هل حد اشترى جهاز من بره مصر وشحنه او جابه معاه ؟؟

[الجنرال]

السلام عليكم ورحمة الله

كنت بسأل هل في حد عنده تجربه شراء اجهزة من بره مصر وشحنها الى مصر


او مثلا اشتراه وجابه معاه من بره مصر؟؟

سبب السؤال ان انا هشتري ان شاء الله الجهاز الدي في دي بتاع البيجو ده من تركيا .. المشكلة ان الجهاز وزنه 4.5 كيلو .. وابعاده

34X27X28 cm

وفي واحد هيجيبه معاه من بره وهو جاي

السؤال المهم بالنسبة لي .. هل دخول الجهاز ده في مشكلة فى الجمارك؟؟ خاصة انه هيبقى للاستعمال الشخصي وهخلي اللى يجيبهولي معاه من بره يفتحه كأنه استخدمه فعلا

هل يقدر يطلعه معاه الطيارة؟؟ وميحطهوش مع الشنط (علشان ميتكسرش)

وايه افضل حل علشان نحل مشكلة كبر حجم الجهاز والعلبة بتاعته

وشكرا

[AhmedJumaa]

وعليكم السلام ورحمة الله وبركاته

أهلا بك

بشكل عام عملية شراء شئ من الخارج لايوجد بها اي مشكله او حتي جمارك أو غيرها لانها للاستخدام الشخصي حتي وأن كانت داخل الكرتون الخاص بالجهاز

علماً بأن لكل شخص له جهازين والثالث يعتبر تجارة أي اذا كان عدد الاجهزه 3 اجهزه سيتم محاسبته من قبل الجمارك حسب القيمة 10% تقريباً

أذا كان جهاز أو اثنين ليس هناك مشكله ويمكنه شحنه داخل الطايرة دون مشكله إن شاء الله

وفقك الله .

[lola_pepito]

وعليكم السلام ورحمة الله وبركاته

يفضل إنه يفتح العلبة و إذا أمكن يحطوا في أي علبة تانية غير علبته عشان يبان إستخدام شخصي، و يحطوا في شنطه من الشنط (في وسط الملابس عشان ميتكسرش).
على حسب المطار و شركة الطيران، بس الأغلب مش هيوافق بدخول جهاز زي ده في الطيارة.

لما تركبه إن شاء الله، ابقى قلنا ركبته فين إذا سمحت. شكراً

[lola_pepito]

وعليكم السلام ورحمة الله وبركاته


بشكل عام عملية شراء شئ من الخارج لايوجد بها اي مشكله او حتي جمارك أو غيرها لانها للاستخدام الشخصي حتي وأن كانت داخل الكرتون الخاص بالجهاز

علماً بأن لكل شخص له جهازين والثالث يعتبر تجارة أي اذا كان عدد الاجهزه 3 اجهزه سيتم محاسبته من قبل الجمارك حسب القيمة 10% تقريباً

ده صحيح بس مسؤلين الجمارك عندنا ما بيصدقوا يشوفوا علبة عشان الغلاسة تشتغل، عن نفسي بتفادى صدعهم و بحط الأجهزة في شنط السفر.

[الجنرال]

طيب خير .. يعني انا المهم بالنسبة لي الجمارك ودخوله من المطار .. هو حد هيجيبه معاه بس لسه مش عارف ازاي هيشيله .. هل هيدخل الكرتونة كلها ولا هيحطها فى وسط الهدوم .. ربنا يستر وميتكسرش

ياريت لو حد دخل فى التجربة دي فعلا يقولنا ايه الاخبار وعمل ايه

وبرضه لو حد شحنه تبع شركة شحن يقولنا عمل ايه

وشكرا

[الجنرال]

مفيش حد خالص :(

طيب اقتراحات حتى نعمل ايه علشان نجيبه وندخله مصر من غير مشاكل

وشكرا

[Karim_Monir]

مينفعش يطلع الطيارة لكن ينفع يدخل في الشنطة عادي وسط الهدوم
والمشكلة الاساسيه لو شافو كلمة gps
هايتجز للفحص والعرض علي الجهاز القومي لتنظيم الاتصالت وتاخدلك لفة حلوة للقرية الذكية للمطار للمحجوزات :-)

[الجنرال]

اممممم

طيب هل عندك اقتراح كويس استاذ كريم؟؟ وهل ارامكس مثلا تقدر تخرجه من الجمارك من غير مشاكل؟