سؤال فنى جدا فى 405

[ehabbasha30]

السلام عليكم
عندى 405 موديل98 الموتور الاسود 8 صباب 2000 سى سى اوتوماتيك
احيانا بيكون عندى نتشة فى العربية لما بكون ماشى على طريق بسرعة عالية او بسرعة متوسطة
ولما بكون ماشى سلانسية بتبطل مع العلم انها وقت التقطيع والبرجلة دى بيطلع دخان اسود من الشكمان وبيبقى فى ريحة بنزين او عادم نى
وساعات بتبقى ماشية ولا اجدع عربية زيرو مافيهاش لا صوت ولا هزة ولا اى برجلة
شلت البوابة ونضفتها - نضفت الحساسات كلها - غيرت فلتر البنزين
برضو نفس المشكلة
شاكك فى ان يكون البنزين مش نضيف والتانك عاوز يتحل
وشاكك كمان فى طلمبة البنزين ممكن تكون بتقطع
وواحد قاللى ممكن يكون الكونترول بتاع العربية



عاوز حد عندة خبرة فى ال405 يقوللى المشكلة فين او يدلنى على حد متخصص فى ال405 البرستيج

[Ahmed Amin]

روحت لميكانيكي يبص لك عليها ولا لسه ؟

[hardy_mero]

احتمال يكون سبب النتشه دي الفتيس مش الموتور
راجع الزيت و الفلتر للفتيس

[ahmed2y]

محمد زكى ميكانيكى بيجو ممتاز ومش بتاع لف ودوران فى الزاوية ٠١٠٠٢٧٣٩٢٩٢

[ehabbasha30]

السلام عليكم
اولا شكرا لكل الردود
ثانيا - انا فعلا رحت لاتنين كهربائية عشان شكيت يكون الموضوع كهربا او موبينا قاللى لا دة شغل ميكانيكا فرحت لتلاتة ميكانيكية اتنين هنا فى المنصورة وواحد فى صقر قريش
اللى فى المنصورة واحد حطها على الكمبيوتر وقاللى المشكلة فى الكونترول والتانى قعد يلعب وموصلش لحاجة
اللى فى صقر قريش قال المشكلة فى حساس الآى دى مع انى كنت منضفة قبل كدة بالدبليو 40 لكن هو قال انة كان راكب بالمقلوب ونضفة وركبة تانى
المشكلة بقى ان العربية فضلت يومين تلاتة ماشية زى الفل لكن رجعت تانى تبرجل وتبطل لكن على خفيف مش زى الاول ..... بس اللى لاحظتة ان الحالة بتسوء يوم بعد يوم
ثالثا المشكلة مش فى الفتيس لان العربية بتبطل وهى واقفة من غير اى غيار وعداد الآر بى ام بيعلى ويوطى وساعات بتبقى مافيهاش اى مشاكل
=========================================

اللى انا شاكك فية بقى ان يكون العربية فيها بنزين مش نضيف وان التانك عاوز يتحل ويتغسل لانى لاحظت ان حالة العربية بتسوء كلما نقص البنزين فى التانك عن النص تقريبا ... ياترى دة منطقى ولا انا بهذى
وكمان حل التانك مسأله سهلة ولا شغلانة ؟؟؟؟؟؟؟

[ehabbasha30]

للرفع

[Ahmed Amin]

لا طبعاً مش بتهذي,, أي حد عنده مشكلة هيفكر في حلول كتير,
بس هوا انت غيرت فلتر البنزين ولا لسه ؟

فك التانك مش عارف صعب ولا لأ في ال 405,
أنا نضفت التانك بتاعي مرة بأني فكيت الكنبة الخلفية, وطلعت طلمبة البنزين وطلعت البنزين منه
ونضفت التانك بأيديا وهوا راكب في العربية عشان محبتش أفكة وأركبه.

وكانت شاكك زيك فيه بس مطلعش فيه حاجة, والعيب طلع من موتور طلمبة البنزين في الأخر وغيرته بعدها.
فأنت أبدأ بتغير فلتر البنزين طالما المشكلة من وصفك مالهاش دعوة بالفتيس, كمان أنت نضفت الحساسات وظبطت الدنيا,
ممكن لما البنزين بيقل عن النص ضغط الموتور بيضعف وعشان كدا بيحصل معاك الأعراض دي.

شوف كدا وأبقي عرفنا عملت أيه ؟

[Ahmed_aboarab]

أنا عندي نفس المشكلة بالظبط و بردو شاكاك في تنك البنزين لأنها غالبا بتقطع كدا علي أخر 20 لتر في التنك بس أنا مش عارف اذا كان التنك ولا لأ عاشان مفتيش :]

[ehabbasha30]

فكيت كوعة التانك الكاوتش من تحت وصفيت التانك خالص مكنش فية اى حاجة خالص
جالى احباط لانى كنت شاكك بنسبة كبيرة ان يكون البنزين علية مية او مش نضيف
بصيت على طلمبة البنزين وشفت ضخ البنزين لقيتة ممتاز
المهم لعبت فى الحساسات كلها تانى ومفيش فايدة
قلت ابص على البوجيهات لان العربية كانت ابتدت تغيب فى الدوارة وقرفتنى على ما رضيت تمشى وعلى ما وصلت مشوارى كانت خلاص بتودع
البوجيهات كانت وحشة جدا برغم انى لسة مغيرهم من اقل من اسبوعين لكن لاحظت انهم عليهم بنزين
ياترى اية ممكن يكون اللى بوظهم وهل مسطرة الرشاشات ممكن تكون بتسيل عليهم بنزين ؟؟؟؟
او هل ممكن يكون كاوتش الرشاشات مش حلو وبيدخل هواء مثلا ؟؟؟؟؟؟؟؟؟
لان واحنا بنلعب كدة ضغطنا على الرشاش التانى لقينا العربية استقامت واتعدلت سبحان الله
على العموم انا بكرة ان شاء الله هحل الرشاشات واشوف الكاوتش بتاعها وانضفها ربنا يسهل بقى ان شاء الله
انا حاسس ان الموضوع بسيط جدا بس هو عاوز حد فاهم مش صنايعى بيفتى وخلاص زى ما شفت

[Ahmed Amin]

فكيت كوعة التانك الكاوتش من تحت وصفيت التانك خالص مكنش فية اى حاجة خالص
جالى احباط لانى كنت شاكك بنسبة كبيرة ان يكون البنزين علية مية او مش نضيف

مانا كنت قايلك كدا في ردي اللي فات,
إني كنت شاكك زيك فيه بس مطلعش فيه حاجة,,

بس عموماً أديك أستفدت من التجربة,
وعشان قلبك يبقي مطمن من ناحيته ومتبقش سايق شاكك فيه ولا تبقي شاكك في البنزين, لأنك شوفتهم عاملين أزاي دلوقتي
ودا لنك لموضوع كنت كاتب فيه طريق تنضيفي للتانك, وأنو مكنش فيه حاجة زي ماكنت متخيل قبل ما أنضفه زيك كدا,

http://www.nilemotors.net/Nile/380455-a.html

بصيت على طلمبة البنزين وشفت ضخ البنزين لقيتة ممتاز
المهم لعبت فى الحساسات كلها تانى ومفيش فايدة
قلت ابص على البوجيهات لان العربية كانت ابتدت تغيب فى الدوارة وقرفتنى على ما رضيت تمشى وعلى ما وصلت مشوارى كانت خلاص بتودع
البوجيهات كانت وحشة جدا برغم انى لسة مغيرهم من اقل من اسبوعين لكن لاحظت انهم عليهم بنزين
ياترى اية ممكن يكون اللى بوظهم وهل مسطرة الرشاشات ممكن تكون بتسيل عليهم بنزين ؟؟؟؟
او هل ممكن يكون كاوتش الرشاشات مش حلو وبيدخل هواء مثلا ؟؟؟؟؟؟؟؟؟
لان واحنا بنلعب كدة ضغطنا على الرشاش التانى لقينا العربية استقامت واتعدلت سبحان الله
على العموم انا بكرة ان شاء الله هحل الرشاشات واشوف الكاوتش بتاعها وانضفها ربنا يسهل بقى ان شاء الله
انا حاسس ان الموضوع بسيط جدا بس هو عاوز حد فاهم مش صنايعى بيفتى وخلاص زى ما شفت

البوجيهات لو لونها أسود شوية بس العربية بتدور من أول تكة يبقي دا طبيعي ومتقلقش منها,,
البوجيهات كانت عندي كدا,, وكنت بعمل صيانة في مرة وطلبت تغير زيت بس وفكو البوجيهات من غير ما أطلب منهم دا وكانو عايزين يغيروها ومكنش عدي عليها 20 ألف كيلو, ورفضت أغيرها وفضلت بعدها 15 ألف كيلو من غير مشاكل.

ممكن أعرف بس أنتو ضغطتو علي الرشاش أزاي ؟
ولو العربية أتظبطت بعدها يبقي في الغالب كان منه,,
وفعلاً حاول تشوف حد فاهم ولو محل مشهور أبحث عنه هنا الأول في المنتديات كلها عشان تشوف لو حد راح له قبل كدا وكاتب تجربته معاه أو أنطباعه عنه.

وأبقي عرفنا عملت أيه.

[ehabbasha30]

تسلملى ولجميع الاعضاء يا استاذ احمد امين
انا عارف يا باشا ان حضرتك قلتلى على طريقة التنضيف بتاعة حل العوامة من تحت الكنبة وحاولت اعملها بس انا معرفتش افك العوامة من تحت الكنبة .....انا فكيت كوعة كاوتش اللى جاية من فتحتة التانك اللى بنخش نحط منها بنزين فى المحطات فى اخر الماسورة دى قبل التانك على طول فى كوعة كاوتش بافيزين .... ودى فى اخر التانك خالص من تحت يعنى زى الطبة كدة مش بتسيب حاجة فى التانك من تحت كلة بيتصفى


اما بالنسبة لموضوع البوجيهات مش موضوع ان لونها اسود ..... هى كانت عطلانة ومش بتشتغل اساسا وكان عليها بنزين فانا عاوز اشوف موضوع البنزين دة جالها منين

[badry78]

متابع
و ربنا يوفقك في الوصول لحل لمشكلتك

[Ahmed Amin]

تسلملى ولجميع الاعضاء يا استاذ احمد امين:s_thum1[1]:
انا عارف يا باشا ان حضرتك قلتلى على طريقة التنضيف بتاعة حل العوامة من تحت الكنبة وحاولت اعملها بس انا معرفتش افك العوامة من تحت الكنبة:copy of majd(4): .....انا فكيت كوعة كاوتش اللى جاية من فتحتة التانك اللى بنخش نحط منها بنزين فى المحطات فى اخر الماسورة دى قبل التانك على طول فى كوعة كاوتش بافيزين .... ودى فى اخر التانك خالص من تحت يعنى زى الطبة كدة مش بتسيب حاجة فى التانك من تحت كلة بيتصفى


اما بالنسبة لموضوع البوجيهات مش موضوع ان لونها اسود ..... هى كانت عطلانة ومش بتشتغل اساسا وكان عليها بنزين فانا عاوز اشوف موضوع البنزين دة جالها منين

أنا متهيألي إن طبيعي إن البوجيهات تطلع سودا لما تطلعها من العربية,
لانها كانت كدا لما طلعوها غلط وركبوها تاني ومشيت بيها عادي,,

المهم لو كانت عطلانة فعلاً يبقي كانت البوجيهات وحشة ومرطبة, أنت كنت جايب نوع أيه ؟
نصيحة مني جرب نوع بوش المرة اللي جاية وهاته من عند غزالي في شارع دمشق وإن شاء الله يبقي كويس ويعيش معاك.

[ehabbasha30]

الحمد لله واتمنى من الله ان يكون هو دة الموضوع ويكون خلص باذن الله ..... انا استنيت شوية قبل ما اكتب عشان يمكن يكون فترة كدة العربية تتعدل فيها وترجع تستندل تانى
المهم انا حليت الرشاشات ...... كانت مليانة طين وقرف وبلاوى زرقا والكاوتش كان وحش
لمهم نضفتها ببنزين نزلت بلاوى ... وغيرت الكاوتش (( الاويل سيل)) بتاعها .... والحمد لله بقت زى الفل
بس يا خوفى تكون بتلاعبنى وتكون منيمانى وهترجع تبوظ تانى ربنا يستر
بس ان شاء الله يكون الموضوع خلص انا ماشى بيها بقالى يومين اهه عشان اشوف ومفيش حاجة الحمد لله


الله المستعان

[badry78]

الحمد لله واتمنى من الله ان يكون هو دة الموضوع ويكون خلص باذن الله ..... انا استنيت شوية قبل ما اكتب عشان يمكن يكون فترة كدة العربية تتعدل فيها وترجع تستندل تانى
المهم انا حليت الرشاشات ...... كانت مليانة طين وقرف وبلاوى زرقا والكاوتش كان وحش
لمهم نضفتها ببنزين نزلت بلاوى ... وغيرت الكاوتش (( الاويل سيل)) بتاعها .... والحمد لله بقت زى الفل
بس يا خوفى تكون بتلاعبنى وتكون منيمانى وهترجع تبوظ تانى ربنا يستر
بس ان شاء الله يكون الموضوع خلص انا ماشى بيها بقالى يومين اهه عشان اشوف ومفيش حاجة الحمد لله


الله المستعان

يا باشا الف مبروك و ان شاء الله تفضل مظبوطة كده و حتى لا قدر الله لو اتكررت يبقى انت عرفت المشكلة جاية منين .. ممكن تحط منظف رشاشات يكون محترم على حوالي 40 أو 50 لتر بنزين و تعمل مشوار كويس هاينضف الرشاشات ( الكلام ده من المنتدى هنا )