بيجو 206 موديل 2001

[Meshfaker]

السلام عليكم
كان عندى استفسار صغير عن بيجو 206 موديل 2001 اوتوماتيك 1400 سى سى
هل سعر العربية دى فعلا فى حدود 40 الف ؟؟ وايه هى المشاكل اللى فيها ؟؟

وشكرااااااااااااا

[Meshfaker]

مفيش حد يعرف اى حاجه عنها كده خالص ؟؟؟

[abohend]

2001 و 1400 cc

اللي أعرفه إن البيجو ال206 المانيوال 1100 cc في حدود من 40-45 للحالات الكويسة
يتهيألي ال1400 الأوتو هتبقى من 43-48
دور كده على كونتاكت و شوف سعرها في حدود كام

[Meshfaker]

شكرا جداااا يا باشا عى الاهتمام والرد وانا شوفت واحده فعلا على كونتاكت

" بيجو 206 موديل 2001 - 39,000 جنيه

1400 سى سى | 110,000كم

[تكييف] [باور ستيرنج] [سنتر لوك] [أوتوماتيك] بيجو 206 موديل 2001 دواخل فابريكة بالكامل رشة حزام نظافة اوتوماتيك 2 زجاج كهرباء امامى تحتاج بطاحتين فقط السعر لسرعة البيع للحاجة للفلوس "

فمش عارف الاعلان حقيقى ولا لا
وغير كده
الاتوماتيك فيها عامل ايه ؟؟ فى اى مشاكل ولا تمام ؟؟

وانا شايف انك معاك بيجو 206 فياريت تدينى شوية معلومات عنها عموما

[Ahmed Amin]

الفتيس الاوتوماتيك بتاع العربية دي هوا نفسه اللي موجود في ال ٤٠٦ وال ٣٠٧.
الموديلات الأولي منه كان فيها مشكلة في السولونيد ڤالڤ وكان بيتغير مع أبديت عشان المشكلة تروح.
فأنت أتاكد أنو مغيره ولا لأ, ومغير الزيت بالأصلي ولا لأ
ولو عنده مشكلة في الفتيس ولا لأ, وفي الغالب هيقول لأ لأنو كاتب في الأعلان "تحتاج بطاحتين فقط السعر لسرعة البيع للحاجة للفلوس"
يعني عايز يخلص من العربية.
فأنت أسئلة كان بيعمل صيانة فين, وشوف لو فيه فواتير من التوكيل ؟
وراجع الرد دا كل حاجة مكتوبة فيه من الحاجات اللي مفروض تاخد بالك منها وأنت بتشتري مستعمل هتنطبق علي ال ٢٠٦

http://www.nilemotors.net/Nile/395421-307-307-sw.html#post3875338150

[Meshfaker]

الف شكر يا احمد باشااااااااااااااا
ولو تقدر تقولى معلومات عن اداء العربية عموما عامله ايه يبقى كتير عليااااااااااااااا
يعنى اتوكل على الله ولا اشوف حاجه تانية

[Ahmed Amin]

الشكر لله,
وتتوكل علي الله فيه ولا لأ دا هيعتمد علي الحالة طبعاً.

لازم تكشف عليها بنفسك وتشوف حالتها من الخارج وحالة الكابينة كويسة ولا لأ.
متتوقعش كتير لأنها مش هتكون ممتازة لأنها موديل ١٣ سنة فاتو, كل دا ليه عوامل هتأثر في حالة الجسم والكابينة.
لكن لو متبهدلة وفيها حاجات بايظة أو مكسورة في الكابينة ابعد عنها عشان اللي مهمل في العربية في الشكل هيبقي مهمل في صيانتها كمان.

بعدين تبدأ تكشف حالة الفتيس والكهرباء والعفشة,
وطبعاً يفضل الكشف يكون في التوكيل عشان متلاقيش حاجات مستخبية بعد كدا وتضايق.

وكقاعدة عامة مش مهم سنة الصنع علي قد الحالة وعدد الكيلومترات اللي العربية مشياها,
وتتأكد من عدادها عشان الرقم دا قليل جداً علي عربية ٢٠٠١
لو كان الرقم دا حقيقي وحالتها حلوة هتبقي عربية لقطة.

[abohend]

مش قليل و لا حاجة

وتتأكد من عدادها عشان الرقم دا قليل جداً علي عربية ٢٠٠١
لو كان الرقم دا حقيقي وحالتها حلوة هتبقي عربية لقطة.

مش قليل و لا حاجة
أنا عربية المدام 82000 بس
عادي
بس موضوع التأكيد ده الراجل يعمله إزاي
يعني هل أثناء كشف التوكيل يطلب منهم التأكد من العداد
و لا الفحص كده كده بيشمل التأكد من العداد؟؟؟

أنا كنت فحصت بيكانتو و i10 قبل كده فالتوكيل محدش جاب سيرة عن الموضوع ده
يعني هو بيقول الكهرباء تمام العفشة تمام رشة و لا لأ و هكذا

[abohend]

تجربتي مع بيجو 206

شكرا جداااا يا باشا عى الاهتمام والرد وانا شوفت واحده فعلا على كونتاكت

" بيجو 206 موديل 2001 - 39,000 جنيه

1400 سى سى | 110,000كم

[تكييف] [باور ستيرنج] [سنتر لوك] [أوتوماتيك] بيجو 206 موديل 2001 دواخل فابريكة بالكامل رشة حزام نظافة اوتوماتيك 2 زجاج كهرباء امامى تحتاج بطاحتين فقط السعر لسرعة البيع للحاجة للفلوس "

فمش عارف الاعلان حقيقى ولا لا
وغير كده
الاتوماتيك فيها عامل ايه ؟؟ فى اى مشاكل ولا تمام ؟؟

وانا شايف انك معاك بيجو 206 فياريت تدينى شوية معلومات عنها عموما

لو الحالة زي مبيقول تبقى لقطة
أقل من سعرها 5 على الأقل
و لو فعلا الحالة كده العربية مش هتستنى و مش هتلحقها لو إترددت (في تجار قاعدين ملهمش شغلانة غير صيد الفرص و إعادة بيعها)

بالنسبة لرأيي في العربية (عن المانيوال 1100 سى سى أتحدث)
هي ممتازة في فئتها
تقفيلها تحفة مش هتلاقي زيه و لا حتى فالعربيات الجديدة-خامات أكثر من ممتازة و الله جلد الفتيس و الطابلوه مقشرش لحد النهارده بسم الله ما شاء الله كأنها جديدة رغم إني مش بركنها فجراج
شبابية أبعادها صغيرة سهلة فالركن و المناورة
مساحة الصالون معقولة لعربية بالحجم ده
مريحة (تحكم بارتفاع عجلة القيادة و كرسي السائق)
مش هتحس إنك راكب عربية 2001 لأن الأبشنز بتاعتها منزلتش فالكوري غير بعد 2007
(عربية أختي i10 2011 الزجاج بتاعها بكرة)
لكن البيجو ..زجاج أمامي كهرباء-تكييف-باور-سنتر-إنذار لو نسيت السنتر أو نسيت المفتاح فالكونتاك أو سيبت أنوار الطابلوه منورة)
موفرة جدا جدا فالبنزين
ثبات معقول للفئة دي
فرامل ممتازة رغم عدم وجود ABS ...و الله ركبت بيكانتو 2010 فرامل البيجو أحسن منها

بس الحياة مش وردية ليها عيوبها برضه

قطع الغيار غالية و مش متوفرة
مش أي حد يشتغل فيها (بالذات فالكهرباء)
إعادة بيع مش أوي نظرا لثقافة السوق
ال1100 سي سي مش بتاعت سفر و مشاوير
مش عائلية (الشنطة بالذات) و ده سبب أني هبيعها إن شاء الله و أجيب ال301 (بيجو برضه..اللي يركب أوروبي ميستريحش فالكوري و ما شابه)
لكن طول مالعربية كانت مع مراتي كانت مبسوطة بيها جدا و مشتكتش منها فحاجة غير صعوبة الصيانة بره التوكيل و عدم توفر قطع الغيار بأسعار مناسبة

[Meshfaker]

اشكركم بشدة على المساعدة
شكرا ابوهند
شكرا احمد باشا

وان شاء الله مش هاخد اى خطوة غير لما اعرفكم ايه اللى بيحصل
ولو عندكم اقتراحات بخصوص اى عربية تانية تكون اوتوماتيك وفوق سنه 2000 وبحاجه و40 الف غير الفيرنا واللانوس اكون شاكر اكتر مع انى مقتنع بال 206 جداااااا

[Ahmed Amin]

مش قليل و لا حاجة
أنا عربية المدام 82000 بس
عادي
بس موضوع التأكيد ده الراجل يعمله إزاي
يعني هل أثناء كشف التوكيل يطلب منهم التأكد من العداد
و لا الفحص كده كده بيشمل التأكد من العداد؟؟؟

أنا كنت فحصت بيكانتو و i10 قبل كده فالتوكيل محدش جاب سيرة عن الموضوع ده
يعني هو بيقول الكهرباء تمام العفشة تمام رشة و لا لأ و هكذا

لا قليل جداً طبعاً,,
متوسط أي عربية في السنة حوالي 10 الأف كيلو لو مش بتتحرك بيها كتير غير في الأجازات بس والسفر فقط وعندك عربية تانية للأستخدام اليومي جوا البلد,
أما لو البيت كله علي عربية واحدة وبتتحرك يومي ممكن تعمل 15 ل 25 ألف كيلو في السنة كحد أدني..

يعني الانسر مثلاً أنا كنت بستخدمها كل يوم مشواير صغيرة من 50 كيلو في اليوم رايح الكلية وراجع ومشواير صغيرة جداً وساعات مش بخرج بيها يومين في الأسبوع,
يعني متوسط 18 ألف كيلو في الشهر,, وضيف علي دا السفر للقاهرة أو الأسكندرية هتزود 300 كيلو في يوم واحد.
في الأخر بعد 3 سنين كانت عاملة 70 ألف كيلو,

ودا متوسط عداد أي عربية بعد 3 سنين اللي هوا 70 ألف كيلو لو كان أستخدام البيت كله عليها جوا البلد وللسفر
وأعرف ناس دلوقتي معاها عربيات موديل 2007 داخلة في ال 180 ألف كيلو,,

لكن فيه بقي عربيات أستخدامها أخف ولو بتستخدم للسفر بس بتعمل حوالي 10 الأف كيلو في السنة. يعني 30 ألف كيلو في السنين,
يعني لو بنتكلم في عربية موديل 2001 المفروض علي الأقل خالص تكون عاملة 110 ألف كيلو عشان تبقي ماشية خفيف.
ويبقي الأعلان دا بتاع العربية اللي Meshfaker حطه مظبوط ومنطقي,
وطبعاً كشف التوكيل بيعرفك لو العداد ملعوب فيه ولا لأ.

لكن لو عربيتك مراتك موديل 2001 ولو كانت عاملة 82 ألف كيلو دي يا أما حالة نادرة, يا كانت مرفوعه كذا سنة, يا ملعوب في عدادها...

والراجل مش بيطلب من التوكيل التأكد من العداد,
هما كدا كدا في الكشف بتاعهم بيشوفو الكمبيوتر مسجل أخطاء ولا لأ,
لو الكنترول مش بتاعها هيتعرف لأن رقمه هيبفي مختلف عن رقم الكنترول اللي نزلت بيه العربية,
ولو أتلعب في عدادها هيتعرف برضه لأن المفروض العداد مش بيتصفر ولا بيتغير في تاريخ التعديل بتاعه اللي طلعت بيه من المصنع.
فا الفحص كدا كدا بيشمل الكشف علي عداد العربية.

[Ahmed Amin]

اشكركم بشدة على المساعدة
شكرا ابوهند
شكرا احمد باشا

وان شاء الله مش هاخد اى خطوة غير لما اعرفكم ايه اللى بيحصل
ولو عندكم اقتراحات بخصوص اى عربية تانية تكون اوتوماتيك وفوق سنه 2000 وبحاجه و40 الف غير الفيرنا واللانوس اكون شاكر اكتر مع انى مقتنع بال 206 جداااااا

المبلغ دا صعب تجيب بيه حاجة كويسة,
يعني أكتر الاختيارات هتكون كوري,
ممكن لو تزود حاجة بسيطة عليه وتشوف الأوبل الأسترا أو الكورسا السيدان عربية حلوة برضه بس أهم حاجة الحالة وميكونش فيها مشاكل في الحرارة.

[Meshfaker]

شكرا يا Ahmed Amin على المعلومات
وان شاء الله مع الدعبسة الكويسه الواحد ممكن يلاقى 206 اوتوماتيك نضيفة زى ما هو عايز

واشكرك تانى للمساعدة

[Ahmed Amin]

الشكر لله,
وإن شاء الله تلاقي حاجة نضيفة بس هتتعب شوية علي ما تلاقي حاجة بنت ناس ومش متبهدلة,
وأبقي عرفنا عملت أيه ولاقيت أيه.

[Meshfaker]

الله يخليك يا باشا
وان شاء الله قبل ما انفذ فى اى حاجه هقولك