إلى كل حاجزي ال301 ربنا يستر

[abohend]

السلام عليكم و رحمة الله و بركاته
أنا مش عايز أخضكم بس للأسف هخضكم
كان في إتفاقية في 2010 بين مصر و و الإتحاد الأوروبي و تركيا على خفض الجمارك تدريجيا على السيارات الأوروبية المستوردة بنسبة 10% سنويا حتى يتم إلغائها تماما بحلول 2019
الموضوع باختصار إن الحكومة الله يعمر بيتها هتعطل إتفاقية تخفيض الجمارك على السيارات الأوروبي و التركي لمدة عام (بحجة تشجيع الصناعة المحلية....مش عارف قصدهم صناعة ايه بالضبط)

طب و إحنا مالنا يا عم.....إحنا مبنشتغلش فالإستيراد
المشكلة الكبرى إن الغلابة الحاجزين و لسه مستلموش و إستلامهم هيبقى فالسنة الجديدة فالغالب و الله أعلم هيطبق عليهم التعريفة الجمركية الجديدة (بدون تخفيض) و للأسف الشديد إن إستمارات الحجز اللي إحنا ماضيين عليها مع التوكيل بتقول (يتم تحديد السعر عند الإستلام)
و طبعا تأخير الإستلام عن وعود المندوبين مكانش بسبب المشتري لكن بسبب التوكيل (و طبعا مفيش تاريخ إستلام مكتوب في إستمارة الحجز .... لعيييبة)
من الآخر هنشربها إحنا و أي تغيير في التعريفة الجمركية هنلبسها إحنا


دي روابط الخبر

لمصلحة من: وقف خفض الجمارك علي السيارات الأوروبية ؟ - الأهرام اليومي

تعطيل إجراءات خفض الجمارك على السيارات الأوروبية والتركية لمدة عام | Egy Speed

عشان كده رأيي اللي يعرف يجيب العربية فوري من أي معرض يجيبها أحسن (لأن ممكن الأوفر برايس ده تدفعه فرق جمارك بين 2013 و 2014 و متستلمش فوري)

طبعا الموضوع كله نظرة شخصية مفيش أي حد من توكيل بيجو أو أي توكيلات أوروبية أخرى قال إن هيبقى في زيادة..لكن أنا شفت الخبر و حبيت أنقله للأعضاء

و عن نفسي هشوف العربية بره فالمعارض عاملة كام لو الفرق أقدر عليه هبيع عربيتي و أشتري ال301 فوري أحسن
تقبلوا تحياتي

[تامر.محمد]

الخلاصة زي ما هو واضح ان فيه وكيل من بتوع الكوري التقال (بدون اسماء غبور او منصور) شخلل للحكومة و الحكومة داست
و بالتالي الاوروبي كله هايولع من مجرد الاشاعة اصلا

زي الفل

[wel781]

متابع

[abohend]

الخلاصة زي ما هو واضح ان فيه وكيل من بتوع الكوري التقال (بدون اسماء غبور او منصور) شخلل للحكومة و الحكومة داست
و بالتالي الاوروبي كله هايولع من مجرد الاشاعة اصلا

زي الفل

المهم أنه من غير أسماء
الله ينور

[تامر.محمد]

متأكد بس من المعلومة دي ؟

اصلها غريبة اوي
ماظنش سهل ابدا ان البلد تعلق اتفاقية كده و خلاص !

[iUsef]

يا جماعة مش معني ان مفيش جمارك هتنزل يبقي الاسعار هتطلع المعني ان يبقي الحال كما هو عليه وعلي المتضرر ان لا يشتري باسعار مبالغ فيها بحجة التسليم الفوري وده لمصلحته
إلا اذا بعد الشر الدولار طلع في العالي ساعتها فعلا العربيات هتعلي وهاتيجو تضربوني عشان قلت بلاش اوڤر برايس

[Mzeid]

معنى انهم مش هيطبقوا التخفيض يبقى الأسعار ستظل على ما هي عليه الآن

[abohend]

متأكد بس من المعلومة دي ؟

اصلها غريبة اوي
ماظنش سهل ابدا ان البلد تعلق اتفاقية كده و خلاص !

العهدة على الأهرام و موقع egyspeed
الروابط في المشاركة الأولى

[Abu Malek]

تعليق الاتفاقية فى التخفيض بس يابو هند
المفروض كان من اول السنة هيحصل تخفيض 10% هيتاجل سنة واحدة بس
انما الاسعار الحالية تبقى على ماهى عليه
يعنى المفروض لو كانت الاتفاقية شغالة السنة الجديدة كان سعر البيجو هيرخص كمان
انما دلوقتى هيفضل زى ماهو مش هيغلى الا لو الدولار عملها تانى وزاد

[abohend]

لأ ممكن تزيد

معنى انهم مش هيطبقوا التخفيض يبقى الأسعار ستظل على ما هي عليه الآن

أنا شايف إنها هتزيد
و خد مثال على كده العربيات الكوري
سنة ورا سنة الأسعار بتنط لفوق (مثلا السيراتو أو الكارينز)
و لو التخفيض مطبقش على العربيات الأوروبي زي كل سنة أكيد أسعار الموديلات الجديدة على الأقل (إن مكانش كل العربيات المستوردة ف2014) هتزيد جامد جدا زيها زي الكوري في ظل الحالة الإقتصادية المتردية اللي بنعيشها و ضعف الجنيه أمام العملات الأجنبية
و ده االي الناس التقيلة زي غبور و منصور بيسعولوا عشان يعرفوا يتحكموا فالسوق من جديد و الناس ترجع تقبل على العربيات التقفيل المصري غصب عنها نظرا لإرتفاع أسعار جميع العربيات المستوردة
يا ريت ظني يطلع مش فمحله
لكن من خبرتي في مصرنا الحبيبة كل القرارات بتبقى لمصلحة التجار الكبار و على دماغ المستهلك

[abohend]

تعليق الاتفاقية فى التخفيض بس يابو هند
المفروض كان من اول السنة هيحصل تخفيض 10% هيتاجل سنة واحدة بس
انما الاسعار الحالية تبقى على ماهى عليه
يعنى المفروض لو كانت الاتفاقية شغالة السنة الجديدة كان سعر البيجو هيرخص كمان
انما دلوقتى هيفضل زى ماهو مش هيغلى الا لو الدولار عملها تانى وزاد

الإتفاقية من 2010 يا زعيم
عمرك لقيت عربية بترخص من 2010 ل2013؟؟؟؟
تخفيض الجمارك كان بيساعد يدوب إن العربية متزدش زيادة كبيرة و بكده تفضل في متناول المستهلك و عشان كده الكوري مقدرش يحقق المعادلة دي و أسعاره بدأت ترفع جامد لدرجة إن الكارينز و السيراتو بقت فسعر الأوكتافيا و الأسترا و الفلوانس رغم الفارق الجوهري في الجودة و الإمكانيات
الكارينز (169 إلى 209)!!
السيراتو (134-191)!!!
الأسترا (179-205)
الفلوانس (140-199)
أوكتافيا 223
و عربيات زي الفلوانس و البيجو 301 و 508 و الأوكتافيا رابيد بقت سعرها معقول و في متناول أيد ناس كتير (كل واحد في الفئة بتاعته طبعا)
و كان كلها كام سنة وثقافة السوق تبدأ تتغير و الرهبة من الأوروبي و أسعار قطع غياره تنتهي (خاصة مع الإنتشار)
لكن زي أبو جويرية مأشار (في ناس مصلحتها الموضوع ده ينتهي عشان ترجع تتحكم فالسوق تاني)
عموما كلها أيام و نشوف الأوضاع ايه مع التعريفة الجديدة سواء للحاجزين و هيستلموا ف2014 أو الموديلات الأوروبية اللي هتنزل ف2014
توقعي الشخصي صعب إن الموديلات دي تفضل بسعر منافس و هنلاقي زيادة 20 ألف على الأقل فعربية زي ال301 و أكتر من كده في الفئات الأعلى
ربنا يستر

[smsm2004w]

إن شاء الله مش هتغلى بس فى نفس الوقت مش هترخص احنا عندنا عصابة مش حكومة واعتقد ان العربيات هتغلى على اخر السنه الجديدة الا لو حدث تغيير فى سعر الدولار يبقى ممكن فى اى وقت لأن العصابه اللى مسكانا حتى لو هتخفض الجمارك هتقوم مزودة الضرائب وربنا معانا الواحد خلاص زهق من البلد دى

[hossam_elwani]

عظيمه يا مصر

قال صناعه محليه ههههههههه

[Eng_hatemfathy]

عربيات كتير لسه منزلش منها ال 2014 زى الشارك والكروز والاوبترا
اعتقد مستنيين يشوفوا السوق هيعمل ايه علشان محدش منهم يلبس

[Ahmed Amin]

أنا شايف إنها هتزيد
و خد مثال على كده العربيات الكوري
سنة ورا سنة الأسعار بتنط لفوق (مثلا السيراتو أو الكارينز)

العربيات اللي أنت محددها ما بين القوسين دا سعرها زاد من بلد المنشأ أصلاً,,
وأسعارها زادت حتي في أوروبا والخليج,, يعني مش مصر بس.!!
السيراتو والكارينز الجديدة سعرهم زاد كتير عن الشكل القديم عشان الأضافات اللي أتعملت ليهم.

و لو التخفيض مطبقش على العربيات الأوروبي زي كل سنة أكيد أسعار الموديلات الجديدة على الأقل هتزيد جامد جدا زيها زي الكوري في ظل الحالة الإقتصادية المتردية اللي بنعيشها و ضعف الجنيه أمام العملات الأجنبية

مفيش دليل علي الكلام دا,, وبلاش تسبق الأحداث وعمل قلق للناس.!!
واللي ربنا عايزة هيكون,,

البيجو 301 والاليزية نازلين للدول النامية بسعر أقتصادي من الأساس,,
مش زي الكوري اللي أسعارة رفعت من بلد المنشأ.
ومفيش نية لرفع أسعار البيجو والستروين,, لأن كدا كدا سعر الهاي لاين فيهم قريب من سعر البيز لاين في العربيات الأعلي منها 308 أو 208 مثلاً.

وأسعار الأوروبي هتفضل تقل كل سنة علي حسب الأتفاقية,, حتي لو أتخصم من سنة من الحسبة دي.
لكن العربيات الكوري والياباني مش هتقل طبعاً لأنها مش من ضمن أتفاقية الأوروبي, فبلاش تقارن بيها وبأسعارها الجديدة لأنها مش مقياس صح تقارن بيه.