افضل بنزين ل 301

[fady saher]

يا جماعة انا حجزت 301 مانيوال و كنت هايز اعرف افضل اداء للعربية بيبقي على بنزين كام 90 و لا 92ولا 95

[amrelsaqqa]

اكيد طبعا 95 ، بس ده نجيبه منين

في الكتالوج مكتوب ان العربية تشتغل في الرينج من 91 لـ 98

وطبعا كل ما الاوكتان يعلى كل ما الاداء والنعومة يزيدوا والاستهلاك يقل

[fady saher]

شكرا على الرد بس كنت عايز اطمن من حضرتك هل اداء العربية كويس مع بنزين 90 او 92 و ماذا عن تخليط البنزين او اضافة محسن الاوكتين و الاستهلاك في المتوسط بيكون كام

[amrelsaqqa]

اداء العربية كويس جدا وبتجيب الـ 100 في 9 او 10 ثوانى بالبنزين بتاعنا عادى جدا

المشكلة اللى بتحصل معايا مش عارف من ايه ان لما العربية بتتكتم في الزحمة نعومتها في الطلعة بتقل شوية مش عارف دي مشكلة فردية ولا مش مشكلة اصلا لان اخويا مثلا بيقوللى كل المانيوال كدة في الزحمة ..

اما عن الاداء والله ممتازة جدا وجبت بيها 180 ع الصحراوى و 160 على الغيار الرابع بس، و 150 ع المحور ، و140 ع الزراعى .. وما شاء الله عليها

استهلاك البنزين حسب اسلوب السواقة ومتوسط السرعة

انا العربية بتعمل معايا متوسط 180-200 في الصفيحة ، طرقى كلها زحمة في الغالب او جوة البلد


(داخل المنوفية ، الطريق الزراعى ، وقفة كوبري قليوب ، داخل القاهرة ووقفات كوبرى اكتوبر ... الخ .. ، مشوار العودة والوقفة ع الدائري واول الزراعى .. ) واحيانا ببقى ماشى متأخر وبجيب سرعات 90 و100 جوة البلد على كوبري اكتوبر مثلا بس ده نادر ما بيحصل ..



في الطرق دى كلها على بعضها بتعمل 180-200 في الصفيحة وبتكتبلى على الشاشة متوسط الاستهلاك المحسوب حوالى 10.2-لـ 10.4 لتر / 100 كيلو

انا شايف الاستهلاك ده عالى ، ومش عارف هيتحسن ولا لا ، بس في نفس الوقت الطرق زفت ، والعربية بتسجل متوسط سرعة ما بيزيدش عن 25 كيلو في الساعة ، يعنى انا تقريبا واقف مش ماشى بالعربية ولولا ان الواحد بيجيب 120 و 140 احياانا كان بقى متوسط السرعة 15 مش 25 ...



امبارح على سبيل التجربة صفرت العداد وانا في الزحمة ومشيت حوالى 20 كيلو في ساعتين ! في زحمة الدائري والزراعى الغير عادية بتاعت امبارح ، لقيت الاستهلاك زاد جدا ووصل لـ 19 لتر في الـ 100 ، يعنى 100 كيلو وشوية بس في الصفيحة ( استهلاك الزحمة القاتلة :d )


اول ما الطريق الزراعى فتح من قبل طوخ بشوية ، مشيت لحد شبين الكوم السرعة كانت بتوصل 120 .. والطريق كان فاضى والتوقفات قليلة ، العربية مشيت 70 كيلو ، متوسط الاستهلاك قل وبقى 7 لتر / 100 كيلو ( ممتاز 285 كيلو في الصفيحة ) متوسط السرعة اللى العربية حسبته كان حوالى 70 كيلو او 67 مش فاكر بالظبط ..


فالمشكلة هنا اللى بتقابلنا في مصر حاجتين ، الزحمة الشديدة ، والبنزين اللى مش بيطلع كل اداء العربية ، ( مش معنى كلامى ان الـ 92 وحش ، بس طبعا مهما عملت مش هتبقى زي لما تكون ممون ببنزين 98 مثلا ! )



ده اللى بيخلى الاستهلاك زيادة عن ماهو مكتوب في بروشور العربية ، يعنى انا بيتهيألى لو عملت ايه عمري ما هوصل للاستهلاك اللى مكتوب في البروشور ع الطرق المفتوحة اللى هو 5.4 لتر / 100 كم تقريبا

[amrelsaqqa]

لو حضرتك تقصد بالتخليط اضافة القليل من بنزين 80 ، يبقى بلاش منه
موضوع اضافة المحسنات في دماغى بقاله فترة وعاوز اجربه فعلا ..

[fady saher]

يا بيه متشكر على ردك و اسف اذا كنت تقلت عليك لاسف هي ديه اصبحت طبيعة الطرق في مصر و المعدلات الى يتقول عليها ممتازة بالنسبة لعربية 1600 سي سي و انشالله لما استلم هانقل التجربة بس ادعيلي استلم على خير

[amrelsaqqa]

ياباشا انا تحت امرك :)
تستلم على خير يارب
عايزين نعمل عصابة للـ 301 مانيوال :d

[Ahmed Amin]

زي ما عمرو قالك,,
في الكتالوج مكتوب ان العربية تشتغل في الرينج من 91 لـ 98

وعشان هيا عربية أقتصادية أكيد اللي هيجيبها مش هيبقي جايبها يحط فيها 95
عموماً 92 مناسب وشغال لأغلب العربيات,, 90 مش حلو لانه تحت ال rate
وكمان الفرق في السعر مش اللي هوا يخيليك تحط 90 أو تفكر فيه وتقارنة بال 92 !!
تقريبا الفرق 2 جنيه في العشرين لتر,, يعني مش مستاهلة.

بالنسبة لل 80 طبعاً دا مينفعش ومش مناسب مع العربية ولا مع أغلب العربيات الجديدة.

فا عايز تحط 95 وتقدر تحط منه علي طول حط,,
ال 92 هوا أنسب حاجة,,
وكمان في صيانة ل 2500 بيظبطو العربية أكتر علي البنزين بتاعتنا.
اللي هوا ال 92.

[mohamed hussei]

لو حضرتك تقصد بالتخليط اضافة القليل من بنزين 80 ، يبقى بلاش منه
موضوع اضافة المحسنات في دماغى بقاله فترة وعاوز اجربه فعلا ..

ياباشا طبيعي في عربيتك انت ماشي علي طول في زحمة والبنزين مستوي بتاعة جيد بالنسبة البنزين بتاع بلدها طالب منها اية اكتر من كدة هي كدة بتقول روحوني بلدي

[fady saher]

يا جماعة انا مجبتش سيرة بنزين 80 لان استخدامه مع اي عربية حقن مباشر مهما كان معدل انضغاط الموتور يقضى على الرشاشات كل ما قصدته وضع نسبة بسيطة 95 او محسن اوكتين و الباقي 92 لان عمرو اشتكي من العربية مخنوقة على الاول و الثاني و هذا كان مجرد اقتراح

[Dr_Moustafa]

طبيعى ان اى عربيه هتشتغل احسن على بنزين 95
بس مين يقدر على سعره ؟ّ

[amrelsaqqa]

يا جماعة انا مجبتش سيرة بنزين 80 لان استخدامه مع اي عربية حقن مباشر مهما كان معدل انضغاط الموتور يقضى على الرشاشات كل ما قصدته وضع نسبة بسيطة 95 او محسن اوكتين و الباقي 92 لان عمرو اشتكي من العربية مخنوقة على الاول و الثاني و هذا كان مجرد اقتراح

بفكر في موضوع المحسن ده فعلا ، بس انا اول حاجة هعملها هخلى العربية على طول ما تزيدش عن نص التنك ، اما اشوف في علاقة زي ماانا حاسس ولا لا ..

[mmohiey]

السلام عليكم ورحمة الله وبركاته

تقرير جميل يا استاذ عمرو السقا.....بس هى ال301 كام سى سى

اصل انا معايا ال3008 بتعمل 170 كم فى الصفيحة جوة البلد ومع التكييف

[amrelsaqqa]

1600 سي سي
وتقريبا الاستهلاك مقارب لان الطريق الزراعى ده في الغالب بقى كأنه جوة البلد ...

الاستهلاك الجامد اوى اللى هو 19 لتر في الـ 100 كيلو ، ده كان استهلاك يعتبر لحظى او في ظروف سيئة جدا اللى هو واقف لمدة ساعتين ، انما عندى الاستهلاك كله على بعضه من 180-200 جوة البلد وعلى طرق مع بعض والطرق في الغالب زحمة وكدة كدة العربية لسة ماجابتش 3000 كيلو

[itمحمد سيد]

طب يا جماعه انا عاوز اسال على حاجه انا كنت مره مسافر بيها على طريق الجيش و محملها على الاخر بصراحه و استهلكت منى تقريبا 3/4 التانك فى مسافه 250 كم هلى ده طبيعى مع الحموله ولا ايه