يعنى ايه بيجو 508

[eleanor]

السلام عليكم
طبعا كتير مننا عارف البيجو 508 وكتير نفسه يعرف عنها اكتر وناس كتير متعرفهاش
طبعا فى تقارير معموله عنها هنا فى المنتدى ومن اولها واشهرها تقرير الاستاذ احمد فهمى
والموضوع ده بعد تجربه 8 شهور وبناء على رغبه الاعضاء الافاضل
بسم الله الرحمن الرحيم
نبداء بالسياره من الخارج
1- دهان السياره من خامات نضيفه جدا وعمليه والفئه التوب لاين بتبقى ميتاليك
2- فوانيس خلفيه ليدات للفئتين
3- فوانيس اماميه ليدات وزينون ويتحرك فى اربعه Bi Xenon&Led لاتجهات اوتوماتيك للتوب لاين وفى الهاى لاين فوانيس هالوجين ويمكن التحكم فى ارتفاعا يدوى من الداخل
4- فوانيس شبوره بها خاصيه الكورنرينج Cornring
5- نظام الاضاءه النهارى DRL
6- مرايات كهرباء وضم كهرباء
7- فتحه سقف زجاج بس مش بانوراما فى التوب لاين
8- جنوط الومنيوم مقاس 17 بوصه للتوب لاين و16 بوصه للهاى لاين
9- حساسات ركن خلفيه للفئتين
10- نظام دخول السياره بدون مفتاح وغلقها بدون مفتاح عن طريق لمس اى مقبض من مقابض الابواب
ثانيا السياره من الداخل
1- فرش جلد طبيعى بالكامل فى التوب لاين ومتوفر بثلاث الوان الاسود والبيج والرمادى مقابل نصف جلد فى الهاى لاين
2- كراسى كهرباء بالكامل مع دعم الفقرات كهرباء للسائق والراكب الامامى فى التوب لاين مقابل كراسى يدويه فى الهاى لاين مع دعم الفقرات كهرباء
3- اضاءه ليدات فى الامام والخلف ولكل راكب اضاءه خاصه موجهة للقراءه مع وجود اضاء خافته بالون الاحمر تضاء ليلا لتسهيل الرؤيه داخل السياره مع وجود اضاء اماميه وخلفيه سفليه
4- اضاءه باللون البيض فى عصايه الفتيس
5- الزجاج كهرباء وبه خاصيه الاوتو فى الاربعه ابواب وباب السائق مع وجود خاصيه نزول الزجاج فى حاله وجود عائق وفتحه السقف برده تفتح فى حاله وجود عائق ونظام امان للاطفال لمنع فتح الزجاج والابواب الخلفيه
6- تابلوه جلد مع تطعيم جلوس شكله تحفه
7- تكيف 4 Zone climate يمكن التحكم فيه على حدى فى الامام والخلف والتحكم فى درجه الحراره والمراوح فى الامام منفصله وفى الخلف منفصله فى التوب لاين مقابل تكيف ثنائى فى الهاى لاين
8- نظام صوتى مكون من 8 سماعات مع خاصيه مانع الضوضاء وخاصيه ارتفاع الصوت فى حاله السرعات العاليه اوتوماتيك مع وجود مدخل USB ومدخل AUX
9- مساحه السياره من الداخل كبيره وتتسع لخمسه اشخاص بالغين بكل راحه
10- السياره مزوده بخاصيه البلوتوث لدعم الهاتف وتشغيل الميديا بلاير
11- طاره متععده الوظائف للتحكم فى مثبت السرعه ومحدد السرعه والتحكم فى الكاسيت
12- وجود اذرع للتحكم ى الغيارات مانيوال خلف الطاره
13- الفتيس استيب ترونيك 6 سرعات مع وجود خاصيع اسبورت مود وخاصيه الجليد وعلى ما اعتقد من تصنيع شركه ماريلى الايطاليه
14- فرامل يد كهرباء مع خاصيه دعم الفرامل المفاجىء فى التوب لاين مقابل فرامل يد عاديه فى الهاى لاين
15- نظام التشغيل الذكى ستارت اند ستوب فى التوب لاين مقابل مفتاح عادى فى الهاى لاين
16- ثلاجه فى التبلوه وفى مسند اليد الامامى فى المنتصف
17- مسن يد قابل للانزلاق للامام والخلف
18- عجله القياده تلسكوبيه تتحرك فى اربعه اتجهات
19- ستائر خلفيه وجانبيه فى التوب لاين مقابل ستائر خلفيه فى الهاى لاين

20- اماكن تخزين فى الاربعه ابواب واماكن لوضع زجاجه المياه

21- مسند يد خلفى فى المنتصف مع وجود 2 حامل اكواب

22- حامل اكواب امامى فى التبلوه ولكن مكتنه غلط ومش عملى علشان بيدارى الانتظار

23- شاشه كمبيوتر واعطال وبها عدد 2 عداد تريب وكميه البنزين المتبقيه والمستهلكه

24- مرايا تعتيم مع وجدود حساس بها فى التوب لاين مقابل مرايا عاديه فى الهاى لاين

25- حساس اضاءه ومطر مع وجود كاميرا لاستشعار الضوء

26- العربيه بها 6 ايرباج و2 ايرباج فى الكراسى يعنى 8 ايرباج

27- العربيه شنطتها كبيره جدا مع امكانيه طى الكنبه على جزئين لزياده المساحه

28- وجود دعمات من الفولاذ فى الابواب للحمايه

29- نظام ايزو فيكس لتثبيت مقاعد الاطفال

ثالثا الموتور والعفشه والفرامل
1- الموتور 1600 سى سى تيربو بقوه 156 حصان لغايه موديلات 2012 ومن اول 2013 بقت 163 حصان وبتشتغل ببنزين 92 عادى جدا بدون اى مشاكل
2- العفشه الخلفيه مالتى لينك مع وجود انتى رول والعفشه الاماميه ماكفيرسون مع وجود دعائم لمنع الانقلاب
3- قرامل ABS عباره عن اسطوانات اماميه مزدوجه واسطوانات خلفيه
4- انظمه الامان فى السياره ABS&ESP with ASR&CBC&PSA&EBA&EBFD
وجهة النظر الشخصيه
طبعا ممكن كل الملاك ينقلو تجاربهم اما بالنسبه لتجربتى ووجهة نظرى الحمد لله العربيه مرضيه جدا
وادائها خرافة وتجميع السرعه مرضى جدا وبتجيب ال230 وبيبقى فيها تانى والار بى ام بيبقى على 4700 لفه فى الدقيقة
الفرامل بعد ماطبعت بقت كويسه يعنى نقدر نقول 8 من 10
وعزل الهواء جيد جدا بس بيبقى ملحوظ بسيط على السرعات فوق 150 لكن لو مشغل التكيف او الكاسيت يبقى مش هاتلاحظه
استهلاك البنزين كويس جدا تفويله التانك بتمش العربيه 1200 كيلو لو طريق سريع وسرعه ثابته 120 مع تشغيل التكيف
والعربيه فى السفر ماشاء الله تبارك الله مش بتحس بحاجه من الاقصر للقاهره مش بتحس بتعب
ومتوسط الاستهلاك داخ المدينه حوالى 7لتر ونص لكل 100 كيلو وممكن توصل ل9 لتر على حسب طريقه القياده
صوت الموتور عالى شويه وده الطبيعى بتاعها بس ممكن يكون بالنسبه لبعض الناس انه مزعج
التكيف بتاعها هايل بمعنى الكلمه ومش بتحتاج انك تعليه
العفشه بتحتاج تربيط كل فتره بسبب مطبات مصر المحروسه يعنى ممكن تتربط كل 10000 كيلو
المشكله فى العربيه انك بتبقى مستهدف من الميكروبصات والعربيات التقيله وبيتغتت عليا كتير علشان بيبقو عارفين انى هاخاف بس يلا الحمد لله
يعاب برده على العربيه عدم وجود الشاشه بسبب التوكيل اللى منزلهاش وعدم وجود ميمورى بالكراسى برده بسبب الوكيل
والشنطه فيه جزء كبير فايبر بس الحمد لله تغيره سهل ومش بياثر على العربيه ويعاب ان الاكصدام الخلفى مش بارز كفايه
انا حاليا مش فاكر حاجه تانى لو افتكرت هابقى ازوده وطبعا كل ملاكها ياريت يقولو رايهم برده
اسيبكم بقى مع شويه فيديوهات للاسد الفرنسى
Peugeot 508 Special Report - YouTube
2011 Peugeot 508 Start-Up and Full Vehicle Tour - YouTube
2011 Peugeot 508 EuroNCAP Crash Tests (Frontal Offset, Side, & Pole) - YouTube
Essai Mercedes Classe C vs Peugeot 508 (Année 2011) - YouTube
Skoda Superb vs. Mazda 6 vs. BMW 320d vs. Peugeot 508 - YouTube
يارب اكون عرفت افيدكم واسف انى ماليش فى عمل التقارير ولو الاداره تحب تعدل التقرير يكون افضل
واى استفسار تحت امر حضارتكم

[Hunting_Eagle]

ما شاء الله .. ربنا يبارك لك فيها

بصراحة انا في اﻻول كنت مندهش من اعجاب الناس بيها

بس لما ركبتها في المعرض اقتنعت بيها 100% وهي من العربيات القليلة في مصر اللي تستحق كل قرش يندفع فيها

و كمان الموتور هيزيد ل 163 حصان .. مفيش احسن من كده

عايز اقولك اني كنت محتار اشتري c180 او 316 و بعد ما شوفت صالون العربية دي بوظتلي كل حساباتي .. ههههه

تسلم ايدك على التقرير

[ahmed sa3ed]

بجد شكرا على التقرير دا والعربيه دى بصراحه من ااقل العربيات الموجوده حاليا فى مصر الى اتميزت باغلب المميزات الى الواحد عايزها وفوق دا كولوا قله اعطالها ومحدش اشتكى من اى حاجه فيها وكل الى بيجبها فرحان بيها جدا

[Ahmed Amin]

الله يا ينور يا أسلام, تقرير ممتاز جداً
والتقرير مش محتاج تعديل ولا حاجة, أنت تقريباً غطيت كل حاجة ممكن تتقال.
وكل الأسئلة اللي كانت كتير بتسأل عليها,,

وفعلاً العربية مميزاتها وأدائها ممتازة جداً مع سعرها,,
تسليم أيدك وربنا يبارك لك فيها.

[Somsom]

أنا سمعت ان العربية. ديت. بتتجمع في الصين؟؟؟؟؟؟

[mastr_n]

ماشاء اللة
ربنا يباركلك فيها ويحميهالك من العين يارب
العربية فعلا فخمة وليها هيبة فى الشارع
ومتشكرين على نقل التجربة

[ALshahba]

ماشاء الله لاقوة الا بالله
تقرير جميل جدا
عربيه محترمه جدا ..... وتعقد جدا
بس نسيت تقولنا اهم حاجه فى الايام الصعبة دي ..... نظام الحماية "ايموبليزر" ضد السرقه
- هل فيها نظام الرفع الاوتوماتك للزجاج من اول لمسه ....زي النزول كده
- هل السنتر بيغلق الباب الخلفي ولا لا زي الفلونس
وياريت توضح عمل الحاجات الغريبه دي : Asr-cbc-psa-eba-ebfd

ربنا يحفظهالك
ودمت فى امان الله

[ahmed sa3ed]

كام سؤال بقى

اولا عارف اجابت السؤال دا بس للتاكيد مش اكتر ثبات العربيه بعد 180 عامل ازاى

ال 8 سماعات دول يا ترى الصوت فيهم حاجه كدا شغل فنادق هاهاهاهاه اصدى لما تعلى الصوت نقى وممتاز ولا ليك تعليق عليه

العربيه جايه نص فرش جلد ونص قماش يا ترى دا بيتغير ولا لازم اروح افرش فوقيه ودا الفرش الاصلى ميتغيرش خالص

حجم العربيه الكبير دا يا ترى مضيقك فى الاماكن الضيقة وبتبقى زوايا الرؤيه واضحه ولا متعبه شوية وشكرا ليك هتعبك معلش

[ahmed sa3ed]

أنا سمعت ان العربية. ديت. بتتجمع في الصين؟؟؟؟؟؟

العربيه تصنيع وتقفيل فرنساوى

[Akram.Gamal]

ماشاء الله لا قوة الا بالله
تقرير جميل و ممتع
و عربيه ماشاء الله تستاهل كل مليم بيدفع فيها
ربنا يباركلك فيها و يرزقك خيرها

[eleanor]

ما شاء الله .. ربنا يبارك لك فيها

بصراحة انا في اﻻول كنت مندهش من اعجاب الناس بيها

بس لما ركبتها في المعرض اقتنعت بيها 100% وهي من العربيات القليلة في مصر اللي تستحق كل قرش يندفع فيها

و كمان الموتور هيزيد ل 163 حصان .. مفيش احسن من كده

عايز اقولك اني كنت محتار اشتري c180 او 316 و بعد ما شوفت صالون العربية دي بوظتلي كل حساباتي .. ههههه

تسلم ايدك على التقرير

هى فعلا تستحق كل قرش يدفع فيها
وتحت امرك فى اى استفسار

[eleanor]

بجد شكرا على التقرير دا والعربيه دى بصراحه من ااقل العربيات الموجوده حاليا فى مصر الى اتميزت باغلب المميزات الى الواحد عايزها وفوق دا كولوا قله اعطالها ومحدش اشتكى من اى حاجه فيها وكل الى بيجبها فرحان بيها جدا

العفو وتحت امرك

[eleanor]

الله يا ينور يا أسلام, تقرير ممتاز جداً
والتقرير مش محتاج تعديل ولا حاجة, أنت تقريباً غطيت كل حاجة ممكن تتقال.
وكل الأسئلة اللي كانت كتير بتسأل عليها,,

وفعلاً العربية مميزاتها وأدائها ممتازة جداً مع سعرها,,
تسليم أيدك وربنا يبارك لك فيها.

ربنا يبارك فيك يا استاذ احمد ويارب اكون قدرت افيد الناس

[eleanor]

أنا سمعت ان العربية. ديت. بتتجمع في الصين؟؟؟؟؟؟

لا يافندم دى فرنساوى 100/100
ولكن فى موديلات بتتصنع مخصوص للصين ودى ومواصفاتها اعلى بكتير من اى فئه بتنزل لبلد تانى
واى استفسار تحت امرك

[eleanor]

ماشاء الله
ربنا يباركلك فيها ويحميهالك من العين يارب
العربية فعلا فخمة وليها هيبة فى الشارع
ومتشكرين على نقل التجربة

ربنا يخليك ويرزقك احسن منها
واى استفسار تحت امرك