اشترى عربيه بيجو

[khater]

السلام عليكم ورحمة الله وبركاته ..

أنا أخوكم / محمد - من المنصوره ..

أولاً : أحب أسجل إعجابى وإحترامى لهذا القسم الأكثر من رائع .

ثانيا : أرجو المساعده .. من إطلاعى على القسم ومواضيعه الرائعه والمفيده أحببت السياره بيجو جدا جدا جدا - وعاوز اشترى واحده مستعمله على قدى [ إمكانياتى من 20000 حتى 30000 ] ولا أكثر من ذلك جنيه واحد .

.. أطلب المساعده من الساده الاعضاء المحترمين .. ولكم جزيل الشكر

[HOSSAM99]

و عليكم السلام و رحمة الله و بركاته
أهلا بك أستاذ محمد
أنا أنصح حضرتك بالـ205 عربيه حلوه و تمشي شبابي و تمشي عائلي (4 أفراد)

[م أحمد]

يا راجل تبقى من المنصورة و جاى تسألنا عن البيجو ؟؟؟

دا انتم عندكم 504 بتعمل 50 الف جنيه و استيشن يتحول لصالون و انت واقف و العاب سحرية كتير

شوف سمكرى معرفة ويكون امين (لان بتوع المنصورة محترفين وممكن يتوهوك ) و دور على حتة504 خالية من البارومة خاصة عند الكارتيرة الامامية خلف العجل الامامى ، والمكان فوق المساعد الامامى ما يكونش مشرخ وفردتين الشاسيه (السلاحين ) ما فيهمش لحام واى حاجة بعد كدة مقدور عليها وممكن ترجع زيرو بما فيهم الموتور و ان كان بيتكلف فى العمرة ، عربية مفحوتة فى المواقف و ماسكة نفسها ، فحاول تشوف واحدة بيتى يبقى احسن و ان شاء الله لوحبيت تغير هيبقى الموضوع سهل جدا
و يا سلام لوgr مكيفة
كتير بيشكر فى موديل ال gl بتاع سنة79 باعتباره اقوى شاسيه

طبعا هتقولى ايه الفارق بين ال grو ال gl

ال gl: "جديدة لانج "
ال gr: "جديدة روخرى "



خلى بالك ال 305 لان الموتور بتاعها وشه للداخل و مقرفة جدا فى الصيانة مع الميكانيكية و دا سبب سقوط سعرها على الرغم من امكانيتها كسيارة

ومتهيألى برده ال 205 اللى اقترحها الاستاذ حسام موتورها مقلوب (البوجيهات ناحية الزجاج الامامى) و قطع غيارها غالية (نسبيا) و شحيحة (نسبيا) مقارنة بالموديلات الاخرى

[khater]

أشكركم جدا ايها الاخوه المحترمين على نصائحكم الغاليه -

بس بعد أزنكم طبعا ممكن حد يقولى 504 فبريكه جوه وحالتها كويسه تعمل كام بالتقريب .. صالون او استيشن

ولكم جزيل الشكر والتقدير