نقصان مياه بيجو 406

[م أحمد]

العربية كل فترة بتطلع رسالة stop فى لوحة العدادات و الاقى مؤشر الحرارة الخاص بالمياه مش بيقرأ خالص (على الصفر) ، المهم ببطل العربية و انزل أزود العربية مياه و تمشى عادى و تروح المشكلة و يقرأ المؤشر من جديد

المياه المزودة ممكن تبقى نصف لتر و ساعات كوباية مياه

مش عارف المشكلة فين ، مع العلم انها مش بتسخن ، درجة الحرارة عادية عند التسعين

[abou-yahia]

الاغلب ترموستات الكوعه

روح لحد يكشف عليها وياخد هوه من الدوره عشان ال406 بيتاخد هواء من 3 اماكن مش من القربه فقط

[م أحمد]

يعنى لو دورة المياه فيها هوا ممكن يحدث هذا النقصان الدائم و على فترات متقاربة (كل اسبوع مثلا)؟

هل المقصود بالترموستات انه غير محكم الغلق فيسبب هذا النقصان ام التلف فيسبب قراءات خاطئة (مع العلم ان القراءات سليمة )

انا عارف الاماكن التى يؤخذ منها هوا ، واحد بجوار علبة زيت الفرامل و التانى فى السربنتينة و التالت بيحتاج مفتاح عشرة جنب بوابة الهوا

[abou-yahia]

حضرتك بتقول مؤشر الحراره مبيقراش

ده معناه ان الترموستات مش بيفتح خالص وده الاغلب

حضرتك لما بتفتح تزود بيكون فيه غليان

[abou-yahia]

يعنى لو دورة المياه فيها هوا ممكن يحدث هذا النقصان الدائم و على فترات متقاربة (كل اسبوع مثلا)؟

هل المقصود بالترموستات انه غير محكم الغلق فيسبب هذا النقصان ام التلف فيسبب قراءات خاطئة (مع العلم ان القراءات سليمة )

انا عارف الاماكن التى يؤخذ منها هوا ، واحد بجوار علبة زيت الفرامل و التانى فى السربنتينة و التالت بيحتاج مفتاح عشرة جنب بوابة الهوا

[م أحمد]

ممكن فعلا زى ما انت بتقول ترموستات الكوعة بيعلق ، لان دا تفسير رسالة stop و فى الآخر اللى بيتزود بيكون فى حجم فنجان مياه فقط !!!

انا حاولت احل الموضوع بوضع مياه خضراء ABRO على المياه و ملاحظة اى تسريب عن طريق ظهور اللون الاخضر على الوصلات من الخارج بس ما لا قتش حاجة و دا سبب استفسارى

[م أحمد]

طيب التموستات دا بيتعمل له صيانة معينة علشان التعليقة تروح و لا بيتغير ؟؟؟

[abou-yahia]

غير افضل

[Ahmed Amin]

العربية كل فترة بتطلع رسالة stop فى لوحة العدادات و الاقى مؤشر الحرارة الخاص بالمياه مش بيقرأ خالص (على الصفر) ، المهم ببطل العربية و انزل أزود العربية مياه و تمشى عادى و تروح المشكلة و يقرأ المؤشر من جديد

المياه المزودة ممكن تبقى نصف لتر و ساعات كوباية مياه

مش عارف المشكلة فين ، مع العلم انها مش بتسخن ، درجة الحرارة عادية عند التسعين

معني إن المية تقل وتزودها بالمعدل دا أنك عندك تسريب مياة أو تبخير,
العربية لو عمرها أكتر من 10 سنين ومغيرتش لسه خراطيم المياة الواصلة ما بين الرادياتير والموتور في الغالب هتلاقي فيه واحد فيهم بدأ يشقق وبيهرب مية من ناحية الكولية اللي رابطة,

والحاجة التانية إن غطاء القربة لو بايظ هيهرب ضغط الماء لأن دورة المياة مضغوطة عشان تحافظ علي درجة الحرارة,
وطالما أنت بتفتح وبتزود مياة بعد ما العربية ميتها بتقل يبقي أنت كدا الدورة مش مضغوطة ودا مش صح,,

أكشف علي غطاء القربة الأول وغيره لو مش بيربط بأحكام,
وكمان أكشف علي الخراطيم كويس, وبص عليها كويس لو فيه تشققات من برة أو من ناحية الأماكن الل فيها تربيط, وزودها دايماً بمية خضرا أو حمرا عشان تشوف التسريب بيجي منين,,

وأخر حاجة لو غيرت الغطاء والمشكلة لسه قايمة, هتروح لحد بتاع رادياتير يضغط لك الدورة ويشوف التسريب بيجي منين.

[م أحمد]

أنا ما كنتش قرأت رد الأستاذ الفاضل أحمد أمين فأخذت بنصيحة الأستاذ المحترم أبو يحيى و روحت فى اتجاه ترموستات الكوعة على طول

اشتريته من التوفيقية بالحاوية الفيبر ب 90 جنيه و فى ناس بتبيعه منفصل ب 75 جنيه
جبت بيبة طويلة مقاس 10 على مقاس مسمارى التثبيت و علشان تطول المسار السفلى الرخم (الترموستات عندى فى وش الموتور)

حاولت افضى الراديراتير بس فشلت فى معرفة مكان الطبة اسفله ، حطيت حتة قماش قطن كبيرة و جرايد لتصرف و شفط المياه بعيدا عن اى وصلات

و انا بفك لقيت آثار سلكون ....أهلااااااااااااااااااااا........يبقى الزبون مفكوك قبل كدة

بعد ما فكيت كانت المفاجأة فى الترموستات القديم ....انه مش موجود اساسا هههههههههه

بصراحة لما شفت الصدأ و حاولت الاقى مبرر لكتم دورة المياه شكيت انه يكون داب و دخل الخراطيم هههههههه او حتى داخل الموتور ، جسيت الخراطيم لقيتها سالكة الحمد لله

المهم شكيت فى طرمبة المياه فقفلت على الوضع القديم بدون ترموستات حتى لا يزيد الطين بلة و قلت اشوف طرمبة المياه

لقيت تحتها سلك لويته يمين و شمال و انا مش فاهم دا بتاع ايه

دورت العربية و استنيت بتاع 3 او 4 دقايق بعدها لقيت خراطيم الدخول و الخروج من الراديوتر دافيين قلت الحمد لله
بعد ما استبعدت موضوع التسريب لانى قلت انا حاطط مياه خضرا تظهر آثار التسريب ، و استبعدت الترموستات اللى مش موجود من اساساه و استبعد طلمبة المياه نقلت لاتجاه تانى خالص كان واحد زميلى فى الشغل معاه عربية بورا و كان فيها نفس الإعراض حرفيا (ارتفاع الحرارة مع عدم نقصان المياه بصورة كبيرة - نقصان المياه بصورة دورية مع مشى العربية - ضعف السحب و زيادة استهلاك البنزين)

"الشوكومان"

و بالتحديد عند خرج الفرن او المانيفولد الخارج من الموتور مباشرة

حطيت ايدى ورا الموتور لقيت صهد غريب طالع و"" جنبه ب 30سم وصلات المياه اللى بيتاخد منها الهوا""، بالاضافة لصوت المحرك العالى ، بالاضافى الى انك ممكن تلاقى شاشة الكمبيوتر سخنة او دافية و انت قاعد جوة حتى فى الجو البرد

فغالبا و ربنا يسترها ان شاء الله هتكون هى دى سبب المشكلة

زميلى بتاع البورا غير الفلانشة اللى طالعة من الفرن ، و السخونة عنده كمان غيرت لون الكبوت بدرجة بسيطة ، و بعد ما غيرها العملية ظبطت

[م أحمد]

رحت لميكانيكى عمل زى ما الاستاذ احمد امين قال ؟ كبس هواء فى دورة المياه و الضغط كان بيقل مع مرور الوقت هذا بالاضافة للفحص النظرى الذى اوضح حوالى 4 خروم اقل من ثقب الابرة يحيط بهم الصدأ

الحل كان فى رايراتير جديد

[abou-yahia]

رحت لميكانيكى عمل زى ما الاستاذ احمد امين قال ؟ كبس هواء فى دورة المياه و الضغط كان بيقل مع مرور الوقت هذا بالاضافة للفحص النظرى الذى اوضح حوالى 4 خروم اقل من ثقب الابرة يحيط بهم الصدأ

الحل كان فى رايراتير جديد

الحمدلله ان السبب اتعرف واتصلح

[م أحمد]

الحمدلله ان السبب اتعرف واتصلح

غيرته عند ميكانيكى فى الزاوية كان شغال فى توكيل بيجو اسمه محمد زكى رقمه موجود فى مراكز خدمة بيجو اللى فى المنتدى
فك و تركيب راديراتير
فك و تركيب جلبة قاعدة الفتيس
فك البوابة و تنظيفها
اجمالى 120 جنيه

[Ahmed Amin]

ألف مبروك علي معرفة سبب العيب وأصلاحه,
والتكلفة معقولة جداً علي الشغل دا, وإن شاء الله ميكونش فيه مشاكل في الحرارة تاني.