استقسار بخصوص 2008

[kirolloshossam]

مساء الخير على الاعضاء الكرام \
انا عندى استفسار بخصوص العربية 2008 الجديدة العربية عجبانى جدا شكلها الرائع بس انا مش عارف عنها اى حاجة ياريت لو حد جبها يقولى العربية عاملة اية معاة عشان العربية لسة جديدة انا مش عارف اية ظروف صيانتها ولا اى حاجة عنها عيوب او مميزات وشكرا للاطالة

[cadeau]

متابع متابع متابع

[Ashraf Fawzy]

سعر بيجو 2008:

البيزلاين: 168,500

الهاى لاين: 188,500


صور بيجو 2008 :












للمواصفات الفنية للبيجو 2008:






أبعاد البيجو 2008:






متفرقات:

- وفقاً لكلام التوكيل إن البيجو 2008 تقفيل فرنسا

- نمط السيارة كروس أوفر


نظراً إن العربية لسه نازله فالأراء الشخصية عن تجربه هاتكون قليله, ممكن تعمل بحث فى اليوتيوب عن مراجعات للعربية (علماً بإن بيكون فى بعض الإختلافات ما بين الموديل اللى بينزل فى كل دولة). ولما تشترى العربية إن شاء الله, ماتنساش تشاركنا برأيك وتجربتك للبيجو 2008 :)

[Sameh.Soliman]

زياده عن ما ذكره اخونا العزيز السيارة فى مصر نازله مفهاش GRIP Control ولا Park Assistant بحجه اننا فى مصر معندناش صحارى ولا ارض متعرجه ولا ثليج

[HeBaA]

طيب ال grip control و لو اني مش فاهمه ليه مش موجود قال عشان ماعنداش صقيع و لا ارض متعرجه ؟! هو احنا عندنا غيرها اصلا
طيب و البار ك اسيست ..ماعندناش باركينج و لا ايه ؟

عندي العربيه استلمت في اول دفعه بقالي اسبوعين دلوقتي ....عربيه جميله جدا مقارنه باني بسوق مرسيديس بتاعه ابويا و اخويا ..هي فعلا عربيه جميله و شكلها صغير مع انها مش صغيره قوي

[mostafa afifi]

طيب ال grip control و لو اني مش فاهمه ليه مش موجود قال عشان ماعنداش صقيع و لا ارض متعرجه ؟! هو احنا عندنا غيرها اصلا
طيب و البار ك اسيست ..ماعندناش باركينج و لا ايه ؟

عندي العربيه استلمت في اول دفعه بقالي اسبوعين دلوقتي ....عربيه جميله جدا مقارنه باني بسوق مرسيديس بتاعه ابويا و اخويا ..هي فعلا عربيه جميله و شكلها صغير مع انها مش صغيره قوي

و خبار سحب العربيه معاك ايه و الفتيس 4 سرعات ولا 6 و فيه النتشه ولا ناعم...هل فيها esp. و مرايات ضم كهربا و وحده رفع
و عملت ايه في مسند اليد

[Sameh.Soliman]

طبعا ان الحجه بتاعه ان الاونشنات ده متشاله ان سعرها حيزيد جدا لما تنزل فيها .. مش عارف يزيد ايه اكتر من كده ده سعرها ازيد من سعرها العالمى بكل الاوبشنات ب 50 الف تقريبا
لازم يكون حل فى موضوع الجمارك ده وجشع التوكيلات

[nav man]

العربية مش بتحس باي نتشة في الفتيس والمريات بتفتح وتقفل مع فتح وقفل السيارة غير انك ممكن تتحكم فية من جو السيارة.العربية 4 نقلات ودي الحاجة اللي بتنقصها.مريحة جدا و مش بتحس بصوت الموتور الا في الشد وبردوا صوتة واطي انا بدات اجري بيها بعد ال 1000 كم وصلت ل165 واللة الثبات ممتاز والدركسيون حجرة في ايدك.معلش انا كنت مش بعرف اعمل تقرير.العربية وسعها مقبول جدا انا طولي 182 ومرتاح واللي قاعد ورايا مرتاح ورجلة بعيدة عن الكرسي بتاعي.قطع الغيار معرفش عنها اي حاجة لما اروح الصيانة بتاعت 3000 هسال وانا شايف ان الموتور وقطع الغيار زي ال 208 الاختلاف في الوسع والعلو.اة العلو مافيش اي مطب في اسكندرية حسيت بية ودة علشان علوها.ومشيت بيها في ارض مكسرة وفية رملة وكانت زي الفل الحمد للة.معلش اسالوني وانا اجاوب وان شاء اللة هعملها تقرير.

[nav man]

واللة انا محستش باي فرق بينها وبين ال بي ام x1.والتانية مع صاحبي وكانو زي بعض.

[nav man]

اة الصور اللي موجودة دي تمام بس العدادات مافيهاش الفريم الازرق اللي بينور .انا معايا الهاي لاين واحلي حاجة السقف البانوراما والجناب بتطلع نور ازرق من الجناب والتكيف عكدي ديوال زون.اعزروني علي الاخطاء الاملائية.واللة مش هندم علي اني جبت بيجو بس ربنا يستر من التوكيل.ان شاء اللة 2008 صفقة رابحة.

[nav man]

معلش كل ما بفتكر حاجة بقولها مافيهاش سي دي علشان الشاشة ومافيش ولاعة سجائر ولاطفاية.بيئة نظيفة ان شاء اللة هتخلي اللي بيدخن مش هيدخن تاني.ا

[nav man]

في في الفتيس زرىر مكتوب علية s ودية للقيادة الرياضية وزرار تحتية شكل علامة التكيف ودي للقيادة علي التلج او المطر.والدركسيون بتتحكم فية زي ما نت عاوز فوق وتحت وقدام ووراء واهم حاجة انة صغير عامل زي لعبة السيارت وشبة اللي موجود في الجوك.بكرر تاني العربية عالية اوي عن اي مطبات الناس ولاد الحلال عملنها.اي سوال انا موجود وتحت امركم.

[HeBaA]

و خبار سحب العربيه معاك ايه و الفتيس 4 سرعات ولا 6 و فيه النتشه ولا ناعم...هل فيها esp. و مرايات ضم كهربا و وحده رفع
و عملت ايه في مسند اليد

لا ما فيش نتشه ..عيب الفتيس الوحيد انه 4 سرعات بس ..و صوت الموتور بيبقى ملحوظ على السرعات العاليه ..طبعا فيها esp و كل الحاجات بتاعتها asr و ebd و abs

انا عندي الهاي لاين فتحه البانوراما ممتازه بس هي الزرار بتاعها مش وان تاتش زي الزجاج
غير كده في وحده رفع بس لازم تدوس مرتين على القفل بتاع الريموت ..العربيه ثابته على الملفات و مريحه انا بنت بس طويله شويه 174 و اخويا 184 و بيسوقها برضه مرتاح ..
المسند مش موجود في بس وحده تخزين بس بقفلها و بسند عادي
كنت بحس انه الدريكسيون خفيف قوي بس تاني انا بقارنها بمرسيدس..دلوقتي اتعودت عليه و حاسه انه بقى كويس
انا بفكر اعملها تقييم بس انا على قدي قوي في المعلومات الفنيه بتاعه العربيه

تحياتي و يارب اكون عرفت افيدك

[HeBaA]

معلش كل ما بفتكر حاجة بقولها مافيهاش سي دي علشان الشاشة ومافيش ولاعة سجائر ولاطفاية.بيئة نظيفة ان شاء الله هتخلي اللي بيدخن مش هيدخن تاني.ا

ههههه ضحكتني و الله قالولي كده برضه و انا بستلمها ..انا عندي الهاي لاين ابيض لؤلؤي ..
بس برضه في المرور خلوني اجيب طفايه ..في ولاعه ورا و قدام ..هما فتحه كهربا ..
كمان الشاشه اللمس كويسه و ينفع تستخدمها لو لابس جوانتي بس محتاج تدوس جامد شويه مش زي الموبايلات ...
اضافه كمان الشاشه متوافقه تماما مع الاي فون ..و لما بتوصله بيقلب IPOD
عشان يشغل الاغاني

مافيش SATNAV بس لو وصلت موبايلك و شغلت جوجل مابس Google Maps
هايطلع الصوت من الساماعات حتى لو مش اغاني ..و دي ميزه كانت بتجنني في المرسيدس ..

[HeBaA]

في في الفتيس زرىر مكتوب علية s ودية للقيادة الرياضية وزرار تحتية شكل علامة التكيف ودي للقيادة علي التلج او المطر.والدركسيون بتتحكم فية زي ما نت عاوز فوق وتحت وقدام ووراء واهم حاجة انة صغير عامل زي لعبة السيارت وشبة اللي موجود في الجوك.بكرر تاني العربية عالية اوي عن اي مطبات الناس ولاد الحلال عملنها.اي سوال انا موجود وتحت امركم.

نسيت خالص ابارك لك معلش ..ربنا يبارك لك فيها و يديك خيرها و يكفيك شرها ..
عايزه اسالك بقى هي اخبارها ايه معاك في البنزين ؟ انا لسه ما رحتش اسال على الصاينه و لا الكلام ده ربنا يسهل و تكون الدنيا ظريفه غالبا هاوديها ابورواش لاني سمعت انهم احسن ..
و سوؤال حشور شويه كملت اول 1000 و لا لسه :)