صيانه 20.000 بيجو 301

[Mohamed GEMY]

انا حابب انقل تفاصيل تجربتي في صيانه 20.000 كيلو متر لي بيجو 301 في فرع ابو رواش
اولا انا اتصلت بخدمه العملاء قبلها بي 48 ساعه وحجزت مياعد للصيانه
كنت داخل التوكيل قبل الساعه 9 صباحا وخرجت الساعه 2 ظهرا (وقت طويل جدا طبعا)
الصيانه اتكلفت بالضبط 1836.50 جنيه (مبلغ كبير جدا بصراحه)
وكانت بنتود الصيانه كالتالي
- تغير زيت موبيل 1 (272.80 جنيه)
- سبراي تنظيف محرك (21.20 جنيه)
-فلتر زيت (49.30 جنيه)
- فلتر هواء (57 جنيه)
- فلتر بنزين ( 45.80 جنيه)
- بوجيهات (134.40 جنيه )
-فلتر تكييف ( 152 جنيه)
- تيل امامي ( 424 جنيه)
- مصنعيه ( 513 جنيه)
-ضريبه مبيعات ( 167 جنيه)
- المجموع = 1836.50
بصراحه تكلفه الصيانه عاليه جدا اولا سعر قطع الغيار عالي اصلا
ثانيا هو واخد بس مصنعيه وضريبه 680جنيه لك ان تتخيل 680 جنيه كده في الهواء مع اني لو عملت الصيانه دي بره او في اي مركز معتمد مش هدفع منهم غير بالميت 200 جنيه

انا شايف بصراحه ان التوكيل بدا يستعبط وبدا يستغل البيجو 301 في انه يلم فلوس
- انا شايف ان لازم يكون لينا وقفه مع التوكيل لاننا بالشكل ده هندفع كتير في الصيانات القادمه لاني كمان الي سمعته ان صيانه 10.000 غليت لانه ضاف ليها ماء خضراء وفلتر تكيف وده طبعا بيبقي اجباري (عاوز يبيع بقه)
-الشبكه الاماميه بتتثبت بمبلغ حاولي 150 .ليه مش عارف هو ده مش عيب صناعه المفروض هو يتحمله

حلاصه الكلام انا بنسبه كبيره هكلم جهاز حمايه المستهلك علي موضوع الشبكه ان ده عيب صناعه هو ملزم انه يحله ..وهبعت شكوي كمان بالاسعار المبالغ فيها دي لصيانه

[amr011111]

هى المصنعيه غاليه جداً
لو مركز الصيانه المعتمد ارخص
يبقى روح مره المركز ومره التوكيل

[simon659]

لازم نكلم حمايه المستهلك الصيانات دي انا اعملها بأيدي 600 جنيه ليه

[mac os]

البوججيهات بتتغير على 20000 ليه ؟ المفروض لسه بدرى عليها

[د.عماد صلاح]

غالي جدا طبعا

[dryousef]

نفس الاستهبال حصل معايا فى صيانة ال10 الاف
الزيت جبته توتال من بره وعملنا دوشه .وقاللى هانغير فلتر هواء قلتلو ليه على 10 الاف قالى هانشوف لو ينفع يتنظف هانظفه وغيروووه.ودفعت 450 مع ان الزيت مش داخل فى الحساب.
لو كده انا هاروح اى مركز.كالما اننا مش بنستفاد منهم بحاحه.عرفونى ايه اللى ممكن استفاد بيه منهم. قلتلهم الموتور بيسقف قاللى نغير بوحيهات .اللى فى الكورى بتتغير على 30 الف.حسبى الله ونعم الوكيل
عرفونا مركز يكون اسعاره كويسه وميغيرش على الفاضى ويكون معتمد

[abohend]

؟؟؟؟؟؟؟؟

الأرقام مبالغ فيها

و ليه بوجيهات على 20 ألف

لو فعلا محتاجين تغيير يبقى السيارة غير إعتمادية...و لو مش محتاجين يبقى التوكيل حرامية

البوجيهات النحاس المفترض تقعد من 16 ألف ل32 ألف

و البلاتينيوم ممكن تقعد لحد 96 ألف

اللي راكب في ال301 نوعه ايه مش عارف؟؟

هشوف على السيرفيس بوكس و اقولكم

[tameem2010]

تيل وبوجيهات وفلتر بنزين في 20 الف كم !!! ليييييييه ياعم انت راكب صيني ؟

[Mohamed GEMY]

انا شايف بصراحه اننا كلنا نبعت شكوي لجهاز حمايه المستهلك كل واحد باسمه ورقم بطاقيته ورفم سيارته بحيث ان الشكوي لما تبقي من عدد كبير هيتنظر فيها ده اكيد وانا واثق ان ده هيجيب نتيجه ان شاء الله

[Hema_Basha]

نفس اللي حصل معايا في غمرة بس اختلاف المصنعية ودفعت 1680

[maio_do]

علشان ارد عايز اعرف اسعار التوكيل فى الكيا والهيواندى

واية موضوع الشبكةا لامامية تقصد اللى فوق عند النمر ولا اللى تحت عند الفوج

[amrelsaqqa]

ايه مياه خضراء عند 10 الاف
هى اه العربية فيها مية غريبة جدا ! بس انا ذنبى ايه ادفع سعر المية بعد 10 الاف كيلو !

[Hany Saad]

طبعاً المصنعيات غالية جداً و فيه قطع ممكن تتنظف مش تتغير زى فلتر الهواء
معنديش خبرة فى العربيات الاسيوى و لكن كل الاوروبى بيغير نفس الأشياء دى فى صيانة ال 20 الف ما عدا طبعاً الميه الخضراء و دى بتتغير عند ال 60 الف او بعد 5 سنوات ايهما اقرب
فلتر الهوا المفروض يتنظف فقط و لكن بما ان العربيات فى الضمان فانت ملزم بجدول الصيانة بتاع الوكيل علشان تفضل العربية فى الضمان
البوجيهات للأسف لازم تتغير على ال 20 الف لانها راكبة على حاجة اسمها coil او ما يطلق عليها بوبينا فى السيارات القديمة و هى المسؤولة عن اعطاء الكهربا العالية للبوجيهات و لكن الفرق انه يوجد coil او بوبينا لكل بوجيه.....التأخير فى تغيير البوجيه عن 20 الف كيلو يزيد من فرصة بوظان ال coil علماً بان سعر ال coil الواحد حوالى 500 جنيه

طبعاً تيل الفرامل ده مش اجبارى يتغير فى ال 20 الف و لكن حسب استهلاكه بعد الكشف عليه التى تعتمد على طريقة السواقه

تحياتى

[mahmed0100]

طبعاً المصنعيات غالية جداً و فيه قطع ممكن تتنظف مش تتغير زى فلتر الهواء
معنديش خبرة فى العربيات الاسيوى و لكن كل الاوروبى بيغير نفس الأشياء دى فى صيانة ال 20 الف ما عدا طبعاً الميه الخضراء و دى بتتغير عند ال 60 الف او بعد 5 سنوات ايهما اقرب
فلتر الهوا المفروض يتنظف فقط و لكن بما ان العربيات فى الضمان فانت ملزم بجدول الصيانة بتاع الوكيل علشان تفضل العربية فى الضمان
البوجيهات للأسف لازم تتغير على ال 20 الف لانها راكبة على حاجة اسمها coil او ما يطلق عليها بوبينا فى السيارات القديمة و هى المسؤولة عن اعطاء الكهربا العالية للبوجيهات و لكن الفرق انه يوجد coil او بوبينا لكل بوجيه.....التأخير فى تغيير البوجيه عن 20 الف كيلو يزيد من فرصة بوظان ال coil علماً بان سعر ال coil الواحد حوالى 500 جنيه

طبعاً تيل الفرامل ده مش اجبارى يتغير فى ال 20 الف و لكن حسب استهلاكه بعد الكشف عليه التى تعتمد على طريقة السواقه

تحياتى

ده كلام منطقي

[J A G U A R]

شغل استغلال وعبط .. لازم تشوفو حل مع حمايه المستهلك