما توصل ل 3500 لفة تقريباً عشان ينقل الغيار ويفضل محافظ علي سحب وأداء عالي طول الوقت, حتي لو رجلك خفيفة علي بدال البنزين بغض النظر عن أستهلاك البنزين.


مثلاً علي الوضع العادي D العربية هتنقل كل شوية علي 2500 و 2800 RPM لو رجلك خفيفة ومش دايس جامد اللي هوا وضع السواقة الطبيعي,,

أما لو علي Ds الفتيس هيأخر النقلات لرينج 3500 وتوصل ل 4000 RPM قبل ما ينقل علي الغيار اللي بعده, ودا بنفس تحميلك علي دواسة البنزين في الوضع العادي,,
يعني مش بتضطر تدوس بنزين جامد عشان تجري, وأول ما تشيل رجلك تنقل منك للغيار الأعلي وتضيع السحب بتاعها,,
وأي دوسة خفيفة زيادة بتزود الرينج دا معاك من غير ما تحمل علي بدال البنزين زي ما بتعمل في الوضع العادي D.

[Haitham G]

داخل البلد مش بجرى قوى بتكلم على الطريق فى السفر زى ما حضرتك قولت يا كبير