تقرير استلام 301 مانوال

[Ahmed Amin]

ياباشا اشكرك ع اهتمامك ربنا يكرمك
بس انا بسال دلوقتي طيب الميه الخضراء دي اغيرها امتى؟ ولا ازودها ؟
طب بالنسبه لزيت الباور والفرامل استني صيانه ال2500؟
الفلاتر ايه ظروفها بعد ال1000 كم؟ ولا استني الصيانه؟
في حد قالي غير الزيت عشان بيبقي رايش مجرد ما العربيه تسخن بيتقلب كله ع بعضه صح ولا غلط؟
العربيه صوتها عالي شويه ؟
عديت ال ار بي ام غصب عني عن 3 ؟ في مشكله؟
فين الحراره بتاعة العربيه اقراها منين ؟
انا عملت موضوع اسمه متابعة تليين 301 حتي معاد اول صيانه ياريت تدخل عليه ونتابع مع بعض
اشكرك ع اهتمامك وربنا يكرمك واسف للاطاله

بس انا بسال دلوقتي طيب الميه الخضراء دي اغيرها امتى؟ ولا ازودها ؟
المية الخضراء دي Long Life Coolant مش بتتغير غير بعد 150 ألف كيلو علي الأقل أو خمس سنين,, ولا بتتزود,, ولو حصل نقص أو تسريب تكشف علي السبب وساعتها تتزود بمية مقطرة بس,, وإن شاء الله دا مبيحصلش فمتقلقش.

طب بالنسبه لزيت الباور والفرامل استني صيانه ال2500؟
زيت الباور والفرامل هما هيكشفو لك عليهم أه في صيانة ال 2500, ولو مش ناقصين برضه ولا فيه تسريب يبقي مش هتحتاج تكشف عليهم ونادر أوي إن حد بيكشف عليهم في عربيتة بس أنا وضحت لك أمكانهم في الموضوع التاني, ولو حصل تسريب من حاجة منهم هيبان تحت العربية,
وتغيرهم كل سنتين,,

الفلاتر ايه ظروفها بعد ال1000 كم؟ ولا استني الصيانه؟
الفلاتر زي فلتر الهواء والبنزين والتكيف بيتغيرو علي 30 أو 40 ألف,,
فلتر الزيت بيتغير كل 10 الأف مع كل غيار زيت.

في حد قالي غير الزيت عشان بيبقي رايش مجرد ما العربيه تسخن بيتقلب كله ع بعضه صح ولا غلط؟
الكلام اللي أتقالك علي تغير الزيت والرايش دا غلط,,
وكان في المواتير القديمة اللي مش بتيجي متلينة,, والعربيات اللي مواتيرها بتتقفل في الهند أو الصيني,,
أما المواتير الجديدة كلها أو الأوروبي عموماً بتيجي متلينة وجاهزة, ومحطوط لها زيت تخليقي كامل,, والمعلومات من فرنسا أن أول غيار زيت علي 10 أو 15 كيلو,,
لو حصل حاجة هتبقي في وشهم,, وأطمن مش هتحصل حاجة, والزيت مش بيتغير علي 1000 ولا 2500 ومش أقل من 10 الأف عشان تغيرة ويكون أشتغل كويس جوا الموتور..

العربيه صوتها عالي شويه ؟
الصوت العالي طبيعي والعربية باردة,, وبيقل أول ما العربية بتوصل لدرجة التشغيل الطبيعية,

عديت ال ار بي ام غصب عني عن 3 ؟ في مشكله؟
مفيش مشكلة لو عديت ال RPM ل 4 أو حتي 5,, لأني زي ما قلت العربية متلينة وممكن تطلع بيها من التوكيل تمشي 160,,
بس يفضل أنك تمشي بيها أول 1000 كيلو هادي عشان لو فيه حاجة تظهر وانت ماشي براحة, وعشان برضه تحافظ علي الموتور زي أي عربية موتورها جديد أو متعمر لازم تمشي بيه فترة هادي الأول.

فين الحراره بتاعة العربيه اقراها منين ؟
العربية مفهاش مؤشر حرارة,, وهيا دايماً ثابتة علي النص,,
لو حصلت مشكلة في الحرارة وبدأت تزيد عن الطبيعي, هتنور لك لمبة STOP عشان تعرف إن فيه مشكلة في دورة التبريد, واللمبة مش بتعطل عشان بتعمل check كل مرة بتدور فيها العربية.
ولو أنت مشوفتها ومشيت بالعربية وهيا منورة الموتور لو بدأ يوصل لدرجة حرارة عالية اللي هيا بتبقي الأحمر في المؤشرات العادية بيفصل أوتوماتيك عشان يحافظ علي نفسه.

انا عملت موضوع اسمه متابعة تليين 301 حتي معاد اول صيانه ياريت تدخل عليه ونتابع مع بعض
أنا رديت عليك برضه في الموضوع التاني,,
بالتوفيق وربنا يبارك لك في العربية.

[damasry]

البيجو ال301 الباور بتاعها كهرباء وملوش زيت

[Silent~Dream]

الف مبروك و ربنا يديلك خيرها و يكفيك شرها و تقرير هايل بس مستنين التقرير الكامل بالصور ان شاء الله

[maxx]

مبروك :) عقبال ما نستلم احنا كمان

[abohend]

مبروك :) عقبال ما نستلم احنا كمان

آمييييييييييييييييييين
أنت حاجز من أمتى؟؟؟
أنا حاجز 31-10 بس كان عندي أمل استلم بعد 15 يوم زي محصل مع بعض الأعضاء
بس خايف التسليم يتأخر و اقعد شهرين فعلاً
ربنا يسهل و يقدم اللي فيه الخير
و يا رب كل الحاجزين يستلموا على خير و بدون مشاكل

[eng_alaaali440]

بسم الله الرحمن الرحيم الاجابه تونس:d
ابدا الاول من الحجز :مبدئيا انا كنت حاجز يوم 30/9 مانوال فيراني والحمد لله استلمت نفس اللون .عربيتي جت بعد اسابيع علي يوم 23/9 وانا الي اتاخرت علي مارحت استلمها رحت يوم السبت 1/11
انا من كفر الشيخ سافرت يوم السبت وصلت التوكيل الساعه 2 الضهر اول ماوصلت اخدوا العربيه وفكوا اللزق الابيض وغسلوها وركبوا الطاسات وشيكوا عليها ميه وزيوت وكاوتشات ودخلت خلصت الاجراءات مغيبتش اكتر من ربع ساعه واستلمت العربيه بالمحضر طبعا كل حاجه فيه استلمتها مع المحضر وطلع ا.محمد شرحلي العربيه وطلبت منه يشيك عليها تاني عشان مسافر 150 كيلو لكفر الشيخ خلصت وقعدت في العربيه انا وصحبي كان معايا وجربنا كل حاجه قبل مانمشي من دهان ل كهربا للفرش والطابلوه والتسجيل والعداد كان 3كم واتوكلنا ع الله خرجت من التوكيل طبعا ا .محمد قالي متعديش 100 وار بي ام ميعديش 3 اول انطباع وانا سايق وبتحرك من هناك طبيعي ابقي خايف ان حد يلمسني ويحكها اي حكه عشان الفال المهم اتوكلت ع الله كنت عاوز ارجع من صلاح سالم واطلع الدائري وانزل الزراعي فضلت ماشي ادور ع يوترن ملقشت :d
دخلت بقي غصب واقتدار نفق الازهر لقيت نفسي في العتبه خرجت من طلعت حرب كان زحمه جدا دخلت ع التحرير طبعا مش هقول اني قعدت ساعتين الاربع من لحظه خروجي من التوكيل لحد خرجت من التحرير :d اديني قلت
خرجت من وسط البلد لحد شبرا ومسكت الطريق الزراعي ودي اول تجربه مع السحب
بصراحه شديده والله من غير مبالغه سحب العربيه رووووووعه وخصوصا اني مقرصتش ع البنزين العربيه كمان سحب التالت بتاعها عالي اوي ولاحظته اكتر في مطالع الكباري فضلت ماشي ع 90 السحب روعه والغرز كمان بحس انها سهله اوي وسلسه والفرامل بتستجيب بسرعه اوي تقريبا لو مطب بعد 100 م بحتاج في حدود 7 ثواني ع حسب تقديري
المهم شغلت التكييف كمان ع 2 وكملت بسرعه 90 وثبات كويس جدا وعفشه ممتاااااااااازة مكنتش بحس بالنقر الي في الطريق الكوتش طبعا كان 28
نزلت مول العابد عشان نتغدي وحصلت فقره دخلت ركنت العربيه وطفيتها وجيت اخرج المفتاح من الكونتكت مرضاش يخرج ابدا ياسيدي يهديك يرضيك اخرج نشف دماغه وحلف ابدا مبقتش عارف هو علق في الكونتكت ولا حصل ايه قلت اشغل واطفي تاني بردو مخرجش اديت حاره وحاولت تاني مفيش فايده افتكرت المفتاح ممكن يكون في زرار ادور مفيش طب اوبشن مثلا :d بردو مفيش قلت الكمبيوتر فيه حاجه طب افصل كهربة العربيه ولا اعمل ايه شغلت مرتين وقفلت وانا بقفل خرج معايا طبيعي قلت لصحبي اول كلمه العربيه دي مش مفهومه تيجي نرجعها بقي :d
اكتشفت ان سكينه المفتاح كان عليها نايلون من الكيس وان هي السبب نصفت المفتاح وشغلت تاني وقفلت وسحبت طلع معايا عادي جربت مرتين تلاته وبقي تمام الحمد لله :d
ريحنا شويه واتغدينا وخرجنا نزلت شيكت تاني ع الكاوتشات وكملت طريقي طبعا طول الطريق كنت محافظ ع سرعة 90 او 80 موصلتش لل 100 بردو احتياطي لسبب ودا ميزه :هي ان البنزين بصراحه مغري جدا مجرد ماتحط رجلك بس يسحبك ويشدك تلاقي نفسك بتوصل لل 100 من غير ماتحس بمنتهي السهوله والسلاسه .
كملت طريقي بردو ومكنتش جبت الخامس خالص كنت ماشي ع الرابع وتقريبا بعد ماقطعت 70 ك جبت الخامس اول مره وكملت بيه ولاحظت ان الكمبيوتر اداني قرائه اطول لاستهلاك البنزين بمعدل 20 ك وصلت لحد طنطا وعند لخبطه الكوبري الجديد هناك لقيت نفسي معاكس وفي وشي عربية شرطة لا وايه ضاربله العالي في وشه :d
انا لو مكانه الصراحه انزل اضربني :d
دخلت طريق كفر الشيخ كنت كملت اول 100 كم وزياده والبنزين قل شرطه واحده بصراحه روعه وصلت كفر الشيخ بعد ساعه طبعا بسبب ام المطبات 30 مطب تقريبا في اقل من 11كم :d
وصلت كفر الشيخ ودخلت اول لجنه مدخل كفر الشيخ وقفت قالي الرخص اديته رخصتي ومحضر الاستلام قالي مفيش نمر تجاريه قلتله والله لسه خارج من المعرض اداني ورقي وقلي اتفضل ووصلت بيتنا بالسلامه الحمد لله والعربيه تمام تقريبا من لحظه خروجي من التوكيل لحد ماوصلت بيتنا اخدت 4 ساعات ونص بسبب زحمه وسط البلد والسرعه القليله وصلت ع ماتش الاهلي بالظبط ومكنتش روحت وكلمت البيت قولتلهم اتفرج ع ماتش الاهلي الاول واجي افرجكم ع العربيه الاول رخامه بقي :d
روحت البيت الحمد لله بالسلامه وركنت العربيه وغطيتها والحمد لله كانت رحله ممتعه
كتقييم بقي :
الشكل الخارجي طبعا مش محتاج كلام كلكم عارفينه وكمان بالنسبه للفئه المانوال الطاسات بصراحه شكلها جميله وقررت اني مركبش جنوط بعد ماشوفتها
من جوه بصراحه العربيه روعه وقعدت الكرسي لما ظبطته ع قعدتي وسوقت حسيت اني اتمكنت من العربيه بسرعه وحفظت المقاسات بشكل اسرع (مع العلم ان في تقريري السابق هنا يو الحجز كانت دي ملاحظه وقلت يومها ان يمكن لما اسوق احس اني هتمكن منها والحمد لله )
بالنسبه للسواقه بصراحه روووووووعه مع احترامي احسن من اللانسر والصني والسيراتو وعربيات تانيه انا سقتها ثبات مش هحكم عليه لسه لاني مجربتش ع السرعات العاليه بس واضح انه هيبقي تمام ان شاء الله
العربية عاليه ومناسبه جدا للمطبات والحمد لله ملبستش ولا مطب :d :d
الفرامل اكتر من ممتاااااااااازة مع اني مقرصتش عليها استجابه ممتازة بمعني الكلمه
بالنسبه لاستهلاك البنزين انا مكنتش فاهم اوي قراية شاشات المعلومات بس لما روحت حسبتها لقيت اني استهلكت 10 -12 لتر في مسافه اجماليه 145 كم يعني شرطه وحده بس
التكييف شغلته طول الطريق ع 1 وقفلته من البرد
انا لسه خارج النهارده بالعربيه اشتريت شوية حاجات وغطاء جديد ودواسات وورق العربيه جالي يوم الحد اللي فات وهرخص بكره ان شاء الله
االتقييم العام
بصراحه انا كنت خايف من العربيه خصوصا اني اخدت فتره طويلة محتار بين اللانسر الشارك والبوما والصني شكل قديم والسيراتو والريو والاوبترا والجين 2 والسيتروين سي اليزيه بس لما جبتتها حسيت براحه الحمد شديدة وانجذاب للعربيه الحمد لله وحسيت بفرق .الاوروبي اوربي بردو
والله من غير مبالغه انا بقول الحمد لله ع الاختيار وانا مرتاح ومطمن ومبسوط بالعربيه عشان حاسس بفرق فعلا
ان شاء الله هلين ال 1000 ك بسرعه واعمل تقرير تاني
ادعولي ربنا يباركلي فيها ويديني خيرها ويبعد عني شرها وربنا يكم الجميع ان شاء الله بيها وبالاحسن منها كمان :d
اتمني تقريري يكون بسيط ويعجبكم يارب وبشكر كل اعضاء المنتدى لانهم ساعدوني كتير ..شكرا :d

الف مبروك ربنا يديك خيرها ويبعد عنك شرها وعيون الحاسدين . كنت حابب اسئل حضرتك بخصوص نظام الصوت داخل العربية اخباره ايه بالنسبة للسماعتين الموجودين فى العربية فقط وهل يوجد تجهيز فى العربية لأضافة سماعتين جداد وكذلك فوجات . معذرة على الأطالة فى الكلام

[on1touch]

الله يبارك فيك واشكرك يافندم
بالنسبه للسماعات ممكن تركب سماعتين ورا عادي اما بالنسبه للفوجات مكانهم موجود ممكن تشتري اللمبتين عادي وتركبهم وانا كلمت التوكيل في الصيانه 2500 هركبهم ان شاء الله

[S O P H O S]

مبروك
تقرير رائع