التوكيل و أخر ما تم (مهم جدا)

[wel781]

مبروك على حل مشكلتك و انا فعلا العربية معايا بتسقف حاجة محرجة اوووى

الله يبارك فيك، لازم تروح تكشف وتبقى مجرب كل حاجه علشان مايسفركش
أنا عايز أقولك وصلت إنى حطيت من 3 بنزينات مختلفة وحطيت 95 شفت قلبى الجامد :d

مش عايز اقولك يا ويل انا انبسطت قد ايه لما قريت الخبر ده اولا لان مشكلة التسقيف اتحلت ثانيا لان تحركنا الجماعي ابتدى يجيب نتيجة و دايما يارب كده متجمعين لغاية ما ناخد حقنا من التوكيل ده

الله يخليك يا فادى فعلا تحركنا الجماعى عمل شغل
و أبو هند واشرف الصراحه علموا شغل حلو.

تصرفك ممتاز ييا wel وأنت بالتوكيل,
والمكالمة فيها بداية مبشرة إن شاء الله لكل الملاك.

أحمد باشا نورت الموضوع والله.
أصل انا استويت الصراحة من عك التوكيلات من ساعة اللى حصل معايا فى eit اللى الناس بتتحاكى بيها

ربنا يسهل ويصدقوا فى كل اللى قالوه إن شاء الله وعموما طول ما احنا مع بعض مافيش حاجة هاتوقفنا

[wel781]

شفتوا إزاي الشكوى طلعت كيدية
الحمد لله اﻷيام أثبتت غننا كنا صح

شكرا للعضو أشرف فوزي اللي أقترح موضوع الشكوى

الحمدلله يا ابو هند ربنا كرمنا

وبعدين كيدية ايه وبتاع ايه ،كل ده علشان المصلحة العامة حتى اللى ماشتركش معانا هايستفيد من اللى حصل

الفائدة هاتعم على الجميع حتى أصحاب موديلات التانية من بيجو. ده كمان ممكن عملاء ماركات تانية غير بيجو يستفيدوا من التجربة ديه

[ahmedz310]

بالتوفيق ياجماعة (لايضيع حق وراءه مطالب)

[maxx]

عاش رجالة البيجو عاش :)

[mdhalpha]

ربنا يباركلك فيها

صباح الخير

من غير مقدمات أنا رحت التوكيل غمرة زى ما كانوا حددولى لما عملت الشكوى بالتليفون.

قابلنى مهندس وابتدى يسمع منى و بعدين يرغى كتير و يشرحلى ليه العربية بتسقف بسبب رداءة البنزين، وان مفيش مشكلة ومن الاخر يعنى أتفضل خد العربية وروح أحسنلك

فى نهاية الكلام قلتله ليا زميلى معاه 301 و بيمون من نفس البنزينة و عربيته مابتسقف. وأصريت العربية تدخل يكشفوا عليها و على الفلتر و الوجيهات.

انا كنت شايف فيها العربية حوه الصيانه كانوا عمالين يرفعوها من ناحية واحدة مش عارف ليه، ودخان أبيض كثيف عمال يطلع من الشكمان

وبعد عدة ساعات من الانتظار قالى خلاص خلصنا... طيب يا سيدى عملت أيه فى العربية ؟؟

قالى عملنا إعادة تظبيط للبوابة، الصراحة انا معرفش ايه ديه فا سكت.

فى الاخر قالى الحساب 165 جنيه. قلتله ليه هما غيروا ايه فى العربية ؟ وبعدين انا مش هادفع حاجه وكنت فعلا بتكلم بجد.

قالى طيب ثانية واحد... ودخل جوه كده بتاع 10 دقائق ورجعلى قالى خلاص الضمان هو اللى هايشيلهم، هما شكلهم كده مصنعيه.

خدوا بالكم وأنتوا بستلموا العربية علشان انا لقيت الشبكة مفكوكة وزعقت جامد واخدوا العربية تانى ثبتوها.

والحمدلله العربية كويسة لغاية دلوقتى


المهم إمبارح بقى التوكيل كلمنى.

قالى يا فندم أحنا بنكلمك بخصوص الشكوى اللى انت عاملها من خلال نايل موتورز (انا إنشحكت اوى)

قالى بالنسبة للمعاملة السيئة اللى حصلت معاك فى توكيل أبو رواش،

انا بالنيابة عن شركة بيجو بتأسفلك وتم إتخاذ اللازم مع الموظف اللى استقبل سيارتك.

قلتلة ماشى ها اللى بعده ؟؟ قالى حضرتك وبالنسبة لفلتر البنزين هما قاموا بتغييره لحضرتك فى الضمان.

قلتله ياعنى هو أتغير فعلا مش نصبوا عليا قالى ايوه يا فندم غيروه لحضرتك فى صيانة الـ 2500 ، قلتله خلاص مش هاكدبكوا كلكوا.

قالى بالنسبة لخرطوم التبريد وقام حكالى ايه اللى بيحصل عند الترخيص اللى بيسبب إن المشكلة ديه تحصل قلتله انا عارف.

قام قايلى إن شاء الله العربيات الجديدة هاينزل فيها ستيكر محطوط على الخرطوم بيوضح إزاى يتم التعامل مع الخرطوم من فك وتركيب وكده.

قلتله طب والعربيات القديمة لما نروح التوكيل هاتلزقلهم الستيكر، قالى أيوه يا فندم إن شاء الله.

قالى فى الاخر بالنسبه للتيل لو باظ قبل الـ 10000 هايتغير فى الضمان إنما لو لسه قدامه 4 أو 5 الاف كيلو بيقولوا للعميل هايغيروه علشان ما يضطرش يرجع تانى الصيانه فى ال 15 الف أو أقل.

ملاحظات عامة:
كان مهذب جدا .. كان دائما حريص أنه مايعديش للنقطة اللى بعدها إلا لما يخلص النقطة اللى بيتكلم فيها من غير كروته. .. وبتأكد أنى راضى عن الكلام ومعنديش ملاحظات.


أعتقد إحنا محتاجبين نتابع الوضع فى الفترة القادمة يا ريت أى حد يعمل صيانة ويحصل معاه حاجه نعرف بعض علشان تعاونا هو اللى خلا التوكيل يهتم بينا.

أسف على الاطالة

[eleanor]

كلام جميل وان شاء الله يفضلو كده على طول
يبقى لازم الكل يحط استيكر نايل موتورز على العربيه لما يروح التوكيل علشان نعملهم رعب ويبقى فى احترام لينا

[abohend]

للقاهرة

كلام جميل وان شاء الله يفضلو كده على طول
يبقى لازم الكل يحط استيكر نايل موتورز على العربيه لما يروح التوكيل علشان نعملهم رعب ويبقى فى احترام لينا

فكرة كويسة جدا
بس أظن فعالة أكتر في القاهرة
موضوع اﻷستيكر مش منتشر في المحافظات

[eleanor]

كده كده التوكيل فى القاهرة ممكن ننسق مع اداره المنتدى ونشوف الاستيكر فين ونجيبه