البيجو الايرانى

[gamil55]

ممكن حد امين جدا ممن اشتروا ال405 الايرانى يدينا النصيحة الصادقة وهى الاجابة على السؤال الاتى اللى عندة 405 وجية اباظة 97 يغير للزيرو الايرانى ولا القديم احسن بارك اللة فيكم :?: :?: :?: 8) 8) 8)

[Abdallah]

اخيرا اقتنعت

waleedabbas2000@hotmail.com 02/04/2007 04:35:11 م

عدد القراء : 254




اخيرا قررت انى مش هشيل علامة ايران خودرو ولا علامة roa اللى على البيجو ال405 الايرانى وكنت اول ماشتريتها ناوى اشيل العلامتين دول عشان احط مكانهم 405 لكن اكتشفت الحمد لله ان العلامة الايرانى مش حاجة تكسف لا بالعكس انا كل يوم بفضل الله بيزداد حبى للعربية سامحونى يا جماعة يمكن يبان من كلامى دلوقتى انى متحيز للعربية عشان اشتريتها لكن والله العربية لغاية النهاردة زى الفل معايا وانا واقفلها على الوحدة عشان اكتشف العيوب اللى فيها لكن الحمد لله لغاية دلوقتى مفيش غير العيب اللى قلت علية وهوان الفتيس تقيل شوية مع انه بدا يخف او انا اللى اتعودت عليه وجايز انا كنت حاسس انه تقيل عشان كنت راكب اتوماتيك قبل دى على طول او جايز فعلا ال405 الفرنساوى اللى كانت عندى فتيسها اخف شوية.
وعلى فكرة ال 405 عموما مشهورة ان الدبرياج بتاعها تقيل شوية وكمان الباور برضه سواء الفرنساوى او المصرى دى ماشاء الله الباور بتاعها احسن وكمان الدبرياج سلس ومريح.
العربية يا جماعة ناعمة وسحبها حلو والتجميع سريع فعلا وبتسد مع عربيات حلوة برضه بالرغم من انى كنت متصور انها عشان جر خلفى والهورس باور اقل من الفرنساوى ان التجميع هيكون بطئ .
اتزان العربية ماشاء الله على السرعات وفى الملفات حلو وحسيت بالامان فيها على فكرة انا كان معايا قبل العربية دى كابريس كلاسيك موديل 90 طبعا اتزانها غنى عن التعريف
لا طبعا عمر البيجو ماهتكون زى الكابريس بس انا كنت خايف انى بعد الكابريس مش هلاقى عربية استريحلها مع ان الكابريس بصراحة برقبة اى 405 او كتير من العربيات الحديثة.
عفشة العربية مريحة جدا وهايلة.
تابلوه العربية اشيك من القديمة طبعا عشان فيه الار بى ام والعدادات ديجيتال الساعة كمان ديجيتال .
يمكن كلامى ميرضيش السادة النقاد بس اعمل صدقونى اى عيب هقول عليه بامانة دى فعلا مسئولية لو حد اشترى العربية دى وطلع حاجه من اللى بقولها غلط.
اتمنى ان يظهر حد تانى من اللى اشتروا العربية يقولنا رايه او احد الاساتذة الافاضل الخبراء عشان فعلا نقدر نفيد الجميع.

======================

منقول

[hanyfarrag]

لو حطيت نفسى مكانك

أكيد حفضل أحتفظ بالفرنساوى
مع إحترامى الشديد للإنتاج الإيرانى - إنتاج كويس جدا
بس أكيد الجودة والتقفيل الفرنساوى حيكون أفضل من الإيرانى
طبعا الرأى الأول والأخير يرجعلك بعد إستشارة الأخوة مالكى بيجوالإيرانى

[waleedabbas]

اخيرا

شكرا جزيلا اخى الكريم هانى فراج وانا بقول اخيرا عشان بقى فى حد يرد علينا فى الاسئلة اللى بنسألها فى منتدى بيجو على فكرة انا وليد عباس اللى منقول عنى الرد على الاستاذ اللى بيسأل عن البيجو الايرانى بس معرفتش ادخل بالايميل بتاعى التانى مش عارف ليه؟
عموما بالنسبة للعربية الايرانى هى عربية جميلة زى ماقلت قبل كده والحمد لله لسه برضه معملتش حاجة وحشة معايا وسافرت بيها كانت ماشاء الله زى الفل واتزانها رائع .
انا مع الاستاذ هانى فراج فى الراى ان الفرنساوى طبعا تقفيلة احسن رغم ان ال 97 تقفيل الهييئة العربية للتصنيع مش فرنساوى وانا كان معايا 405 98 لو كانت لسه معايا لغاية دلوقتى بصراحة كنت هحتار برضة لكن انا بعتها قبل ماتنزل الايرانى اصلا .
اعتقد اللى هيحسم الرد على سؤال حضرتك هو حالة العربية اللى معاك لو حالتها حلوة ومش متهانة ومش كل يوم تفتح معاك فى صيانة يبقى احتفظ بيها ومفيش داعى تبيعها بخسارة وتزود 20 او 25 الف عليها وتشترى الايرانى لكن لو بدات تفتح معاك يبقى طبعا الزيرو مفيش احسن منه ولو هنقارن بين العربيتين كل واحدة ليها ميزاتها القديمة طبعا لان معظم مكوناتها فرنساوى والتقفيل احسن شوية اما الايرانى وان كان التقفيل مش بنفس الجودة وان كانت مش ملحوظ اوى غير للى يدقق لكنها تتميز انها جر خلفى (مع انى مكنتش بحب الجر الخلفى) وكمان انجكشن وده فرق كتير فى سحب العربية وتجميعها وكمان توفير البنزين (بتعمل حوالى 280 كيلو فى الصفيحة)
الصالون هو نفسه ونفس الكماليات بس التابلوة احسن من القديمة .
هرجع تانى واقولك حالة عربيتك برضه هى الفيصل لكن لو فعلا عايز تغير وتجدد ان شاء الله مش هتندم العربية محترمة وكويسة ولو عايز بقى تغير بجد وتحس انك غيرت استنى ال405 البارس ودى انا متوقع انها ان شاء الله هتكون عربية ناجحة جدا موتورها 1600 و100 هورس باور (اعلى من الفرنساوى) انجكشن 4 زجاج كهرباء مش 2 فرامل abs وايرباج جر امامى مش خلفى مع تعديل فى شكل العربية من الامام والخلف.
وبرضه استخير واسال الخبراء ومرة تانية بشكر الاستاذ هانى فراج على اهتمامه بمنتدى بيجو اخيرا بخد ما كان مهمل فى الموقع القديم.

[gamil55]

شكرا جزيلا ي اخوتى الافاضل وفعلا ها استنى البارس